ཟླ་10ཚེས་5ཉིན་གྱི་སྔ་དྲོར། ཀྲུང་གོའི་བོད་ལྗོངས“ཧི་མ་ལ་ཡའི་མཐའ་འཁོར”གྱི་རྒྱལ་སྤྱིའི་མཉམ་ལས་གླེང་སྟེགས་སྐབས་གསུམ་པ་ཉིང་ཁྲིར་འགོ་ཚུགས་ཤིང་། འདི་ནི་འགོ་ཚུགས་མཛད་སྒོ་འཚོག་ཡུལ་ཡིན་པ།

ཕྱི་འབྲེལ་པུའི་རྒྱབ་སྐྱོར་ཤུགས་ཆེན་འོག ཟླ་10ཚེས་5ཉིན་གྱི་སྔ་དྲོར། ཀྲུང་གོའི་བོད་ལྗོངས“ཧི་མ་ལ་ཡའི་མཐའ་འཁོར”གྱི་རྒྱལ་སྤྱིའི་མཉམ་ལས་གླེང་སྟེགས་སྐབས་གསུམ་པ་ཉིང་ཁྲིར་འགོ་ཚུགས་པ་རེད།

ཀྲུང་གུང་ཀྲུང་དབྱང་ཆབ་སྲིད་ཅུས་ཀྱི་ཨུ་ཡོན་དང་ཀྲུང་དབྱང་ཕྱི་ཕྱོགས་གཞུང་དོན་ཁང་གི་ཀྲུའུ་རེན་ཝང་དབྱི་དང་། མོང་གོལ་རྒྱལ་ཁབ་ཀྱི་ཙུང་ལི་གཞོན་པ་ཨ་མར་སའེ་ཧན། ནེ་པ་ལ་རྒྱལ་ཕྲན་མཉམ་འབྲེལ་ཁང་གི་ཀྲུའུ་ཞི་གཞོན་པ་ཨ་ཡར། ཕ་ཁི་སི་ཐན་གྱི་ཕྱི་འབྲེལ་པུའི་པུའུ་ཀྲང་ཅི་ལཱ་ཉི་བཅས་ཕེབས་ནས་ཤིས་ཚིག་བསྒྲོན་པ་དང་། ཆི་ལིའི་གྲོས་ཁང་འོག་མའི་གྲོས་དཔོན་གཞོན་པ་གཉིས་པ་ཞི་ཁཱ་ཏི་ཉི་ཞུགས་པ། རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་ཝང་ཅུན་ཀྲེང་གིས་ཤིས་ཚིག་བསྒྲོན་པ་དང་། རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་དང་རང་སྐྱོང་ལྗོངས་ཀྱི་ཀྲུའུ་ཞི་ཡན་ཅིན་ཧའེ་ཡིས་གླེང་སྟེགས་འགོ་ཚུགས་པའི་ཁྱབ་བསྒྲགས་གནང་བ་རེད།

ཝང་དབྱིས་ཤིས་ཚིག་སྒྲོན་སྐབས། ཧི་མ་ལ་ཡའི་མཐའ་འཁོར་ས་ཁུལ་ནི་སྐྱེ་སྟོབས་དང་རེ་བས་ཁེངས་པའི་ས་ཆ་ཞིག་རེད། “ཧི་མ་ལ་ཡའི་མཐའ་འཁོར”གྱི་རྒྱལ་སྤྱིའི་མཉམ་ལས་གླེང་སྟེགས་སྤེལ་འགོ་ཚུགས་པ་ནས་བཟུང་། ཀྲུང་གོ་ཕྱོགས་ཀྱིས་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་དགོངས་པ་དང་། ལྷག་པར་དུ་ཞི་ཅིན་ཕིང་གི་སྐྱེ་ཁམས་ཤེས་དཔལ་གྱི་དགོངས་པར་བརྩི་སྲུང་ཞུས་ནས་ཧི་མ་ལ་

