ཚེས་29ཉིན། རང་སྐྱོང་ལྗོངས་མི་དམངས་སྲིད་གཞུང་དང་རང་སྐྱོང་ལྗོངས་སྤྱི་ཁྱབ་བཟོ་ཚོགས་ཀྱི་མཉམ་འབྲེལ་ཚོགས་འདུ་ལྷ་སར་འཚོགས་པ་རེད། ཚོགས་འདུའི་ཐོག སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཀྲུང་ཧྭ་རྒྱལ་ཡོངས་སྤྱི་ཁྱབ་བཟོ་ཚོགས་ཀྱི་སྐབས་གསར་པའི་འགོ་ཁྲིད་ཚན་ཁག་གི་ཁོངས་མི་དང་མཉམ་སྡེབ་གླེང་མོལ་གནང་སྐབས་གནང་བའི་གསུང་བཤད་གལ་ཆེན་གྱི་དགོངས་དོན་སོགས་བརྒྱུད་བསྒྲགས་དང་སློབ་སྦྱོང་བྱས་པ་རེད། རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་དང་རང་སྐྱོང་ལྗོངས་ཀྱི་ཀྲུའུ་ཞི་ཡན་ཅིན་ཧའེ་ཡིས་བཟོ་པའི་གྲལ་རིམ་དང་བཟོ་ཚོགས་ཀྱི་ལས་དོན་སྐོར་གྱི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་རྣམ་བཤད་གལ་ཆེན་དང་། བོད་ཀྱི་ལས་དོན་སྐོར་གྱི་མཛུབ་སྟོན་གལ་ཆེན་དང་དུས་རབས་གསར་པའི་ཏང་གི་བོད་སྐྱོང་མཛད་ཇུས་བཅས་སློབ་སྦྱོང་དང་ལག་བསྟར་གཏིང་ཟབ་བྱས་ཏེ། ལྗོངས་ཏང་ཨུད་ཀྱི་ལས་དོན་གྱི་བླང་བྱ་གཞིར་བཟུང་། རྒྱ་ཆེའི་ལས་བཟོ་མང་ཚོགས་ཚོས་སྤྱི་ཚོགས་རིང་ལུགས་དེང་རབས་ཅན་གྱི་བོད་གསར་འཛུགས་སྐྲུན་བྱེད་པའི་ཚ་ཚ་འུར་འུར་གྱི་ལག་ལེན་གྱི་ཚ་རླབས་ཁྲོད་སླར་ཡང་བྱས་རྗེས་གསར་པ་འཇོག་པ་དང་གྲུབ་འབྲས་བཟང་པོ་གཏོད་རྒྱུར་སྐུལ་ལྕག་བྱེད་དགོས་ཞེས་ནན་བཤད་གནང་བ་རེད།

ཐང་མིང་དབྱིན་གྱིས་རང་སྐྱོང་ལྗོངས་སྤྱི་ཁྱབ་བཟོ་ཚོགས་ཀྱི་ལས་དོན་གནས་ཚུལ་བརྡ་ཁྱབ་བཏང་བ་དང་ལུའོ་མེ་ཡིས་གཙོ་སྐྱོང་གནང་བ་རེད། ཚོགས་འདུའི་ཐོག་སྲིད་གཞུང་གིས་བཟོ་ཚོགས་འཕེལ་རྒྱས་ལ་རྒྱབ་སྐྱོར་བྱེད་པའི་འབྲེལ་ཡོད་གནས་ཚུལ་གྱི་སྙན་སེང་གསན་པ་རེད།

