ཟླ་7ཚེས་5ཉིན་གྱི་སྔ་དྲོ། ལྗོངས་ཏང་ཨུད་ཀྱི་རྒྱུན་ཨུ་རང་སྐྱོང་ལྗོངས་ཀྱི་རྒྱུན་ལས་ཀྲུའུ་ཞི་གཞོན་པ་ཤའོ་ཡིའུ་ཚའེ་ཡིས་བརྟག་ཞིབ་ཚོགས་ཆུང་གི་སྣེ་ཁྲིད་དེ། གཙང་རལ་རི་མགོ་ཕུག་ལམ་གྱི་བྱང་འདབས་རི་ངོས་ནགས་བཟོ་ཁུལ་དུ་རྣམ་གྲངས་ལག་བསྟར་བྱས་ཚུལ་ལ་ས་གནས་ས་ཐོག་ཏུ་བརྟག་ཞིབ་གནང་བ་དང་འབྲེལ། ཆེད་དོན་ཚོགས་འདུ་གཙོ་སྐྱོང་གནང་ནས་ལྷ་སའི་ལྷོ་རི་བྱང་རིའི་སྔོ་འགྱུར་གྱི་འབྲེལ་ཡོད་ལས་དོན་ལ་ཞིབ་འཇུག་དང་བཀོད་སྒྲིག་ཀྱང་གནང་བ་རེད།

ཤའོ་ཡིའུ་ཚའེ་ཡིས་ནགས་རྩྭ་སྡེ་ཚན་གྱིས་ལྕང་སོན་མཁོ་སྤྲོད་ལ་སྤྱི་འདོམས་དང་མཐུན་སྦྱོར་ཡག་པོ་བྱས་ཏེ་ས་གནས་དེ་རང་གི་ལྕང་སོན་འདེབས་གསོ་ཤུགས་ཆེན་བྱེད་པ་དང་། ས་གནས་དེ་རང་གི་ལྕང་སོན་འདེབས་རྒྱུ་གཙོ་བོར་འཛིན་པ། ལྗོངས་ཕྱིའི་ལྕང་སོན་ལ་ས་ཁོངས་ཕྱེ་ནས་ཉོ་སྒྲུབ་ལག་ལེན་ནན་པོ་བསྟར་དགོས་པ་མ་ཟད་། ད་དུང་ལྕང་སོན་གྱི་སྤུས་ཚད་ཀྱི་འགག་སྒོ་ནན་པོ་སྲུང་དགོས། རིམ་ཁག་བཀོད་འདོམས་པུའི་གཞུང་དོན་ཁང་གིས་འགོ་ཁྲིད་ལ་ཤུགས་སྣོན་རྒྱག་པ་དང་། རིམ་པ་ཁག་གི་འགན་ནུས་གསལ་པོ་བཟོ་བ། ཁེ་ལས་ཁག་གི་བྱེད་པོའི་འགན་འཁྲི་ནན་དུ་གཏོང་བ། ནགས་བཟོའི་འཕེལ་རིམ་ལ་ལྟ་སྟངས་ཡང་དག་འཛིན་པ་བཅས་བྱས་ནས་ཚན་རིག་དང་མཐུན་པའི་ངང་ནགས་བཟོའི་དམིགས་ཚད་ལས་འགན་བཟོ་དགོས། ནགས་བཟོའི་ལས་གྲྭའི་རྣམ་པ་གསར་པ་ཞིབ་འཇུག་དང་འཚོལ་ཞིབ་ཧུར་ཐག་བྱས་ནས་ནགས་བཟོའི་ལས་འགན་དང་དམིགས་ཚད་ཚད་གཞི་མཐོ་པོས་དོན་འཁྱོལ་བྱེད་དགོས། ནགས་བཟོའི་དུས་ཚོད་ཡག་ཤོས་ལ་དམ་འཛིན་ཡག་པོ་བྱས་ཏེ་ཆུ་གློག་ལམ་སོགས་ལེ་ལག་ཚང་བའི་ལས་གྲྭ་ལག་བསྟར་ལ་ཤུགས་སྣོན་རྒྱག་པ་དང་རྨང་གཞིའི་སྒྲིག་བཀོད་འོས་སྐུལ་འོས་དཔོད་ཀྱི་ཁྲིམས་སྲོལ་ལག་བསྟར་ནན་པོ་བྱེད་དགོས། གྲངས་གཞི་བསྡོམས་རྩིས་འཕྱུགས་མེད་དང་། རྩིས་ཐོ་ཞིབ་ཕྲ་བཟོ་བ། ལྕང་སོན་འདེབས་འཛུགས་ཀྱི་སྣ་ཁ་དང་གྲངས་འབོར་གྱི་རྩིས་ཐོ་བཟོ་བ་དང་འཐུས་སྒོ་ཚང་དུ་གཏོང་བ་བཅས་བྱས་ནས་གྲངས་གཞི་ངོ་མ་དང་བློས་འགེལ་ཆོག་པ་བྱེད་པ་ལས་མི་བདེན་རྫུན་སྒྲིག་གཏན་ནས་བྱེད་མི་རུང་། ནགས་བཟོའི་དུས་མཇུག་གི་དོ་དམ་ལ་ཤུགས་སྣོན་དང་། གཏོགས་ཁོངས་དོ་དམ་གྱི་འགན་འཁྲི་སྒྲུབ་པ། ནགས་ཤིང་གསོན་ཚད་མཐོ་རུ་ཏན་ཏིག་གཏོང་བ་བཅས་བྱས་ཏེ་ནགས་བཟོའི་ཕན་འབྲས་འགན་ལེན་བྱེད་དགོས་ཞེས་ནན་བཤད་གནང་བ་རེད།