ཁྲེན་ཡུང་ཆིས་རང་སྐྱོང་ལྗོངས་ཀྱི་རྒྱལ་ཡོངས་དཔལ་འབྱོར་ཡོངས་བཤེར་ཐེངས་ལྔ་པ་དང་རེས་སྐོར་དང་པོའི་བསྡོམས་རྩིས་ལྟ་ཞིབ་སྐུལ་སློང་བཀོད་སྒྲིག་གི་བརྙན་ལམ་ཚོགས་འདུ་གཙོ་སྐྱོང་གནང་བ།
ཟླ་9ཚེས་9ཉིན། ལྗོངས་ཡོངས་ཀྱི་རྒྱལ་ཡོངས་དཔལ་འབྱོར་ཡོངས་བཤེར་ཐེངས་ལྔ་པ་དང་རེས་སྐོར་དང་པོའི་བསྡོམས་རྩིས་ལྟ་ཞིབ་སྐུལ་སློང་བཀོད་སྒྲིག་གི་བརྙན་ལམ་ཚོགས་འདུ་ལྷ་སར་འཚོགས་ཤིང་། ཚོགས་འདུའི་ཐོག རྒྱལ་ཡོངས་དཔལ་འབྱོར་ཡོངས་བཤེར་ཐེངས་ལྔ་པ་དང་རྒྱལ་ཡོངས་བསྡོམས་རྩིས་ཁྲིམས་སྐྱོང་ལས་དོན་ཚོགས་འདུའི་དགོངས་དོན་བརྒྱུད་བསྒྲགས་སློབ་སྦྱོང་བྱས་པ་དང་སྦྲགས། རང་ལྗོངས་ཀྱི་ལས་དོན་བཀོད་སྒྲིག་ཀྱང་བྱས་པ་རེད། རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་དང་རང་སྐྱོང་ལྗོངས་ཀྱི་རྒྱུན་ལས་ཀྲུའུ་ཞི་གཞོན་པ་ཁྲེན་ཡུང་ཆིས་ཚོགས་འདུ་གཙོ་སྐྱོང་གནང་བ་དང་འབྲེལ་གསུང་བཤད་ཀྱང་གནང་བ་དང་། ས་ཁུལ་དང་གྲོང་ཁྱེར་ཁག་ཏུ་ཡན་ལག་ཚོགས་ར་བཙུགས་ཡོད་པ་རེད།
ཁྲེན་ཡུང་ཆིས་ནན་བཤད་གནང་དོན། ཚུགས་གནས་མཐོ་རུ་བཏང་ནས་རྒྱལ་ཡོངས་དཔལ་འབྱོར་ཡོངས་བཤེར་ཐེངས་ལྔ་པའི་དོན་སྙིང་གལ་ཆེན་ལ་ངོས་འཛིན་གང་ལེགས་བྱེད་དགོས།རིམ་པ་ཁག་དང་སྡེ་ཚན་ཁག་གིས་བསྡོམས་རྩིས་ལས་དོན་དང་དཔལ་འབྱོར་ཡོངས་བཤེར་ལས་དོན་སྐོར་གྱི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཛུབ་སྟོན་དང་མཆན་བཀོད་མཛུབ་སྟོན་གལ་ཆེན་གྱི་དགོངས་དོན་སློབ་སྦྱོང་དང་ལག་བསྟར་ནན་ཏན་བྱས་ནས་བསམ་བློ་དང་བྱ་སྤྱོད་ཏང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་གི་ཐབས་ཇུས་བཀོད་སྒྲིག་དང་རང་སྐྱོང་ལྗོངས་ཏང་ཨུད་དང་སྲིད་གཞུང་གི་ལས་དོན་བཀོད་སྒྲིག་ཐོག་རང་རྟོགས་ངང་གཅིག་གྱུར་ཡོང་བར་བྱས་ཐོག