མི་ཐབས་ཀྱིས་གནམ་གཤིས་འགྱུར་གཏོང་ལས་ཀ་ནི་རིམ་ཁག་སྲིད་གཞུང་གི་འགོ་ཁྲིད་འོག་སྤེལ་བའི་ས་གནས་གནམ་གཤིས་ཀྱི་བྱ་གཞག་སྤྱི་ལ་ཕན་པ་ཞིག་དང་། རང་ལྗོངས་སུ་གནོད་འཚེ་སྔོན་འགོག གནོད་འཚེ་ཉུང་གཏོང་། གེགས་སེལ་ཕན་འདོགས། འབྲུ་རིགས་ཐོན་སྐྱེད་ལ་འགན་སྲུང་། སྣོད་བཅུད་ཁོར་ཡུག་ལ་སྲུང་སྐྱོང་བྱེད་པའི་བྱ་ཐབས་གལ་ཆེན་ཞིག་ཀྱང་ཡིན། བོད་རང་སྐྱོང་ལྗོངས་2024ལོའི་མི་ཐབས་ཀྱིས་གནམ་གཤིས་འགྱུར་གཏོང་ལས་སྒོ་ད་ལྟ་ཁྱོན་ཡོངས་ནས་སྤེལ་བཞིན་ཡོད། ལས་སྒོ་དེ་བདེ་འཇགས་དང་ལས་ཆོད་ཆེ་བར་འགན་ལེན་ཡོང་ཆེད《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་གནམ་གཤིས་བཅའ་ཁྲིམས》རྒྱལ་སྲིད་སྤྱི་ཁྱབ་ཁང་གི《མི་ཐབས་ཀྱིས་གནམ་གཤིས་འགྱུར་གཏོང་དོ་དམ་སྲོལ་ཡིག》དང《བོད་རང་སྐྱོང་ལྗོངས་མི་ཐབས་ཀྱིས་གནམ་གཤིས་འགྱུར་གཏོང་དོ་དམ་བྱ་ཐབས》ཀྱི་འབྲེལ་ཡོད་གཏན་འབེབས་ལ་གཞིགས་ནས་སྤྱི་བསྒྲགས་གཤམ་གསལ་ལྟར།

དང་པོ། 2024ལོའི་ཟླ་5པའི་ཚེས་1ནས་2024ལོའི་ཟླ་12པའི་ཚེས་31བར་དུ་རང་ལྗོངས་ཁུལ་གྱི་ལྷ་ས་གྲོང་ཁྱེར་དང་གཞིས་རྩེ་གྲོང་ཁྱེར། ལྷོ་ཁ་གྲོང་ཁྱེར། ཆབ་མདོ་གྲོང་ཁྱེར། མངའ་རིས་ས་ཁུལ། ཉིང་ཁྲི་གྲོང་ཁྱེར། ནག་ཆུ་གྲོང་ཁྱེར་བཅས་སུ་དུས་འོས་འཚམ་སྐབས་ལ་མི་ཐབས་ཀྱིས་སེར་འགོག ཆར(གངས)འབེབས། ནགས་ཚལ་གྱི་མེ་གསོད། གལ་ཆེའི་སྤྱི་ཚོགས་བྱེད་སྒོར་འགན་སྲུང་སོགས་མི་ཐབས་ཀྱིས་གནམ་གཤིས་འགྱུར་གཏོང་ལས་སྒོ་སྤེལ་རྒྱུ་ཡིན་པས། ས་གནས་དེ་གའི་རིམ་ཁག་སྲིད་གཞུང་གིས་མི་ཐབས་ཀྱིས་གནམ་གཤིས་འགྱུར་གཏོང་ལས་ཀའི་བདེ་འཇགས་ཀྱི་དྲིལ་བསྒྲགས་དང་སློབ་གསོ་སོགས་འབྲེལ་ཡོད་ལས་ཀ་ལེགས་སྒྲུབ་ཡོད་པར་ཞུ། རྒྱ་ཆེའི་མང་ཚོགས་ཚོས་ཀྱང་ཕན་ཚུན་བརྒྱུད་བཤད་ཡོད་པར་ཞུ།

