འདི་ནི་ཉེ་ཆར་རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་ཝང་ཅུན་ཀྲེང་གིས་ལྷ་སར་ནེ་པ་ལ་རྒྱལ་ཕྲན་མཉམ་འབྲེལ་ཁང་གི་ཀྲུའུ་ཞི་ཅ་ནེ་ཧྲེ·ཕུའུ་ལ་ས་ཏེ·ཏི་སྨིར་ཤིས་ནཱ་བཅས་པ་དང་མཇལ་འཛོམས་གནང་བཞིན་པ།

ཉེ་ཆར། རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་ཝང་ཅུན་ཀྲེང་གིས་ལྷ་སར་ནེ་པ་ལ་རྒྱལ་ཕྲན་མཉམ་འབྲེལ་ཁང་གི་ཀྲུའུ་ཞི་ཅ་ནེ་ཧྲེ·ཕུའུ་ལ་ས་ཏེ·ཏི་སྨིར་ཤིས་ནཱ་བཅས་པ་དང་མཇལ་འཛོམས་གནང་བ་རེད།

ཝང་ཅུན་ཀྲེང་གིས་བོད་ཀྱི་དཔལ་འབྱོར་དང་སྤྱི་ཚོགས་འཕེལ་རྒྱས་དང་བོད་ལྗོངས་འགྲེམས་ཚོགས་སྐབས་ལྔ་པའི་འབྲེལ་ཡོད་གནས་ཚུལ་ངོ་སྤྲོད་གནང་བ་རེད།

ཝང་ཅུན་ཀྲེང་གིས་གསུངས་དོན། ཀྲུང་ནེའི་འབྲེལ་བ་ཟམ་མི་ཆད་པར་ཟབ་ཏུ་འགྲོ་བའི་རྒྱབ་ལྗོངས་ཆེན་པོའི་འོག་ཕྱོགས་གཉིས་པོའི་མཉམ་ལས་འཕེལ་རྒྱས་ཆེན་པོ་བྱུང་ནས་མཉམ་སྦྲེལ་མཉམ་མཐུད་དང་། དཔལ་འབྱོར་ཚོང་དོན་མཉམ་ལས། མི་ཆོས་རིག་གནས་སྤེལ་རེས་སོགས་ཁྱབ་ཁོངས་ལ་གྲུབ་འབྲས་མངོན་གསལ་དོད་པོ་ཐོབ་ཡོད། སྒོ་དབྱེའི་དཔལ་འབྱོར་ལ་གསོན་ཤུགས་ཆེ་ཤོས་ལྡན་པ་དང་སྒོ་དབྱེའི་ས་ཁུལ་ལ་འགྲན་རྩོད་ནུས་པ་ཆེ་ཤོས་ལྡན་པས། ང་ཚོས་ཀྲུའུ་ཞི་ཞི་ཅིན་ཕིང་གིས་ནེ་པ་ལར་འཚམས་འདྲི་གནང་བའི་གྲུབ་འབྲས་གལ་ཆེན་དང་རྒྱལ་ཁབ་གཉིས་པོའི་འགོ་ཁྲིད་དབར་བྱུང་བའི་ཐུན་མོང་ངོས་འཛིན་གལ་ཆེན་ལག་བསྟར་དོན་འཁྱོལ་ནན་ཏན་བྱས་ཏེ། ཏང་ཀྲུང་དབྱང་གི་ཕྱི་འབྲེལ་མཛད་ཕྱོགས་དང་ནེ་པ་ལར་འཛིན་པའི་སྲིད་ཇུས་ལག་ལེན་ཧུར་ཐག་བསྟར་བ་དང་རང་ངོས་ཀྱི་ས་བབ་ཀྱི་ལེགས་ཆ་བཏོན་ནས་བོད་ཀྱི་འཕེལ་རྒྱས་སྒོ་དབྱེ་དང་ཀྲུང་ནེའི་འབྲེལ་བ་དར་རྒྱས་གོང་འཕེལ་ལ་སྐུལ་འདེད་གཏོང་བ་ཟུང་འབྲེལ་དམ་ཟབ་བྱེད་པ་དང་། ཀྲུང་ནེས་སྤུས་ཚད་མཐོ་པོས“རྒྱུད་གཅིག་ལམ་གཅིག”མཉམ་སྐྲུན་ཧུར་ཐག་ཞུགས་ནས་ཀྲུང་ནེའི་མཁའ་ལམ་དང་། འགག་སྒོ་འཛུགས་སྐྲུན། ཐོན་ལས་གླིང་། རྨང་གཞིའི་སྒྲིག་བཀོད་འཛུགས་སྐྲུན་སོགས་ཁྱབ་ཁོངས་སུ་ནེ་པ་ལ་ཕྱོགས་དང་འབྲེལ་མཐུད་མཉམ་ལས་ལ་ཤུགས་སྣོན། ཧི་མ་ལ་ཡ་བརྒལ་བའི་ཕྱོགས་བསྡུས་མཉམ་སྦྲེལ་མཉམ་མཐུད་ཀྱི་དྲ་བ་བཙུགས་ཏེ། འཕེལ་རྒྱས་ཀྱི་རྣམ་པ་གསར་པ་མགྱོགས་མྱུར་གཏོད་པ་དང་ཆུ་ཚད་མཐོ་བའི་ཕྱི་ཕྱོགས་སྒོ་དབྱེར་གོམ་སྟབས་དེ་བས་ཆེ་བ་སྤོ་བར་སྐུལ་འདེད་བཏང་ནས། ཀྲུང་ནེའི་འབྲེལ་བ་འཕེལ་རྒྱས་ཆེན་པོ་ཡོང་ཆེད་བོད་ཀྱི་ལེགས་སྐྱེས་འབུལ་གྱི་ཡིན། ཀྲུའུ་ཞི་ཏི་སྨིར་ཤིས་ནཱ་དང་བཅས་པས་བོད་ལྗོངས་འགྲེམས་ཚོགས་སྐབས་ལྔ་པར་ཕེབས་པ་གོ་སྐབས་སུ་བྱས་ནས་སྤྱི་ཚོགས་རིང་ལུགས་དེང་རབས་ཅན་གྱི་བོད་ལྗོངས་གསར་པའི་གྲུབ་འབྲས་གསར་པ་དང་རྣམ་པ་གསར་པ་སྔར་བས་ཤེས་རྟོགས་གཏིང་ཟབ་དང་གངས་ལྗོངས་ས་མཐོའི་དམིགས་བསལ་གྱི་ཡིད་དབང་འཕྲོག་ཤུགས་ཉམས་སུ་མྱངས་ཏེ། སྔར་བས་དར་རྒྱས་དང་སྒོ་དབྱེའི་ཀྲུང་གོའི་བོད་ལྗོངས་ཕྱོགས་ཡོངས་དང་། དངོས་ཡོད། ཇི་མ་ཇི་བཞིན་དུ་ནེ་པ་ལའི་དམངས་ཚོགས་དང་རྒྱལ་སྤྱིའི་སྤྱི་ཚོགས་ལ་ངོ་སྤྲོད་བྱས་ནས་འཛམ་གླིང་གིས་བོད་ལ་དེ་བས་ཤེས་རྟོགས་ཐུབ་པ་དང་བོད་འཛམ་གླིང་གི་ཕྱོགས་སུ་མགྱོགས་མྱུར་སྐྱོད་ཐུབ་པའི་རེ་བ་ཡོད།

