ཟླ་5ཚེས་23ཉིན་གྱི་ཕྱི་དྲོར། རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་ཝང་ཅུན་ཀྲེང་ལྷ་ས་གྲོང་ཁྱེར་སྟག་རྩེ་ཆུས་སུ་ཡོད་པའི་བོད་ལྗོངས་མཁའ་འགྲུལ་འཕྲལ་སྡོམ་རོགས་སྐྱོབ་རྟེན་གཞིར་ཕེབས་ནས། རང་ལྗོངས་ཀྱི་ཀུན་སྤྱོད་མཁའ་འགྲུལ་ཐོན་ལས་འཕེལ་རྒྱས་དང་ཕྱོགས་བསྡུས་འཕྲལ་སྡོམ་རོགས་སྐྱོབ་མ་ལག་འཛུགས་སྐྱོང་སོགས་ཀྱི་གནས་ཚུལ་སྐོར་ལ་བརྟག་ཞིབ་གནང་ཞིང་། འདི་ནི་བརྟག་ཞིབ་གནང་ཡུལ་ཡིན་པ།

གསར་དར་ཐོན་ལས་སྐྱེད་སྲིང་དང་དམའ་འཕུར་དཔལ་འབྱོར་འཕེལ་རྒྱས་ཧུར་ཐག་བཏང་ནས་བོད་ཀྱི་དཔལ་འབྱོར་སྤུས་ཚད་མཐོ་བའི་འཕེལ་རྒྱས་ལ་སྒུལ་ཤུགས་གསར་པ་སྣོན་དགོས།

ཚེས་23ཉིན་གྱི་ཕྱི་དྲོར། རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་ཝང་ཅུན་ཀྲེང་ལྷ་ས་གྲོང་ཁྱེར་སྟག་རྩེ་ཆུས་སུ་ཡོད་པའི་བོད་ལྗོངས་མཁའ་འགྲུལ་འཕྲལ་སྡོམ་རོགས་སྐྱོབ་རྟེན་གཞིར་ཕེབས་ནས། རང་ལྗོངས་ཀྱི་ཀུན་སྤྱོད་མཁའ་འགྲུལ་ཐོན་ལས་འཕེལ་རྒྱས་དང་ཕྱོགས་བསྡུས་འཕྲལ་སྡོམ་རོགས་སྐྱོབ་མ་ལག་འཛུགས་སྐྱོང་སོགས་ཀྱི་གནས་ཚུལ་སྐོར་ལ་བརྟག་ཞིབ་གནང་ཞིང་། ཁོང་གིས་ཐོན་སྐྱེད་ནུས་ཤུགས་གསར་མ་འཕེལ་རྒྱས་གཏོང་རྒྱུའི་སྐོར་གྱི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཛུབ་སྟོན་གལ་ཆེན་གྱི་དགོངས་དོན་ལག་བསྟར་དོན་འཁྱོལ་གཏིང་ཟབ་བྱས་ཏེ། འཕེལ་རྒྱས་ཀྱི་འདུ་ཤེས་གསར་པ་ཆ་ཚང་བ་དང་། གནད་ལ་འཁེལ་བ། ཕྱོགས་ཡོངས་བཅས་ཀྱི་སྒོ་ནས་ལག་བསྟར། བོད་ཀྱི་དོན་དངོས་དང་ཟུང་འབྲེལ་དམ་ཟབ། གསར་དར་ཐོན་ལས་སྐྱེད་སྲིང་། དམའ་འཕུར་དཔལ་འབྱོར་འཕེལ་རྒྱས་ཧུར་ཐག་གཏོང་བ་བཅས་བྱས་ནས་བོད་ཀྱི་དཔལ་འབྱོར་སྤུས་ཚད་མཐོ་བའི་འཕེལ་རྒྱས་ལ་སྒུལ་ཤུགས་གསར་པ་སྣོན་དགོས་པའི་ནན་བཤད་གནང་བ་རེད།

