ཉེ་ཆར། རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་དང་རང་སྐྱོང་ལྗོངས་ཀྱི་རྒྱུན་ལས་ཀྲུའུ་ཞི་གཞོན་པ་ཁྲེན་ཡུང་ཆིས་ལྷ་སར་རེས་སྐོར་དང་པོའི་ནེ་པ་ལར་རོགས་སྐྱོར་ལས་དོན་གྱི་མཇལ་འཛོམས་ལ་ཞུགས་མཁན་ནེ་པ་ལ་སྲིད་གཞུང་རྒྱལ་ཕྲན་མཉམ་འབྲེལ་ལས་དོན་དང་སྤྱི་ཁྱབ་སྲིད་འཛིན་པུའི་མཉམ་འབྲེལ་དྲུང་ཡིག་པཱ་ཐ་ལའེ་དབྱི་བཅས་པ་དང་མཇལ་འཛོམས་གནང་བ་རེད།

ཁྲེན་ཡུང་ཆིས་རང་སྐྱོང་ལྗོངས་ཏང་ཨུད་དང་སྲིད་གཞུང་དང་། ཧྲུའུ་ཅི་ཝང་ཅུན་ཀྲེང་། ཀྲུའུ་ཞི་ཡན་ཅིན་ཧའེ་བཅས་ཀྱི་ཚབ་ཞུས་ཏེ་འཐུས་མི་ཚོགས་པ་དང་བཅས་པ་ཀྲུང་གོའི་བོད་ལྗོངས་སུ་འཚམས་འདྲིར་ཕེབས་པར་དགའ་བསུ་ཞུས་པ་དང་ཀྲུང་ནེའི་རེས་སྐོར་དང་པོའི་ནེ་པ་ལར་རོགས་སྐྱོར་ལས་དོན་གྱི་མཇལ་འཛོམས་ལ་གྲུབ་འབྲས་ཐོབ་པར་རྟེན་འབྲེལ་ཞུས་ཤིང་། ཁོང་གིས་ཀྲུང་གོ་དང་ནེ་པ་ལ་རྒྱལ་ཁབ་གཉིས་ཀྱི་རི་ཆུ་འབྲེལ་བ་དང་། མི་ཆོས་རིག་གནས་འདྲ་བ། མི་རབས་ནས་མི་རབས་བར་མཛའ་མཐུན་བཅས་ཡོད། ནེ་པ་ལ་ནི་སྔར་ནས་བཟུང་ཀྲུང་གོའི་ཐུན་མོང་འཕེལ་རྒྱས་ཀྱི་ཁྱིམ་མཚེས་རྒྱལ་ཁབ་བཟང་པོ་དང་། གྲོགས་པོ་བཟང་པོ། རོགས་ཟླ་བཟང་པོ་བཅས་ཡིན་པས་འགྲོ་འོང་སྤེལ་རེས་ཐད་ལོ་རྒྱུས་ཡུན་རིང་ལྡན་ཡོད། 2019ལོར་ཀྲུའུ་ཞི་ཞི་ཅིན་ཕིང་གིས་ནེ་པ་ལར་ལོ་རྒྱུས་རང་བཞིན་གྱི་རྒྱལ་དོན་འཚམས་འདྲི་གནང་ནས་ཕྱོགས་གཉིས་པོས་འཕེལ་རྒྱས་དང་དར་རྒྱས་ལ་ཕྱོགས་པའི་མི་རབས་ནས་མི་རབས་བར་མཛའ་མཐུན་གྱི་འཐབ་ཇུས་མཉམ་ལས་རོགས་ཟླའི་འབྲེལ་བ་བཙུགས་ཡོད། 