ཟླ་9ཚེས་1ཉིན་ནས་ཚེས་4ཉིན་བར། ཧོ་པེ་ཞིང་ཆེན་གྱི་ཏང་སྲིད་འཐུས་མི་ཚོགས་པ་བོད་དུ་རྟོག་ཞིབ་གནང་བར་ཕེབས་པ་དང་ཧོ་པེ་དང་བོད་ཀྱི་ལས་དོན་སྐོར་གྱི་བཞུགས་མོལ་ཚོགས་འདུར་ཞུགས་པ་རེད། རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་དང་རང་སྐྱོང་ལྗོངས་ཀྱི་ཀྲུའུ་ཞི་ཡན་ཅིན་ཧའེ་དང་ཧོ་པེ་ཞིང་ཨུད་ཀྱི་ཧྲུའུ་ཅི་གཞོན་པ་དང་ཧྲེང་ཀྲང་ཝང་ཀྲེང་ཕུའུ་བཞུགས་མོལ་ཚོགས་འདུར་ཞུགས་པ་དང་གསུང་བཤད་ཀྱང་གནང་བ་རེད།

རང་སྐྱོང་ལྗོངས་མི་དམངས་འཐུས་ཚོགས་རྒྱུན་ལས་ཨུ་ལྷན་གྱི་ཀྲུའུ་རེན་གཞོན་པ་ཐང་མིང་དབྱིང་དང་ཧོ་པེ་ཞིང་ཆེན་མི་དམངས་འཐུས་ཚོགས་རྒྱུན་ལས་ཨུ་ལྷན་གྱི་ཀྲུའུ་རེན་གཞོན་པ་ཀའོ་ཡུན་ཞའོ་རྣམ་གཉིས་ཀྱིས་ས་གནས་གཉིས་ཀྱི་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་གནས་ཚུལ་ཁག་སོ་སོར་ངོ་སྤྲོད་གནང་བ་རེད། རང་སྐྱོང་ལྗོངས་སྲིད་གྲོས་ཀྱི་ཀྲུའུ་ཞི་གཞོན་པ་སྒྲོལ་དཀར་དང་ཧོ་པེ་ཞིང་ཆེན་སྲིད་གྲོས་ཀྱི་ཀྲུའུ་ཞི་གཞོན་པ་ཁྲང་ལི་ཧུང་ཚོགས་འདུར་ཞུགས་པ་རེད།

ཡན་ཅིན་ཧའེ་ཡིས་རང་སྐྱོང་ལྗོངས་ཏང་ཨུད་དང་སྲིད་གཞུང་དང་ཧྲུའུ་ཅི་ཝང་ཅུན་ཀྲེང་གི་ཚབ་ཞུས་ཏེ་ཧོ་པེ་ཞིང་ཆེན་གྱི་ཏང་སྲིད་འཐུས་མི་ཚོགས་པ་བོད་དུ་རྟོག་ཞིབ་གནང་བར་ཕེབས་པར་དགའ་བསུ་ཞུས་པ་དང་། ཧོ་པེ་ཞིང་ཆེན་གྱིས་བོད་ལ་ཐུགས་ཁུར་དང་རྒྱབ་སྐྱོར་གནང་བར་ཐུགས་རྗེ་ཆེ་ཞུས་པ་རེད། ཁོང་གིས། དུས་ཡུན་རིང་པོའི་ནང་ཧོ་པེ་ཞིང་ཨུད་དང་ཞིང་ཆེན་སྲིད་གཞུང་གིས་བོད་ཀྱི་ལས་དོན་སྐོར་གྱི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཛུབ་སྟོན་གལ་ཆེན་དང་དུས་རབས་གསར་པའི་ཏང་གི་བོད་སྐྱོང་མཛད་ཇུས་ལག་བསྟར་ནན་ཏན་བྱས་ཏེ་བློ་བརྟན་འགྱུར་མེད་ངང་ཁ་གཏད་བོད་སྐྱོར་གྱི་ཆབ་སྲིད་ཀྱི་འགན་འཁྲི་ཁུར་ནས་བོད་སྐྱོར་ལས་དོན་ལ་གཡུར་དུ་ཟ་བའི་གྲུབ་འབྲས་ཐོབ་སྟེ་བོད་དང་ལྷག་པར་དུ་མངའ་རིས་ས་ཁུལ་ཡུན་རིང་བདེ་འཁོད་དང་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་ནུས་ལྡན་བཏང་ཡོད། ཞིང་ཆེན་དང་རང་སྐྱོང་ལྗོངས་གཉིས་པོས་ཐོན་ལས་འཕེལ་རྒྱས་ཀྱི་འགྲན་ལམ་རྒྱ་ཆེར་གཏོང་བར་མཉམ་དུ་ཤུགས་སྣོན་རྒྱག་པ་དང་། རྨང་གཞིའི་སྒྲིག་བཀོད་འཛུགས་སྐྲུན་གྱི་གོ་སྐབས་གསར་པར་དམ་འཛིན་བྱེད་པ། རིག་སྟོབས་བོད་སྐྱོར་ཐད་བྱས་རྗེས་གསར་པ་འཇོག་པ། མི་རིགས་མཐུན་སྒྲིལ་གྱི་རྣམ་པ་གསར་པ་གཏོད་པ་བཅས་བྱས་ནས། མཉམ་དུ་རྒྱལ་ཁབ་སྟོབས་ཆེན་འཛུགས་སྐྲུན་དང་མི་རིགས་བསྐྱར་དར་གྱི་བརྗིད་ཆེའི་དམིགས་ཚད་ཕྱོགས་སུ་འབད་འཐབ་ཧུར་ཐག་བྱ་རྒྱུའི་རེ་བ་ཡོད། བོད་ཀྱིས་ད་ཐེངས་འཐུས་མི་ཚོགས་པ་བོད་དུ་རྟོག་ཞིབ་དང་མཛུབ་ཁྲིད་གནང་བར་ཕེབས་པ་གོ་སྐབས་སུ་བྱས་ནས་དྲིན་ཚོར་གྱི་བསམ་པ་བཅངས་ཏེ་རང་འགུལ་ངང་འབྲེལ་མཐུད་ལ་ཤུགས་སྣོན་རྒྱག་པ་དང་། ལས་དོན་དོན་འཁྱོལ་ལ་དམ་འཛིན་བྱེད་པ། དྲིན་ཚོར་དང་འབད་འབུངས་ཀྱི་བྱ་སྤྱོད་དངོས་ལ་བརྟེན་ནས་སྤྱི་ཁྱབ་ཧྲུའུ་ཅི་དང་ཏང་ཀྲུང་དབྱང་གི་བྱམས་བརྩེའི་ཐུགས་ཁུར་དང་ཧོ་པེ་ཞིང་ཆེན་གྱི་སྒེར་སེམས་མེད་པའི་རོགས་སྐྱོར་ལ་དྲིན་ལན་འཇལ་གྱི་ཡིན་ཞེས་གསུངས་པ་རེད།

