ཁྲེན་ཡུང་ཆིས་ཀྲུང་གོའི་བོད་ལྗོངས“ཧི་མ་ལ་ཡའི་མཐའ་འཁོར”གྱི་རྒྱལ་སྤྱིའི་མཉམ་ལས་གླེང་སྟེགས་སྐབས་གསུམ་པའི“འཕེལ་ རྒྱས་དང་མཉམ་ལས་ཀྱི་གྲུབ་འབྲས་མཉམ་སྤྱོད་བྱེད”ཅེས་པའི་རིམ་མཚུངས་ཡན་ལག་གླེང་སྟེགས་ཐོག་ནན་བཤད་གནང་དོན།
སྤེལ་རེས་དང་མཉམ་ལས་ལ་ཤུགས་སྣོན་བརྒྱབ་ནས་མཉམ་སྐྲུན་མཉམ་སྤྱོད་ཡོང་བ་བྱེད་དགོས།
ཟླ་10ཚེས་5ཉིན། ཀྲུང་གོའི་བོད་ལྗོངས“ཧི་མ་ལ་ཡའི་མཐའ་འཁོར”གྱི་རྒྱལ་སྤྱིའི་མཉམ་ལས་གླེང་སྟེགས་སྐབས་གསུམ་པས“འཕེལ་རྒྱས་དང་མཉམ་ལས་ཀྱི་གྲུབ་འབྲས་མཉམ་སྤྱོད་བྱེད”ཅེས་པའི་རིམ་མཚུངས་ཡན་ལག་གླེང་སྟེགས་འཚོགས་ནས་སྒོ་དབྱེ་མཉམ་ལས་ཀྱི་བསམ་ཕྱོགས་གསར་པར་སྐད་ཆ་ཤོད་རེས་དང་སྤེལ་རེས་བྱས་ཏེ་འཕེལ་རྒྱས་དང་མཉམ་ལས་ཀྱི་གྲུབ་འབྲས་མཉམ་སྤྱོད་བྱེད་པར་སྐུལ་འདེད་བཏང་ཡོད། རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་དང་རང་སྐྱོང་ལྗོངས་ཀྱི་རྒྱུན་ལས་ཀྲུའུ་ཞི་གཞོན་པ་ཁྲེན་ཡུང་ཆི་ཚོགས་འདུར་ཕེབས་པ་དང་འབྲེལ་ཤིས་ཚིག་ཀྱང་བསྒྲོན་པ་རེད།
ཁྲེན་ཡུང་ཆིས་རང་སྐྱོང་ལྗོངས་ཏང་ཨུད་དང་སྲིད་གཞུང་གི་ཚབ་ཞུས་ནས་སྐུ་མགྲོན་རྣམས་ལ་སྤྲོ་སེམས་འཁོལ་བའི་ངང་དགའ་བསུ་ཞུས་པ་རེད།
ཁོང་གིས་གསུངས་དོན། བོད་ཀྱིས་ཕྱོགས་ཁག་དང་མཉམ་སྦྲེལ་མཉམ་མཐུད་བྱེད་ཤུགས་ཟབ་ཏུ་བཏང་ནས་མཉམ་ལས་དང་སྒོ་དབྱེར་ཤུགས་སྣོན་རྒྱག་འདོད་ཡོད་པ་དང་།“ཧི་མ་ལ་ཡའི་མཐའ་འཁོར”གྱི་རྒྱལ་སྤྱིའི་མཉམ་ལས་གླེང་སྟེགས་སོགས་ཀྱི་སྤེལ་རེས་ལས་སྟེགས་གང་ལེགས་སྤྱོད་པ། ཞི་བདེ་དང་། འཕེལ་རྒྱས། དྲང་སྙོམས། དྲང་བདེན། དམངས་གཙོ། རང་དབང་བཅས་ཀྱི་མིའི་རིགས་ཡོངས་ཀྱི་ཐུན་མོང་གི་རིན་ཐང་མཐའ་འཁྱོངས་བཅས་བྱས་ནས་ཕན་ཚུན་ཡིད་ཆེས་བྱེད་པའི་ཁྲོད་གཉིས་ཁེ་དང་མཉམ་སྐྲུན་ཁྲོད་མཉམ་སྤྱོད་བྱེད་པ་དང་། མཉམ་སྦྲེལ་མཉམ་མཐུད་ལ་ཤུགས་སྣོན་རྒྱག་པ་དང་འཕེལ་རྒྱས་ཀྱི་སྒུལ་ཤུགས་བཏོད་ནས་ཕྱི་ཕྱོགས་སྒོ་དབྱེའི་ཁུལ་ཁོངས་རྒྱུན་མཐུད་རྒྱ་ཆེར་གཏོང་བ། རྒྱལ་ཁབ་ཀྱི་སྐམ་མཚོའི་བགྲོད་ལམ་གསར་པ་དང་སྦྲེལ་མཐུད་ཧུར་ཐག་བྱེད་པ། སྐྱིད་གྲོང་གསར་སྤེལ་སྒོ་དབྱེའི་ཚོད་ལྟ་ཁུལ་དང་རྒྱལ་ཁབ་རིམ་པའི་མཐའ་མཚམས་དཔལ་འབྱོར་མཉམ་ལས་ཁུལ་སྤུས་ཚད