ཟླ་9ཚེས་11ཉིན་ནས་ཚེས་14ཉིན་བར། རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་དང་རང་སྐྱོང་ལྗོངས་ཀྱི་རྒྱུན་ལས་ཀྲུའུ་ཞི་གཞོན་པ་ཁྲེན་ཡུང་ཆིས་གཞིས་རྩེ་གྲོང་ཁྱེར་སྐྱིད་གྲོང་རྫོང་དང་། གྲོང་ཁྱེར་དཔལ་འབྱོར་ལག་རྩལ་གསར་སྤེལ་ཁུལ། རིན་སྤུངས་རྫོང་སོགས་སུ་ཕེབས་ཏེ་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་གནས་ཚུལ་ལ་བརྟག་ཞིབ་གནང་བ་དང་། དེ་བཞིན་སྐྱིད་གྲོང་འགག་སྒོའི་མཉམ་འབྲེལ་ཞིབ་བཤེར་ཚོམས་ཆེན་དང་། དཔལ་འབྱོར་གསར་སྤེལ་ཁུལ་གྱི་ཕྱིར་གཏོང་དངོས་ཟོག་བརྟག་ཞིབ་ར་བ། བོད་ཀྱི་འཕྲལ་སྡོམ་འབྲུ་རིགས་གསོག་འཇོག་ལྟེ་གནས་གཞིས་རྩེ་ཡན་ལག་ལྟེ་གནས། ལྷ་གཞིས་མྱུར་བགྲོད་གཞུང་ལམ་སོགས་རྣམ་གྲངས་ཨར་སྐྲུན་བྱ་ཡུལ་དང་། ཁེ་ལས་ཀྱི་ཐོན་སྐྱེད་འཁོར་ཁང་། ཞིང་ནང་དང་མུ་ཁ་བཅས་སུ་ཕེབས་ཏེ་གཙོ་གནད་རྣམ་གྲངས་འཛུགས་སྐྲུན་དང་། ཁྱད་ལྡན་ཐོན་ལས་འཕེལ་རྒྱས། ཕྱི་ཕྱོགས་སྒོ་དབྱེ། འབྲུ་རིགས་གསོག་འཇོག་སོགས་ཀྱི་གནས་ཚུལ་ཤེས་རྟོགས་ཞིབ་ཕྲ་གནང་བ་རེད།

ཁྲེན་ཡུང་ཆིས་སྟོན་དུས་ནི་འབྲུ་རིགས་བརྔ་བསྡུ་དང་། རྣམ་གྲངས་འཛུགས་སྐྲུན། ཐོན་སྐྱེད་ལས་སྒྲུབ་བཅས་ཀྱི་དུས་སྐབས་ཡག་ཤོས་ཤིག་རེད། དེས་ན་རིམ་པ་ཁག་དང་སྡེ་ཚན་ཁག་གིས་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་དགོངས་པ་སློབ་སྦྱོང་དང་ལག་བསྟར་བྱེད་པའི་བརྗོད་དོན་གཙོ་བོའི་སློབ་གསོ་སྤེལ་བ་གོ་སྐབས་སུ་བྱས་ཏེ། འཕེལ་རྒྱས་ཀྱི་འདུ་ཤེས་གསར་པ་ཆ་ཚང་བ་དང་། གནད་ལ་འཁེལ་བ། ཕྱོགས་ཡོངས་བཅས་ཀྱི་སྒོ་ནས་ལག་ལེན་བསྟར་བ་དང་། འཕེལ་རྒྱས་ཀྱི་རྣམ་པ་གསར་པར་རང་འགུལ་ངང་ཞབས་འདེགས་ཞུ་བ་དང་མཉམ་འདྲེས་ཐུབ་པར་བྱེད་པ། ལོ་ཧྲིལ་པོའི་དམིགས་ཚད་ལས་འགན་ལ་རྩེ་གཅིག་ཏུ་དམིགས་པ། ལས་ཀའི་གཙོ་གནད་ཁོང་དུ་བརྟན་པོ་ཆུད་པར་བྱེད་པ། དུས་ཚོད་ཀྱིས་མི་མི་སྒུག་པ་དང་དུས་ཚོད་སྐར་ཆ་ཙམ་ཡང་བརྩོན་ལེན་བྱེད་པའི་དགོས་གཏུགས་ཀྱི་བསམ་པ་དང་འགན་འཁྲིའི་བསམ་པ་འཆང་བ། གོ་སྐབས་དམ་འཛིན་དང་། འགག་སྒྲོལ་དཀའ་སེལ། འབད་འབུངས་ཡར་བརྩོན་བཅས་བྱས་ཏེ། དཔལ་འབྱོར་ལས་དོན་ལ་རྒྱུན་ཆད་མེད་པར་གྲུབ་འབྲས་གསར་པ་ཐོབ་པར་སྐུལ་འདེད་ཧུར་ཐག་གཏོང་དགོས་ཞེས་མཛུབ་སྟོན་གནང་བ་རེད།