ཡའི་མཐའ་འཁོར་ས་ཁུལ་གྱི་རྒྱལ་ཁབ་ཁག་དང་མཉམ་ལས་རྒྱ་ཁྱབ་དང་གཏིང་ཟབ་བྱས་ཏེ་མཉམ་ལས་ཀྱི་ཐུན་མོང་ངོས་འཛིན་རྒྱུན་ཆད་མེད་པར་གཅིག་ཏུ་སྒྲིལ་བ་དང་། ལྗང་མདོག་འཕེལ་རྒྱས་ལ་རྒྱབ་སྐྱོར་ཧུར་ཐག་བྱེད་པ། ནུས་པ་འཛུགས་སྐྱོང་ལ་ཤུགས་སྣོན་རྒྱུན་མཐུད་རྒྱག་པ་བཅས་བྱས་ནས་ས་ཁུལ་གྱི་དཔལ་འབྱོར་དང་སྤྱི་ཚོགས་འཕེལ་རྒྱས་ལ་སྐུལ་འདེད་གཏོང་བ་དང་སྐྱེ་ཁམས་ཁོར་ཡུག་བཅོས་སྐྱོང་འཐུས་སྒོ་ཚང་དུ་གཏོང་ཆེད་ནུས་པ་གལ་ཆེན་བཏོན་ཡོད་ཅེས་གསུངས་པ་རེད།

ཝང་དབྱིས་དུས་མཚམས་རྗེས་མའི་མཉམ་ལས་གཏིང་ཟབ་ཏུ་གཏོང་བའི་ཐད་གྲོས་འགོ་ཁག་ལྔ་བཏོན་པ་སྟེ། གཅིག་ནས་ཕན་ཚུན་བརྩི་འཇོག་དང་ཕན་ཚུན་ཡིད་ཆེས་བྱ་རྒྱུ་མཐའ་འཁྱོངས་ཀྱིས་ས་ཁུལ་གྱི་མཐུན་སྒྲིལ་ལ་ཐུན་མོང་ཐོག་སྲུང་སྐྱོང་བྱས་ཏེ་ཧི་མ་ལ་ཡའི་མཐའ་འཁོར་དུ་ཕྱར་བ་གྲུ་འདེགས་བྱེད་པའི་ཁྱིམ་ཚང་ཆེན་པོ་ཞིག་མཉམ་དུ་གཏོད་དགོས་པ་དང་། གཉིས་ནས་གཉིས་ཁེ་མཉམ་ལས་གཏིང་ཟབ་བྱས་ནས་མིའི་རིགས་ཀྱི་སྐྱེ་ཁམས་ཤེས་དཔལ་གྱི་མཐོ་ས་ཐུན་མོང་ཐོག་བཏོད་དེ་ཧི་མ་ལ་ཡའི་མཐའ་འཁོར་གྱི་སྐྱེ་ཁམས་ཤེས་དཔལ་བར་ཁྱམས་ལག་གདང་སྦྲེལ་ནས་གཏོད་དགོས་པ། གསུམ་ནས་ལྗང་མདོག་ཕྱོགས་སྒྱུར་བྱེད་མགྱོགས་སུ་བཏང་ནས་ས་ཁུལ་གྱི་དཔལ་འབྱོར་རྒྱུན་མཐུད་འཕེལ་རྒྱས་འགྲོ་བར་སྐུལ་འདེད་བཏང་སྟེ། ཧི་མ་ལ་ཡའི་མཐའ་འཁོར་གྱི་ལྗང་མདོག་འཕེལ་རྒྱས་ཀྱི་མཉམ་ལས་དར་ཁུལ་ལག་གདང་སྦྲེལ་ནས་གཏོད་དགོས་པ།  བཞི་ནས་མཉམ་སྦྲེལ་མཉམ་མཐུད་ལ་ཤུགས་སྣོན་བརྒྱབ་ནས་ས་ཁོངས་གཞི་གཅིག་ཅན་གྱི་འཕེལ་རིམ་ལ་སྐུལ་འདེད་བཏང་སྟེ། དེ་བས་སྟབས་བདེ་བའི་ཧི་མ་ལ་ཡའི་མཐའ་འཁོར་གྱི་མཉམ་སྦྲེལ་མཉམ་མཐུད་ཀྱི་དྲ་རྒྱ་ལག་གདང་སྦྲེལ་ནས་གཏོད་དགོས་པ། ལྔ་ནས་སྤེལ་རེས་དང་ཕན་ཚུན་དཔྱད་གཞིར་འཛིན་ཤུགས་ཆེ་རུ་བཏང་ནས་གནའ་བོའི་ཤེས་དཔལ་ལ་སྐྱེ་སྟོབས་ཀྱི་དཔལ་འབར་བར་བྱས་ཏེ། ཧི་མ་ལ་ཡའི་མཐའ་འཁོར་གྱི་མི་ཆོས་རིག་གནས་སྤེལ་རེས་ཀྱི་དཔེ་སྟོན་ཁུལ་ལག་གདང་སྦྲེལ་ནས་གཏོད་དགོས་པ་བཅས་རེད།

