དཔྱིད་གསར་དུས་ཆེན་དང་བོད་ཀྱི་ལོ་གསར་གྱི་སྔ་ནུབ་ཏུ་ལྗོངས་ཏང་ཨུད་ཀྱི་རྒྱུན་ཨུ་རང་སྐྱོང་ལྗོངས་ཀྱི་རྒྱུན་ལས་ཀྲུའུ་ཞི་གཞོན་པ་རེན་ཝེས་ཧྲུའུ་ཅི་ཝང་ཅུན་ཀྲེང་དང་ཀྲུའུ་ཞི་ཡན་ཅིན་ཧའེ་ཡི་མངགས་བཅོལ་ལྟར་རང་སྐྱོང་ལྗོངས་ཏང་ཨུད་དང་སྲིད་གཞུང་གི་ཚབ་ཞུས་ཏེ་ཟླ་2ཚེས་6ཉིན་དམངས་སྲིད་ཐིང་དང་། རང་སྐྱོང་ལྗོངས་དབང་སྐྱོན་དྲག་སྐྱེད་ཞབས་ཞུ་ལྟེ་གནས། ལྷ་ས་གྲོང་ཁྱེར་སྤྱི་བདེ་ཅུས། རྒྱལ་ཁབ་གློག་དྲ་ལྷ་ས་གློག་གཏོང་ཀུང་སིའི་གྲོང་ཁུལ་གྱི་གློག་མཁོ་འདོན་ཞབས་ཞུ་ལྟེ་གནས་བཅས་ཀྱི་དཀའ་ངལ་ཡོད་པའི་མང་ཚོགས་དང་། དམིགས་བསལ་ཚོགས་སྤྱི། གཞི་རིམ་གྱི་ལས་བྱེད་ལས་བཟོ། གཞུང་དོན་དུ་དབང་པོར་སྐྱོན་ཤོར་བ་དང་རྐྱེན་ལམ་དུ་ཤོར་བའི་སྤྱི་བདེ་ལས་བྱེད་ཉེན་རྟོག་པའི་ནང་མི་བཅས་ལ་གཟིགས་པ་དང་འཚམས་འདྲི་གནང་ནས་ཏང་དང་སྲིད་གཞུང་གི་ཐུགས་ཁུར་དང་བྱམས་སྐྱོང་གནང་ལུགས་མཚོན་པར་བྱས་པ་མ་ཟད། དུས་ཆེན་གྱི་སྨོན་འདུན་བཟང་པོ་ཡང་ཞུས་པ་རེད།

རེན་ཝེས་དམངས་སྲིད་ཐིང་དང་རང་སྐྱོང་ལྗོངས་དབང་སྐྱོན་དྲག་སྐྱེད་ཞབས་ཞུ་ལྟེ་གནས་སུ་འཚམས་འདྲི་བྱེད་སྐབས། དཀའ་ངལ་ཡོད་པའི་མང་ཚོགས་དང་དཀའ་ངལ་ཡོད་པའི་ལས་བཟོའི་ཁྲོད་དུ་རྟག་ཏུ་བསྐྱོད་དེ་ཁོང་ཚོའི་སྙིང་གཏམ་ཉན་ནས་སློབ་གསོ་དང་། སྨན་བཅོས། སྤྱི་ཚོགས་འགན་སྲུང་སོགས་མང་ཚོགས་ཀྱི“འཕྲལ་མཁོ་དང་། དཀའ་ངལ། སེམས་ཁྲལ། རེ་སྒུག”བཅས་ཀྱི་གནད་དོན་ནུས་ཤུགས་ཡོད་རྒུས་ཐག་གཅོད་བྱས་ཏེ། དཀའ་ངལ་ཡོད་པའི་མང་ཚོགས་དང་དམིགས་བསལ་ཚོགས་སྤྱི་ཚུད་པའི་མི་རིགས་ཁག་གི་མང་ཚོགས་ལ་སྤུས་ཚད་མཐོ་བའི་འཕེལ་རྒྱས་ཀྱི་གྲུབ་འབྲས་མཉམ་སྤྱོད་ཐུབ་པར་བྱེད་དགོས། ལྷ་ས་གྲོང་ཁྱེར་སྤྱི་བདེ་ཅུས་ལ་འཚམས་འདྲི་བྱེད་སྐབས། སྤྱི་བདེ་ཁོངས་གཏོགས་ཀྱིས་དུས་ཡུན་རིང་པོར་མི་དམངས་ཀྱི་ཚེ་སྲོག་དང་རྒྱུ་ནོར་བདེ་འཇགས་ལ་སྲུང་སྐྱོང་བྱ་ཆེད་ལེགས་སྐྱེས་ཕུལ་བར་ཐུགས་རྗེ་ཆེ་ཞུས་པ་མ་ཟད། དུས་དང་རྣམ་པ་ཀུན་ཏུ་བདེ་འཇགས་ཀྱི་རྩ་བ་དེ་དམ་པོར་བཟུང་ནས་སྡོད་བྱ་ལས་གྲབས་ནན་པོ་བྱས་ཏེ་སྤྱི་ཚོགས་བརྟན་ལྷིང་དང་བརྟན་ལྷིང་སྲུང་སྐྱོང་བྱེད་དགོས་པའི་བླང་བྱ་ཡང་བཏོན་པ་རེད། རྒྱལ་ཁབ་གློག་དྲ་ལྷ་ས་གློག་གཏོང་ཀུང་སིའི་གྲོང་ཁུལ་གྱི་གློག་མཁོ་འདོན་ཞབས་ཞུ་ལྟེ་གནས་སུ་འཚམས་འདྲི་གནང་སྐབས། གློག་བརྟན་པོ་མཁོ་འདོན་བྱེད་པའི་འགན་འཁྲི་ཡག་པོ་འཁུར་བ་དང་། ཁ་གཏད་གཅོག་ཐབས་ཞིབ་ཕྲ་བཟོས་ནས་གློག་དྲ་བདེ་འཇགས་ངང་འཁོར་སྐྱོད་དང་གློག་ཤུགས་བརྟན་པོ་ཡོང་བར་འགན་ལེན་བྱས་ཏེ་ལྗོངས་ཡོངས་ཀྱི་མི་དམངས་དྲོ་སྐྱིད་དང་། སྤྲོ་སྣང་། འཆམ་མཐུན་བཅས་ཀྱི་སྒོ་ནས་དུས་ཆེན་གཏོང་ཐུབ་པར་འགན་ལེན་བྱེད་དགོས་པའི་ནན་བཤད་བྱས་པ་རེད།