ཏི་སྨིར་ཤིས་ནཱ་ཡིས། བོད་ལྗོངས་འགྲེམས་ཚོགས་སྐབས་ལྔ་པར་ཞུགས་པའི་གོ་སྐབས་བྱུང་བས་ཧ་ཅང་དགའ་པོ་བྱུང་ལ་བོད་ཀྱི་དཔལ་འབྱོར་དང་སྤྱི་ཚོགས་འཕེལ་རྒྱས་ལ་ཐོབ་པའི་གྲུབ་འབྲས་ལ་རྟེན་འབྲེལ་ཡང་ཞུ་གི་ཡིན་ཞེས་གསུངས་པ་དང་། ཁོང་གིས་ནེ་ཀྲུང་རྒྱལ་ཁབ་གཉིས་པོའི་མཛའ་གྲོགས་ལ་ལོ་རྒྱུས་ཡུན་རིང་ལྡན་ཞིང་། རྒྱལ་ཁབ་གཉིས་པོ་ནི་ཁྱིམ་མཚེས་ཡག་པོ་དང་། གྲོགས་པོ་ཡག་པོ། རོགས་ཟླ་ཡག་པོ་བཅས་རེད། ནེ་པ་ལ་ཕྱོགས་ཀྱིས་ཀྲུང་གོ་དང་དེ་བཞིན་བོད་རང་སྐྱོང་ལྗོངས་དབར་གྱི་སྤེལ་རེས་མཉམ་ལས་ལ་ཚད་མཐོའི་མཐོང་ཆེན་བྱེད་ཀྱི་ཡོད་ལ། བོད་ཀྱི་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་ཉམས་མྱོང་མང་པོ་ཞིག་ལ་ནེ་པ་ལས་སློབ་སྦྱོང་དང་དཔྱད་གཞིར་འཛིན་རིན་ཡོད། ད་ཐེངས་ཀྱི་འཚམས་འདྲི་གོ་སྐབས་སུ་བྱས་ཏེ“རྒྱུད་གཅིག་ལམ་གཅིག”གི་འཛུགས་སྐྲུན་ལ་ཧུར་ཐག་ཞུགས་པ་དང་ནེ་པ་ལ་དང་ཀྲུང་གོའི་བོད་དབར་གྱི་དཔལ་འབྱོར་ཚོང་དོན་དང་། མི་ཆོས་རིག་གནས། ཡུལ་སྐོར། འགག་རྩའི་རྨང་གཞིའི་སྒྲིག་བཀོད། འགག་སྒོ་འཛུགས་སྐྲུན་སོགས་ཁྱབ་ཁོངས་ཀྱི་སྤེལ་རེས་མཉམ་ལས་ལ་ཤུགས་སྣོན་བརྒྱབ་ནས་ཐུན་མོང་ཐོག་དར་རྒྱས་གོང་འཕེལ་ཡོང་བའི་རེ་བ་ཡོད་ཅེས་གསུངས་པ་རེད།