ཟླ་11ཚེས་16དང་17ཉིན། ལྗོངས་ཡོངས་ཀྱི་མི་དམངས་འཐུས་ཚོགས་ཀྱི་ཁྲིམས་འཛུགས་ལས་དོན་ཚོགས་འདུ་དང་ས་གནས་ཀྱི་ཁྲིམས་འཛུགས་ལས་དོན་གྱི་ས་གནས་ས་ཐོག་གི་སྤེལ་རེས་ཚོགས་འདུ་ལྷོ་ཁར་འཚོགས་ཏེ། ཞི་ཅིན་ཕིང་གི་ཁྲིམས་སྐྱོང་དགོངས་པ་སློབ་སྦྱོང་དང་། འབྲེལ་ཡོད་ཚོགས་འདུའི་དགོངས་དོན་བརྒྱུད་བསྒྲགས། “དོན་ཆེན་བཞིར”དམིགས་པ་དང“འཛུགས་གཏོད་བཞིར”ཤུགས་རྒྱག་པ། ས་གནས་ཀྱི་ཁྲིམས་འཛུགས་ལས་དོན་གྱི་ཉམས་མྱོང་ཕྱོགས་སྡོམ་དང་སྤེལ་རེས་བཅས་བྱས་ནས། དུས་རབས་གསར་པའི་བོད་ཀྱི་ས་གནས་ཀྱི་ཁྲིམས་འཛུགས་ལས་དོན་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་བཏང་ཡོད། རང་སྐྱོང་ལྗོངས་མི་དམངས་འཐུས་ཚོགས་རྒྱུན་ལས་ཨུ་ལྷན་གྱི་ཀྲུའུ་རེན་གཞོན་པ་ཀྲང་ཡན་ཆིང་ཚོགས་འདུར་ཕེབས་པ་དང་འབྲེལ་གསུང་བཤད་ཀྱང་གནང་བ་རེད།

ཚོགས་འདུའི་ཐོག་ནན་བཤད་བྱས་དོན། རྩ་བ་བརྟན་འཛུགས་དང་བླ་སྲོག་གཏོད་རྒྱུ་མཐའ་འཁྱོངས་ཀྱིས་ས་གནས་ཀྱི་ཁྲིམས་འཛུགས་ཀྱི་ཡང་དག་པའི་ཆབ་སྲིད་ཁ་ཕྱོགས་བརྟན་དུ་གཏོང་བ་དང་། ཏང་གིས་ཁྲིམས་འཛུགས་ལས་དོན་ལ་ཕྱོགས་ཡོངས་ནས་འགོ་ཁྲིད་བྱེད་པའི་ཆབ་སྲིད་ཀྱི་རྩ་དོན་གལ་ཆེན་ལ་གཡོ་འགུལ་གཏན་ནས་མི་གཏོང་བ་མཐའ་འཁྱོངས་བྱེད་དགོས། སྤྱི་ཡོངས་ལ་ཞབས་འདེགས་ཞུ་རྒྱུ་མཐའ་འཁྱོངས་བྱས་ནས་ས་གནས་ཀྱི་ཁྲིམས་འཛུགས་འཕེལ་རྒྱས་ཀྱི་བརྒྱུད་རིམ་བཟོས་ཏེ། ལྟེ་བའི་ལས་དོན་དང་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་དགོས་མཁོ་དངོས་ལ་དམིགས་ནས་ཁྲིམས་འཛུགས་ལས་དོན་སྤེལ་དགོས། ཁྲིམས་ཀྱིས་དམངས་ཀྱི་བློ་ཁ་འགུགས་རྒྱུ་མཐའ་འཁྱོངས་བྱས་ནས་ས་གནས་ཀྱི་ཁྲིམས་འཛུགས་ཐད་ཀྱི་མང་ཚོགས་ཀྱི་བརྩེ་སེམས་ཟབ་ཏུ་བཏང་སྟེ་ས་གནས་ཀྱི་ཁྲིམས་འཛུགས་ཐད་དམངས་སེམས་མཚོན་པ་དང་། དམངས་འདུན་མངོན་པ། དམངས་ཀྱི་བློ་གྲོས་གཅིག་སྡུད་བཅས་བྱེད་དགོས། རྒྱལ་ཁབ་ཀྱི་ཁྲིམས་སྐྱོང་གཅིག་གྱུར་ལ་སྲུང་སྐྱོང་བྱེད་པའི་སྔོན་འགྲོའི་ཆ་རྐྱེན་འོག་ཁྲིམས་འཛུགས་ཞིབ་ཚགས་དང་ལག་ལེན་གསར་གཏོད་མཐའ་འཁྱོངས་བྱས་ནས། ས་གནས་ཀྱི་ཁྲིམས་འཛུགས་སྒྲིག་སྲོལ་དང་ལམ་སྲོལ་ལེགས་སུ་བཏང་སྟེ་ས་གནས་ཀྱི་ཁྲིམས་འཛུགས་སྤུས་ཚད་ལེགས་སུ་དང་ཕན་འབྲས་ཆེ་རུ་གཏོང་དགོས།