ཝང་ཀྲེང་ཕུའུ་ཡིས་ཞིང་ཨུད་དང་། ཞིང་ཆེན་སྲིད་གཞུང་། ཞིང་ཨུད་ཀྱི་ཧྲུའུ་ཅི་ཉི་གཡོད་ཧྥུང་བཅས་ཀྱི་ཚབ་ཞུས་ཏེ་བོད་རང་སྐྱོང་ལྗོངས་ཀྱིས་དུས་ཡུན་རིང་པོའི་ནང་ཧོ་པེར་རྒྱབ་སྐྱོར་དང་རོགས་རམ་གནང་བར་ཐུགས་རྗེ་ཆེ་ཞུས་པ་རེད། ཁོང་གིས། བོད་ལ་ཁ་གཏད་རོགས་སྐྱོར་བྱེད་པ་དེ་ནི་ཏང་ཀྲུང་དབྱང་གིས་ཧོ་པེར་དཀྲིས་པའི་ཆབ་སྲིད་ཀྱི་ལས་འགན་གལ་ཆེན་ཞིག་ཡིན་ལ། ཧོ་པེ་ཡི་རང་འཁྲིའི་ལས་དོན་ཞིག་ཀྱང་རེད། ཧོ་པེས་ཁ་གཏད་བོད་སྐྱོར་ལས་དོན་དེ་ཐོག་མཐའ་བར་གསུམ་དུ་གནས་བབ་གལ་ཆེན་ཐོག་བཞག་ནས་སྤུས་ཚད་མཐོ་བའི་འཕེལ་རྒྱས་དང་དམངས་འཚོ་འགན་ལེན་དང་ལེགས་སུ་གཏོང་བར་དམིགས་ཏེ། རོགས་སྐྲུན་རྣམ་གྲངས་དང་། ཤེས་ལྡན་པ་དང་མ་དངུལ་སོགས་ཀྱི་ཐོན་ཁུངས་བཀོད་སྒྲིག་ལེགས་པོ་བྱེད་པ། སློབ་གསོ་དང་སྨན་བཅོས་སོགས་བོད་སྐྱོར་བྱེད་ཤུགས་ཆེ་རུ་གཏོང་བ། མངའ་རིས་ས་ཁུལ་ལ་ཁྱད་ལྡན་ཐོན་ལས་ཀྱི་ཁྲོམ་ར་རྒྱ་ཆེར་གཏོང་རོགས་བྱེད་པ། ཕྱོགས་གཉིས་པོར་རིག་གནས་སྤེལ་རེས་དང་ཡུལ་སྐོར་ལ་སྐུལ་འདེད་གཏོང་རེས་བྱེད་པར་རྒྱབ་སྐྱོར་བཅས་བྱས་ཏེ། ཁ་གཏད་རོགས་སྐྱོར་གྱི་ལས་དོན་ལ་ཕན་འབྲས་གསར་པ་དེ་བས་ཆེ་བ་ཐོན་པར་སྐུལ་འདེད་གཏོང་གི་ཡིན་ཞེས་གསུངས་པ་རེད།