ཟླ་12ཚེས་11ཉིན་ནས་13ཉིན་བར། རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་རང་སྐྱོང་ལྗོངས་ཀྱི་རྒྱུན་ལས་ཀྲུའུ་ཞི་གཞོན་པ་ཁྲེན་ཡུང་ཆིས་རུ་སྣེ་ཁྲིད་དེ་ཡུན་ནན་ཞིང་ཆེན་ལུའུ་ཆོན་རྫོང་ཝུའུ་ཏུང་ཏེ་ཆུ་ཤུགས་གློག་ཁང་དང་། འབྲི་ཆུའི་འགག་གསུམ་ཚོགས་པའི་ཝུའུ་ཏུང་ཏེ་འཛུགས་སྐྲུན་པུའུ་དང་དེ་བཞིན་ཁུན་མིང་སྐས་རིམ་བཀོད་གཏོང་ལྟེ་གནས་བཅས་སུ་ཕེབས་ནས་ས་གནས་ས་ཐོག་ཏུ་རྟོག་ཞིབ་དང་བརྟག་ཞིབ་གནང་བ་མ་ཟད། ཡུན་ནན་ཞིང་ཆེན་སྲིད་གཞུང་དང་། འབྲི་ཆུའི་འགག་གསུམ་ཚོགས་པ། དེ་བཞིན་ཝུའུ་ཏུང་ཏེ་འཛུགས་སྐྲུན་པུའི་འབྲེལ་ཡོད་བློ་མཐུན་དང་བཞུགས་མོལ་གནང་ནས་ནུས་རྒྱུ་གཙང་མ་གསར་སྤེལ་གྱི་མ་འཇོག་འཛུགས་སྐྲུན་འཁོར་སྐྱོད་དང་། དོ་དམ་སྒྲིག་སྲོལ་ལམ་སྲོལ། ཁེ་ཕན་མཉམ་སྤྱོད། ཆུ་མཛོད་ཁུལ་གྱི་ཡུལ་མི་གནས་སྤོ་བཀོད་སྒྲིག ཆུ་བོའི་སྟོད་སྨད་རྒྱུད་ཀྱི་ཐོན་ལས་འཕེལ་རྒྱས། རྣམ་གྲངས་གལ་ཆེན་གྱིས་དཔལ་འབྱོར་དང་སྤྱི་ཚོགས་འཕེལ་རྒྱས་ལ་སྐུལ་ཁྲིད་བྱེད་པ་སོགས་ཐད་ཀྱི་ཉམས་མྱོང་དང་བྱ་ཐབས་མཁྱེན་རྟོགས་ཞིབ་ཕྲ་གནང་བ་རེད། ཡུན་ནན་ཞིང་ཆེན་སྲིད་གཞུང་གི་ཧྲེང་ཀྲང་གཞོན་པ་ཀྲང་ཀྲི་ལི་དང་། དབྱང་པིན། འབྲི་ཆུའི་འགག་གསུམ་ཚོགས་པའི་སྤྱི་ཁྱབ་ཅིང་ལི་གཞོན་པ་ཝང་ཝུའུ་པིན་བཅས་བཞུགས་མོལ་ཚོགས་འདུར་ཞུགས་པའམ་ཡང་ན་འབྲེལ་ཡོད་བྱེད་སྒོར་ཞུགས་པ་རེད། རང་སྐྱོང་ལྗོངས་འཕེལ་སྒྱུར་ཨུ་ལྷན་དང་། ནོར་སྲིད་ཐིང་། ཆུ་བེད་ཐིང་། ནུས་རྒྱུ་ཅུས། རྒྱལ་ཁབ་གློག་དྲ་བོད་ལྗོངས་ཀུང་སི་བཅས་དང་དེ་བཞིན་ཉིང་ཁྲི་གྲོང་ཁྱེར་གྱི་འབྲེལ་ཡོད་འགན་འཁུར་བློ་མཐུན་ཚོགས་འདུར་ཞུགས་པ་རེད།

ཁྲེན་ཡུང་ཆིས་རང་སྐྱོང་ལྗོངས་ཏང་ཨུད་དང་སྲིད་གཞུང་དང་ཧྲུའུ་ཅི་ཝང་ཅུན་ཀྲེང་དང་ཀྲུའུ་ཞི་ཡན་ཅིན་ཧའེ་ཡི་ཚབ་ཞུས་ནས། ཡུན་ནན་ཞིང་ཨུད་དང་ཞིང་ཆེན་སྲིད་གཞུང་གིས་དུས་ཡུན་རིང་པོའི་ནང་བོད་ལ་རྒྱབ་སྐྱོར་དང་རོགས་རམ་གནང་བར་ལྷག་བསམ་ཟོལ་མེད་ངང་ཐུགས་རྗེ་ཆེ་ཞུས་པ་རེད།

ཁྲེན་ཡུང་ཆིས། ལྗོངས་ཐད་གཏོགས་འབྲེལ་ཡོད་སྡེ་ཚན་དང་ས་ཁུལ་དང་གྲོང་ཁྱེར་གྱིས་ཡུན་ནན་ཞིང་ཆེན་གྱི་འབྲེལ་ཡོད་སྡེ་ཚན་དབར་གྱི་འབྲེལ་མཐུད་ལ་ཤུགས་སྣོན་བརྒྱབ་ནས་ནུས་རྒྱུ་གཙང་མ་གསར་སྤེལ་འཛུགས་སྐྲུན་བྱེད་རིང་གི་ཡུན་ནན་ཞིང་ཆེན་གྱི་ཉམས་མྱོང་དང་བྱེད་སྟངས་ཡག་པོར་སློབ་སྦྱོང་ནན་ཏན་དང་དཔྱད་གཞིར་འཛིན་པ་དང་། ཆད་སྐྱོན་སེལ་བ། ཞན་ཆ་ལེགས་སུ་གཏོང་བ་བཅས་བྱས་ཏེ་ཐོན་ཁུངས་ཀྱི་ལེགས་ཆ་དེ་དཔལ་འབྱོར་གྱི་ལེགས་ཆ་དང་འཕེལ་རྒྱས་ཀྱི་ལེགས་ཆར་ཏན་ཏིག་འགྱུར་བ་བྱས་ནས་རང་ལྗོངས་ཀྱི་ནུས་རྒྱུ་གཙང་མའི་ཐོན་ལས་ཀྱི་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་དགོས་པའི་བླང་བྱ་བཏོན་གནང་བ་རེད།