འདི་ལོའི་ཟླ་5ཚེས་12ཉིན་ནི་རྒྱལ་ཡོངས་ཀྱི་གནོད་འཚེ་སྔོན་འགོག་དང་ཉུང་གཏོང་ཉིན་མོ་16པ་དེ་རེད། གནོད་འཚེའི་ཉེན་ཁར་དོ་དམ་དང་ཕྱོགས་བསྡུས་གནོད་འཚེ་ཉུང་གཏོང་གི་འདུ་ཤེས་བརྟན་པོ་འཛུགས་རྒྱུ་དང་། གནོད་འཚེ་སྔོན་འགོག་དང་ཉུང་གཏོང་གི་ཤེས་བྱ་དང་ཉེན་གཡོལ་རྩལ་ནུས་རྒྱ་ཁྱབ་ངང་དྲིལ་བསྒྲགས་དང་ཁྱབ་གདལ་གཏོང་བ། སྤྱི་ཚོགས་ཡོངས་ཀྱི་གནོད་འཚེ་སྔོན་འགོག་དང་ཉུང་གཏོང་གི་འདུ་ཤེས་དང་རང་སྐྱོབ་རོགས་སྐྱོབ་ནུས་པ་སྔར་བས་ཆེ་རུ་གཏོང་བ་བཅས་བྱ་ཆེད། ཚེས་12ཉིན་གྱི་སྔ་དྲོར། 2024ལོའི“5·12”གནོད་འཚེ་སྔོན་འགོག་དང་ཉུང་གཏོང་ཉིན་མོའི་དྲིལ་བསྒྲགས་ཁྲོམ་གཞུང་གི་བྱེད་སྒོ་ལྷ་ས་གྲོང་ཁྱེར་ཁྲེང་ཀོན་ཆུས་གཡུ་ཐོག་ལམ་དུ་སྤེལ་བ་རེད། ལྗོངས་ཏང་ཨུད་ཀྱི་རྒྱུན་ཨུ་རང་སྐྱོང་ལྗོངས་ཀྱི་རྒྱུན་ལས་ཀྲུའུ་ཞི་གཞོན་པ་རེན་ཝེ་བྱེད་སྒོར་ཞུགས་པ་རེད།

རེན་ཝེ་ཡིས་ལྗོངས་ཡོངས་ཀྱི་རིམ་པ་ཁག་དང་སྡེ་ཚན་ཁག་གིས“གནོད་འཚེ་སྔོན་འགོག་དང་ཉུང་གཏོང་ཉིན་མོ”དང“བདེ་འཇགས་ཐོན་སྐྱེད་ཟླ་བ”སོགས་དྲིལ་བསྒྲགས་ཀྱི་མཚམས་ཚིགས་གལ་ཆེན་གོ་སྐབས་སུ་བྱས་ནས་ས་གནས་ས་ཐོག་ཏུ་སྒྲོག་འགྲེལ་དང་། འདྲི་བར་ལན་རྒྱག་པ། བཀོལ་སྤྱོད་ཉམས་ལེན། ལད་མོ་ནང་སྦྱོང་སོགས་བྱེད་ཐབས་སྣ་ཚོགས་ཀྱི་ཚན་རིག་ཁྱབ་གདལ་དྲིལ་བསྒྲགས་བྱེད་སྒོ་སྒྲིག་འཛུགས་བྱས་ཏེ་ས་ཡོམ་རང་སྐྱོབ་དང་། མེ་ཟོན་བདེ་འཇགས། འཕྲལ་སྡོམ་ཉེན་གཡོལ་སོགས་མང་ཚོགས་ཀྱི་ཐོན་སྐྱེད་འཚོ་བ་དང་འབྲེལ་བ་དམ་ཟབ་ཡོད་པའི་གནོད་འཚེ་སྔོན་འགོག་དང་། ཉུང་གཏོང་། གེགས་སེལ་སོགས་ཀྱི་རྩལ་ནུས་ཁྱབ་གདལ་བཏང་ནས་གནོད་འཚེ་སྔོན་འགོག་གི་སྤྱི་དམངས་ཀྱི་འདུ་ཤེས་ཟབ་ཏུ་གཏོང་བ་མ་ཟད། གནོད་འཚེ་སྔོན་འགོག་དང་ཉུང་གཏོང་གི་སྤྱི་ཚོགས་ཧྲིལ་པོའི་མཉམ་ཤུགས་ཆེན་པོ་གཅིག་ཏུ་སྒྲིལ་དགོས་པའི་ནན་བཤད་གནང་བ་རེད།