ཤའོ་ཡིའུ་ཚའེ་ལོ་སྟོད་ཀྱི་ལྗོངས་ཡོངས་ཀྱི་བཟོ་ལས་དཔལ་འབྱོར་འཁོར་རྒྱུག་དང་བཟོ་ལས་ཁྱབ་ཁོངས་ཀྱི་བདེ་འཇགས་ཐོན་སྐྱེད་ཚོགས་འདུར་ཞུགས་པ།
ཚེས་2ཉིན་གྱི་སྔ་དྲོར། ལྗོངས་ཏང་ཨུད་ཀྱི་རྒྱུན་ཨུ་རང་སྐྱོང་ལྗོངས་ཀྱི་རྒྱུན་ལས་ཀྲུའུ་ཞི་གཞོན་པ་ཤའོ་ཡིའུ་ཚའེ་ཡིས་2023ལོའི་ལོ་སྟོད་ཀྱི་ལྗོངས་ཡོངས་ཀྱི་བཟོ་ལས་དཔལ་འབྱོར་འཁོར་རྒྱུག་དང་བཟོ་ལས་ཁྱབ་ཁོངས་ཀྱི་བདེ་འཇགས་ཐོན་སྐྱེད་ཚོགས་འདུ་གཙོ་སྐྱོང་གནང་ཞིང་། ཚོགས་འདུའི་ཐོག རྒྱལ་ཡོངས་བདེ་འཇགས་ཐོན་སྐྱེད་ཀྱི་བརྙན་འཕྲིན་ཁ་པར་ཚོགས་འདུ་དང་། རྒྱལ་ཡོངས་བཟོ་ལས་དང་ཆ་འཕྲིན་ཅན་གཙོ་གཉེར་སྡེ་ཚན་གྱི་འགོ་ཁྲིད་བློ་མཐུན་གྱི་བཞུགས་མོལ་ཚོགས་འདུ། ལྗོངས་ཏང་ཨུད་སྐབས་བཅུ་པའི་ཚང་འཛོམས་གྲོས་ཚོགས་ཐེངས་བཞི་པ་བཅས་ཀྱི་དགོངས་དོན་བརྒྱུད་བསྒྲགས་དང་སློབ་སྦྱོང་བྱས་པ་དང་སྦྲགས། ལོ་སྟོད་ཀྱི་ལྗོངས་ཡོངས་ཀྱི་བཟོ་ལས་དཔལ་འབྱོར་འཁོར་རྒྱུག་དང་དེ་བཞིན་བཟོ་ལས་ཁྱབ་ཁོངས་ཀྱི་བདེ་འཇགས་ཐོན་སྐྱེད་གནས་ཚུལ་ལ་དབྱེ་ཞིབ་དང་ལོ་སྨད་ཀྱི་གཙོ་གནད་ལས་དོན་ཁག་བཀོད་སྒྲིག་ཀྱང་བྱས་པ་རེད།
ཤའོ་ཡིའུ་ཚའེ་ཡིས་ནན་བཤད་གནང་དོན། བདེ་འཇགས་ཐོན་སྐྱེད་ཀྱི་འདུ་ཤེས་བརྟན་པོར་བཙུགས་ནས་མཐའ་ཚད་ཀྱི་འདུ་ཤེས་དང་དམར་ཐིག་གི་འདུ་ཤེས་ཟབ་ཏུ་བཏང་ཐོག་ཉེན་བརྡ་རྒྱུན་སྒྲོག་བྱས་ཏེ། ནམ་ཡང་སེམས་ཁྲལ་བྱེད་པའི་འགན་འཁྲི་འཁུར་སེམས་ལ་བརྟེན་ནས། བདེ་འཇགས་ཐོན་སྐྱེད་ལ་ཤུགས་སྣོན་བརྒྱབ་སྟེ། བཟོ་ལས་དཔལ་འབྱོར་འཕེལ་རྒྱས་ལ་ཁོར་ཡུག་བཟང་པོ་གཏོད་དགོས། འགན་འཁྲི་ནན་དུ་བཏང་ཐོག་འགན་འཁྲི་གདུབ་ཟུམ་དོ་དམ་ལམ་སྲོལ་འཐུས་སྒོ་ཚང་དུ་གཏོང་བ་དང་མི་མངོན་པའི་རྐྱེན་ངན་གྲལ་བཤེར་དང་བཅོས་སྒྲིག་བྱེད་ཤུགས་ཆེ་རུ་བཏང་ནས། ལས་འཛོལ་སྣ་ཚོགས་མཐའ་གཅིག་ཏུ་བཀག་སྟེ་བཟོ་ལས་ཁྱབ་ཁོངས་ཀྱི་བདེ་འཇགས་ཐོན་སྐྱེད་གནས་ཚུལ་བརྟན་ལ་བརྒྱུད་རིམ་ལྡན་པ་ཡོང་བའི་འགན་ལེན་བྱེད་དགོས།