ཚོགས་འདུ་གཉིས་རིང་རང་སྐྱོང་ལྗོངས་ཏང་ཨུད་ཀྱི་རྒྱུན་ཨུ་དབང་ཧའེ་ཀྲོའུ་དང་། ལའེ་ཅའོ། རེན་ཝེ། ཀརྨ་ཚེ་བརྟན། ཤའོ་ཡིའུ་ཚའེ། ཟླ་བ་ཚེ་རིང་བཅས་ཀྱིས་རང་སྐྱོང་ལྗོངས་མི་དམངས་འཐུས་ཚོགས་སྐབས་བཅུ་གཉིས་པའི་ཚོགས་འདུ་ཐེངས་གཉིས་པའི་འབྲེལ་ཡོད་འཐུས་མི་ཚོགས་པར་ཁག་སོ་སོར་ཞུགས་ནས་འཐུས་མི་ཚོ་དང་མཉམ་དུ་གྲོས་ཞིབ་གནང་བ་རེད།

ལའེ་ཅའོ་ལྷོ་ཁའི་འཐུས་མི་ཚོགས་པའི་གྲོས་ཞིབ་ནང་ཞུགས་སྐབས། སྙན་སྒྲོན་ནང་མིག་སྔའི་བོད་ཀྱི་འཕེལ་རྒྱས་ལ་འཕྲད་པའི་གོ་སྐབས་གལ་ཆེན་དང་ལེགས་ཆའི་ཆ་རྐྱེན་ལ་དབྱེ་ཞིབ་གཏིང་ཟབ་གནང་སྟེ“དོན་ཆེན་བཞིར”དམིགས་པ་དང་། “འཛུགས་གཏོད་བཞིར”ཤུགས་རྒྱག་པ། “གལ་ཆེན་དྲུག”མངོན་གསལ་དོད་པོ་ཡོང་བ་བཅས་བྱས་ནས་2024ལོའི་ལས་འགན་གཙོ་བོ་ཚན་རིག་དང་མཐུན་པའི་ངང་འཆར་འགོད་དང་བཀོད་སྒྲིག་བྱས་པ་དེ་ནི་དམ་པ་དོན་གཉེར་དང་མི་སེམས་ལ་སྐུལ་མ་ཐེབས་པའི་སྙན་སྒྲོན་ཡག་པོ་ཞིག་རེད། ལྗོངས་ཏང་ཨུད་རྩ་འཛུགས་པུས་ངེས་པར་དུ་ལྟེ་བ་དང་སྤྱི་ཡོངས་ལ་དམིགས་པ་དང་འགན་ནུས་དང་འགན་འཁྲིར་དམ་པོར་དམིགས་ནས། ངེས་གནས་གནད་འཁེལ་འཚོལ་བ་དང་ནུས་པ་འདོན་སྤེལ་བྱས་ཏེ་འཇོན་ཐང་ལ་གཞིགས་ནས་ལས་བྱེད་པ་བཀོལ་སྤྱོད་དང་ལས་རྗེས་ལ་གཞིགས་ནས་གདེང་འཇོག་བྱ་རྒྱུ་མཐའ་འཁྱོངས་ཀྱིས་འགོ་ཁྲིད་ཚན་ཁག་དང་ལས་བྱེད་པའི་དཔུང་ཁག་འཛུགས་སྐྱོང་ལ་ཕྱོགས་ཡོངས་ནས་ཤུགས་སྣོན་རྒྱག་པ་དང་། ཕུལ་བྱུང་ན་གཞོན་ལས་བྱེད་པ་གདམ་གསེས་ཤུགས་ཆེན་བྱེད་པ། གཞི་རིམ་ཏང་རྩ་འཛུགས་ཀྱི་ཆབ་སྲིད་ཀྱི་ནུས་པ་དང་རྩ་འཛུགས་ཀྱི་ནུས་པ་འདོན་སྤེལ་གང་ལེགས་བྱེད་པ་བཅས་དང་ཆབས་ཅིག