དཔལ་འབྱོར་ཡོངས་བཤེར་ལ་ངོས་འཛིན་གཏིང་ཟབ་བྱེད་རྒྱུ་དེ་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་གནས་ཚུལ་ཕྱོགས་ཡོངས་ནས་མཐིལ་རྟོགས་དང་། དུས་རབས་གསར་པའི་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་ཁྱད་ཆོས་ཁོང་དུ་ཡང་དག་ཆུད་པ། སྤྱི་ཁོག་སྙོམས་སྒྲིག་ལ་ཤུགས་སྣོན་དང་ལེགས་སུ་གཏོང་བ། སྤུས་ཚད་མཐོ་བའི་འཕེལ་རྒྱས་ལ་ཞབས་འདེགས་ཞུ་བ་དང་སྐུལ་འདེད་གཏོང་བ་བཅས་ཀྱི་ངོས་ནས་བརྗོད་ན་གལ་ཆེ་ལ་རྒྱང་རིང་གཏིང་ཟབ་ཀྱི་དོན་སྙིང་ལྡན་ཡོད།
ཁྲེན་ཡུང་ཆིས་བླང་བྱ་བཏོན་དོན། རིམ་པ་ཁག་དང་སྡེ་ཚན་ཁག་གིས་བསྡོམས་རྩིས་ལྟ་ཞིབ་ཀྱི་གལ་ཆེའི་རང་བཞིན་ལ་ངོས་འཛིན་གཏིང་ཟབ་བྱས་ཐོག་རེས་སྐོར་དང་པོའི་བསྡོམས་རྩིས་ལྟ་ཞིབ་ལས་དོན་ཚད་གཞི་མཐོན་པོ་དང་བླང་བྱ་ནན་པོས་སྤེལ་ནས་བསྡོམས་རྩིས་ལྟ་ཞིབ་ཀྱི་ལག་ཆ་ནུས་ལྡན་གྱི་ནུས་པ་ཡག་པོ་འདོན་དགོས། ལྟ་ཞིབ་ཇུས་གཞི་སྔར་བས་ཞིབ་ཕྲ་དང་ལས་བགོས་ཁ་གསལ་བཟོས་ནས་འགན་འཁྲི་ཚན་པ་དང་མི་སྒེར་ལ་དོན་འཁྱོལ་བྱས་ཐོག་གནད་དོན་ལ་དམ་པོར་དམིགས་ནས་ཡུལ་དངོས་ལ་ལྟ་ཞིབ་ཡག་པོ་དང་ལྟ་ཞིབ་སྙན་ཞུ་སྤུས་ཚད་མཐོ་པོས་བྲིས་ཏེ། ལྟ་ཞིབ་བྱ་ཡུལ་ཚན་པའི་གནས་ཚུལ་དོན་དངོས་དང་མཐུན་པར་གསལ་ཞུ་བྱེད་དགོས། གཞི་རིམ་གྱི་ཁུར་པོ་ཡང་དུ་གཏོང་བའི་བླང་བྱ་དོན་འཁྱོལ་ནན་ཏན་བྱས་ཐོག་བརྒྱུད་རིམ་ཁུ་བསྡུ་དང་བྱེད་སྟངས་ལེགས་སུ་བཏང་ནས་ཕྱི་ཚུལ་རིང་ལུགས་དང་དཔོན་ཉམས་རིང་ལུགས་གཏན་འགོག་བྱེད་དགོས། གྲུབ་འབྲས་གཞན་སྒྱུར་དང་བེད་སྤྱོད་བྱེད་ཤུགས་ཆེ་རུ་བཏང་ནས་ལྟ་ཞིབ་ཀྱི་རྗེས་མཐུད་ལས་དོན་ཡག་པོ་སྒྲུབ་དགོས། ཡོངས་བཤེར་གྱི་སྒྲིག་ཁྲིམས་ལ་བརྩི་སྲུང་ནན་པོ་ཞུས་ནས་བསྡོམས་རྩིས་རྫུན་བཟོ་དང་མི་བདེན་རྫུན་སྒྲིག་ལ་མཐའ་གཅིག་ཏུ་འགོག་ཟོན་དང་ཉེས་ཆད་བཅད་དེ། བསྡོམས་རྩིས་ལས་དོན་གྱི་ཕན་འབྲས་བཟང་པོར་བརྟེན་ནས་བོད་ཀྱི་དཔལ་འབྱོར་དང་སྤྱི་ཚོགས་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་དགོས།