ཟླ་6ཚེས་15ཉིན་གྱི་སྔ་དྲོར། “ཀྲུང་གོའི་གཟི་བརྗིད་བྱ་གཞག་གི་བོད་སྐྱོད”བྱེད་སྒོ་ལྷ་སར་སྤེལ་ཞིང་། འདི་ནི་བྱེད་སྒོ་སྤེལ་ཡུལ་ཡིན་པ།

ཚེས་15ཉིན་གྱི་སྔ་དྲོར། “ཀྲུང་གོའི་གཟི་བརྗིད་བྱ་གཞག་གི་བོད་སྐྱོད”བྱེད་སྒོ་ལྷ་སར་སྤེལ་ཞིང་། རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་ཝང་ཅུན་ཀྲེང་དང་། ཀྲུང་དབྱང་འཐབ་ཕྱོགས་གཅིག་གྱུར་པུའི་པུའུ་ཀྲང་གཞོན་པ་དང་། རྒྱལ་ཡོངས་བཟོ་ཚོང་མཉམ་འབྲེལ་ལྷན་ཚོགས་ཀྱི་ཏང་ཙུའུ་ཡི་ཧྲུའུ་ཅི་དང་རྒྱུན་ལས་ཀྲུའུ་ཞི་གཞོན་པ། ཀྲུང་གོ་གཟི་བརྗིད་བྱ་གཞག་ཡར་སྐུལ་མཐུན་ཚོགས་ཀྱི་ཚོགས་གཙོ་བཅས་ཡིན་པའི་ཞུས་ལེ་ཅང་ཞུགས་པ་དང་འབྲེལ་གསུང་བཤད་གནང་བ་རེད།

རང་སྐྱོང་ལྗོངས་ཀྱི་འགོ་ཁྲིད་ཡན་ཅིན་ཧའེ་དང་། ཁྲེན་ཡུང་ཆི། ཀརྨ་ཚེ་བརྟན། ཟླ་བ་ཚེ་རིང་། ཝང་ཅུན། རྡོ་རྗེ་ཚེ་སྒྲུབ་བཅས་ཚོགས་འདུར་ཞུགས་པ་དང་། རྒྱལ་ཡོངས་བཟོ་ཚོང་མཉམ་འབྲེལ་ལྷན་ཚོགས་ཀྱི་ཀྲུའུ་ཞི་གཞོན་པ་ཧྥང་ཀོང་ཧྭ་ཡིས་གཙོ་སྐྱོང་གནང་བ་རེད།

ཝང་ཅུན་ཀྲེང་གིས་རང་སྐྱོང་ལྗོངས་ཏང་ཨུད་དང་སྲིད་གཞུང་གི་ཚབ་ཞུས་ནས་དུས་ཡུན་རིང་པོའི་ནང་བོད་ཀྱི་ལས་དོན་ལ་རྒྱབ་སྐྱོར་བྱེད་མཁན་ཀྲུང་དབྱང་དང་། རྒྱལ་ཁབ་ལས་ཁུངས། བོད་སྐྱོར་ཞིང་ཆེན་དང་གྲོང་ཁྱེར། དེ་བཞིན་རྒྱ་ཆེའི་དམངས་གཉེར་ཁེ་ལས་མཁས་ཅན་བཅས་ལ་སྙིང་ཐག་པ་ནས་ཐུགས་རྗེ་ཆེ་ཞུས་པ་རེད།

ཝང་ཅུན་ཀྲེང་གིས་གསུངས་དོན། ཉེ་བའི་ལོ་ཤས་རིང་། རང་སྐྱོང་ལྗོངས་ཏང་ཨུད་ཀྱིས་དམངས་གཉེར་དཔལ་འབྱོར་འཕེལ་རྒྱས་དང་བོད་ཀྱི་ལས་དོན་སྐོར་གྱི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཛུབ་སྟོན་གལ་ཆེན་དང་དུས་རབས་གསར་པའི་ཏང་གི་བོད་སྐྱོང་མཛད་ཇུས་ལག་བསྟར་དོན་འཁྱོལ་གཏིང་ཟབ་བྱས་ཏེ“གཡོ་འགུལ་སྤུ་ཙམ་ཡང་མི་གཏོང་བ་གཉིས”མཐའ་འཁྱོངས་ཀྱིས་དམངས་གཉེར་དཔལ་འབྱོར་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བའི་སྒུལ་ཤུགས་གལ་ཆེན་ལ་བརྩིས་ནས་དེ་བས་མངོན་གསལ་དོད་པའི་གནས་བབ་ཐོག་བཞག་སྟེ་གནས་ཚུལ་གསར་པར་ཞིབ་འཇུག་ཧུར་ཐག་དང་། གནད་དོན་གསར་པ་རང་འགུལ་ངང་ཐག་གཅོད། ལམ་སྲོལ་གསར་པ་འཚོལ་ཞིབ་བཅས་བྱས་ནས་ཚོང་གཉེར་ཁོར་ཡུག་ལེགས་སུ་གཏོང་བའི་སྲིད་ཇུས་རབ་དང་རིམ་པ་བཏོན་པ་དང་སྤྱི་དབང་མིན་པའི་ལམ་ལུགས་ཀྱི་དཔལ་འབྱོར་སྐྱོན་བྲལ་ངང་འཕེལ་རྒྱས་འགྲོ་བར་སྐུལ་འདེད་ཧུར་ཐག་བཏང་བས་ལྗོངས་ཡོངས་ཀྱི་དམངས་གཉེར་དཔལ་འབྱོར་འཕེལ་རྒྱས་ལ་གྲུབ་འབྲས་གསར་པ་ཐོབ་ཡོད།

