ཁྲེན་ཡུང་ཆིས་སྲིད་གཞུང་གི་ཆེད་དོན་ཚོགས་འདུ་གཙོ་སྐྱོང་གནང་བ།
ཟླ་3ཚེས་22ཉིན། རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་དང་རང་སྐྱོང་ལྗོངས་ཀྱི་རྒྱུན་ལས་ཀྲུའུ་ཞི་གཞོན་པ་ཁྲེན་ཡུང་ཆིས་སྲིད་གཞུང་གི་ཆེད་དོན་ཚོགས་འདུ་གཙོ་སྐྱོང་གནང་ནས་རང་སྐྱོང་ལྗོངས་ཀྱི་འདི་ལོའི་དགུན་ཁ་དང་སང་ལོའི་དཔྱིད་ཀའི་གློག་མཁོ་སྤྲོད་འགན་ལེན་ཇུས་གཞིའི་གནས་ཚུལ་སྙན་སེང་གསན་ཏེ་ལྗོངས་ཡོངས་ཀྱི་གློག་ཤུགས་མཁོ་སྤྲོད་འགན་ལེན་ལས་དོན་ལ་བསྐྱར་དུ་ཞིབ་འཇུག་དང་བཀོད་སྒྲིག་གནང་ཡོད། རང་སྐྱོང་ལྗོངས་ཀྱི་འགོ་ཁྲིད་རེན་ཝེ་དང་། ལང་ཧྥུའུ་ཁོན། ཝེ་ཤིའུ་ཁྲང་བཅས་ཚོཊ་འདུར་ཞུཊ་ཡོད་པ་རེད།
ཁྲེན་ཡུང་ཆིས་ནུས་རྒྱུ་འགན་ལེན་དང་བདེ་འཇགས་ཡོང་བ་ནི་རྒྱལ་ཁབ་ཀྱི་དོན་ཆེན་དང་ལྗོངས་ཡོངས་ཀྱི་དོན་ཆེན་ཡིན་པས་དཔལ་འབྱོར་དར་རྒྱས་གོང་འཕེལ་དང་། མི་དམངས་ཀྱི་འཚོ་བ་ལེགས་སུ་གཏོང་བ། སྤྱི་ཚོགས་ཡུན་རིང་བདེ་འཁོད་བཅས་ཡོང་བར་གལ་འགངས་ཆེན་པོ་ཡིན། རིམ་པ་ཁག་དང་སྡེ་ཚན་ཁག་གིས་ཆབ་སྲིད་ཀྱི་ཚུགས་གནས་སྔར་བས་མཐོ་རུ་བཏང་ནས་བསམ་བློ་དང་བྱ་སྤྱོད་ཏང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་གི་ཐབས་ཇུས་བཀོད་སྒྲིག་དང་རང་སྐྱོང་ལྗོངས་ཏང་ཨུད་དང་སྲིད་གཞུང་གི་ལས་དོན་བཀོད་སྒྲིག་ཐོག་གཅིག་གྱུར་ཏན་ཏིག་ཡོང་བར་བྱས་ནས་ལས་ཀའི་དགོས་གཏུགས་ཀྱི་བསམ་པ་དང་། འགན་འཁྲིའི་བསམ་པ། ལས་འགན་སྒྲུབ་སེམས་བཅས་ཆེ་རུ་ཏན་ཏིག་བཏང་སྟེ་མི་དམངས་ལྟེ་བར་འཛིན་པའི་འཕེལ་རྒྱས་ཀྱི་བསམ་བློ་བརྟན་པོ་འཛུགས་པ་དང་། “དོན་ཆེན་བཞིར”དམིགས་པ་དང “འཛུགས་གཏོད་བཞིར”ཤུགས་རྒྱག་པ། བོད་ཀྱི་དོན་དངོས་ལ་གཞི་ཚུགས་པ་བཅས་བྱས་ནས་ལྗོངས་ཡོངས་ཀྱི་ས་གནས་ཁག་གིས་འདི་ལོའི་དགུན་ཁ་དང་སང་ལོའི་དཔྱིད་ཀའི་གློག་མཁོ་སྤྲོད་དགོས་མཁོའི་འབྲེལ་བར་སྔ་སྣུར་དུ་ཕྱོགས་བསྡུས་ངང་བརྡར་ཤ་བཅད་དེ་ཚན་རིག་དང་མཐུན་ཞིང་ལུགས་མཐུན་ངང་གློག་མཁོ་སྤྲོད་འགན་ལེན་རྣམ་གྲངས་ཀྱི་གཞི་ཁྱོན་གཏན་འཁེལ་བཟོས་ནས། ལྗོངས་ཡོངས་སུ་གློག་སྤྱོད་མང་བའི་དགུན་དུས་ཀྱི་གློག་མཁོ་སྤྲོད་འགན་ལེན་ལ་འགོ་ཡག་པོ་འཛུགས་པ་དང་རང་འགུལ་གྱི་དམག་འཐབ་ཡག་པོ་བརྒྱབ་ནས་གློག་མཁོ་སྤྲོད་འགན་ལེན་དང་དམངས་འཚོའི་ནུས་རྒྱུ་བེད་སྤྱོད་ཀྱི་བདེ་འཇགས་མཐའ་ཚད་མཐའ་གཅིག་ཏུ་བརྟན་པོ་བསྲུངས་ཏེ། སྤུས་ཚད་མཐོ་བའི་འཕེལ་རྒྱས་དང་ཆུ་ཚད་མཐོ་བའི་བདེ་འཇགས་རྒྱུན་འཁོར་མཉམ་འགུལ་ཡོང་བར་སྐུལ་འདེད་གཏོང་དགོས་ཞེས་གསུངས་པ་རེད།
ཁྲེན་ཡུང་ཆིས། གཙོ་གནད་ས་ཁོངས་དང་། གཙོ་གནད་ལྷུ་ཚིགས། གཙོ་གནད་དུས་མཚམས་བཅས་ལ་དམ་པོར་དམིགས་ཏེ། གློག་ཁུངས་ས་ཚིགས་འཛུགས་སྐྲུན་གྱི་བཀོད་པ་ཚན་རིག་དང་མཐུན་ཞིང་ལུགས་མཐུན་ངང་ལེགས་སུ་བཏང་ནས་ཆུ་གློག་འཚམ་སར་ཆུ་གློག་དང་། རླུང་གློག་འཚམ་སར་རླུང་གློག ཉི་གློག་འཚམ་སར་ཉི་གློག་སྤྱོད་རྒྱུ་མཐའ་འཁྱོངས་བྱས་ཏེ་སྔོན་ཐོན་ལག་རྩལ་དང་བཟོ་རྩལ་སྤྱད་དེ་ཡུལ་བབ་དང་བསྟུན་ནས་འོད་ཤུགས་དང་། དྲ་རྒྱ་རྒྱ་ཆེར་འཛུགས་པའི་གསོག་ནུས། འོད་ཤུགས་དང་ཚ་ནུས་གཞི་གཅིག་ཅན་སོགས་ནུས་རྒྱུ་གསར་པ་མཁོ་སྤྲོད་འགན་ལེན་རྣམ་གྲངས་འཕེལ་རྒྱས་བཏང་ནས་མཆན་བཀོད་བཀའ་ལན་བཀོད་ཟིན་པའི་གློག་ཁུངས་དང་མཐུད་འབྲེལ་གློག་དྲའི་རྣམ་གྲངས་འཛུགས་སྐྲུན་གང་མགྱོགས་དང་དུས་གཅིག་ཏུ་སྤྱོད་ཐུབ་པར་འགན་ལེན་ཏན་ཏིག་བྱས་ཏེ། གློག་ཁུངས་མཁོ་སྤྲོད་འགན་ལེན་གྱི་ནུས་པ་ཕྱོགས་ཡོངས་ནས་མཐོ་རུ་གཏོང་དགོས་པ་དང་། གློག་དྲའི་སྒྲོམ་གཞི་འཛུགས་སྐྲུན་ལ་མུ་མཐུད་སྐུལ་འདེད་བཏང་སྟེ་གློག་དྲ་ཆེན་པོའི་ཐོན་ཁུངས་བཀོད་སྒྲིག་མི་འདང་བ་དང་ས་ཁུལ་འགའི་གློག་དྲའི་འཇུར་མིག་སོགས་ཀྱི་གནད་དོན་གཙོ་གནད་ཐོག་ཐག་གཅོད་བྱས་ནས་གྲོང་གསེབ་གློག་དྲ་སྒྱུར་བཀོད་བྱེད་ཤུགས་ཆེ་རུ་གཏོང་བ་དང་། གློག་དྲ་བེད་སྤྱོད་བྱེད་སྟངས་ལེགས་སུ་གཏོང་བ། གློག་དྲ་ནས་གློག་གཏོང་གློག་འཐེན་བརྟན་པོ་ཡོང་བར་བྱས་ཏེ། རིམ་ཁག་གློག་དྲས་གློག་མཁོ་སྤྲོད་ཀྱི་འགན་ལེན་ནུས་པ་ཆེ་རུ་གཏོང་དགོས། ལྗོངས་ཡོངས་ཀྱི་ནུས་རྒྱུ་དང་ནུས་ཁུངས་ལུགས་མཐུན་གསར་སྤེལ་ལ་སྤྱི་འདོམས་བྱས་ཏེ་རྟེན་གཞིས་གསར་སྤེལ་ཕྱིར་གཏོང་དང་ནང་མཁོ་མཁོ་སྤྲོད་འགན་ལེན་ཟུང་འབྲེལ་རྣམ་གྲངས་ཀྱི་བྱེད་སྟངས་བརྒྱུད་རྟེན་གཞིའི་གསར་སྤེལ་བྱེད་པོས་སྤྱི་ཚོགས་ལ་མཁོ་སྤྲོད་འགན་ལེན་གྱི་འགན་འཁྲི་འཁུར་རྒྱུར་ཁྲིད་སྟོན་བྱེད་དགོས། ནུས་རྒྱུ་མཁོ་སྤྲོད་འགན་ལེན་གྱི་མཐུན་སྦྱོར་ལམ་སྲོལ་འཛུགས་པ་དང་འཐུས་སྒོ་ཚང་དུ་བཏང་ནས་དེ་མཚུངས་ཀྱི་ཇུས་གཞི་བཟོས་ཏེ་འགན་འཁྲིའི་ལས་ཀ་ཁག་བགོས་དང་། ལས་འགན་གཙོ་བོ། དུས་ཚོད་ཀྱི་གོ་རིམ་བཀོད་སྒྲིག་བཅས་ཁ་གསལ་བཟོས་ཏེ། ཕྱོགས་ཁག་གི་འགན་འཁྲི་ནན་དུ་ཏན་ཏིག་བཏང་ནས་རྒྱུན་གཏན་གྱི་ལས་ཀ་བཀོད་གཏོང་ལ་དམ་འཛིན་ནན་པོ་བྱས་ཏེ། སྲིད་གཞུང་གི་སྡེ་ཚན་དང་ཁེ་ལས་དབར་འབྲེལ་གཏུག་མཐུན་སྦྱོར་བྱེད་ཤུགས་ཆེ་རུ་བཏང་ནས་ལས་ཀའི་མཉམ་ཤུགས་ཆགས་པར་བྱས་ཏེ། ལྗོངས་ཡོངས་ཀྱི་དམངས་འཚོ་དང་ཐོན་སྐྱེད་ཀྱི་གློག་སྤྱོད་ལ་འགན་ལེན་མཐའ་གཅིག་ཏུ་བྱས་ནས། གློག་བདེ་འཇགས་ངང་མཁོ་སྤྲོད་ལ་འགན་ལེན་ཏན་ཏིག་བྱེད་པར་བརྟེན་ནས་བོད་ཡུན་རིང་བདེ་འཁོད་དང་སྤུས་ཚད་མཐོ་བའི་འཕེལ་རྒྱས་ལ་རམ་འདེགས་ཏན་ཏིག་བྱེད་དགོས་པའི་ནན་བཤད་གནང་བ་རེད།