ཁྲེན་ཡུང་ཆི་དང་། རེན་ཝེ། ཤའོ་ཡིའུ་ཚའེ། ཟླ་བ་ཚེ་རིང་བཅས་ཞུགས་ཡོད་པ་རེད།

ཝང་ཅུན་ཀྲེང་གིས་འགྲེམས་པང་ལ་ནན་ཏན་ངང་གཟིགས་པ་དང་སྙན་སེང་ཞིབ་ཕྲ་གསན་པ་མ་ཟད། ས་གནས་ས་ཐོག་ཏུ་ཐད་འཕུར་གནམ་གྲུ་དང་མི་མེད་གནམ་གྲུའི་སྐབས་བསྟུན་འཕུར་ཚུལ་ལ་གཟིགས་པ་དང་། རང་ལྗོངས་ཀྱི་དམའ་འཕུར་དཔལ་འབྱོར་འཕེལ་རྒྱས་ལས་དོན་ལ་སྐུལ་འདེད་གཏོང་ཚུལ་མཁྱེན་རྟོགས་གཏིང་ཟབ་གནང་ཞིང་། ཁོང་གིས་དམའ་འཕུར་དཔལ་འབྱོར་ལ་ཞབས་ཞུའི་ཁྱབ་ཁོངས་རྒྱ་ཆེ་བ་དང་། ཐོན་ལས་འཁོར་འབྲེལ་རིང་བ། ལས་རྣམ་སྣ་མང་སོགས་ཀྱི་ཁྱད་ཆོས་ལྡན་པས། དེ་ནི་མདུན་ལམ་ཡངས་ཤིང་རྒྱ་ཆེ་བའི་འཐབ་ཇུས་རང་བཞིན་གྱི་གསར་དར་ཐོན་ལས་ཤིག་རེད།

གོ་སྐབས་དམ་འཛིན་དང་བབ་བསྟུན་འཕྲལ་སྒྲུབ་ཀྱིས་འཕེལ་རྒྱས་ཀྱི་ཁ་ཕྱོགས་གསལ་པོ་བཟོ་བ་དང་། ལས་ཀའི་གཙོ་གནད་ཁ་གསལ་བཟོ་བ། གསར་གཏོད་བྱེད་སྟངས་འཚོལ་ཞིབ་ཧུར་ཐག་བྱེད་པ། དམའ་འཕུར་དཔལ་འབྱོར་སོགས་འཕར་བའི་སྒུལ་ཤུགས་གསར་པ་གཏོད་པ་བཅས་བྱས་ནས་བོད་ཀྱི་དཔལ་འབྱོར་སྤུས་ཚད་མཐོ་བའི་འཕེལ་རྒྱས་ལ་ལེགས་སྐྱེས་ཧུར་ཐག་འབུལ་དགོས་ཞེས་གསུངས་པ་རེད།

ཝང་ཅུན་ཀྲེང་གིས་ནན་བཤད་གནང་དོན། རིམ་པ་ཁག་དང་འབྲེལ་ཡོད་སྡེ་ཚན་ཁག་གིས་ཆབ་སྲིད་ཀྱི་ཚུགས་གནས་མཐོ་རུ་གཏོང་དགོས་ཤིང་། གསར་དར་ཐོན་ལས་མགྱོགས་མྱུར་སྐྱེད་སྲིང་བྱེད་པའི་དོན་སྙིང་གལ་ཆེན་ལ་ངོས་འཛིན་གཏིང་ཟབ་བྱས་ཏེ། དམའ་འཕུར་དཔལ་འབྱོར་འཕེལ་རྒྱས་ཀྱི་ཆོས་ཉིད་ཚན་རིག་དང་མཐུན་པའི་སྒོ་ནས་ཁོང་དུ་ཆུད་པར་བྱེད་པ་དང་། ཡུལ་བབ་དང་བསྟུན་ཞིང་སྔོན་ལ་བཀོལ་སྤྱོད་མཐའ་འཁྱོངས་བྱེད་པ། དམའ་འཕུར་དཔལ་འབྱོར་སོགས་གསར་དར་ཐོན་ལས་ཧུར་ཐག་གཏོད་པ་བཅས་བྱས་ནས། གཞི་ཁྱོན་ཅན་དང་། དྲ་རྒྱ་ཅན། རིག་ནུས་ཅན། ཚད་ལྡན་ཅན་གྱི་ཆུ་ཚད་བཅས་རྒྱུན་ཆད་མེད་པར་མཐོ་རུ་གཏོང་དགོས།

འཆར་འགོད་ཀྱི་སྣེ་ཁྲིད་བྱེད་ཤུགས་ཆེ་རུ་གཏོང་དགོས་ཤིང་། ཚན་རིག་དང་མཐུན་པའི་རྣམ་འགྱུར་དང་དངོས་སྒྲུབ་ཀྱི་སྙིང་སྟོབས་མཐའ་འཁྱོངས་ཀྱིས་ས་གནས་ཁག་གི་རྨང་གཞིའི་ཆ་རྐྱེན་དང་ཐོན་ཁུངས་ཀྱི་རང་སྤུས་དང་ཟུང་འབྲེལ་བྱས་ནས། རང་ལྗོངས་ཀྱི་དམའ་འཕུར་དཔལ་འབྱོར་འཕེལ་རྒྱས་ལ་ཚན་རིག་དང་མཐུན་པའི་སྒོ་ནས་འཆར་འགོད་བྱེད་པ་དང་། མ་དངུལ་དང་། ལག་རྩལ། སྲིད་ཇུས། རྣམ་གྲངས་སོགས་ཕན་ཚུན་བསྡུ་སྒྲིལ་བྱེད་པ། འཆར་འགོད་ལ་བརྟེན་ནས་ཐོན་ལས་འཕེལ་རྒྱས་ལ་སྣེ་ཁྲིད་བཅས་བྱས་ཏེ་རང་སོ་སོའི་ཁྱད་ཆོས་ལྡན་པའི་དམའ་འཕུར་དཔལ་འབྱོར་འཕེལ་རྒྱས་གཏོང་དགོས།