2023ལོར་ཙུང་ལི་ཕུའུ་ལ་ཁྲང་ཏ་ཀྲུང་གོར་འཚམས་འདྲིར་ཕེབས་པ་དང་རྒྱལ་ཁབ་གཉིས་པོའི་འགོ་ཁྲིད་དབར་ཀྲུང་གོ་དང་ནེ་པ་ལའི་འབྲེལ་བ་འཕེལ་རྒྱས་གཏོང་བའི་ཐད་ཐུན་མོང་གི་ངོས་འཛིན་གལ་ཆེན་བྱུང་ནས་རྒྱལ་ཁབ་གཉིས་པོའི་འབྲེལ་བ་འཕེལ་རྒྱས་འགྲོ་བར་སྒུལ་ཤུགས་གསར་པ་བསྣན་ཡོད། བོད་རང་སྐྱོང་ལྗོངས་ནི་ནེ་པ་ལ་དང་ས་འབྲེལ་གྱི་ཀྲུང་གོའི་ཞིང་ཆེན་རིམ་པའི་སྲིད་འཛིན་ཁུལ་འབའ་ཞིག་ཡིན་པའི་ངོས་ནས་ཉེ་བའི་ལོ་ཤས་རིང་ཞི་ཅིན་ཕིང་གི་ཕྱི་འབྲེལ་དགོངས་པ་ཕྱོགས་ཡོངས་ནས་ལག་ལེན་བསྟར་བ་དང་། ཏང་ཀྲུང་དབྱང་གི་ཕྱི་ཕྱོགས་མཛད་ཕྱོགས་སྲིད་ཇུས་དོན་འཁྱོལ་ནན་ཏན། ས་བབ་ཀྱི་ལེགས་ཆ་དང་། ས་འབྲེལ་གྱི་ལེགས་ཆ། མི་ཆོས་རིག་གནས་ཀྱི་ལེགས་ཆ་ཧུར་ཐག་འདོན་པ་བཅས་བྱས་ཏེ། དཔལ་འབྱོར་ཚོང་དོན་དང་། རིག་གནས། ཡུལ་སྐོར། མཛའ་གྲོགས་གྲོང་ཁྱེར་སོགས་ཁྱབ་ཁོངས་ཀྱི་ཀྲུང་གོ་དང་ནེ་པ་ལ་ཕྱོགས་གཉིས་པོའི་མཉམ་ལས་རྒྱུན་ཆད་མེད་པར་རྒྱ་སྐྱེད་གཏོང་བར་སྐུལ་འདེད་བཏང་བ་མ་ཟད་དུས་མཚམས་རང་བཞིན་གྱི་གྲུབ་འབྲས་གལ་ཆེན་ཐོབ་པ་དང་། ལྷག་པར་དུ་2023ལོར་ཧྲུའུ་ཅི་ཝང་ཅུན་ཀྲེང་གིས་གདན་ཞུས་ལྟར་བོད་ཀྱི་སྐུ་ཚབ་ཚོགས་པའི་སྣེ་ཁྲིད་དེ་ནེ་པ་ལར་འཚམས་འདྲིར་ཕེབས་ནས་ཕྱོགས་གཉིས་པོའི་ཁྱབ་ཁོངས་ཁག་གི་དངོས་སྒྲུབ་མཉམ་ལས་ལ་སྐུལ་འདེད་གཏོང་བར་དགོངས་འཆར་སྤེལ་རེས་གནང་ཡོད། གོམ་སྟབས་རྗེས་མར། ང་ཚོས་གཙོ་བདག་ཕྱི་འབྲེལ་གྱི་སྣེ་ཁྲིད་འོག་ནེ་པ་ལ་ཕྱོགས་དང་ཐུན་མོང་ཐོག་འབད་བརྩོན་བྱས་ཏེ་ནེ་པ་ལར་རོགས་སྐྱོར་རྣམ་གྲངས་དང་ཐུག་འཕྲད་ཀྱི་གྲུབ་འབྲས་དོན་འཁྱོལ་ཡག་པོ་དང་། དཔལ་འབྱོར་ཚོང་དོན་འགྲོ་འོང་ཟབ་ཏུ་གཏོང་བ། རྨང་གཞིའི་སྒྲིག་བཀོད་མཉམ་སྦྲེལ་མཉམ་མཐུད་ལ་ཤུགས་སྣོན་རྒྱག་པ། མཐའ་མཚམས་ཚོང་དོན་ཁྲོམ་ར་འཛུགས་སྐྲུན་མགྱོགས་མྱུར་བྱེད་པ། མི་ཆོས་རིག་གནས་སྤེལ་རེས་བྱེད་ཤུགས་ཆེ་རུ་གཏོང་བ། མཛའ་གྲོགས་གྲོང་ཁྱེར་ཀྱི་མཉམ་ལས་གཏིང་ཟབ་ཏུ་གཏོང་བ་བཅས་བྱས་ནས། ཀྲུང་གོ་དང་ནེ་པ་ལ་རྒྱལ་ཁབ་གཉིས་ཀྱི་འབྲེལ་བ་འཕེལ་རྒྱས་གཏོང་བ་དང“རྒྱུད་གཅིག་ལམ་གཅིག”སྤུས་ཚད་མཐོ་པོས་མཉམ་སྐྲུན་ལ་སྐུལ་འདེད་གཏོང་བར་ནུས་པ་འདོན་འདོད་ཡོད། འཐུས་མི་ཚོགས་པས་ཀྱང་བོད་དུ་མང་ཙམ་ཕེབས་པ་དང་མང་ཙམ་གཟིགས་ཏེ་མཛེས་སྡུག་དང་། དར་རྒྱས། སྒོ་དབྱེ། ཡར་ཐོན་བཅས་ཀྱི་བོད་ལྗོངས་ཕྱོགས་ཡོངས་དང་། དངོས་ཡོད། ཇི་མ་ཇི་བཞིན་བཅས་ཀྱི་སྒོ་ནས་ནེ་པ་ལའི་རྒྱལ་ནང་གི་དམངས་ཚོགས་དང་རྒྱལ་སྤྱིའི་སྤྱི་ཚོགས་ལ་ངོ་སྤྲོད་བྱེད་རྒྱུའི་རེ་བ་ཡོད་ཅེས་གསུངས་པ་རེད།

པཱ་ཐ་ལའེ་དབྱི་ཡིས། ནེ་པ་ལ་དང་ཀྲུང་གོའི་དབར་སྲོལ་རྒྱུན་མཛའ་གྲོགས་ཟབ་པ་དང་སོ་དང་མཆུ་ཏོ་གཅིག་ལ་གཅིག་བརྟེན་བཞིན་རྒྱལ་ཁབ་གཉིས་པོའི་འབྲེལ་བར་དུས་ཚོད་ཀྱི་ཚོད་བགམ་ཐེག་ཡོད་པས། ཀྲུང་གོ་ནི་ནེ་པ་ལའི་བློས་འགེལ་ཆོག་པའི་མཉམ་ལས་རོགས་ཟླ་ཞིག་ཡིན། ནེ་པ་ལ་ཕྱོགས་ཀྱིས་ཀྲུང་གོ་གཅིག་གི་རྩ་དོན་བློ་བརྟན་འགྱུར་མེད་ངང་ལག་ལེན་བསྟར་ནས་ཀྲུང་གོ་དང་མཛའ་གྲོགས་མཉམ་ལས་ཀྱི་འབྲེལ་བ་འཕེལ་རྒྱས་གཏོང་བར་ཚད་མཐོའི་མཐོང་ཆེན་དང་ཀྲུང་གོའི་བོད་རང་སྐྱོང་ལྗོངས་དང་སྤེལ་རེས་འགྲོ་འོང་བྱེད་པར་ཚད་མཐོའི་མཐོང་ཆེན་བྱེད་ཀྱི་ཡོད། ཀྲུང་གོའི་བོད་རང་སྐྱོང་ལྗོངས་ཀྱིས་དུས་ཡུན་རིང་པོའི་ནང་ནེ་པ་ལ་དང་ལྷག་པར་དུ་ནེ་པ་ལའི་བྱང་རྒྱུད་ས་ཁུལ་གྱི་དཔལ་འབྱོར་དང་སྤྱི་ཚོགས་འཕེལ་རྒྱས་ལ་རྒྱབ་སྐྱོར་དང་རོགས་རམ་བྱས་པར་ཐུགས་རྗེ་ཆེ་ཞུ་རྒྱུ་ཡིན་ལ། སླད་ཕྱིན་ཞིང་ལས་དང་། ཚོང་དོན། ཡུལ་སྐོར་སོགས་ཁྱབ་ཁོངས་སུ་སྔར་བས་དངོས་སྒྲུབ་མཉམ་ལས་བྱས་ནས་ཐུན་མོང་ཐོག་དར་རྒྱས་གོང་འཕེལ་ཡོང་བའི་རེ་སྒུག་བྱེད་ཀྱི་ཡོད་ཅེས་གསུངས་པ་རེད།