ཁྲེན་ཡུང་ཆིས་ལྷ་ས་དཔལ་འབྱོར་ལག་རྩལ་གསར་སྤེལ་ཁུལ་དུ་བརྟག་ཞིབ་གནང་བ།
ཟླ་6ཚེས་25ཉིན། རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་དང་རང་སྐྱོང་ལྗོངས་ཀྱི་རྒྱུན་ལས་ཀྲུའུ་ཞི་གཞོན་པ་ཁྲེན་ཡུང་ཆི་ལྷ་ས་དཔལ་འབྱོར་ལག་རྩལ་གསར་སྤེལ་ཁུལ་གྱི་མེ་ཧྭ་སྐྱེ་དངོས་ཚན་རྩལ་ཚོགས་པ་མ་རྐང་ཚད་ཡོད་ཀུང་སི་དང་། ཧྭ་པའོ་དྲི་ཞིམ་རྫས་བཅུད་མ་རྐང་ཚད་ཡོད་ཀུང་སི། ལྷ་སའི་ཕྱོགས་བསྡུས་ཁྲལ་སྲུང་ཁུལ་བཅས་སུ་བརྟག་ཞིབ་གནང་བར་ཕེབས་ནས་ཁེ་ལས་འཕེལ་རྒྱས་དང་། གླིང་ཁུལ་འཛུགས་སྐྲུན། ཐོན་ལས་ཀྱི་བཀོད་པ། ཚོང་གཉེར་ཁོར་ཡུག ཚོང་འགུགས་མ་འདྲེན། ཕྱིར་གཏོང་དངོས་ཟོག་སོགས་ཀྱི་གནས་ཚུལ་མཁྱེན་རྟོགས་ཞིབ་ཕྲ་གནང་བ་མ་ཟད། ས་ཡུལ་དངོས་ཀྱི་བཞུགས་མོལ་ཚོགས་འདུའང་འཚོགས་ནས་འབྲེལ་ཡོད་ལས་དོན་གྱི་སྙན་སེང་གསན་པ་དང་། གནས་པའི་དཀའ་ངལ་དང་གནད་དོན་ཞིབ་འཇུག་ཐག་གཅོད། གོམ་སྟབས་རྗེས་མའི་ལས་དོན་བཀོད་སྒྲིག་བཅས་གནང་བ་རེད། རང་སྐྱོང་ལྗོངས་ཀྱི་ཀྲུའུ་ཞི་གཞོན་པ་ཝང་ཡུང་བརྟག་ཞིབ་གནང་སྐབས་ལྷན་དུ་ཕེབས་ཡོད་པ་རེད།
ཁྲེན་ཡུང་ཆིས་ནན་བཤད་གནང་དོན། ལྗོངས་ཡོངས་ཀྱི་རྒྱལ་ཁབ་རིམ་པའི་གསར་སྤེལ་ཁུལ་འབའ་ཞིག་ཡིན་པའི་ལྷ་སའི་དཔལ་འབྱོར་ལག་རྩལ་གསར་སྤེལ་ཁུལ་གྱིས་སྣེ་ཁྲིད་པ་ཡག་པོ་དང་། གདོང་དམག་ཡག་པོ། དཔེ་སྟོན་སྣེ་ཁྲིད་ཀྱི་ནུས་པ་འདོན་སྤེལ་ཡག་པོ་བཅས་བྱེད་དགོས། རྣམ་གྲངས་འཛུགས་སྐྲུན་དེ་སྲོག་རྩར་བརྩིས་ནས་རྣམ་གྲངས་ཀྱི་དུས་འགོའི་ལས་དོན་ཡག་པོ་སྒྲུབ་པ་དང་། རྒྱུ་རྐྱེན་གཙོ་བོ་འགན་ལེན་བྱེད་ཤུགས་ཆེ་རུ་གཏོང་བ། རྣམ་གྲངས་འཛུགས་སྐྲུན་མགྱོགས་པོ་བྱེད་པ། དངོས་པོ་དངོས་ཀྱི་ལས་དོན་སྒྲུབ་ཚད་མང་པོ་ཆགས་པ་བཅས་བྱས་ནས་ནུས་ལྡན་གྱི་མ་འཇོག་རྒྱུན་ཆད་མེད་པར་རྒྱ་ཆེར་གཏོང་དགོས། གཙོ་ཁྲིད་ཐོན་ལས་ཚན་རིག་དང་མཐུན་ལ་ལུགས་མཐུན་ངང་གཏན་འཁེལ་བྱས་ནས་སྔོན་ཐོན་བཟོ་སྐྲུན་དང་། ལྗང་མདོག་བཟོ་ལས། ས་མཐོའི་སྐྱེ་དངོས། ཆ་འཕྲིན་ལག་རྩལ། དེང་རབས་ཟོག་འགྲེམས་སོགས་ཀྱི་ཐོན་ལས་ལ་དམིགས་པ་དང་། ཚོང་འགུགས་མ་འདྲེན་བྱེད་ཤུགས་ཆེ་རུ་གཏོང་བ། ཚོང་འགུགས་མ་འདྲེན་གྱི་སྤུས་ཚད་མཐོ་རུ་གཏོང་བ་བཅས་བྱས་ནས་ཐོན་ལས་ཕྱོགས་སྒྱུར་རིམ་སྤོར་ལ་སྐུལ་འདེད་གཏོང་དགོས།
གསར་སྤེལ་ཁུལ་སྣ་ཚོགས་དབར་དང་། གསར་སྤེལ་ཁུལ་དང་རྫོང་ཆུས་དབར་ཐབས་སྒྱུར་གོང་འཕེལ་དང་ལེགས་ཆ་གསབ་རེས་བྱས་ཏེ་སྤུས་མཐུན་ཅན་གྱི་སྒྲིག་ལམ་མེད་པའི་འགྲན་རྩོད་བཀག་འགོག་བྱེད་དགོས། ལྷ་སའི་ཕྱོགས་བསྡུས་ཁྲལ་སྲུང་ཁུལ་འཛུགས་སྐྲུན་ལ་གང་མགྱོགས་སྐུལ་འདེད་གཏོང་བ་དང་། “རྒྱུད་གཅིག་ལམ་གཅིག”གི་གྲོས་འགོར་རང་འགུལ་དང་ཞབས་འདེགས་ཞུ་བ་དང་འབྲེལ་མཐུད་བྱེད་པ། ཁེ་ལས་དེ་བས་མང་བ་ཁྲལ་སྲུང་ཁུལ་དུ་གཞིས་ཆགས་པར་ཡིད་དབང་འགུགས་པ། ཕྱིར་གཏོང་ནང་འདྲེན་གྱི་ཚོང་དོན་ཤུགས་ཆེན་སྤེལ་བ་བཅས་བྱས་ནས། བོད་ཀྱི་ཕྱི་ཕྱོགས་ཚོང་དོན་གྱི་དཔལ་འབྱོར་འཕར་གཞི་གསར་པ་ཧུར་ཐག་གཏོད་དགོས། ཚོང་གཉེར་ཁོར་ཡུག་ལེགས་སུ་གཏོང་བ་དང་། རང་སྐྱོང་ལྗོངས་ཀྱི་ལས་དོན་གྱི་གཙོ་གནད་དང་བྱ་སྤྱོད་ཀྱི་ཇུས་གཞི་དོན་འཁྱོལ་ཡག་པོ། “ཆེས་བཞིའི”ཚོང་གཉེར་ཁོར་ཡུག་སྔོན་ལ་གཏོད་པ་བཅས་བྱས་ནས་གསར་སྤེལ་ཁུལ་གྱི་ཚོང་གཉེར་ཁོར་ཡུག་ལེགས་སུ་གཏོང་བའི་ལས་དོན་ལྗོངས་ཡོངས་ཀྱི་མདུན་གྲལ་དུ་སླེབས་པར་སྐུལ་འདེད་གཏོང་དགོས། སྒྲིག་སྲོལ་ལམ་སྲོལ་གྱི་སྒྱུར་བཅོས་གཏིང་ཟབ་དང་དོ་དམ་བྱེད་སྟངས་གསར་གཏོད་བྱས་ཏེ་གསར་སྤེལ་ཁུལ་ཉིད་དཔལ་འབྱོར་འཛུགས་སྐྲུན་གྱི་གཡུལ་ས་གཙོ་བོ་དང་། འཐབ་ས་གཙོ་བོ། སྒུལ་ཤུགས་གཙོ་བོ་བཅས་སུ་དངོས་འབྲེལ་འགྱུར་བར་སྐུལ་འདེད་གཏོང་དགོས། རིམ་པ་ཁག་དང་སྡེ་ཚན་ཁག་གིས་ལས་དོན་གྱི་མཛུབ་ཁྲིད་ལ་ཤུགས་སྣོན་དང་། གཞོགས་འདེགས་མཐུན་སྦྱོར་བྱེད་ཤུགས་ཆེ་རུ་གཏོང་བ། དཀའ་གནད་དང་གནད་དོན་དུས་ཐོག་ཏུ་སེལ་རོགས་བཅས་བྱས་ནས་གསར་སྤེལ་ཁུལ་གྱི་སྤུས་ཚད་མཐོ་བའི་འཕེལ་རྒྱས་ལ་གཡས་གཞོགས་གཡོན་འདེགས་བྱེད་དགོས།