ཉེ་ཆར། 2023ལོ་འཁོར་གྱི་ལྗོངས་ཡོངས་ཀྱི་ཕྱོགས་བསྡུས་དཔྱད་ཞིབ་ལས་དོན་གྱི་སྐུལ་སློང་བཀོད་སྒྲིག་གསོ་སྦྱོང་ཚོགས་འདུ་དང་རང་སྐྱོང་ལྗོངས་ཀྱི་དཔྱད་ཞིབ་ལས་དོན་འགོ་ཁྲིད་ཚོགས་ཆུང་གཞུང་ལས་ཁང་གི་ཚོགས་འདུ་ཐེངས་གཉིས་པ་ལྷ་སར་འཚོགས་ནས་2023ལོ་འཁོར་གྱི་རང་སྐྱོང་ལྗོངས་ཀྱི་ཕྱོགས་བསྡུས་དཔྱད་ཞིབ་ལས་དོན་ལ་སྐུལ་སློང་བཀོད་སྒྲིག་བྱས་པ་དང་། ལྗོངས་ཏང་ཨུད་ཀྱི་རྒྱུན་ཨུ་རྩ་འཛུགས་པུའི་པུའུ་ཀྲང་ལའེ་ཅའོ་ཚོགས་འདུར་ཞུགས་པ་དང་འབྲེལ་གསུང་བཤད་ཀྱང་གནང་བ་རེད།

ལའེ་ཅའོ་ཡིས། འགོ་ཁྲིད་ཚན་ཁག་དང་འགོ་ཁྲིད་ལས་བྱེད་པར་ལོ་འཁོར་གྱི་ཕྱོགས་བསྡུས་དཔྱད་ཞིབ་བྱེད་པ་ནི་ཏང་ཀྲུང་དབྱང་གི་ཐབས་ཇུས་བཀོད་སྒྲིག་དང་ལྗོངས་ཏང་ཨུད་ཀྱི་ལས་དོན་བླང་བྱ་དོན་ཐོག་ཏུ་འཁྱོལ་བར་སྐུལ་འདེད་གཏོང་བའི་བྱ་ཐབས་གལ་ཆེན་ཞིག་ཡིན་ལ། ལེགས་ཞན་དབྱེ་འབྱེད་དང་། ལེགས་པར་བྱ་དགའ་དང་ཞན་པར་ཆད་གཅོད། འགན་འཁུར་ཕོད་པར་ལྕག྇་སྐུལ། འཕེལ་རྒྱས་ལ་སྐུལ་འདེད་གཏོང་བ་བཅས་ལ་དོན་སྙིང་ཆེན་པོ་ལྡན་ཡོད། འགྱུར་མེད་ཀྱི་ཚད་གཞི་འབུར་དུ་ཐོན་པར་བྱས་ནས་ཆབ་སྲིད་བྱང་ཚད་ལ་དཔྱད་ཞིབ་གཏིང་ཟབ་དང་ཏན་ཏིག་བྱས་ཏེ་དཔྱད་ཞིབ་བྱ་ཡུལ་དང་ཚན་པར་ཕྱོགས་ཡོངས་དང་ཚང་མ་ནས“ཆབ་སྲིད་ཀྱི་ཞིབ་བཤེར”ཐེངས་གཅིག་བྱས་ནས། ཏང་ཡོན་ལས་བྱེད་པའི་ཆབ་སྲིད་ཀྱི་བརྡར་ཤ་གཅོད་ནུས་དང་། ཆབ་སྲིད་ཀྱི་གོ་རྟོགས་སད་ནུས། ཆབ་སྲིད་ཀྱི་ལག་བསྟར་བྱེད་ནུས་བཅས་ཟམ་མི་ཆད་པར་ཆེ་རུ་འགྲོ་བར་སྐུལ་འདེད་གཏོང་དགོས་པ་དང་། འཇོན་ཐང་ལ་གཞིགས་ནས་ལས་བྱེད་པ་བཀོལ་སྤྱོད་དང་ལས་རྗེས་ལ་གཞིགས་ནས་གདེང་འཇོག་མཐའ་འཁྱོངས་བྱས་ནས་ལས་འགན་ཕྲག་ཏུ་འཁུར་ཕོད་མིན་དང་། ལས་ཀ་སྒྲུབ་འདོད་ཡོད་མེད། ལས་ཀ་སྒྲུབ་ཐུབ་མིན་ཚད་གཞི་གལ་ཆེན་ལ་བརྩིས་ཏེ“སྙིང་སྟོབས”དང“དྲང་ནུས”ལྡན་པའི་སྒོ་ནས་ལས་དོན་ཡག་པོ་སྒྲུབ་པ་དང་། ཚད་ལོངས་པ། བེད་སྤྱོད་ཡག་པོ་ཐུབ་པ་བཅས་ཡོང་བའི་འགན་ལེན་བྱེད་དགོས་པ། བྱེད་སྟངས་དང་བྱ་ཐབས་ཁོང་དུ་ཆུད་པ་དང་། ལས་དོན་ལ་དཔྱད་ཞིབ་བྱེད་པའི་གཞི་རྩའི་རྩལ་ནུས་ཡག་པོ་སྦྱོང་བ། དཔྱད་ཞིབ་ཀྱི་མཐོང་རྒྱ་ཆེ་རུ་གཏོང་བ། དབྱེ་ཞིབ་དང་བརྡར་གཅོད་བྱེད་ནུས་ཆེ་རུ་གཏོང་བ་བཅས་ཀྱི་སྒོ་ནས་དཔྱད་ཞིབ་བྱ་ཡུལ་གྱི་དོན་དངོས་གནས་ཚུལ་ཕྱོགས་ཡོངས་དང་དྲང་གཞག་ཡོང་བར་བྱེད་དགོས་པ། ལས་ཀའི་འགན་འཁྲི་ནན་དུ་གཏོང་བ་དང་། སྤྱི་འདོམས་མཐུན་སྦྱོར་བྱེད་ཤུགས་ཆེ་རུ་གཏོང་བ། དུས་བཀག་གི་བླང་བྱ་སྟངས་འཛིན། དཔྱད་ཞིབ་ཀྱི་སྒྲིག་ཁྲིམས་ནན་དུ་གཏོང་བ་བཅས་བྱས་ནས་སྤྱོད་ཚུལ་ཏན་ཏིག་དང་གཟུགས་བརྙན་བཟང་པོར་བརྟེན་ཏེ་སྤུས་ཚད་མཐོ་པོས་ལོ་འཁོར་གྱི་ཕྱོགས་བསྡུས་དཔྱད་ཞིབ་ཀྱི་ལས་འགན་ཁག་ལེགས་སྒྲུབ་བྱེད་དགོས་ཞེས་གསུངས་པ་རེད།

ཤེས་རྟོགས་བྱུང་བར་གཞིགས་ན། ཉེ་ཆར། རང་སྐྱོང་ལྗོངས་ཀྱི་དཔྱད་ཞིབ་ལས་དོན་ཚོགས་ཆུང་18ཀྱིས་ལྗོངས་ཏང་ཨུད་ཀྱི་གཅིག་གྱུར་བཀོད་སྒྲིག་གཞིར་བཟུང་། ལྗོངས་ཡོངས་ཀྱི་གྲོང་ཁྱེར་དང་ས་ཁུལ་7དང་། ལྗོངས་ཐད་གཏོགས་་ཚན་པ་ཁག་དང་། ལྗོངས་ཁོངས་གཏོགས་ཀྱི་མཐོ་སློབ། ལྗོངས་དོ་དམ་ཁོངས་གཏོགས་ཀྱི་གཞུང་ཁོངས་ཁེ་ལས། དགོན་སྡེ་དོ་དམ་ཨུ་ལྷན་ཁག་ཅིག་བཅས་ཀྱི་འགོ་ཁྲིད་ཚན་ཁག་དང་འགོ་ཁྲིད་ལས་བྱེད་པར་ལོ་འཁོར་གྱི་ཕྱོགས་བསྡུས་དཔྱད་ཞིབ་ཕྱོགས་ཡོངས་དང་། གོ་རིམ་ལྡན་པ། གཏིང་ཟབ་བཅས་བྱ་རྒྱུ་ཡིན་པ་རེད།