ཚེས་13ཉིན་གྱི་ཕྱི་དྲོ། 2023ལོའི་ཧི་མ་ལ་ཡ་བརྒལ་བའི་རྒྱལ་སྤྱིའི་གཞུང་ལམ་རྐང་འཁོར་མཐར་ཟད་འགྲན་བསྡུར་སྐབས་བཞི་པ་ཉིང་ཁྲི་གྲོང་ཁྱེར་དུ་གཟབ་རྒྱས་ངང་འགོ་ཚུགས་ཤིང་། ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་དང་། རང་སྐྱོང་ལྗོངས་ཀྱི་ཀྲུའུ་ཞི། སྒྲིག་འཛུགས་ཨུ་ལྷན་གྱི་ཀྲུའུ་རེན་བཅས་ཡིན་པའི་ཡན་ཅིན་ཧའེ་འགོ་ཚུགས་མཛད་སྒོར་ཕེབས་ནས་འགྲན་བསྡུར་འགོ་ཚུགས་པའི་ཁྱབ་བསྒྲགས་གནང་བ་དང་རྒྱལ་ཁབ་ལུས་རྩལ་སྤྱི་ཁྱབ་ཅུས་ཀྱི་ཅུས་ཀྲང་གཞོན་པ་ལི་ཡིང་ཁྲོན་གྱིས་ཤིས་ཚིག་བསྒྲོན་ཞིང་། རང་སྐྱོང་ལྗོངས་ཀྱི་ཀྲུའུ་ཞི་གཞོན་པ་ལྕགས་རྭ་བློ་བཟང་བསྟན་འཛིན་ཞུགས་ཡོད་པ་རེད།

གཙོ་སྐྱོང་བས་རིམ་པ་བཞིན་ངོ་སྤྲོད་བྱས་པ་དང་བསྟུན་ནས་ཀྲུང་གོའི་རྒྱལ་ཁབ་རྐང་འཁོར་རུ་ཁག་དང་ཨུ་ཟ་བྷེ་ཁི་སི་ཐན་རྒྱལ་ཁབ་རུ་ཁག་སོགས་འགྲན་བསྡུར་ལ་ཞུགས་མཁན་རྐང་འཁོར་རུ་ཁག་17གཅིག་རྗེས་གཉིས་མཐུད་ངང་གར་སྟེགས་ཐོག་འཛེགས་ནས་ངོ་འཕྲད་བྱས་ཤིང་། དེའི་ནང་འགྲན་བསྡུར་ཐེངས་བརྒྱར་ཞུགས་མྱོང་བའི་ཆེད་ལས་རྐང་འཁོར་རུ་ཁག་ཡོད་ལ། བཙུགས་ནས་ཡུན་རིང་མ་སོང་བའི་རྗེས་ཐོན་རུ་ཁག་ཀྱང་ཡོད་པ་རེད། འགྲན་ཞུགས་རྐང་འཁོར་རུ་ཁག་གིས་དཔའ་ངར་ཆེར་སྐྱེད་དང་ནུས་ཤུགས་ཡོད་རྒུས་གདེང་ཚོད་དང་ཉམས་འགྱུར་མངོན་པར་བྱས་པར་དགའ་བསུ་ཆེན་པོ་ཐོབ་པ་རེད། དེ་རྗེས་ཀྱི་ཉིན་བཞིའི་འགྲན་བསྡུར་ལ་ཞུགས་མཁན་རྐང་འཁོར་རུ་ཁག་ཉིང་ཁྲི་གྲོང་ཁྱེར་དང་། གཞིས་རྩེ་གྲོང་ཁྱེར། ལྷ་ས་གྲོང་ཁྱེར་བཅས་སུ་ཁྱོན་ལམ་ཐག་སྤྱི་ལེ་312.57ཡོད་པའི་འགྲན་སྐོར་གསུམ་གྱི་འགྲན་བསྡུར་ལ་ཞུགས་རྒྱུ་རེད།

