ཡན་ཅིན་ཧའེ་ཡིས་ཀོང་པོ་རྒྱ་མདའ་རྫོང་དུ་བརྟག་ཞིབ་གནང་བ།
ཚེས་15ཉིན། རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་དང་རང་སྐྱོང་ལྗོངས་ཀྱི་ཀྲུའུ་ཞི་ཡན་ཅིན་ཧའེ་ཉིང་ཁྲི་གྲོང་ཁྱེར་ཀོང་པོ་རྒྱ་མདའ་རྫོང་དུ་ཕེབས་ཏེ་གནའ་བོའི་གྲོང་ཚོ་སྲུང་སྐྱོང་གསར་སྤེལ་དང་། རིག་གནས་ཡུལ་སྐོར་ཐོན་ལས་འཕེལ་རྒྱས། གྲོང་གསེབ་དར་རྒྱས་སོགས་ལ་དམིགས་ནས་བརྟག་ཞིབ་གནང་བ་རེད།
བྲག་གསུམ་མཚོའི་ངོགས་སུ་ཡོད་པའི་མཚོ་མགོ་གྲོང་ཚོ་ནི་རི་ཚོགས་ཀྱི་དབུས་སུ་གནས་ལ། ཀོང་པོའི་ཁྱད་ཆོས་ལྡན་པའི་དམངས་སྲོལ་སྡོད་ཁང་སྟར་པ་རེ་རེ་བཞིན་གྲལ་འགྲིག་པོར་ཡོད། ཡན་ཅིན་ཧའེ་གྲོང་མི་ཤེས་རབ་ཀྱི་ཁྱིམ་དུ་ཕེབས་ནས་ཅི་འཕྲོས་མོལ་འཕྲོས་དང་། དམངས་ཀྱི་སྐྱིད་སྡུག་བཀའ་འདྲི། དམངས་ཀྱི་གནས་ཚུལ་མཁྱེན་རྟོགས། དམངས་ཀྱི་སྐད་སྒྲ་གསན་པ་བཅས་གནང་ཞིང་། ཉེ་བའི་ལོ་ཤས་རིང་གི་གྲོང་ཚོའི་འགྱུར་ལྡོག་ཆེན་པོ་དང་དེ་བཞིན་དམངས་སྲོལ་གནས་ཚང་ལས་བྱུང་བའི་ཡོང་འབབ་སྐོར་གསན་སྐབས། ཡན་ཅིན་ཧའེ་ཡིས་ཚང་མར་ད་ཆ་འཚོ་བ་འདི་འདྲ་ཡག་པོ་སྐྱེལ་རྒྱུ་བྱུང་བ་ནི་སྤྱི་ཁྱབ་ཧྲུའུ་ཅི་ཞི་ཅིན་ཕིང་དང་ཏང་ཀྲུང་དབྱང་གི་བཀའ་དྲིན་རེད། ང་ཚོས་ཕན་པ་གང་ནས་བྱུང་བ་དང་དྲིན་ལན་སུ་ལ་འཇལ་དགོས་པ་ངེས་པར་ཏུ་ཤེས་དགོས་ལ། སྤྱི་ཁྱབ་ཧྲུའུ་ཅི་དང་གུང་ཁྲན་ཏང་གི་བཀའ་དྲིན་དེ་བས་ཀྱང་ཚོར་དགོས་པ་དང་ཆབས་ཅིག ཏང་གི་དམངས་ཕན་སྲིད་ཇུས་ཀྱི་ཁྲིད་སྟོན་འོག དེ་བས་མཛེས་སྡུག་ལྡན་པའི་བདེ་སྐྱིད་འཚོ་བ་ཧུར་ཐག་གཏོད་དགོས་ཞེས་གསུངས་པ་རེད། ས་གནས་དེ་གའི་དམངས་སྲོལ་གནས་ཚང་གཉེར་སྐྱོང་བྱེད་སྟངས་དང་འཆར་འགོད་འཛུགས་སྐྲུན་གནས་ཚུལ་མཁྱེན་རྟོགས་གནང་རྗེས། ཡན་ཅིན་ཧའེ་ཡིས་མཚོ་མགོ་གྲོང་ཚོ་འདི་ཉིད་ནགས་ཁུལ་ནས་མཛེས་ལྗོངས་ཁུལ་དང་། མང་ཚོགས་ཀྱི་སྡོད་ཁང་ནས་དམངས་སྲོལ་གནས་ཚང་དུ་འགྱུར་ཏེ། གྲོང་མི་ཚོས་སོ་སོའི་སྒོ་རྩར་སྐྱེ་ཁམས་དང་ཡུལ་སྐོར་གྱི་ཡོང་འབབ་གསོག་ཐུབ་པ་འདི་ནི“རི་སྔོན་ཆུ་དྭངས་གསེར་དངུལ་རི་ལས་ལྷག