ཟླ་6ཚེས་17ཉིན་ཀྲུང་གོའི་བོད་ལྗོངས་ཡུལ་སྐོར་དང་རིག་གནས་ཀྱི་རྒྱལ་སྤྱིའི་འགྲེམས་ཚོགས་སྐབས་ལྔ་པའི་ཚོང་འགུགས་མ་འདྲེན་གྱི་འོས་སྦྱོར་ཚོགས་འདུ་དང་རྣམ་གྲངས་ལ་གཅིག་སྡུད་གན་རྒྱ་འཇོག་པའི་མཛད་སྒོ་ལྷ་སར་འཚོགས་ཤིང་། རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་དང་རང་སྐྱོང་ལྗོངས་ཀྱི་རྒྱུན་ལས་ཀྲུའུ་ཞི་གཞོན་པ་ཁྲེན་ཡུང་ཆི་ཚོགས་འདུར་ཞུགས་པ་དང་འབྲེལ་ཤིས་ཚིག་ཀྱང་གསུངས་པ་དང་། རང་སྐྱོང་ལྗོངས་ཏང་ཨུད་ཀྱི་རྒྱུན་ཨུ་དང་རང་སྐྱོང་ལྗོངས་ཀྱི་རྒྱུན་ལས་ཀྲུའུ་ཞི་གཞོན་པ་རེན་ཝེ་ཡིས་ཚོགས་འདུ་གཙོ་སྐྱོང་གནང་བ། རང་སྐྱོང་ལྗོངས་ཀྱི་འགོ་ཁྲིད་ཤའོ་ཡིའུ་ཚའེ་དང་། ཀྲང་ཧུང་པོ། ཝེ་ཤིའུ་ཁྲང་། བསྟན་པ། ཚེ་རིང་ཕུན་ཚོགས་བཅས་ཚོགས་འདུར་ཞུགས་ཡོད་པ་རེད།

ཚོགས་འདུའི་ཐོག་བོད་ཀྱི་ཚོང་འགུགས་མ་འདྲེན་གྱི་དྲིལ་བསྒྲགས་བརྙན་ཐུང་བསྟན་པ་དང་ས་ཁུལ་དང་གྲོང་ཁྱེར་7དང་བོད་དང་མཚོ་སྔོན་གྱི་བཟོ་ལས་གླིང་བཅས་ཀྱིས་འོས་སྦྱོར་བྱས་པ་དང་འབྲེལ་གན་རྒྱ་བཞག་པ་རེད། རང་སྐྱོང་ལྗོངས་མི་དམངས་སྲིད་གཞུང་གིས་ཀྲུང་གོ་ལན་ཐུང་དང་། ཧྭ་ཝེ་ཀུང་སི། ཀྲུང་གོ་ལྕགས་ལམ། ཀྲུང་གོ་འགྲིམ་འགྲུལ་འཛུགས་སྐྲུན་སོགས་ཀུང་སི་དང་དེ་བཞིན་ཧྲང་ཧའེ་དང་། ཧྲེན་ཀྲེན། པེ་ཅིང་བཅས་ཀྱི་འཛིན་ལོར་ཉོ་ཚོང་ཁང་དང་མཉམ་ལས་ཀྱི་གྲོས་མཐུན་བཞག་པ་རེད།

ཁྲེན་ཡུང་ཆིས་ད་ཆར་བོད་ལ་འཕྲད་དཀའ་བའི་འཐབ་ཇུས་ཀྱི་གོ་སྐབས་ཡག་པོ་རག་ཡོད་པས། རང་སྐྱོང་ལྗོངས་ཏང་ཨུད་ཀྱིས་དུས་རབས་གསར་པའི་ཏང་གི་བོད་སྐྱོང་མཛད་ཇུས་ལག་བསྟར་དོན་འཁྱོལ་བྱས་ཏེ“དོན་ཆེན་བཞིར”དམིགས་ནས“འཛུགས་གཏོད་བཞིའི”ཐབས་ཇུས་བཀོད་སྒྲིག་བཏོན་པ་དང་། “ཐོན་ལས་ཆེན་པོ་བརྒྱད”མགྱོགས་མྱུར་འཕེལ་རྒྱས་བཏང་སྟེ་རྒྱ་ཆེའི་ཁེ་ལས་ལ་བོད་དུ་འཕེལ་རྒྱས་གཏོང་བར་འཐོབ་པར་དཀའ་བའི་གོ་སྐབས་མཁོ་འདོན་བྱས་ཡོད། ད་ཆ་བོད་ཀྱི་ཐོན་ཁུངས་ཀྱི་ལེགས་ཆ་རྒྱུན་ཆད་མེད་པར་མངོན་གསལ་དོད་དུ་འགྲོ་བ་དང་། ནུས་རྒྱུ་གཙང་མའི་ཐོན་ཁུངས་བཟང་བ། གཏེར་ཁའི་ཐོན་ཁུངས་ཀྱི་སྣ་ཁ་དང་གསོག་ཚད་མང་བ། རིག་གནས་ཡུལ་སྐོར་ཐོན་ཁུངས་ཀྱི་ཡིད་དབང་འཕྲོག་ཤུགས་ཆེ་བ། ཞིང་འབྲོག་ལས་ཀྱི་ཐོན་ཁུངས་ཕུན་སུམ་ཚོགས་པ་བཅས་ཡོད་པས། མ་དངུལ་བཞག་ནས་ལས་གཏོད་བྱེད་པར་ཆ་རྐྱེན་བཟང་པོ་བཏོད་ཡོད། ད་ཆ་བོད་ཀྱི་རྨང་གཞིའི་སྒྲིག་བཀོད་ཉིན་རེ་བཞིན་འཐུས་སྒོ་ཚང་དུ་འགྲོ་བཞིན་ཡོད་པ་དང་ཤར་བགྲོད་ཐུབ་ཅིང་སྟབས་བདེ་བའི་ཕྱོགས་བསྡུས་ཀུན་ཁྱབ་ཀྱི་འགྲིམ་འགྲུལ་དྲ་རྒྱ་གང་མྱུར་འགྲུབ་བཞིན་ཡོད་པ་དང་གློག་ཤུགས་དང་འཕྲིན་གཏོང་སོགས་ཀྱི་འགན་ལེན་ལ་རྒྱུན་མཐུད་ཤུགས་སྣོན་ཐེབས་ནས་རྣམ་གྲངས་འཛུགས་སྐྲུན་ལ་འདེགས་སྐྱོར་ནུས་ལྡན་བྱས་ཡོད། ད་ཆ་བོད་དུ་སྲིད་ཇུས་ཀྱི་རྒྱབ་སྐྱོར་དེ་བས་ཤུགས་ཆེ་རུ་སོང་བ་དང་ཀྲུང་དབྱང་གིས་ཁྲལ་འབབ་དང་། མ་དངུལ་བསྡུ་སྒྲིལ། ཐོན་ལས་སོགས་ལ་དམིགས་བསལ་གྱི་གཟིགས་སྐྱོང་སྲིད་ཇུས་རབ་དང་རིམ་པ་ལག་ལེན་བསྟར་ནས་ཁེ་ལས་འཕེལ་རྒྱས་ལ་སྒུལ་ནུས་ཧ་ཅང་ཆེན་པོ་ཞིག་བསྣན་ཡོད། ད་ཆ་བོད་ཀྱི་ཞབས་ཞུའི་ཆུ་ཚད་རྒྱུན་ཆད་མེད་པར་མཐོ་རུ་ཕྱིན་ནས་སྲིད་དོན་ཞབས་འདེགས་ལེགས་སུ་ཕྱིན་པ་དང་། ས་ཆ་སྤྱོད་པ་དང་ལས་མི་སྤྱོད་པ་སོགས་ཀྱི་འགན་ལེན་ལ་ཤུགས་སྣོན་ཐེབས་པ། ནུས་ཤུགས་ཡོད་རྒུས་ཚོང་གཉེར་ཁོར་ཡུག“ཡག་ཤོས་བཞི”བཏོད་པ། གན་རྒྱ་བཞག་པའི་རྣམ་གྲངས་ལ་དེ་བས་ཞབས་འདེགས་ཞིབ་ཚགས་ཞུས་ཏེ་རྒྱ་ཆེའི་ཁེ་ལས་མཁས་ཅན་ཚོ་བློ་བདེ་པོས་མ་དངུལ་འཇོག་པ་དང་ཚོང་གཉེར་བྱེད་པ། སེམས་སྐྱིད་པོས་འཕེལ་རྒྱས་དོན་གཉེར་བྱེད་པ་བཅས་བྱུང་ཡོད་ཅེས་གསུངས་པ་རེད།

ཁྲེན་ཡུང་ཆིས་བོད་ལ་དགའ་ཞེན་བྱེད་པ་ནི་རེ་བར་དགའ་ཞེན་བྱེད་པ་དང་བོད་ལ་མ་དངུལ་འཇོག་པ་ནི་འབྱུང་འགྱུར་ལ་མ་དངུལ་འཇོག་པ་ཞིག་རེད། ཁེ་ལས་མཁས་ཅན་དེ་བས་མང་བ་བོད་དུ་སྐྱོད་པ་དང་། བོད་ལ་ཤེས་རྟོགས་བྱེད་པ། བོད་ལ་མ་དངུལ་འཇོག་པ་བཅས་བྱས་ཏེ་ཀྲུང་གོའི་ལུགས་ཀྱི་དེང་རབས་ཅན་གྱི་བོད་ཀྱི་ལེའུ་རྩོམ་རིང་ཁེ་ལས་ཀྱི་ཕུགས་བསམ་མངོན་འགྱུར་དང་མི་ཚེའི་རིན་ཐང་མངོན་འགྱུར་བྱེད་པའི་རེ་བ་ཡོད་ཅེས་གསུངས་པ་རེད།

ཤེས་རྟོགས་བྱུང་བར་གཞིགས་ན། ད་ཐེངས་ཀྱི་འོས་སྦྱོར་ཚོགས་འདུར་ཁྱོན་བསྡོམས་རྣམ་གྲངས་60ལ་གན་རྒྱ་བཞག་པ་དང་མ་དངུལ་སྒོར་དུང་ཕྱུར་531.83བཏང་བ་དེ་དག་རིག་གནས་དང་ཡུལ་སྐོར་དང་། ལྗང་མདོག་བཟོ་ལས། དེང་རབས་ཞབས་འདེགས། ས་མཐོའི་སྐྱེ་དངོས། མཐོ་གསར་གྲངས་གཞི་སོགས་ཁྱབ་ཁོངས་མང་པོ་དང་འབྲེལ་བ་ཡོད་པ་རེད།