ཆུ་ཚོད་16དང་སྐར་མ་20ཡོལ་ཙམ་ལ། ཚང་མ་ཡར་ལངས་ཏེ་རྒྱལ་དར་སྒྲེང་བ་དང་རྒྱལ་གླུ་བླངས་ནས་གུས་ལུགས་མཚོན་པར་བྱས་པ་དང་། སྐར་ལྔའི་དར་དམར་དལ་བུར་སྒྲེང་བཞིན་རླུང་ཕྱོགས་དང་བསྟུན་ནས་ལྷབ་ལྷུབ་ཏུ་གཡོ་བཞིན་མཆིས།

ལི་ཡིང་ཁྲོན་གྱིས་ཤིས་ཚིག་སྒྲོན་སྐབས། ས་མཐོའི་ལུས་རྩལ་དང་ཕྱི་རོལ་ལུས་རྩལ་ཐོན་ལས་འཕེལ་རྒྱས་གཏོང་བའི་ཐད་བོད་ལ་ཐུན་མོང་མ་ཡིན་པའི་ལེགས་ཆ་ལྡན་ཡོད། རྒྱལ་ཁབ་ལུས་རྩལ་སྤྱི་ཁྱབ་ཅུས་ཀྱིས་སྔར་རྒྱུན་བཞིན་ལུས་རྩལ་བོད་སྐྱོར་ལས་དོན་ཡག་པོ་སྒྲུབ་པ་དང་འགྲན་བསྡུར་ལ་རྒྱབ་སྐྱོར་ཤུགས་ཆེན་བྱས་ཏེ། བོད་རང་སྐྱོང་ལྗོངས་མི་དམངས་སྲིད་གཞུང་དང་ལག་གདང་སྦྲེལ་ནས་འགྲན་བསྡུར་དེ་རྒྱལ་སྤྱིའི་ཚད་གཞི་དང་བོད་ཀྱི་དམིགས་བསལ་ཁྱད་ཆོས་ལྡན་པའི་གྲགས་ཅན་འགྲན་བསྡུར་ཞིག་ཏུ་གཉེར་རྒྱུ་དང་། “འགྲན་བསྡུར་དང་འགྲོགས་ནས་ཡུལ་སྐོར་ལ་སྐྱོད་པའི”སྤུས་རྟགས་འགྲན་བསྡུར་ཞིག་ཏུ་སྐྱེད་སྲིང་བྱེད་པ་དང་འགྲན་བསྡུར་གྱི་ཕྱོགས་བསྡུས་ཕན་འབྲས་དང་སྣ་མང་རིན་ཐང་ཕྱོགས་ཡོངས་ནས་འདོན་སྤེལ་བྱས་ཏེ། བོད་ཀྱི་དཔལ་འབྱོར་དང་སྤྱི་ཚོགས་འཕེལ་རྒྱས་དང་དེང་རབས་ཅན་འཛུགས་སྐྲུན་ལ་དེ་བས་ལེགས་པའི་སྒོ་ནས་རམ་འདེགས་བྱ་རྒྱུ་ཡིན་ལ། འགྲན་བསྡུར་ནང་ཞུགས་མཁན་རྐང་འཁོར་རུ་ཁག་ལ་ཆུ་ཚད་དེ་བས་མཐོ་བ་དང་གྲུབ་འབྲས་བཟང་པོ་ཐོབ་པའི་སྨོན་འདུན་ཡང་ཞུ་གི་ཡིན་ཞེས་གསུངས་པ་རེད།

ཆུ་ཚོད་16དང་སྐར་མ་40ཙམ་ལ། ཡན་ཅིན་ཧའེ་ཡིས་2023ལོའི་ཀྲུང་གོའི་བོད་ལྗོངས་ཀྱི་ཧི་མ་ལ་ཡ་བརྒལ་བའི་རྒྱལ་སྤྱིའི་གཞུང་ལམ་རྐང་འཁོར་མཐར་ཟད་འགྲན་བསྡུར་སྐབས་བཞི་པ་འགོ་ཚུགས་པའི་ཁྱབ་བསྒྲགས་གནང་བ་རེད།