ཏང་སྲིད་སྒྲིག་གཞི་སྒྱུར་བཅོས་ལ་གཙོ་གནད་ཐོག་དམ་འཛིན་ཡག་པོ་བྱེད་པ་དང་སྒྲིག་གཞིའི་སྒྲིག་ཁོངས་ཀྱི་ཐོན་ཁུངས་བཀོད་སྒྲིག་སྔར་བས་ལེགས་སུ་བཏང་སྟེ་མ་ལག་ཆ་ཚང་བ་དང་། ཚན་རིག་དང་མཐུན་ལ་ཚད་དང་ལྡན་པ། འཁོར་སྐྱོད་ནུས་པ་ལྡན་པ་བཅས་ཀྱི་སྒྲིག་གཞིའི་འགན་ནུས་མ་ལག་ནུས་ཤུགས་ཡོད་རྒུས་འཛུགས་གཏོད་བྱེད་དགོས་པའི་ནན་བཤད་གནང་བ་རེད།

ཚེས་7ཉིན་གྱི་ཕྱི་དྲོར། ལྗོངས་ཏང་ཨུད་ཀྱི་རྒྱུན་ཨུ་དང་རང་སྐྱོང་ལྗོངས་ཀྱི་རྒྱུན་ལས་ཀྲུའུ་ཞི་གཞོན་པ་རེན་ཝེ་ཆབ་མདོའི་འཐུས་མི་ཚོགས་པའི་གྲོས་ཞིབ་ནང་ཞུགས་སྐབས། རང་སྐྱོང་ལྗོངས་ཀྱི་ཀྲུའུ་ཞི་ཡན་ཅིན་ཧའེ་ཡིས་གནང་བའི་སྲིད་གཞུང་གི་ལས་དོན་སྙན་སྒྲོན་ལ་ཆབ་སྲིད་ཀྱི་མཐོ་ཚད་དང་། དམངས་འཚོའི་དྲོད་ཚད། ལས་དོན་སྤེལ་ཤུགས་བཅས་ཆེན་པོ་ལྡན་ཡོད། 2024ལོར་རང་ལྗོངས་ཀྱིས་རྨང་གཞིའི་སྒྲིག་བཀོད་འཛུགས་སྐྲུན་ལ་མུ་མཐུད་ཤུགས་སྣོན་རྒྱག་པ་དང་མ་འཇོག་བརྩོན་ལེན་བྱེད་ཤུགས་མུ་མཐུད་ཆེ་རུ་བཏང་ནས་རྣམ་གྲངས་གལ་ཆེན་མཚམས་མི་ཆད་པ་དང་མ་དངུལ་ལ་བརྟེན་ནས་སྐུལ་ཁྲིད་བྱ་རྒྱུ་རྒྱུན་མི་ཆད་པའི་འགན་ལེན་བྱེད་དགོས་ཞེས་ནན་བཤད་གནང་བ་རེད།

ཀརྨ་ཚེ་བརྟན་ལྷ་སའི་འཐུས་མི་ཚོགས་པའི་གྲོས་ཞིབ་ནང་ཞུགས་སྐབས། སྲིད་གཞུང་གི་ལས་དོན་སྙན་སྒྲོན་གྱི་དམིགས་ཚད་ཁ་གསལ་བ་དང་། བསམ་ཕྱོགས་ཁ་གསལ་བ། གཙོ་གནད་མངོན་གསལ་དོད་པ། བྱ་ཐབས་ནུས་པ་ལྡན་པ་བཅས་ཡོད་པ་དེ་ནི་མི་སེམས་ལ་སྐུལ་མ་ཐེབས་པ་དང་། མི་སེམས་ལ་གཏིང་ཟབ་ཟུག་པ། མི་སེམས་གཅིག་ཏུ་སྒྲིལ་བ་བཅས་ཀྱི་སྙན་སྒྲོན་ཞིག་རེད་ཅེས་གསུངས་པ་རེད། ཁོང་གིས། ཀྲུང་དབྱང་གི་དཔལ་འབྱོར་ལས་དོན་