བར་མཐོངས་ཀྱི་བཀོད་པ་ལེགས་སུ་གཏོང་དགོས་ཤིང་། ད་ལྟའི་དུས་རིམ་གྱི་དགོས་མཁོ་དངོས་དང་འཕེལ་རྒྱས་ཀྱི་དགོས་མཁོར་དམིགས་ཏེ། གནས་རྒྱུད་ཁྱོན་གསུམ་མཉམ་དུ་འཕེལ་རྒྱས་གཏོང་རྒྱུ་མཐའ་འཁྱོངས་བྱེད་པ་དང་། འབོར་སྤུས་ཕན་གསུམ་དཔུང་གཤིབ་མཉམ་སྐྱོད་བྱེད་པ། “མ་འཇོག་དང་། འཛུགས་སྐྲུན། འཁོར་རྒྱུག་བཅས”གཞི་གཅིག་ཅན་གྱི་རྣམ་པའི་ལེགས་ཆ་འདོན་སྤེལ་བྱེད་པ། འཕེལ་རྒྱས་ཀྱི་དམིགས་ཚད་ལུགས་མཐུན་ངང་གཏན་འཁེལ་བཅས་བྱས་ནས་བེད་སྤྱོད་ཀྱི་ཕན་འབྲས་ཆེ་རུ་ཏན་ཏིག་གཏོང་དགོས། མ་དངུལ་དང་། ས་ཆ། ཤེས་ལྡན་མི་སྣ་སོགས་རྒྱུ་རྐྱེན་གཙོ་བོའི་འགན་སྲུང་ལ་ཤུགས་སྣོན་རྒྱག་པ་དང་ལེ་ལག་ཚང་བའི་ཞབས་ཞུའི་སྒྲིག་བཀོད་འཛུགས་སྐྲུན་མགྱོགས་པོ་བྱས་ནས་དམའ་འཕུར་དཔལ་འབྱོར་འཕེལ་རྒྱས་གཏོང་ཆེད་འདེགས་སྐྱོར་ཤུགས་ཆེན་མཁོ་འདོན་བྱེད་དགོས།

ཐོན་ལས་འཁོར་འབྲེལ་ལ་ཤུགས་སྣོན་རྒྱག་དགོས་ཤིང་། དམའ་འཕུར་ཐོན་རྫས་དང་ཁྱབ་ཁོངས་དེ་བས་མང་བ་མཉམ་འདྲེས་གཏིང་ཟབ་ཡོང་བར་སྐུལ་འདེད་བཏང་ནས་གྲོང་ཁྱེར་གྱི་མཁའ་འགྲུལ་དང་། དམའ་འཕུར་ཟོག་འགྲུལ། མི་སྒེར་གྱི་འཛད་སྤྱོད་སོགས་ཁྱབ་ཁོངས་ཀྱི་བཀོལ་སྤྱོད་རྒྱ་སྐྱེད་གཏོང་དགོས། ཐོན་ལས་འཁོར་འབྲེལ་འཐུས་སྒོ་ཚང་དུ་བཏང་སྟེ་རིག་གནས་ཡུལ་སྐོར་ཐོན་ལས་དང་མཉམ་འདྲེས་གང་མགྱོགས་བྱེད་པ་དང་། དམའ་འཕུར་ལྟ་སྐོར་དང་འཕུར་སྐྱོད་ཉམས་ལེན་སོགས་སྣ་མང་ཅན་གྱི་དམའ་འཕུར་ཡུལ་སྐོར་ཐོན་ལས་གསར་སྤེལ་དང་ཁྱབ་གདལ་བཏང་ནས་ཡུལ་སྐོར་ཞབས་ཞུའི་ལས་རིགས་ཀྱི་ཕྱོགས་སྒྱུར་རིམ་སྤོར་ལ་སྐུལ་ཁྲིད་བྱེད་དགོས།