་མཐོ་པོས་བསྐྲུན་པ་བཅས་བྱས་ནས། ཕྱོགས་ཁག་དང་མཉམ་དུ་མཉམ་སྦྲེལ་མཉམ་མཐུད་ཀྱི་ཆུ་ཚད་མཐོ་རུ་དང་འཕེལ་རྒྱས་དང་མཉམ་ལས་གཏིང་ཟབ་ཏུ་གཏོང་རྒྱུ་ཡིན། ལེགས་ཆ་ཕྲན་བུ་འདོན་སྤེལ་བྱས་ནས་ཐོན་ལས་ཀྱི་རྨང་གཞི་བརྟན་དུ་གཏོང་བ་དང་། འཕེལ་རྒྱས་ཀྱི་འདུ་ཤེས་གསར་པ་ལག་ལེན་བསྟར་བ། འཕེལ་རྒྱས་ཀྱི་རྣམ་པ་གསར་པར་ཞབས་འདེགས་དང་མཉམ་འདྲེས་ཧུར་ཐག་བཅས་བྱས་ཏེ། ཕྱོགས་ཁག་དང་མཉམ་དུ་ཐོན་ལས་གསར་སྤེལ་དང་མཉམ་ལས་ལ་ཤུགས་སྣོན་རྒྱག་པ་དང་རིག་གནས་ཡུལ་སྐོར་ལས་རིགས་དང་མཐའ་མཚམས་ཚོང་དོན་ཟོག་འགྲེམས་ལས་རིགས་སོགས་འཕེལ་རྒྱས་ཧུར་ཐག་བཏང་ནས་དམངས་ཁྲོད་ཚོང་དོན་ལ་སྐུལ་འདེད་གཏོང་རྒྱུ་ཡིན། “རི་གཉིས”ཀྱི་རིགས་པའི་གཞུང་ལུགས་མཐའ་འཁྱོངས་ཀྱིས་སྐྱེ་ཁམས་ཀྱི་རྨང་གཞི་བརྟན་དུ་གཏོང་བ་དང་སྐྱེ་ཁམས་སྔོན་འཇོག་དང་ལྗང་མདོག་འཕེལ་རྒྱས་ཐོག་མཐའ་བར་གསུམ་དུ་མཐའ་འཁྱོངས་བྱས་ནས། ཕྱོགས་ཁག་དང་མཉམ་དུ་ཧི་མ་ལ་ཡའི་རི་རྒྱུད་ཁུལ་ཁོངས་ཀྱི་ཁོར་ཡུག་སྲུང་སྐྱོང་དང་སྐྱེ་ཁམས་ཤེས་དཔལ་འཛུགས་སྐྱོང་ལ་ཤུགས་སྣོན་བརྒྱབ་སྟེ། ཐཱན་ཉུང་གཏོང་དང་། སྦགས་བཙོག་ཉུང་འཕྲི། སྔོ་རྒྱ་ཆེར་གཏོང་། མང་དུ་གཏོང་བ་བཅས་ལ་མཐུན་སྦྱོར་ངང་སྐུལ་འདེད་བཏང་སྟེ་སའི་གོ་ལའི་མཛེས་སྡུག་ལྡན་པའི་ཁྱིམ་གཞིས་ཐུན་མོང་ཐོག་བསྐྲུན་རྒྱུ་ཡིན། ཞི་མཐུན་བསྟུན་མཁས་ཀྱི་འདུ་ཤེས་འཛིན་པ་དང་ཤེས་དཔལ་མྱོང་ལེན་ལ་ཤུགས་སྣོན་བརྒྱབ་ནས་ཕྱོགས་ཁག་གིས་ཤེས་དཔལ་གྱི་སྐད་ཆ་ཤོད་རེས་ལ་ཤུགས་སྣོན་རྒྱག་པར་སྤྲོ་སེམས་འཁོལ་པོས་དགའ་བསུ་ཞུས་ཏེ། ཧི་མ་ལ་ཡའི་མཐའ་འཁོར་ས་ཁུལ་དང་ཐ་ན་འཛམ་གླིང་ཡོངས་ཀྱི་རིག་གནས་སྤེལ་རེས་ལ་ཐུན་མོང་ཐོག་སྐུལ་འདེད་བཏང་ཐོག་འཛམ་གླིང་ཞི་བདེ་འཕེལ་རྒྱས་ཆེད་ལེགས་སྐྱེས་ཧུར་ཐག་འབུལ་རྒྱུ་ཡིན་པ་བཅས་རེད།
གླེང་སྟེགས་འཚོགས་ཡུལ་ཧ་ཅང་འཁྲུག་ཆ་དོད་པ་དང་བཀྲག་མདངས་འཚེར་ས་མང་ཞིང་། རིགས་གཅིག་མཁས་ཅན་དང་མཁས་དབང་ཚོས་མཐོ་ཚད་ཡོད་པ་དང་། གཏིང་ཟབ་པ། གསར་གཏོད་ལྡན་པ་བཅས་ཀྱི་གཏམ་བཤད་སྤེལ་རེས་རབ་དང་རིམ་པ་བྱས་ཏེ་ཧི་མ་ལ་ཡའི་མཐའ་འཁོར་ས་ཁུལ་གྱི་མཉམ་སྐྲུན་མཉམ་སྤྱོད་ལ་ཐུན་མོང་ཐོག་སྐུལ་འདེད་གཏོང་ཆེད་ཐབས་འདོན་ཇུས་འབུལ་བྱས་པ་རེད།