ཚོགས་འདུ་དང་ལྗོངས་ཏང་ཨུད་སྐབས་བཅུ་པའི་ཚང་འཛོམས་གྲོས་ཚོགས་ཐེངས་ལྔ་པ་དང་རང་སྐྱོང་ལྗོངས་ཏང་ཨུད་ཀྱི་དཔལ་འབྱོར་ལས་དོན་ཚོགས་འདུ་བཅས་ཀྱི་དགོངས་དོན་ལ་གོ་བ་གཏིང་ཟབ་ལེན་པ་དང་ཟུང་འབྲེལ་བྱས་ཏེ། བསམ་བློ་སྔར་བས་གཅིག་གྱུར་དང་ངོས་འཛིན་མཐོར་གཏོང་གིས་མཐུན་སྒྲིལ་འབད་འཐབ་ཀྱི་དུས་རབས་ཀྱི་བརྗོད་བྱ་གཙོ་བོར་སྟངས་འཛིན་ནན་པོ་བྱེད་པ་དང་། ཀྲུང་ཧྭ་མི་རིགས་གཅིག་མཐུན་འདུས་གྲུབ་ཀྱི་འདུ་ཤེས་བརྟན་པོར་འཛུགས་རྒྱུ་གཙོ་རྐང་དང་འཐབ་ཇུས་རང་བཞིན་གྱི་ལས་འགན་ལ་བརྩིས་ནས་ཕྱོགས་ཁག་གི་བློ་གྲོས་དང་སྟོབས་ཤུགས་གཅིག་སྒྲིལ་གྱིས། ཡུན་རིང་བདེ་འཁོད་དང་སྤུས་ཚད་མཐོ་བའི་འཕེལ་རྒྱས་ལ་ནུས་ཤུགས་ཡོད་རྒུས་སྐུལ་འདེད་བཏང་སྟེ་ཀྲུང་གོའི་ལུགས་ཀྱི་དེང་རབས་ཅན་གྱི་བོད་ཀྱི་ལེའུ་རྩོམ་དགོས་པའི་ནན་བཤད་གནང་བ་རེད།

ཤའོ་ཡིའུ་ཚའེ་ལྷ་སའི་འཐུས་མི་ཚོགས་པའི་གྲོས་ཞིབ་ནང་ཞུགས་སྐབས། གོམ་སྟབས་རྗེས་མར་ལྷ་ས་གྲོང་ཁྱེར་གྱིས་ལྗོངས་ཏང་ཨུད་སྐབས་བཅུ་པའི་ཚང་འཛོམས་གྲོས་ཚོགས་ཐེངས་ལྔ་པ་དང་རང་སྐྱོང་ལྗོངས་ཏང་ཨུད་ཀྱི་དཔལ་འབྱོར་ལས་དོན་ཚོགས་འདུ་དང་ཚོགས་འདུ་གཉིས་བཅས་ཀྱི་དགོངས་དོན་ལག་བསྟར་དོན་འཁྱོལ་མཐའ་གཅིག་ཏུ་བྱས་ནས། འདི་ལོའི་དཔལ་འབྱོར་ལས་དོན་ཁྲོད་རང་ཉིད་ལ་གནོན་ཤུགས་སྤྲད་དེ་ས་ཁུལ་གྱི་ཐོན་སྐྱེད་རིན་ཐང་བསྡོམས་འབོར་སྒོར་དུང་ཕྱུར་900ལས་བརྒལ་རྒྱུར་ནུས་ཤུགས་ཡོད་རྒུས་སྐུལ་འདེད་བཏང་ནས་8%ཟིན་པ་དང་9%འཕར་བའི་འགན་ལེན་གྱིས་2025ལོར་སྒོར་དུང་ཕྱུར་སྟོང་གི་འགག་སྒོ་ཆེན་པོ་ལས་སྒྲོལ་རྒྱུའི་བརྩོན་ལེན་བྱེད་དགོས་ཞེས་གསུངས་པ་རེད།