ཚན་རྩལ་གསར་གཏོད་བྱེད་ཤུགས་ཆེ་རུ་གཏོང་དགོས་ཤིང་། ཚན་རྩལ་གསར་གཏོད་དེ་དམའ་འཕུར་དཔལ་འབྱོར་འཕེལ་རྒྱས་ཀྱི་ལྷུ་ཚིགས་ཁག་དང་འཁོར་འབྲེལ་ཁག་ཏུ་ཁྱབ་པ་དང་། 5Gདང་། གཞི་གྲངས་ཆེན་པོ། དྲ་སྤྲིན་རྩིས་རྒྱག མི་ཐབས་རིག་ནུས་སོགས་ཁྱབ་ཁོངས་ཀྱི་ལག་རྩལ་ལེགས་ཆ་འདོན་སྤེལ་གང་ལེགས་བྱས་ཏེ་དམའ་འཕུར་བར་སྣང་ཁོངས་ཀྱི་དོ་དམ་དང་། འཕྲིན་གཏོང་། གཞི་གྲངས་དོ་དམ་དང་བེད་སྤྱོད་སོགས་ཁྱབ་ཁོངས་སུ་མཉམ་འདྲེས་བེད་སྤྱོད་གང་མགྱོགས་བྱེད་དགོས།

རོགས་སྐྱོབ་ནུས་པ་ཆེ་རུ་གཏོང་དགོས་ཤིང་། མཁའ་འགྲུལ་གྱི་འཕྲལ་སྡོམ་རོགས་སྐྱོབ་ནུས་པ་འཛུགས་སྐྱོང་ལ་ཤུགས་སྣོན་རྒྱག་པ་དང་། ཚན་རྩལ་གྱི་འདེགས་སྐྱོར་བྱེད་ཤུགས་ཆེ་རུ་གཏོང་བ། ཚན་རྩལ་ཐོན་ཁུངས་བཀོད་སྒྲིག་ལེགས་སུ་གཏོང་བ། ལྟ་ཞིབ་ཚད་ལེན་དང་སྔོན་ཚུད་ཉེན་བརྡ་དང་། བཀོད་འདོམས་བཀོད་གཏོང་། ཉེན་སེལ་གུད་སྐྱོབ་བཅས་ཀྱི་མ་ལག་འཛུགས་པ་དང་བེད་སྤྱོད་ཡག་པོ་བཅས་བྱས་ནས་མེ་ཟོན་གེགས་སེལ་དང་། འཕྲལ་སྡོམ་རོགས་སྐྱོབ། སྨན་བཅོས་སྲོག་སྐྱོབ། གནམ་བཤོས་ནགས་འདེབས་སོགས་ཐད་ཀྱི་ཀུན་སྤྱོད་མཁའ་འགྲུལ་གྱི་ནུས་པ་དེ་བས་ལེགས་པའི་སྒོ་ནས་འདོན་སྤེལ་བྱེད་དགོས།

ཝང་ཅུན་ཀྲེང་གིས་ནན་བཤད་གནང་དོན། རིམ་ཁག་ཏང་ཨུད་དང་སྲིད་གཞུང་གིས་ལས་ཀའི་འགན་འཁྲི་ནན་དུ་གཏོང་བ་དང་། དམའ་འཕུར་དཔལ་འབྱོར་འཕེལ་རྒྱས་ཁྲོད་ཀྱི་གནད་དོན་གལ་ཆེན་ལ་དུས་ཐོག་ཏུ་ཞིབ་འཇུག་དང་ཐག་གཅོད་བྱེད་པ། འཐབ་ཇུས་རང་བཞིན་གྱི་གསར་དར་ཐོན་ལས་སྐྱེད་སྲིང་ལ་སྐུལ་འདེད་གཏོང་བ་བཅས་བྱས་ནས་དེང་རབས་ཅན་གྱི་ཐོན་ལས་མ་ལག་འཛུགས་སྐྱོང་མགྱོགས་པོ་བྱེད་དགོས། ས་གནས་ཁག་དང་སྡེ་ཚན་ཁག་གིས་རང་འགན་རང་འཁུར་དང་རང་འགན་གཙང་སྒྲུབ་ཀྱིས་འབྲེལ་གཏུག་འབྲེལ་མཐུད་ལ་ཤུགས་སྣོན་རྒྱག་པ་དང་མཉམ་ལས་གཞོགས་འདེགས་ཟབ་ཏུ་བཏང་སྟེ། རྣམ་པ་ཕུན་སུམ་ཚོགས་པ་དང་། མཁོ་སྤྲོད་བློ་རིག་ཕན་ཆེ། བདེ་འཇགས་དོ་དམ་ཚད་ལྡན་བཅས་ཀྱི་དམའ་འཕུར་དཔལ་འབྱོར་སྐྱོན་བྲལ་ངང་འཕེལ་རྒྱས་འགྲོ་བའི་རྣམ་པ་བཟང་པོ་ཞིག་ཆགས་པར་སྐུལ་འདེད་གཏོང་དགོས།