གངས་རི་འཁྱགས་ཀླུང་ཡིན་ཡང་གསེར་དངུལ་རི”ཡིན་པའི་གསོན་ཉམས་ལྡན་པའི་ལག་ལེན་ཞིག་རེད། སྐྱེ་ཁམས་སྔོན་འཇོག་དང་ལྗང་མདོག་འཕེལ་རྒྱས་མཐའ་འཁྱོངས་བྱས་ཐོག་ཡུལ་སྐོར་ཐོན་ཁུངས་ཀྱི་སྐྱེ་ཁམས་ཐེག་ནུས་ལ་བསམ་གཞིག་གང་ལེགས་བྱས་ནས། མཚོ་མགོ་གྲོང་ཚོའི་གནའ་གྲོང་གི་ལོ་རྒྱུས་དང་རིག་གནས་ཀྱི་ཐོན་ཁུངས་རྩ་ཆེན་བེད་སྤྱོད་ཡག་པོ་གཏོང་དགོས། མཛེས་ལྗོངས་ཁུལ་གྱི་རྨང་གཞིའི་སྒྲིག་བཀོད་རྒྱུན་ཆད་མེད་པར་འཐུས་ཚང་དང་། ཡུལ་སྐོར་ཞབས་ཞུའི་སྤུས་ཚད་ལེགས་སུ་གཏོང་བ། མཛེས་ལྗོངས་ཁུལ་གྱི་ཁོར་ཡུག་གཙང་སྦྲ་ལེགས་སུ་གཏོང་བ་བཅས་བྱས་ནས། ཡུལ་སྐོར་ལས་རིགས་རིམ་སྤོར་ཡོང་བར་སྐུལ་འདེད་བཏང་སྟེ། གྲོང་མི་ཚོའི་ཡོང་འབབ་རྒྱུན་ཆད་མེད་པར་མང་དུ་གཏོང་དགོས་ཞེས་གསུངས་པ་རེད། “རྙིང་པ་ལྟར་ཉམས་བཟོ་བྱེད་པའི”འདུ་ཤེས་གཞིར་བཟུང་། ཀོང་པོ་རྒྱ་མདའ་རྫོང་གིས་ན་ནིང་མཚོ་མགོ་གནའ་བོའི་གྲོང་ཚོར་སྲུང་སྐྱོང་རང་བཞིན་གྱི་གསར་སྤེལ་རྣམ་གྲངས་འཛུགས་སྐྲུན་བྱེད་འགོ་ཚུགས་ཤིང་། ཡན་ཅིན་ཧའེ་རྣམ་གྲངས་སྐྲུན་ཡུལ་དུ་ཕེབས་ནས་རྣམ་གྲངས་འཆར་འགོད་དང་ལས་གྲྭའི་འཕེལ་རིམ་སོགས་སྐོར་གྱི་སྙན་ཞུ་ཞིབ་ཕྲ་གསན་རྗེས་དམངས་སྲོལ་མྱོང་རོལ་ཁང་དུ་གཟིགས་ཞིབ་གནང་བ་རེད། ཁོང་གིས་བསྟན་དོན། གནའ་བོའི་གྲོང་ཚོ་ནི་རིག་གནས་ཤུལ་བཞག་གལ་ཆེན་ཞིག་ཡིན་པས། གནའ་བོའི་གྲོང་ཚོར་སྲུང་སྐྱོང་ཡག་པོ་བྱེད་པར་གནའ་བོའི་གྲོང་ཚོའི་རྣམ་པ་རང་སོར་བྱེད་དགོས་པ་མ་ཟད། ད་དུང་གྲོང་ཚོ་དེའི་ཡུལ་སྲོལ་གོམས་གཤིས་ཀྱང་རང་སོར་འཇོག་དགོས། སྲུང་སྐྱོང་དང་གསར་སྤེལ་དབར་གྱི་འབྲེལ་བ་ཐག་གཅོད་ཡང་དག་བྱས་ཐོག སྲུང་སྐྱོང་རྣམ་པའི་གསར་སྤེལ་བརྒྱུད་གནའ་བོའི་གྲོང་ཚོའི་ལོ་རྒྱུས་དང་རིག་གནས་ཀྱི་ནང་དོན་སྔོག་འདོན་གཏིང་ཟབ་དང་། གནའ་བོའི་གྲོང་ཚོ་དང་གནའ་བོའི་བཟོ་བཀོད་ཀྱིས་མཚོན་པའི་ལོ་རྒྱུས་དང་རིག་གནས་ཀྱི་གཏམ་རྒྱུད་ཡག་པོ་བཤད་དེ་གནའ་བོའི་ཉམས་འགྱུར་ཇི་མ་ཇི་བཞིན་མངོན་པར་བྱས་ནས། གནའ་བོའི་གྲོང་ཚོ་དེར་གསོན་ཤུགས་དངོས་འབྲེལ་རྒྱས་པ་དང་དེའི་ཤེས་རིག་གི་འཕེལ་རྒྱུན་མི་རབས་ནས་མི་རབས་བར་བརྒྱུད་སྤེལ་བྱེད་དགོས།
བརྟག་ཞིབ་གནང་རིང་། ཡན་ཅིན་ཧའེ་བྲག་གསུམ་མཚོ་མཛེས་ལྗོངས་ཁུལ་གྱི་ཡུལ་སྐོར་བའི་ཞབས་ཞུ་ལྟེ་གནས་སུ་ཕེབས་ནས། ཡུལ་སྐོར་ལས་རིགས་འཕེལ་རྒྱས་དང་ཡུལ་སྐོར་ཁྲོམ་རའི་གནས་ཚུལ་མཁྱེན་རྟོགས་གནང་བ་དང་སྦྲགས་ཆུ་དཔོན་མཚོ་དཔོན་ལམ་ལུགས་དོན་འཁྱོལ་བྱེད་ཚུལ་ལ་ལྟ་སྐུལ་མཛུབ་ཁྲིད་ཀྱང་གནང་བ་རེད།