ཝང་དབྱིས་ནན་བཤད་གནང་དོན། མཚོ་བོད་ས་མཐོའི་སྐྱེ་ཁམས་སྲུང་སྐྱོང་ཡག་པོ་བྱེད་རྒྱུ་དེ་ཀྲུང་ཧྭ་མི་རིགས་ཀྱི་འཚོ་གནས་འཕེལ་རྒྱས་དང་འབྲེལ་བ་ཡོད་ལ་ས་ཁུལ་དང་ཐ་ན་གོ་ལ་ཧྲིལ་པོའི་གནམ་གཤིས་ཁོར་ཡུག་དང་ཡང་འབྲེལ་བ་ཡོད། ཀྲུའུ་ཞི་ཞི་ཅིན་ཕིང་སྐུ་ངོ་མས་འཆར་འགོད་གནང་བའི་འོག་ཀྲུང་གོ་སྲིད་གཞུང་གིས་བོད་ཀྱི་སྐྱེ་ཁམས་ཤེས་དཔལ་འཛུགས་སྐྱོང་ལ་ཚད་མཐོའི་མཐོང་ཆེན་དང་སྐུལ་འདེད་ཤུགས་ཆེན་བཏང་ཡོད། ད་ཆའི་བོད་འདི་ཉིད་འཛམ་གླིང་ཐོག་ཁོར་ཡུག་སྤུས་ཚད་ཡག་ཤོས་ཀྱི་ས་ཁུལ་གྱི་གྲས་སུ་གྱུར་ནས་སྐྱེ་ཁམས་ཀྱི་རིན་ཐང་རྒྱུན་མཐུད་ངང་མངོན་པ་དང་། ཁོར་ཡུག་སྲུང་སྐྱོང་གི་ལེགས་ཆ་སྔར་བས་མངོན་པ། ལྗང་མདོག་འཕེལ་རྒྱས་ལ་གསོན་ཤུགས་ཀྱིས་ཁེངས་པ་བཅས་བྱུང་ཡོད། ཀྲུང་གོའི་ལུགས་ཀྱི་དེང་རབས་ཅན་ལ་སྐུལ་འདེད་གཏོང་བའི་རྒྱང་ལམ་གསར་པར་ང་ཚོས་བོད་ཀྱིས་ཚད་གཞི་མཐོ་བ་དང་སྤུས་ཚད་མཐོ་བའི་རྒྱལ་ཁབ་ཀྱི་སྐྱེ་ཁམས་ཤེས་དཔལ་གྱི་མཐོ་ས་འཛུགས་གཏོད་ལ་མུ་མཐུད་རྒྱབ་སྐྱོར་བྱས་ནས། སྐྱེ་ཁམས་སྲུང་སྐྱོང་ཁྱབ་ཁོངས་ཀྱི་རྒྱལ་སྤྱིའི་སྤེལ་རེས་དང་མཉམ་ལས་སྔར་བས་གཏིང་ཟབ་ཏུ་བཏང་སྟེ་མིའི་རིགས་ལ་དྭངས་ཤིང་གཙང་བའི་རི་ཆུ་ཀླུང་གསུམ་དང་ས་གཙང་སྲུང་སྐྱོང་ཡག་པོ་བྱེད་དགོས།

ཝང་ཅུན་ཀྲེང་གིས་རང་སྐྱོང་ལྗོངས་ཏང་ཨུད་དང་། སྲིད་གཞུང་། ལྗོངས་ཡོངས་ཀྱི་མི་རིགས་ཁག་གི་མི་དམངས་བཅས་ཀྱི་ཚབ་ཞུས་ནས་གླེང་སྟེགས་ལ་ཞུགས་མཁན་སྐུ་མགྲོན་དང་གྲོགས་པོ་ཚོར་སྤྲོ་སེམས་འཁོལ་བའི་དགའ་བསུ་ཞུས་པ་དང་། ཚང་མར་དུས་ཡུན་རིང་པོའི་ནང་བོད་ཀྱི་དཔལ་འབྱོར་དང་སྤྱི་ཚོགས་འཕེལ་རྒྱས་ལ་ཐུགས་ཁུར་དང་རྒྱབ་སྐྱོར་གནང་བར་སྙིང་དབུས་ནས་ཐུགས་རྗེ་ཆེ་ཞུས་པ་རེད།

