ཡན་ཅིན་ཧའེ་ཡིས་སྲིད་གཞུང་ཏང་ཙུའི་རིགས་པའི་གཞུང་ལུགས་སློབ་སྦྱོང་ལྟེ་བའི་ཚོགས་ཆུང（རྒྱ་ཆེ）གི་སློབ་སྦྱོང་ཚོགས་འདུ་གཙོ་སྐྱོང་གནང་བ།
ཉེ་ཆར། རང་སྐྱོང་ལྗོངས་ཀྱི་ཀྲུའུ་ཞི་དང་རང་སྐྱོང་ལྗོངས་སྲིད་གཞུང་ཏང་ཙུའི་ཧྲུའུ་ཅི་ཡན་ཅིན་ཧའེ་ཡིས་རང་སྐྱོང་ལྗོངས་མི་དམངས་སྲིད་གཞུང་ཏང་ཙུའི་རིགས་པའི་གཞུང་ལུགས་སློབ་སྦྱོང་ལྟེ་བའི་ཚོགས་ཆུང(རྒྱ་ཆེ)གི་སློབ་སྦྱོང་ཚོགས་འདུ་གཙོ་སྐྱོང་གནང་ཞིང་། ཁོང་གིས“གཏན་འཁེལ་གཉིས”ལྷག་བསམ་རྣམ་དག་ངང་སྲུང་སྐྱོང་དང“སྲུང་སྐྱོང་གཉིས”བློ་དཀར་སེམས་དཀར་ངང་ལག་བསྟར་བྱེད་པའི་ཆབ་སྲིད་ཀྱི་མཐོ་ཚད་ནས། ཀྲུང་ཧྭ་མི་རིགས་གཅིག་མཐུན་འདུས་གྲུབ་ཀྱི་འདུ་ཤེས་རང་རྟོགས་ངང་བརྟན་དུ་གཏོང་བ་གཙོ་རྐང་དུ་བྱེད་པ་དང་། “དོན་ཆེན་བཞིར”དམིགས་པ་དང“འཛུགས་གཏོད་བཞིར”ཤུགས་རྒྱག་པ། བོད་ཀྱི་བྱ་གཞག་ཁག་རྒྱུན་ཆད་མེད་པར་གོང་འཕེལ་ཡོང་བར་སྐུལ་འདེད་གཏོང་བ་བཅས་བྱས་ཏེ། མི་རིགས་ཁག་གི་མི་དམངས་མཐུན་སྒྲིལ་འབད་འཐབ་ཀྱི་རྣམ་པ་བཟང་པོ་རྒྱུན་ཆད་མེད་པར་སྲ་བརྟན་དང་འཕེལ་རྒྱས་གཏོང་དགོས་པའི་ནན་བཤད་གནང་བ་རེད།
ཡན་ཅིན་ཧའེ་ཡིས་ནན་བཤད་གནང་དོན། ཀྲུང་ཧྭ་མི་རིགས་གཅིག་མཐུན་འདུས་གྲུབ་ཀྱི་འདུ་ཤེས་བརྟན་དུ་གཏོང་བ་ནི་དུས་རབས་གསར་པའི་ཏང་གི་མི་རིགས་ལས་དོན་གྱི་གཙོ་གནད་ཡིན། ཆབ་སྲིད་ཀྱི་རྨང་གཞི་བརྟན་དུ་བཏང་སྟེ་ཏང་གིས་མི་རིགས་ལས་དོན་ལ་འགོ་ཁྲིད་བྱེད་པ་མཐའ་འཁྱོངས་དང་། མི་རིགས་ས་ཁོངས་རང་སྐྱོང་ལམ་ལུགས་མཐའ་འཁྱོངས། ཏང་གི་མི་རིགས་སྲིད་ཇུས་ལ་ཕྱོགས་ཡོངས་ནས་གོ་བ་ལེན་པ་དང་ལག་ལེན་བསྟར་བ། ཀྲུང་ཧྭ་མི་རིགས་གཅིག་མཐུན་འདུས་གྲུབ་ཀྱི་འདུ་ཤེས་བརྟན་པོ་འཛུགས་པ་ནི་བོད་ཀྱི་ལས་དོན་ཡག་པོ་སྒྲུབ་པའི་ཆེས་རྨང་གཞི་དང་ཕུགས་ཕན་གྱི་གནད་དོན་ཞིག་ཡིན་པའི་ངོས་འཛིན་གཏིང་ཟབ་བྱེད་པ། ཆབ་སྲིད་ཀྱི་རང་རྟོགས་དང་། བསམ་བློའི་རང་རྟོགས། བྱ་སྤྱོད་ཀྱི་རང་རྟོགས་བཅས་རྒྱུན་ཆད་མེད་པར་ཆེ་རུ་གཏོང་བ་བཅས་བྱས་ནས་ཀྲུང་ཧྭ་མི་རིགས་