རེན་ཝེ་ཡིས་ལྗོངས་ཡོངས་ཀྱི་བདེ་འཇགས་ཐོན་སྐྱེད་ཆེད་དོན་བཀོད་གཏོང་ཚོགས་འདུ་གཙོ་སྐྱོང་གནང་བ།
ཚེས་9ཉིན་གྱི་ཕྱི་དྲོ། ལྗོངས་ཏང་ཨུད་ཀྱི་རྒྱུན་ཨུ་རང་སྐྱོང་ལྗོངས་ཀྱི་རྒྱུན་ལས་ཀྲུའུ་ཞི་གཞོན་པ་རེན་ཝེ་ཡིས་ལྗོངས་ཡོངས་ཀྱི་བདེ་འཇགས་ཐོན་སྐྱེད་ཆེད་དོན་བཀོད་གཏོང་ཚོགས་འདུ་གཙོ་སྐྱོང་གནང་ནས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཀོང་ཏུང་མེ་ཀྲོའུ་གྲོང་ཁྱེར་གྱི་མེ་ཏ་མྱུར་བགྲོད་གཞུང་ལམ་གྱི་ཁྲ་དབྱང་ལམ་རྡིབ་པའི་གནོད་འཚེའི་ཐད་གནང་བའི་མཛུབ་སྟོན་གལ་ཆེན་གྱི་དགོངས་དོན་སློབ་སྦྱོང་དང་ལག་བསྟར་གཏིང་ཟབ་དང་། རང་སྐྱོང་ལྗོངས་ཏང་ཨུད་དང་སྲིད་གཞུང་གི་ལས་ཀའི་བླང་བྱ་ལག་བསྟར་དོན་འཁྱོལ། ལྗོངས་ཡོངས་ཀྱི་ཉེན་ཡོད་དངོས་རྫས་ཁྱབ་ཁོངས་ལ་ཞིབ་བཤེར་དང་བདེ་འཇགས་ཐོན་སྐྱེད་ཀྱི་རྩ་བཅོས་འགག་སྒྲོལ་གྱི་ལོ་གསུམ་བྱ་སྤྱོད་སྐུལ་སྤེལ་གནས་ཚུལ་གྱི་སྙན་སེང་གསན་པ་མ་ཟད། གློག་སྒུལ་རྐང་འཁོར་གྱི་བདེ་འཇགས་མངོན་མེད་རྐྱེན་ངན་གྱི་འཁོར་འབྲེལ་ཧྲིལ་པོ་བཅོས་སྒྲིག་སོགས་གཙོ་གནད་ལས་འགན་བཀོད་སྒྲིག་ཀྱང་གནང་བ་རེད།
རེན་ཝེ་ཡིས། ས་གནས་ཁག་དང་སྡེ་ཚན་ཁག་ལ་མཐའ་ཚད་ཀྱི་བསམ་གཞིག་མཐའ་འཁྱོངས་བྱས་ནས་གཙོ་གནད་ལས་རིགས་ཁྱབ་ཁོངས་ལ་ཞིབ་བཤེར་བྱ་རྒྱུར་སྐུལ་འདེད་རྒྱུན་སྲིང་ལྷོད་མེད་གཏོང་བ་དང་འགན་འཁྲི་དོན་འཁྱོལ་དང་། སྒྲིག་ཆས་གལ་ཆེན། གཙོ་གནད་མི་སྣ། མངོན་མེད་རྐྱེན་ངན་གལ་ཆེན་སོགས་ཀྱི་ལྷུ་ཚིགས་ལ་དམིགས་ཏེ་བདེ་འཇགས་ལ་འགོག་ཟོན་ཡག་པོ་བྱས་ནས་ཉེན་ཁ་སེལ་བ་དང་མངོན་མེད་རྐྱེན་ངན་མ་ཐོན་གོང་ནས་སེལ་དགོས་པ་དང་། མ་ལག་གི་བསམ་གཞིག་རྒྱུན་འཁྱོངས་བྱས་ནས་བདེ་འཇགས་ཐོན་སྐྱེད་ཀྱི་རྩ་བཅོས་འགག་སྒྲོལ་གྱི་ལོ་གསུམ་བྱ་སྤྱོད་ལ་སྐུལ་འདེད་ཏན་ཏིག་གཏོང་བ་དང་། “བྱ་སྤྱོད་ཆེན་པོ་བརྒྱད”དོན་འཁྱོལ་ནན་ཏན། “མི་དང་། ལག་རྩལ། ལས་གྲྭ དོ་དམ་བཅས་ལ་བརྟེན་ནས་འགོག་ཟོན”བྱེད་པ་སོགས་ཀྱི་རྩ་བཅོས་བྱེད་ཐབས་ལ་གོ་རིམ་ལྡན་པའི་སྒོ་ནས་སྐུལ་འདེད་བཏང་སྟེ་རྩ་ལག་མཉམ་བཅོས་ལ་བརྟེན་ནས་བདེ་འཇགས་ཀྱི་ཆུ་ཚད་མཐོ་རུ་གཏོང་དགོས། བཅོས་སྐྱོང་བསམ་གཞིག་མཐའ་འཁྱོངས་བྱས་ནས་ཚད་གཞི་མཐོན་པོས་གློག་སྒུལ་རྐང་འཁོར་གྱི་མངོན་མེད་རྐྱེན་ངན་བཅོས་སྒྲིག་བྱ་སྤྱོད་སྤེལ་ཏེ་འབྱུང་རྩ་ནས་དོ་དམ་ཚོད་འཛིན་དང་། ཐོ་འགོད་དོ་དམ། ལམ་དུ་སྐྱོད་པ། སྒྲིག་འགལ་གྱིས་གློག་གསོག་སྒྲིག་ཆས་གང་སར་འཇོག་པ། བེད་མེད་ཚུར་བསྡུ་སོགས་ལྷུ་ཚིགས་ཁག་གི་ཉེན་ཁ་དང་མངོན་མེད་རྐྱེན་ངན་བཅོས་སྒྲིག་ལ་ཕྱོགས་ཡོངས་ནས་ཤུགས་སྣོན་བརྒྱབ་སྟེ་བདེ་འཇགས་ལས་འཛོལ་སྔོན་འགོག་དང་ཉུང་དུ་གཏོང་དགོས་པའི་བླང་བྱ་བཏོན་གནང་བ་རེད།