ཡན་ཅིན་ཧའེ་ཡིས། ལྗོངས་ཡོངས་ཀྱི་རིམ་ཁག་བཟོ་ཚོགས་རྩ་འཛུགས་དང་ལས་བཟོ་མང་ཚོགས་ཚོས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མངགས་བཅོལ་ཟབ་མོ་བློ་ལ་བརྟན་པོར་ངེས་ཏེ་ཐོག་མཐའ་བར་གསུམ་དུ་རྒྱལ་ཁབ་ཀྱི་བདག་པོའི་རྣམ་འགྱུར་ཐོག་ནས་དུས་རབས་གསར་པར་བྱས་རྗེས་འཇོག་པ་དང་རྒྱང་ལམ་གསར་པར་མདུན་སྐྱོད་བྱེད་པ་དང་། ཡིད་ཆེས་ཀྱིས་ཁེངས་བཞིན་རྒྱལ་ཁབ་སྟོབས་ཆེན་འཛུགས་སྐྲུན་དང་མི་རིགས་བསྐྱར་དར་གྱི་ཚ་ཚ་འུར་འུར་གྱི་ལག་ལེན་ནང་ཞུགས་ཏེ་མཛེས་སྡུག་དང་བདེ་སྐྱིད་ལྡན་པའི་བོད་ལྗོངས་འཛུགས་སྐྲུན་བྱས་ནས་ཐུན་མོང་ཐོག་བསྐྱར་དར་རླབས་པོ་ཆེའི་ཕུགས་འདུན་མངོན་འགྱུར་བྱེད་པའི་སྟོབས་ཤུགས་ཆེན་པོ་ཆགས་པར་བྱེད་དགོས། སྤྱི་ཡོངས་ལ་ཞབས་འདེགས་ཞུ་བའི་ཐད་རང་འགུལ་ངང་བྱས་རྗེས་བཞག་ནས་བཟོ་ཚོགས་ལས་དོན་དང་ལྟེ་བའི་ལས་འགན་གྱི་ཟུང་འབྲེལ་བྱེད་ས་དང་། འགོ་འཛུགས་ས། ཤུགས་རྒྱག་ས་བཅས་བཙལ་འཚོལ་དང་རང་རྟོགས་ངང་བཟོ་ཚོགས་ཀྱི་ལས་དོན་དེ་ལྗོངས་ཡོངས་ཀྱི་སྒྱུར་འཕེལ་བརྟན་གསུམ་གྱི་སྤྱི་ཡོངས་ཁྲོད་བཞག་ནས་བསམ་གཞིག་དང་། ཇུས་འགོད། སྐུལ་འདེད་གཏོང་བ་བཅས་བྱས་ཏེ། བཟོ་ཚོགས་རྩ་འཛུགས་དང་རྒྱ་ཆེའི་ལས་བཟོ“དོན་ཆེན་བཞི”དང“འཛུགས་གཏོད་བཞིའི”གཡུལ་ས་གཙོ་བོར་རང་འགུལ་ངང་མཉམ་འདྲེས་དང་། རང་རྟོགས་ངང་ཞབས་འདེགས་ཞུ་བ་དང་ཧུར་ཐག་ཞུགས་པ་བཅས་ལ་རྒྱབ་སྐྱོར་བྱེད་དགོས། ཁེ་དབང་སྲུང་སྐྱོང་ཞབས་ཞུའི་ཐད་མུ་མཐུད་ཤུགས་སྣོན་བརྒྱབ་ནས་ལས་བཟོ་མང་ཚོགས་ཀྱིས་དོ་སྣང་ཆེ་ཤོས་བྱེད་པ་དང་། མང་ཚོགས་དང་ཐད་ཀར་འབྲེལ་བ་ཆེ་ཤོས་ཡོད་པ། མང་ཚོགས་ལ་འཕྲལ་མཁོ་ཆེ་ཤོས་ཡིན་པ་བཅས་ཀྱི་ཁེ་ཕན་གྱི་གནད་དོན་མངོན་པར་བྱེད་པ་དང་། འཐབ་ཕྱོགས་དང་པོའི་ལས་བཟོ་པ་དང་། དཀའ་ངལ་ཡོད་པའི་ལས་མི། སྟབས་བསྟུན་ལས་ཞུགས་མི་སྣ། ལས་རྣམ་གསར་པའི་ལས་ཞུགས་མི་སྣ། ཞིང་པ་ལས་མི་སོགས་གཙོ་གནད་ཚོགས་སྤྱིར་དེ་བས་དོ་ཁུར་བྱས་ཏེ་ལམ་ལུགས་ཀྱི་འབྱུང་རྩ་ནས་ལས་བཟོ་མང་ཚོགས་ཀྱི་ཁེ་དབང་ཁག་འགན་སྲུང་བྱེད་དགོས། ལས་བཟོའི་བསམ་ཚུལ་དང་རེ་སྒུག་དུས་ཐོག་ཏུ་ཤེས་རྟོགས་བྱས་ནས་ལས་བཟོར་ཞབས་འདེགས་ཞུ་བའི་འཇོན་ཐང་རྒྱུན་ཆད་མེད་པར་ཆེ་རུ་བཏང་སྟེ་ལས་བཟོར་ཕན་འདོགས་པའི་ཀུན་ཕན་རང་བཞིན་དང་། རྒྱུན་རྣམ་རང་བཞིན། གནད་སྨིན་རང་བཞིན་བཅས་ཀྱི་ཞབས་ཞུ་དེ་བས་མང་བ་མཁོ་འདོན་ཧུར་ཐག་བྱེད་དགོས། སྲིད་གཞུང་གིས་ཏང་ཨུད་ཀྱི་བླང་བྱར་གཞིགས་ནས་ནུས་ཤུགས་ཡོད་རྒུས་བཟོ་ཚོགས་ཀྱི་དཀའ་ངལ་སེལ་དགོས། སྒྱུར་བཅོས་གསར་གཏོད་ཐད་གཙོ་གནད་ཚད་བརྒལ་ཡོང་བར་བྱས་ཏེ་རང་འགུལ་ངང་བསམ་གཞིག་གསར་གཏོད་དང་། རྩ་འཛུགས་གསར་གཏོད་ལ་སྐུལ་འདེད་ཧུར་ཐག་གཏོང་བ། ལས་དོན་གསར་གཏོད་ལ་སྐུལ་འདེད་ཤུགས་ཆེན་གཏོང་བ་བཅས་བྱས་ནས་བཟོ་ཚོགས་ལས་དོན་གྱིས་མི་སེམས་ལ་སྐུལ་ལྕག་ཐེབས་པ་དང་། མི་སེམས་ལ་དྲོ་སྐྱིད་སྦྱིན་པ། མི་སེམས་འཐོབ་པ་བཅས་བྱེད་དགོས་ཞེས་གསུངས་པ་རེད།

ཡན་ཅིན་ཧའེ་ཡིས། བསམ་སྤྱོད་གཅིག་མཐུན། མཉམ་ཤུགས་གཅིག་སྒྲིལ། ལྟེ་གཅིག་འཁོར་སྐྱོད་བཅས་མཐའ་འཁྱོངས་བྱས་ཏེ་མཉམ་འབྲེལ་གྲོས་ཚོགས་ཀྱི་ལམ་ལུགས་མཐའ་འཁྱོངས་དང་། འཐུས་ཚང་། འཕེལ་རྒྱས་བཅས་ཡག་པོ་ཡོང་བ་བྱེད་དགོས། རིམ་ཁག་སྲིད་གཞུང་དང་སྡེ་ཚན་ཁག་གིས་ལས་དོན་འཆར་འགོད་དང་སྲིད་ཇུས་གཏན་འབེབས་སམ་ཡང་ན་ལས་འགན་བཀོད་སྒྲིག་དང་སྟོབས་ཤུགས་བཀོད་སྒྲིག་བཅས་བྱེད་སྐབས་བཟོ་ཚོགས་ཀྱི་བསམ་འཆར་གང་ལེགས་ཉན་པ་དང་། བཟོ་ཚོགས་ཀྱི་ནུས་པ་འདོན་པ། དུས་བབ་གསར་པའི་འོག་བཟོ་ཚོགས་འཕེལ་རྒྱས་གཏོང་བའི་དགོས་མཁོར་བསམ་གཞིག་བཅས་གང་ལེགས་བྱེད་པ་དང་། དགོས་ངེས་ཀྱི་མི་རྒྱུ་དངོས་གསུམ་འགན་སྲུང་བཅས་བྱས་ནས་བཟོ་ཚོགས་རྩ་འཛུགས་ལ་བྱ་བ་སྒྲུབ་པའི་མ་དངུལ་ཡོད་པ་དང་། བྱ་གཞག་སྒྲུབ་མཁན་གྱི་མི་ཡོད་པ། བྱ་བ་སྒྲུབ་ཐུབ་པ་བཅས་འགན་ལེན་བྱེད་དགོས་པའི་བླང་བྱ་བཏོན་པ་རེད།