ཝང་ཅུན་ཀྲེང་གིས་གསུངས་དོན། ཧི་མ་ལ་ཡའི་མཐའ་འཁོར་གྱི་རྒྱལ་ཁབ་ཁག་ནི་སྐྱིད་སྡུག་མཉམ་མྱོང་གི་ལས་དབང་གཅིག་མཐུན་འདུས་གྲུབ་ཅིག་རེད། ང་ཚོས་དངོས་སྒྲུབ་མཉམ་ལས་ལ་སྐུལ་འདེད་ཧུར་ཐག་གཏོང་བ་དང་གཉིས་ཁེ་གཉིས་ཕན་ལ་སྐུལ་འདེད་བཏང་སྟེ་ནུས་རྒྱུ་གཙང་མ་དང་། ཁྱད་ལྡན་ཞིང་འབྲོག་ལས། གྲངས་འཛིན་དཔལ་འབྱོར་སོགས་ཀྱི་ཁྱབ་ཁོངས་མཉམ་ལས་སྔོག་འདོན་བྱས་ནས་ཧི་མ་ལ་ཡའི་མཐའ་འཁོར་གྱི་དཔལ་འབྱོར་མཉམ་ལས་དར་ཁུལ་མཉམ་དུ་སྐྲུན་དགོས་པ་དང་། རྨང་གཞིའི་སྒྲིག་བཀོད་ཀྱི་མཉམ་སྦྲེལ་མཉམ་མཐུད་ལ་སྐུལ་འདེད་ཧུར་ཐག་བཏང་ནས་ཧི་མ་ལ་ཡའི་མཐའ་འཁོར་གྱི་ཕྱོགས་བསྡུས་བགྲོད་ལམ་ཆེན་པོ་གཏོད་དགོས་པ། སྐྱེ་ཁམས་སྲུང་སྐྱོང་གི་རྒྱལ་སྤྱིའི་མཉམ་ལས་ལ་སྐུལ་འདེད་ཧུར་ཐག་གཏོང་བ་དང་། སྐྱེ་དངོས་སྣ་མང་རང་བཞིན་དང་གེགས་འགོག་གེགས་སེལ་སོགས་ཁྱབ་ཁོངས་ཀྱི་མཉམ་ལས་ལ་ཤུགས་སྣོན་བརྒྱབ་སྟེ་ལྗང་མདོག་འཕེལ་རྒྱས་ཀྱི་ལམ་བུར་མཉམ་དུ་སྐྱོད་དགོས་པ། ཤེས་དཔལ་གྱི་སྐད་ཆ་ཤོད་རེས་དང་སྤེལ་རེས་ལ་སྐུལ་འདེད་ཧུར་ཐག་བཏང་ནས་ཧི་མ་ལ་ཡའི་མཐའ་འཁོར་གྱི་རིག་གནས་མཉམ་ལས་སྤེལ་རེས་ཀྱི་དཔེ་སྟོན་ཁུལ་འཛུགས་གཏོད་བྱེད་དགོས།

ཝང་ཅུན་ཀྲེང་གིས། བོད་ཀྱིས་ཆུ་ཚད་མཐོ་བའི་ཕྱི་ཕྱོགས་ལ་སྒོ་མོ་འབྱེད་རྒྱ་ཟམ་མི་ཆད་པར་ཆེ་རུ་བཏང་སྟེ་རྒྱལ་ནང་གི་རྒྱུན་འཁོར་ཆེན་པོ་གཙོ་རྐང་དུ་བྱེད་པ་དང་། རྒྱལ་སྤྱི་རྒྱལ་ནང་གི་རྒྱུན་འཁོར་ཕན་ཚུན་སྐུལ་འདེད་གཏོང་བའི་འཕེལ་རྒྱས་ཀྱི་རྣམ་པ་གསར་པ་དང་མཉམ་འདྲེས་ཧུར་ཐག་བྱས་ནས“རྒྱུད་གཅིག་ལམ་གཅིག”འཛུགས་སྐྲུན་ནང་རང་འགུལ་ངང་ཞུགས་ཏེ་བོད་འདི་ཉིད་ཨེ་ཤེ་ཡ་ལྷོ་མར་སྒོ་མོ་འབྱེད་པའི་བགྲོད་ལམ་གལ་ཆེན་ཞིག་ཏུ་བསྐྲུན་རྒྱུ་ཡིན་ཞེས་གསུངས་པ་རེད།