གཉིས་པ། མི་ཐབས་ཀྱིས་གནམ་གཤིས་འགྱུར་གཏོང་ལས་སྒོ་སྤེལ་སྐབས་སྤྱོད་པའི་ལག་ཆ་མེ་ཤུགས་འཕུར་མདའ་དང་གནམ་སྒྱོགས་ནི་མེ་འབར་སླ་བ་དང་འབར་གས་བྱེད་སླ་བའི་དངོས་རྫས་ཡིན་སྟབས་ལས་སྒྲུབ་ས་གནས་དང་དེའི་ཉེ་འཁོར་ལ་འབྲེལ་མེད་མི་སྣ་དང་ཕྱུགས་རིགས་འཛུལ་མི་ཆོག ལྷག་པར་དུ་ལས་སྒྲུབ་ཤུགས་རྐྱེན(མདེལ་ལྷུང)ཁུལ་ནང་གི་ལས་ཁུངས་སམ་མི་སྒེར་གྱིས་མདེའུ་ཡི་འབར་རོ་རྙེད་ཚེ་ཁྱེད་དང་མི་གཞན་གྱི་བདེ་འཇགས་ཆེད་དུ་རང་དགར་འབར་རོ་དེ་དག་རྡུང་བ་དང་བཤིག་པ། རྩེད་མོ་རྩེ་བ། སྦས་སྐུང་བྱེད་པའམ་ཡང་ན་བརྒྱུད་འཚོང་མི་བྱེད་པར་ཐག་གཅོད་འོས་འཚམ་ཡོང་ཆེད་མགྱོགས་མྱུར་ངང་ས་གནས་དེ་གའི་སྲིད་གཞུང་དང་སྤྱི་བདེ་ལས་ཁུངས་ལ་སྙན་ཞུ་བྱེད་པ་དང། ས་གནས་དེ་གའི་གནམ་གཤིས་ལས་ཁུངས་སམ་ཞིང་འབྲོག་ཅུས་ལ་འབྲེལ་གཏུགས་བྱེད་དགོས།

གསུམ་པ། མི་ཐབས་ཀྱིས་གནམ་གཤིས་འགྱུར་གཏོང་ལས་སྒོ་སྤེལ་སྐབས་ལས་འཛོལ་ཐོན་ཚེ་དུས་ཐོག་ཏུ་དོན་རྐྱེན་ལ་ཐག་གཅོད་ཡོང་ཆེད་མགྱོགས་མྱུར་དུ་ས་གནས་དེ་གའི་སྲིད་གཞུང་དང་སྤྱི་བདེ་ལས་ཁུངས་ཡང་ན་གནམ་གཤིས་ལས་ཁུངས་སམ་ཞིང་འབྲོག་ཅུས་ལ་སྙན་ཞུ་ཕུལ་ཏེ་དོན་རྐྱེན་ཐོན་སའི་ཡུལ་དངོས་སྲུང་སྐྱོབ་ཡག་པོ་བྱེད་དགོས།

བཞི་པ། གོང་གསལ་སྤྱི་བསྒྲགས་ཀྱི་ནང་དོན་ལས་འགལ་ཚེ་འབྲེལ་ཡོད་གཏན་འབེབས་ལྟར་དོ་བདག་གི་འགན་འཁྲི་རྩད་གཅོད་བྱ་རྒྱུ་ཡིན། དེ་ལས་བྱུང་བའི་དོན་རྐྱེན་གྱི་འགན་འཁྲི་ཐམས་ཅད་རང་ཉིད་ཀྱིས་འཁུར་དགོས་པ་དང་དེས་རྒྱལ་ཁབ་དང་མི་གཞན་ལ་དོན་རྐྱེན་དང་གྱོང་གུན་བཟོས་ཚེ་དཔལ་འབྱོར་དང་ཁྲིམས་ལུགས་ཀྱི་ཐོག་ནས་འགན་འཁྲི་རྩད་གཅོད་གཏོང་རྒྱུ་ཡིན།

འབྲེལ་གཏུགས་ཁ་པར། བོད་རང་སྐྱོང་ལྗོངས་མི་ཐབས་ཀྱིས་གནམ་གཤིས་འགྱུར་གཏོང་འགོ་ཁྲིད་ཚོགས་ཆུང་གཞུང་ལས་ཁང(0891-6331552)

དེ་དོན་ཆེད་དུ་སྤྱིར་བསྒྲགས།

བོད་རང་སྐྱོང་ལྗོངས་མི་ཐབས་ཀྱིས་གནམ་གཤིས་འགྱུར་གཏོང་འགོ་ཁྲིད་ཚོགས་ཆུང་གཞུང་ལས་ཁང་།

2024ལོར།