གཅིག་མཐུན་འདུས་གྲུབ་ཀྱི་འདུ་ཤེས་བརྟན་དུ་གཏོང་བའི་ལས་དོན་ཁག་ཡག་པོ་སྒྲུབ་དགོས། དཔལ་འབྱོར་གྱི་རྨང་གཞི་བརྟན་དུ་བཏང་སྟེ་སྤུས་ཚད་མཐོ་བའི་འཕེལ་རྒྱས་དེ་དུས་རབས་གསར་པའི་བསྙོན་མེད་ཀྱི་དོན་དམ་ཞིག་ཏུ་བརྩི་བ་མཐའ་འཁྱོངས་དང་ཀྲུང་གོའི་ལུགས་ཀྱི་དེང་རབས་ཅན་གྱི་དམིགས་ཚད་ལས་འགན་གཏན་འཁེལ་བྱས་ནས། དམངས་འཚོ་ལེགས་གཏོང་དང་མི་སེམས་གཅིག་སྒྲིལ་དེ་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་འགོ་འཛུགས་ས་དང་དོན་ལ་བབས་སར་བརྩིས་ཐོག་འཕེལ་རྒྱས་དོ་མི་མཉམ་ཞིང་གང་ལེགས་མ་བྱུང་བའི་མངོན་གསལ་དོད་པའི་གནད་དོན་ཐག་གཅོད་ནུས་ལྡན་བྱེད་པ་དང་། སྤྱི་པའི་ཞབས་ཞུར་འགན་ལེན་གྱི་ནུས་པ་ཆེ་རུ་དང་ཆུ་ཚད་མཐོ་རུ་རྒྱུན་ཆད་མེད་པར་གཏོང་བ། འཕེལ་རྒྱས་ཀྱི་གྲུབ་འབྲས་ལས་མི་རིགས་ཁག་གི་མང་ཚོགས་ལ་ཕན་པ་དྲང་གཞག་ངང་ཐོབ་པར་སྐུལ་འདེད་གཏོང་བ་བཅས་བྱས་ཏེ། མི་རིགས་ཁག་མཉམ་དུ་དེང་རབས་ཅན་གྱི་འཕེལ་རིམ་ཕྱོགས་སུ་སྐྱོད་པ་དེ་ནུས་སེམས་གཅིག་སྒྲིལ་གྱི་བརྒྱུད་རིམ་ལ་སྒྱུར་དགོས། རིག་གནས་ཀྱི་རྨང་གཞི་བརྟན་དུ་བཏང་སྟེ་ཡང་དག་པའི་ཀྲུང་ཧྭ་མི་རིགས་ཀྱི་ལོ་རྒྱུས་ཀྱི་ལྟ་བ་བརྟན་པོ་འཛུགས་པ་དང་སྤྱི་ཚོགས་རིང་ལུགས་ཀྱི་རིག་གནས་འཕེལ་རྒྱས་ཀྱི་ཁ་ཕྱོགས་མཐའ་འཁྱོངས་བྱས་ཏེ། སྤྱི་ཚོགས་རིང་ལུགས་ཀྱི་ལྟེ་བའི་རིན་ཐང་ལྟ་བ་ཁྲིད་སྟོན་དུ་བྱེད་པ་དང་། གསར་བརྗེའི་སྙིང་སྟོབས་རྒྱུན་འཛིན་གྱི་འདུ་འགོད་ལག་བསྟར་གཏིང་ཟབ་བྱེད་པ། མི་རིགས་ཁག་གི་རིག་གནས་རྒྱུན་འཛིན་སྲུང་སྐྱོང་དང་གསར་གཏོད་མཉམ་འདྲེས་ལ་སྐུལ་འདེད་གཏོང་བ། མི་རིགས་ཁག་གིས་མཉམ་སྤྱོད་བྱེད་པའི་ཀྲུང་ཧྭའི་རིག་གནས་ཀྱི་བརྡ་རྟགས་དང་ཀྲུང་ཧྭ་མི་རིགས་ཀྱི་གཟུགས་བརྙན་གཏོད་པ་དང་མངོན་གསལ་དོད་པོ་ཡོང་བར་བྱེད་པ། རྒྱལ་ཁབ་ཀྱི་སྤྱི་སྤྱོད་སྐད་ཡིག་ཕྱོགས་ཡོངས་ནས་ཁྱབ་སྤེལ་དང་ཁྱབ་གདལ་གཏོང་བ། རིག་དངོས་དང་རིག་གནས་ཤུལ་བཞག་ལ་སྲུང་སྐྱོབ་དང་བེད་སྤྱོད་བྱེད་ཤུགས་ཆེ་རུ་གཏོང་བ། ཀྲུང་ཧྭ་མི་རིགས་ཐུན་མོང་ལ་དབང་བའི་བསམ་པའི་ཁྱིམ་གཞིས་རྒྱུན་ཆད་མེད་པར་བརྟན་པོ་འཛུགས་པ་བཅས་བྱས་ཏེ། ཀྲུང་ཧྭའི་རིག་གནས་ཀྱི་མོས་སེམས་རྒྱུན་ཆད་མེད་པར་ཟབ་ཏུ་གཏོང་དགོས། སྤྱི་ཚོགས་ཀྱི་རྨང་གཞི་བརྟན་དུ་བཏང་སྟེ་ཁྱད་པར་ལ་བརྩི་འཇོག་དང་། སྣ་མང་ལ་བསྟུན་མཁས། གཞི་གཅིག་བརྟན་གཏོང་བཅས་མཐའ་འཁྱོངས་བྱས་ཏེ། སྒར་རེས་རྣམ་པའི་སྤྱི་ཚོགས་ཀྱི་གྲུབ་ཆ་དང་སྤྱི་ཚོགས་ཀྱི་ཁོར་ཡུག་གཏོད་པ་དང་། མི་རིགས་ཁག་གི་མང་ཚོགས་མཉམ་སྡོད་མཉམ་སྦྱོང་དང་། མཉམ་སྐྲུན་མཉམ་སྤྱོད། མཉམ་སྒྲུབ་མཉམ་སྤྲོ་བཅས་ཀྱི་སྤྱི་ཚོགས་ཀྱི་ཆ་རྐྱེན་གཏོད་པ། ཕུགས་བསམ་དང་། དད་སེམས། བརྩེ་སེམས། རིག་གནས་བཅས་མཐུན་སྒྲིལ་གཅིག་གྱུར་ཡོང་བ། ཁོར་ཡུག་དང་། རིག་གནས། དཔལ་འབྱོར། སྤྱི་ཚོགས། བསམ་བློ་སོགས་ཕྱོགས་གང་ས་ཅི་ཐད་བརྟན་པོ་འཛུགས་པ་བཅས་བྱས་ཏེ་མི་རིགས་ཁག་གི་མང་ཚོགས་གྲོགས་པོ་བློས་ཐུབ་ལ་འགྱུར་ཐུབ་པ་དང་། འཆམ་མཐུན་གྱི་ཁྱིམ་མཚེས་བྱེད་ཐུབ་པ། བདེ་སྐྱིད་ཕུན་སུམ་ཚོགས་པའི་གཉེན་མཐུན་གྱི་ལས་འབྲེལ་ཆགས་པ་བཅས་བྱེད་དགོས། ཁྲིམས་སྐྱོང་གི་རྨང་གཞི་བརྟན་དུ་བཏང་སྟེ་བཅའ་ཁྲིམས་ལ་བརྟེན་ནས་འཕེལ་རྒྱས་ལ་སྐུལ་འདེད་གཏོང་བ་དང་། བཅའ་ཁྲིམས་ལ་བརྟེན་ནས་དམངས་སེམས་གསོ་བ། བཅའ་ཁྲིམས་ལ་བརྟེན་ནས་དུས་བདེ་སྲུང་བ་བཅས་མཐའ་འཁྱོངས་དང་། བཅའ་ཁྲིམས་ཀྱི་མདུན་དུ་མི་ཚང་མ་འདྲ་མཉམ་ཡིན་པ་མཐའ་འཁྱོངས། མི་རིགས་ཁག་གི་ཁྲིམས་མཐུན་ཁེ་དབང་ལ་ཁྲིམས་བཞིན་སྲུང་སྐྱོང་། མི་རིགས་དང་འབྲེལ་བའི་རྒྱུ་རྐྱེན་གྱི་གྱོད་གཞི་དང་གནད་དོན་ཁྲིམས་བཞིན་ཐག་གཅོད་ཡག་པོ་བྱེད་པ། མི་རིགས་ཁག་གི་སྤྱི་དམངས་ལ་དབང་ཆ་འདྲ་མཉམ་སྤྱོད་ཐུབ་པ་དང་འོས་འགན་འདྲ་མཉམ་སྒྲུབ་པར་འགན་ལེན་བཅས་བྱེད་དགོས་པ་དང་། ཁྲིམས་འགལ་ཉེས་གསོག་བྱེད་སྤྱོད་སྣ་ཚོགས་གཏན་འགོག་ནན་པོ་དང་དེར་མཐའ་གཅིག་ཏུ་རྡུང་རྡེག་བཏང་སྟེ། རྒྱལ་ཁབ་གཅིག་འགྱུར་དང་། མི་རིགས་མཐུན་སྒྲིལ། སྤྱི་ཚོགས་བརྟན་ལྷིང་བཅས་ལ་སྲུང་སྐྱོང་ཧུར་ཐག་བྱེད་དགོས།