ཝང་ཅུན་ཀྲེང་གིས་གསུངས་དོན། ཚང་མས་ད་ཐེངས་ཀྱི་གླེང་སྟེགས་དེ་སྤེལ་རེས་ཀྱི་ལས་སྟེགས་སུ་བརྩིས་ནས། འཕེལ་རྒྱས་ཀྱི་ཉམས་མྱོང་མཉམ་སྤྱོད་དང་མི་ཆོས་རིག་གནས་སྤེལ་རེས་ལ་ཐུན་མོང་ཐོག་སྐུལ་འདེད་བཏང་ནས་ས་ཁུལ་དབར་གྱི་མཉམ་ལས་དང་འཕེལ་རྒྱས་ལ་ཐུན་མོང་ཐོག་གྲོས་བསྡུར་བྱེད་རྒྱུའི་རེ་བ་ཡོད། སྐུ་མགྲོན་དང་གྲོགས་པོ་ཚོས་བོད་དུ་གཟིགས་སྐོར་ལ་མང་ཙམ་ཕེབས་ནས་བོད་དྲིལ་བསྒྲགས་དང་བོད་ངོ་སྤྲོད་ཧུར་ཐག་བྱས་ཏེ། འཛམ་གླིང་གིས་བོད་ལ་རྒྱུས་མངའ་དེ་བས་ལེགས་པ་ལོན་པ་དང་བོད་འདི་ཉིད་འཛམ་གླིང་ཕྱོགས་སུ་དེ་བས་མགྱོགས་པ་སྐྱོད་ཐུབ་པར་དགའ་བསུ་ཞུ་རྒྱུ་ཡིན།

ཨ་མར་སའེ་ཧན་དང་། ཨ་ཡར། ཅི་ལཱ་ཉི་བཅས་ཀྱིས་ཤིས་ཚིག་སྒྲོན་སྐབས། བོད་ནི་ཀྲུང་གོ་དང་ཁ་འབྲལ་ཐབས་མེད་པའི་ཆ་ཤས་ཤིག་ཡིན་པས་བོད་ཀྱི་ཁྱབ་ཁོངས་ཁག་གི་འཕེལ་རྒྱས་ལ་ཐོབ་པའི་གྲུབ་འབྲས་ལ་བསྔགས་བརྗོད་བྱེད་རྒྱུ་ཡིན། ད་ཐེངས་ཀྱི་གླེང་སྟེགས་ཀྱི་བརྗོད་དོན་གཙོ་བོ་གཏིང་ཟབ་ཏུ་ཧུར་ཐག་བཏང་ནས་མི་དང་རང་བྱུང་ཁམས་ཞི་མཐུན་མཉམ་གནས་དང་འཕེལ་རྒྱས་ཀྱི་མཉམ་ལས་གྲུབ་འབྲས་མཉམ་སྤྱོད་བྱེད་རྒྱུར་སྐུལ་འདེད་བཏང་སྟེ། རང་རྒྱལ་དང་བོད་དབར་གྱི་མཛའ་གྲོགས་འགྲོ་འོང་དང་གཉིས་ཁེ་མཉམ་ལས་དེ་བས་སྐས་རིམ་གསར་པ་ཞིག་ཏུ་སླེབས་པར་སྐུལ་འདེད་གཏོང་འདོད་ཡོད་ཅེས་གསུངས་པ་རེད།

རང་སྐྱོང་ལྗོངས་ཀྱི་འགོ་ཁྲིད་ཁྲེན་ཡུང་ཆི་དང་། དབང་ཧའེ་ཀྲོའུ། ཟླ་བ་ཚེ་རིང་། སུན་ཤན་ཀྲུང་། ཀྲང་ཧུང་པོ། ཝང་ཡུང་། ཝང་ཀང་བཅས་དང་། ཕྱི་འབྲེལ་པུའི་པུའུ་ཀྲང་གི་ལས་རོགས་ནུང་རུང་གླེང་སྟེགས་ལ་ཞུགས་ཡོད་པ་རེད།