ལིའུ་ཅང་གིས་ལྷ་ས་གྲོང་ཁྱེར་དུ་ལྟ་སྐུལ་མཛུབ་ཁྲིད་དང་ཞིབ་བཤེར་གནང་བ།
ཉེ་ཆར། རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་དང་སྲིད་ཁྲིམས་ཨུ་ལྷན་གྱི་ཧྲུའུ་ཅི་ལིའུ་ཅང་ལྷ་ས་གྲོང་ཁྱེར་སྣེའུ་སྤྱི་བདེའི་རིམ་པ་དང་པོའི་ཕྱོགས་བསྡུས་ཞིབ་བཤེར་ས་ཚིགས་དང་། ཁྲེང་ཀོན་ཆུས་ཀུན་བདེ་གླིང་མངགས་གཏོང་ཁང་། ཐེན་ཧའེ་མཚན་ཁྲོམ་སོགས་ལ་ཕེབས་ནས་སྤྱི་ཚོགས་བརྟན་ལྷིང་དང་བདེ་འཇགས་ཐོན་སྐྱེད་ཀྱི་ལས་ཀའི་གནས་ཚུལ་ལ་ལྟ་སྐུལ་མཛུབ་ཁྲིད་དང་ཞིབ་བཤེར་གནང་བ་རེད།
ཀྲང་ཧུང་པོ་ལྷན་དུ་ཕེབས་ཡོད་པ་རེད།
ལིའུ་ཅང་སྣེའུ་སྤྱི་བདེའི་རིམ་པ་དང་པོའི་ཕྱོགས་བསྡུས་ཞིབ་བཤེར་ས་ཚིགས་སུ་ཕེབས་ནས་བདེ་འཇགས་ཞིབ་བཤེར་དང་ཤར་བགྲོད་ཀྱི་བྱ་ཐབས་དོན་འཁྱོལ་བྱས་ཚུལ་ལ་མཁྱེན་རྟོགས་ཞིབ་ཕྲ་གནང་ཞིང་། ཁོང་གིས་སྣེའུ་སྤྱི་བདེའི་རིམ་པ་དང་པོའི་ཕྱོགས་བསྡུས་ཞིབ་བཤེར་ས་ཚིགས་ནི་གྲོང་ཁྱེར་དུས་བདེ་བརྟན་ལྷིང་ཡོང་བའི་འགོག་སྲུང་འཛིང་རགས་ཤིག་ཡིན་ལ། བོད་ལྗོངས་ཀྱི་སྒོ་དབྱེ་འཕེལ་རྒྱས་ཀྱི་རྣམ་པ་བཟང་པོ་མངོན་པར་བྱེད་པའི་སྐར་ཁུང་གལ་ཆེན་ཞིག་ཀྱང་ཡིན་པས། མི་གཤིས་ཅན་གྱི་བྱེད་ཐབས་ལ་བརྟེན་ནས་གྲོང་ཁྱེར་དུ་འོང་བའི་མི་དང་། རླངས་འཁོར། དངོས་ཟོག་བཅས་ཀྱི་བདེ་འཇགས་ཞིབ་བཤེར་གྱི་ལས་དོན་ཡག་པོ་བསྒྲུབས་ཏེ་སེམས་རྩ་འཁོལ་པོས་ཞབས་འདེགས་ཞུ་བ་དང་། ཡ་རབས་ཁྲིམས་སྒྱུར་གྱིས་བདེ་འཇགས་ཞིབ་བཤེར་བྱེད་ཚད་སྔར་བས་མགྱོགས་པ་དང་། ཤར་བགྲོད་སྔར་བས་སྟབས་བདེ་བ། དོ་དམ་དང་ཚོད་འཛིན་སྔར་བས་གནད་འཁེལ་བཅས་ཡོང་བར་བྱེད་དགོས་ཞེས་གསུངས།
ཐེན་ཧའེ་མཚན་ཁྲོམ་དུ་ལིའུ་ཅང་གིས་བདེ་འཇགས་ཐོན་སྐྱེད་དང་གཉེར་སྐྱོང་དོ་དམ་སོགས་ཀྱི་གནས་ཚུལ་མཁྱེན་རྟོགས་ཞིབ་ཕྲ་གནང་ཞིང་། ཁོང་གིས། བདེ་འཇགས་ཀྱི་འགན་འཁྲི་རི་བོ་ཐའེ་ཧྲན་ལས་ལྕི་བ་ཡོད་པས། མི་དམངས་གོང་དུ་བཀུར་བ་དང་ཚེ་སྲོག་གོང་དུ་བཀུར་བ་མཐའ་འཁྱོངས་བྱས་ནས་དུས་དང་རྣམ་པ་ཀུན་ཏུ་བདེ་འཇགས་ཐོན་སྐྱེད་ཀྱི་རྩ་བ་དམ་པོར་བཟུང་སྟེ། བཟའ་བཅའི་བདེ་འཇགས་དང་མེ་ཟོན་བདེ་འཇགས་ལ་ཞིབ་བཤེར་བྱེད་ཤུགས་དང་། མངོན་མེད་རྐྱེན་ངན་གྲལ་བཤེར་དང་བཅོས་སྒྲིག་བྱེད་ཤུགས། ཁྲོམ་ར་ལྟ་འདོམས་ཀྱི་ཕན་ནུས་བཅས་ཆེ་རུ་བཏང་སྟེ། བདེ་འཇགས་ཐོན་སྐྱེད་ཀྱི་མཐའ་ཚད་བརྟན་པོ་བསྲུངས་ནས་མི་དམངས་མང་ཚོགས་ཀྱི་ཚེ་སྲོག་དང་རྒྱུ་ནོར་གྱི་བདེ་འཇགས་ལ་འགན་ལེན་བྱེད་དགོས་ཞེས་གསུངས།
ཀུན་བདེ་གླིང་མངགས་གཏོང་ཁང་དུ་ཕེབས་སྐབས། ལིའུ་ཅང་གིས་ས་གནས་ས་ཐོག་ཏུ་གཞི་རིམ་གྱི་རྨང་གཞིའི་འཛུགས་སྐྲུན་དང་ལས་རེས་དང་ལས་སྒྲུབ་གྲ་སྒྲིག་གི་གནས་ཚུལ་མཁྱེན་རྟོགས་གནང་ཞིང་། ཁོང་གིས། མངགས་གཏོང་ཁང་ནི་བདེ་འཇགས་བརྟན་ལྷིང་སྲུང་སྐྱོང་གི་ཆེས་མདུན་གྲལ་གྱི་གཡུལ་ས་དང་མང་ཚོགས་ལ་འབྲེག་གཏུག་ཞབས་འདེགས་ཞུ་བའི་འཐབ་ས་དང་པོར་གནས་པས། ཏང་འཛུགས་སྐྱོང་གིས་གཞི་རིམ་བཅོས་སྐྱོང་ལ་སྣེ་འཁྲིད་རྒྱུ་མཐའ་འཁྱོངས་ཀྱིས་མངགས་གཏོང་ཁང་གི་ལས་ཀ་སྡེ་ཁུལ་གྱི་གཞི་རིམ་བཅོས་སྐྱོང་དང་མཉམ་འདྲེས་ཟབ་མོ་ཡོང་བར་བྱས་ནས། འགག་སྒོ་མདུན་དུ་སྤོ་བ་དང་། འབྱུང་རྩ་ནས་བཅོས་སྐྱོང་། གཞི་གཅིག་མཉམ་འགུལ། ནུས་ཆེ་མཐུན་སྦྱོར་བཅས་ཀྱི་སྒོ་ནས་སྤྱི་ཚོགས་ངོས་ཀྱི་སྐོར་གཡེང་དང་ཚོད་འཛིན་ནན་དུ་གཏོང་བ་དང་། བདེ་འཇགས་སྒྲིག་ལམ་ལ་སྲུང་སྐྱོང་བྱེད་ཤུགས་ཆེ་རུ་གཏོང་བ། འགལ་བ་དང་རྩོད་གཞི་སེལ་ཤུགས་ཆེ་རུ་གཏོང་བ་བཅས་བྱས་ནས་ཉེན་ཁ་སྣ་ཚོགས་ལ་ནུས་ཤུགས་ཡོད་རྒུས་འགོག་ཟོན་བྱེད་དགོས་ཞེས་གསུངས།
བརྟག་ཞིབ་གནང་རིང་། ལིའུ་ཅང་གིས་ཉེན་བརྡ་རྒྱུན་སྒྲོག་དང་རྒྱུན་དུ་དོགས་ཟོན་མཐའ་འཁྱོངས་བྱས་ནས་དཀའ་ངལ་དང་ཞན་ཆ་བསལ་ཏེ་བརྟན་ལྷིང་སྲུང་སྐྱོང་གི་ལས་དོན་དུས་རྒྱུན་དང་གཞི་རིམ་དུ་སྒྲུབ་དགོས་པ་དང་། བརྟན་ལྷིང་སྲུང་སྐྱོང་གི་འགན་འཁྲི་དང་བརྟན་ལྷིང་སྲུང་སྐྱོང་གི་བྱ་ཐབས་དོན་འཁྱོལ་ནན་པོ་བྱས་ཏེ། “དུས་དང་རྣམ་པ་ཀུན་ཏུ་གནས་བཟོད་མི་བདེ་བའི”འགན་འཁྲིའི་སེམས་པ“ལས་དོན་ཚང་མ་དོན་ཐོག་ཏུ་འཁྱོལ་བའི”ལག་ལེན་བསྟར་ནུས་སུ་བསྒྱུར་ཏེ། ཆུ་ཚད་མཐོ་བའི་བདེ་འཇགས་ལ་བརྟེན་ནས་ཡུན་རིང་བདེ་འཁོད་དང་སྤུས་ཚད་མཐོ་བའི་འཕེལ་རྒྱས་ཡོང་བར་འགན་ལེན་བྱེད་དགོས་པའི་ནན་བཤད་གནང་བ་རེད།