ཤའོ་ཡིའུ་ཚའེ་ལྷ་སའི་ལྷོ་རི་བྱང་རིའི་སྔོ་འགྱུར་བཀོད་འདོམས་པུའི་གཞུང་དོན་ཁང་གི་ཚོགས་འདུར་ཞུགས་པ།
ཚེས་24ཉིན་ལྷ་སའི་ལྷོ་རི་བྱང་རིའི་སྔོ་འགྱུར་བཀོད་འདོམས་པུའི་གཞུང་དོན་ཁང་གིས་ཚོགས་འདུ་འཚོགས་ནས། ཧྲུའུ་ཅི་ཝང་ཅུན་ཀྲེང་དང་ཀྲུའུ་ཞི་ཡན་ཅིན་ཧའེ་ཡིས་ཉེ་དུས་ལྷ་སའི་ལྷོ་རི་བྱང་རིའི་སྔོ་འགྱུར་ལས་དོན་ལ་གནང་བའི་མཛུབ་སྟོན་དང་མཆན་བཀོད་མཛུབ་སྟོན་གལ་ཆེན་གྱི་དགོངས་དོན་བརྒྱུད་བསྒྲགས་དང་སློབ་སྦྱོང་དང་། 2023ལོའི་ལས་དོན་སྐུལ་འདེད་ཀྱི་གནས་ཚུལ་དང་དེའི་ཐད་གནས་པའི་དཀའ་ངལ་གཙོ་བོ་ཉན་པ། གོམ་སྟབས་རྗེས་མའི་གཙོ་གནད་ལས་དོན་ལ་ཞིབ་འཇུག་དང་བཀོད་སྒྲིག་བཅས་བྱས་པ་རེད། ལྗོངས་ཏང་ཨུད་ཀྱི་རྒྱུན་ཨུ་རང་སྐྱོང་ལྗོངས་ཀྱི་རྒྱུན་ལས་ཀྲུའུ་ཞི་གཞོན་པ་ཤའོ་ཡིའུ་ཚའེ་ཡིས་ཚོགས་འདུ་གཙོ་སྐྱོང་གནང་བ་དང་འབྲེལ་གསུང་བཤད་ཀྱང་གནང་བ་དང་། རང་སྐྱོང་ལྗོངས་མི་དམངས་འཐུས་ཚོགས་རྒྱུན་ལས་ཨུ་ལྷན་གྱི་ཀྲུའུ་རེན་གཞོན་པ་འཇམ་དཔལ་ཚོགས་འདུར་ཞུགས་པ་རེད།
ཤའོ་ཡིའུ་ཚའེ་ཡིས་ནན་བཤད་གནང་དོན། ཧྲུའུ་ཅི་ཝང་ཅུན་ཀྲེང་དང་ཀྲུའུ་ཞི་ཡན་ཅིན་ཧའེ་ཡིས་མཆན་བཀོད་མཛུབ་སྟོན་ཐེངས་མང་གནང་ནས། ཚན་རིག་ལ་བརྩི་བཀུར་དང་ཚན་རིག་ལ་བརྟེན་རྒྱུར་སྣང་ཆེན་བྱས་ནས་ཆོས་ཉིད་ལྟར་བྱ་བ་སྒྲུབ་དགོས་པའི་ནན་བཤད་ཡང་ཡང་གནང་ཡོད། ཁོངས་མིའི་ཚན་པ་ཁག་དང་སྡེ་ཚན་ཁག་གིས་ངེས་པར་དུ་ཚན་རིག་དང་མཐུན་པའི་སྔོ་འགྱུར་གྱི་བླང་བྱ་གཞིར་བཟུང་། ལོ་གཅིག་རིང་གི་ས་མཐོའི་རིར་ཤིང་འཛུགས་ནགས་བཟོའི་ཉམས་མྱོང་ཕྱོགས་སྡོམ་ནན་ཏན་བྱས་ཏེ། ཚན་རིག་དང་མཐུན་པའི་སྒོ་ནས་ལྷ་སའི་ལྷོ་རི་བྱང་རིའི་སྔོ་འགྱུར་ནགས་བཟོའི་ཤིང་སྣ་འདེམས་པ་དང་། ཤིང་སོན་གྱི་སྤུས་ཚད་དང་ཚད་གཞི་ནན་སྲུང་གིས། ཤིང་སོན་གྱི་གསོན་ཚད་དང་ཉར་ཚགས་བྱེད་ཚད་ཆེ་རུ་གཏོང་དགོས། འགན་གཙང་བླངས་ནས་ནགས་བཟོ་བྱ་རྒྱུ་དང་སྔོན་འདེབས་རྗེས་གསབ་སོགས་ཀྱི་བྱེད་སྟངས་མུ་མཐུད་དར་སྤེལ་བཏང་ནས། རྨང་གཞིའི་སྒྲིག་བཀོད་འཛུགས་སྐྲུན་དང་ཤིང་འཛུགས་ནགས་བཟོའི་གཞི་གཅིག་ཅན་གྱི་བྱེད་སྟངས་གསར་པ་འཚོལ་ཞིབ་བྱེད་དགོས། ལས་གྲྭ་ལག་བསྟར་བྱེད་མགྱོགས་སུ་བཏང་སྟེ། སྤྱི་འདོམས་ངང་འགན་འཁྲི་ནན་དུ་གཏོང་བ་དང་། གནད་དོན་ཕྱོགས་སྟོན་དུ་འཛིན་རྒྱུ་མཐའ་འཁྱོངས་དང་མ་ལག་འདུ་ཤེས་ཟབ་ཏུ་གཏོང་བ། ལས་འགན་དང་དུས་ཚོད་ཀྱི་མཚམས་ཚིགས་ཁ་གསལ་བཟོ་བ་བཅས་བྱས་ནས། སྤུས་ཚད་མཐོ་པོས་ལོ་འཁོར་གྱི་ནགས་བཟོའི་ལས་འགན་ལེགས་གྲུབ་ཐུབ་པའི་འགན་ལེན་བྱེད་དགོས།