ཁྲེན་ཡུང་ཆིས། ཁྱད་ལྡན་ལེགས་ཆའི་ཐོན་ལས་འཕེལ་རྒྱས་ཤུགས་ཆེན་གཏོང་དགོས་ཤིང་། ཡུལ་བབ་དང་བསྟུན་པ་དང་ཚན་རིག་དང་མཐུན་པའི་སྒོ་ནས་འཆར་གཞི་འགོད་པ་དང་ལག་རྩལ་དང་། ཤེས་ལྡན་མི་སྣ། མ་དངུལ། སྲིད་ཇུས་སོགས་ཀྱི་རོགས་སྐྱོར་བྱེད་ཤུགས་ཆེ་རུ་བཏང་སྟེ། ཐོན་ལས་འཕེལ་རྒྱས་ཀྱི་སྤུས་ཚད་དང་ཕན་འབྲས་རྒྱུན་ཆད་མེད་པར་མཐོ་རུ་འགྲོ་བར་སྐུལ་འདེད་གཏོང་དགོས་པ་དང་། གསར་སྤེལ་ཁུལ་སོགས་གླིང་ཁུལ་ཁག་གི་རྨང་གཞིའི་སྒྲིག་བཀོད་ཀྱི་ཞན་ཆ་མགྱོགས་མྱུར་སེལ་བ་དང་། ཐོན་ཁུངས་མཉམ་སྤྱོད་ལ་ཤུགས་སྣོན་རྒྱག་པ། ཚོང་གཉེར་ཁོར་ཡུག་རྒྱུན་ཆད་མེད་པར་ལེགས་སུ་གཏོང་བ། ཚོང་འགུགས་མ་འདྲེན་བྱེད་ཤུགས་ཆེ་རུ་གཏོང་བ། རིམ་པ་ཁག་དང་རིགས་ཁག་གི་གཟིགས་སྐྱོང་སྲིད་ཇུས་དྲིལ་བསྒྲགས་ལག་བསྟར་ཡག་པོ་བཅས་བྱས་ནས་ཁེ་ལས་དེ་བས་མང་པོ་གཞིས་ཆགས་ཐབས་བྱེད་དགོས་པ། ཕྱི་ཕྱོགས་སུ་སྒོ་མོ་འབྱེད་རྒྱ་ཆེ་རུ་ཧུར་ཐག་གཏོང་བ་དང་། སྒོ་དབྱེའི་སྲིད་ཇུས་ཟམ་མི་ཆད་པར་ལེགས་སུ་གཏོང་བ། “རྒྱུད་གཅིག་ལམ་གཅིག”འཛུགས་སྐྲུན་ལ་རང་འགུལ་ངང་ཞབས་འདེགས་ཞུ་བ་དང་དེའི་ནང་ཞུགས་པ་བཅས་བྱས་ནས་ཨེ་ཤེ་ཡ་ལྷོ་མར་ཕྱོགས་པའི་སྒོ་དབྱེའི་བགྲོད་ལམ་གལ་ཆེན་གཏོད་དགོས་པ། ཕྱི་ཕྱོགས་ཚོང་དོན་གྱི་དཔལ་འབྱོར་ནུས་ཤུགས་ཡོད་རྒུས་འཕེལ་རྒྱས་གཏོང་བ་དང་། འགག་སྒོའི་འགག་སྒྲོལ་ནུས་པ་ཆེ་རུ་གཏོང་བར་ཤུགས་སྣོན་རྒྱག་པ། རིག་ནུས་ཅན་གྱི་ཆུ་ཚད་མཐོ་རུ་གཏོང་བ། མཐའ་མཚམས་མི་སེར་གྱི་ཁྲོམ་རའི་ཉོ་ཚོང་རིམ་བཞིན་སླར་གསོ་དང་རྒྱ་ཆེར་གཏོང་བ་བཅས་བྱས་ནས་ཕྱི་ཕྱོགས་ཚོང་དོན་རྒྱུན་མཐུད་དང་། སྐྱོན་བྲལ། བརྟན་པོ་བཅས་ཀྱི་སྒོ་ནས་འཕེལ་རྒྱས་འགྲོ་ཐུབ་པའི་འགན་ལེན་བྱེད་དགོས་པ། མང་ཚོགས་སྒྲིག་འཛུགས་ཧུར་ཐག་བྱས་ཏེ་སྟོན་བསྡུའི་མཛོད་འཇུག་གི་ལས་དོན་ཡག་པོ་བསྒྲུབས་ནས་འབྲུ་རྡོག་གཅིག་ཀྱང་མ་ལུས་པར་མཛོད་མཇུག་ཐུབ་པའི་འགན་ལེན་བྱེད་དགོས་པ། ནས་ཉོ་སྒྲུབ་རིན་གོང་དམའ་ཤོས་ཀྱི་སྲིད་ཇུས་དོན་འཁྱོལ་ཡག་པོ་བྱས་ཏེ་ནས་གསོག་ཉར་གྱི་དམིགས་ཚད་དང་ལས་འགན་ཕུན་སུམ་ཚོགས་པོས་ལེགས་འགྲུབ་ཡོང་བར་བྱེད་དགོས་པ་བཅས་ཀྱི་ནན་བཤད་གནང་བ་རེད།