ཁྲེན་ཡུང་ཆིས་ཁྲེང་ཏུའུ་རུ་བཅའ་སྡོད་ཤང་ཀང་གི་དཔལ་འབྱོར་ཚོང་དོན་དོན་གཅོད་ཁྲུའུ་ཡི་ཀྲུའུ་རེན་ཡོན་ཅ་ནུའོ་བཅས་པ་དང་མཇལ་འཕྲད་གནང་བ།
ཉེ་ཆར། རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་རང་སྐྱོང་ལྗོངས་ཀྱི་རྒྱུན་ལས་ཀྲུའུ་ཞི་གཞོན་པ་ཁྲེན་ཡུང་ཆིས་ལྷ་སར་ཁྲེང་ཏུའུ་རུ་བཅའ་སྡོད་ཤང་ཀང་གི་དཔལ་འབྱོར་ཚོང་དོན་དོན་གཅོད་ཁྲུའུ་ཡི་ཀྲུའུ་རེན་ཡོན་ཅ་ནུའོ་བཅས་པ་དང་མཇལ་འཕྲད་གནང་བ་རེད།
ཁྲེན་ཡུང་ཆིས་རང་སྐྱོང་ལྗོངས་ཏང་ཨུད་དང་སྲིད་གཞུང་དང་། ཧྲུའུ་ཅི་ཝང་ཅུན་ཀྲེང་དང་ཀྲུའུ་ཞི་ཡན་ཅིན་ཧའེ་ཡི་ཚབ་ཞུས་ཏེ་ཡོན་ཅ་ནུའོ་བཅས་པ་བོད་དུ་འཚམས་འདྲིར་ཕེབས་པར་ལྷག་བསམ་ཟོལ་མེད་ཀྱི་དགའ་བསུ་ཞུས་པ་དང་། ཁྲེང་ཏུའུ་རུ་བཅའ་སྡོད་ཤང་ཀང་གི་དཔལ་འབྱོར་ཚོང་དོན་དོན་གཅོད་ཁྲུའུ་ཡིས་དུས་ཡུན་རིང་པོའི་ནང་བོད་དང་ཤང་ཀང་དབར་སྤེལ་རེས་མཉམ་ལས་ལ་སྐུལ་འདེད་གཏོང་ཆེད་ལེགས་སྐྱེས་ཕུལ་བར་ཐུགས་རྗེ་ཆེ་ཞུས་པ་དང་འབྲེལ་བོད་ཀྱི་ལོ་རྒྱུས་དང་། མི་ཆོས་རིག་གནས། ས་ཁམས། དཔལ་འབྱོར་དང་སྤྱི་ཚོགས་འཕེལ་རྒྱས་བཅས་ཀྱི་གནས་ཚུལ་ངོ་སྤྲོད་མདོར་བསྡུས་ཀྱང་གནང་བ་རེད།
ཁྲེན་ཡུང་ཆིས་བོད་ནི་མཛེས་སྡུག་ལྡན་ལ་ངོ་མཚར་ཆེ་བའི་ས་ཆ་ཞིག་དང་། དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་སྐྱེ་སྟོབས་ཀྱི་དཔལ་འབར་བའི་ས་ཆ་ཞིག སྒོ་དབྱེ་བསྟུན་མཁས་ཀྱི་སྤྱི་ཚོགས་ཤིག་བཅས་ཡིན།
ཡོན་ཅ་ནུའོ་དང་བཅས་པ་བོད་དུ་མང་ཙམ་གཟིགས་པར་ཕེབས་ནས་མཛེས་སྡུག་དང་། དར་རྒྱས། སྒོ་དབྱེ། ཡར་ཐོན་བཅས་ཀྱི་བོད་འདི་ཁྱོན་ཡོངས་དང་། དངོས་ཡོད། དོན་དངོས་བཅས་ཀྱི་སྒོ་ནས་སྤུན་ཟླ་ཤང་ཀང་དང་འཛམ་གླིང་རྒྱལ་ཁབ་ཁག་གི་མི་དམངས་ལ་ངོ་སྤྲོད་བྱ་རྒྱུའི་རེ་བ་ཡོད། དེ་དང་ཆབས་ཅིག་ལྷ་ས་ནས་ཤང་ཀང་དང་ཨའོ་མོན་དུ་སྐྱོད་པའི་མི་སྒེར་གྱི་ཡུལ་སྐོར་ཤར་གཏོང་ཐུབ་པ་གོ་སྐབས་སུ་བྱས་ཏེ། ཕྱོགས་གཉིས་པོའི་དཔལ་འབྱོར་ཚོང་དོན་དང་། སློབ་གསོ། རིག་གནས། ཡུལ་སྐོར་སོགས་རིམ་པ་ཁག་དང་ཁྱབ་ཁོངས་ཁག་གི་སྤེལ་རེས་མཉམ་ལས་སྔར་བས་གཏིང་ཟབ་ཏུ་བཏང་ནས་ས་གནས་གཉིས་ཐུན་མོང་ཐོག་འཕེལ་རྒྱས་འགྲོ་རྒྱུར་སྐུལ་འདེད་གཏོང་གི་ཡིན། བོད་ཀྱིས་སྒྱུར་བཅོས་སྒོ་དབྱེ་སྔར་བས་རྒྱ་ཆེར་དང་ཚོང་གཉེར་ཁོར་ཡུག་རྒྱུན་ཆད་མེད་པར་ལེགས་སུ་བཏང་ནས་སྤུན་ཟླ་ཤང་ཀང་ཚུད་པའི་མ་དངུལ་འཇོག་མཁན་ལ་དེ་བས་ནུས་ཆེ་དང་སྟབས་བདེ་བའི་ཞབས་ཞུ་མཁོ་འདོན་བྱེད་ཀྱི་ཡིན་ཞེས་གསུངས་པ་རེད།
ཡོན་ཅ་ནུའོ་ཡིས་བོད་རང་སྐྱོང་ལྗོངས་ཀྱིས་ཁྲེང་ཏུར་བཅའ་སྡོད་ཤང་ཀང་དཔལ་འབྱོར་ཚོང་དོན་དོན་གཅོད་ཁྲུའུ་ཡི་ལས་དོན་ལ་རྒྱབ་སྐྱོར་གནང་བར་ཐུགས་རྗེ་ཆེ་ཞུས་པ་དང་། ཁོང་གིས། ད་ཐེངས་ཀྱི་འཚམས་འདྲིའི་ནང་བོད་ཀྱི་བརྗིད་ཉམས་ལྡན་པའི་རི་དང་། དྭངས་གཙང་གི་ཆུ་བོ། མཛའ་མཐུན་གྱི་མི་དང་དེ་བཞིན་ལོ་རྒྱུས་དང་མི་ཆོས་རིག་གནས་ཀྱི་མཛེས་སྡུག་དངོས་སུ་མྱོང་རོལ་ཐུབ་བྱུང་ལ། ཆབ་སྲིད་དང་། དཔལ་འབྱོར། སྤྱི་ཚོགས། རིག་གནས་སོགས་ཐད་བོད་ལ་ཐོབ་པའི་གྲུབ་འབྲས་རླབས་པོ་ཆེ་ཡང་དངོས་སུ་མཐོང་བྱུང་། ལྷག་པར་དུ་རྒྱལ་སྤྱིའི་རང་བཞིན་གྱི་ཡུལ་སྐོར་བྱ་ཡུལ་ཡིན་པའི་ལྷ་སའི་གསོན་ཤུགས་ཀྱིས་མི་རྣམས་ལ་བག་ཆགས་ཟབ་མོ་བཞག་ཡོད། མེས་རྒྱལ་ལ་རྒྱབ་རྟེན་དང་འཛམ་གླིང་དང་འབྲེལ་མཐུད་ཀྱི་ཟམ་སྣེའི་མཁར་རྫོང་དང་། རྒྱལ་སྤྱིའི་དངུལ་རྩའི་ཚོང་དོན་གྱི་མཚོ་ཐོག་སྐྱེལ་འདྲེན་ལྟེ་གནས། ཀྲུང་གོ་དང་ནུབ་ཕྱོགས་ཀྱི་རིག་གནས་མཉམ་འདྲེས་བྱེད་ས་བཅས་ཡིན་པའི་ཤང་ཀང་གིས་བོད་དང་འགྲོ་འོང་སྤེལ་རེས་བྱེད་ཤུགས་ཆེ་རུ་བཏང་ནས་རང་ངོས་ཀྱི་ལེགས་ཆ་སྤྱད་དེ་བོད་ལ་ཞབས་འདེགས་ཞུ་རྒྱུ་དང་མེས་རྒྱལ་གྱི་འཕེལ་རྒྱས་ལ་ཞབས་འདེགས་ཞུ་འདོད་ཡོད་ཅེས་གསུངས་པ་རེད།