ཝང་ཅུན་ཀྲེང་གིས་གསུངས་དོན། “ཀྲུང་གོའི་གཟི་བརྗིད་བྱ་གཞག་གི་བོད་སྐྱོད”ཅེས་པ་ནི“ཀྲུང་ཧྭ་མི་རིགས་ཁྱིམ་ཚང་གཅིག་ལྟར་བརྩེ། སེམས་མཐུན་ཀྲུང་གོའི་ཕུགས་འདུན་མཉམ་དུ་གཏོད”ཅེས་པའི་གསོན་ཉམས་དོད་པའི་ལག་ལེན་ཞིག་དང་དུས་རབས་གསར་པའི་ཏང་གི་བོད་སྐྱོང་མཛད་ཇུས་ལག་བསྟར་དོན་འཁྱོལ་གཏིང་ཟབ་བྱེད་པའི་བྱ་ཐབས་གལ་ཆེན་ཞིག་རེད། ཀྲུང་དབྱང་འཐབ་ཕྱོགས་གཅིག་གྱུར་པུའུ་དང་རྒྱལ་ཡོངས་བཟོ་ཚོང་ལས་རིགས་མཉམ་འབྲེལ་ལྷན་ཚོགས་ཁོངས་གཏོགས་ཀྱིས་བོད་ཀྱི་ལས་དོན་ལ་རྒྱབ་སྐྱོར་བྱེད་ཤུགས་སྔར་བས་ཆེ་རུ་བཏང་ནས་ལས་ཞུགས་བོད་སྐྱོར་དང་། རིག་སྟོབས་བོད་སྐྱོར། ཐོན་ལས་བོད་སྐྱོར། སྤྱི་ཕན་བོད་སྐྱོར་བཅས་ལ་ཤུགས་སྣོན་རྒྱག་པ་དང་། ཁེ་ལས་དང་ཚོང་ཚོགས་བོད་དུ་རྟོག་ཞིབ་བྱེད་པ་དང་མ་དངུལ་གཏོང་བར་སྐུལ་ལྕག་དང་རྒྱབ་སྐྱོར་བྱས་ནས“ཁེ་ལས་བརྒྱས་གྲོང་ཚོ་བརྒྱར་འབྲེལ་མཐུད”ཀྱིས་མཐའ་མཚམས་ལ་རོགས་སྐྱོར་བྱེད་པའི་བྱ་སྤྱོད་དང“ཁེ་ལས་ཁྲི་ཡིས་གྲོང་ཚོ་ཁྲི་དར་རྒྱས་གཏོང་བའི”བྱ་སྤྱོད་ལ་སྐུལ་འདེད་གཏིང་ཟབ་བཏང་སྟེ་འཛད་སྤྱོད་རོགས་སྐྱོར་ཤུགས་ཆེན་བྱས་ནས་དམངས་གཉེར་ཁེ་ལས་སྤྱི་ཕན་དགེ་སྒྲུབ་ནང་ཧུར་ཐག་ཞུགས་པ་དང་སྤྱི་ཚོགས་རིང་ལུགས་དེང་རབས་ཅན་གྱི་བོད་ལྗོངས་གསར་པ་འཛུགས་སྐྲུན་ལ་རོགས་སྐྱོར་བྱ་རྒྱུའི་ཁྲིད་སྟོན་ཐུབ་པའི་རེ་བ་ཡོད།

རྒྱ་ཆེའི་དམངས་གཉེར་ཁེ་ལས་མཁས་ཅན་གྱིས་ས་མཐོའི་དཔལ་འབྱོར་སྤུས་ཚད་མཐོ་པོས་འཕེལ་རྒྱས་གཏོང་བའི་ནང་ཧུར་ཐག་ཞུགས་ཏེ་ནུས་རྒྱུ་གཙང་མ་དང་། ཞིང་འབྲོག་ཐོན་རྫས་ལས་སྣོན་ཞིབ་ཚགས། རིག་གནས་ཡུལ་སྐོར། གྲངས་འཛིན་དཔལ་འབྱོར། ཀུན་སྤྱོད་མཁའ་འགྲུལ། ཡང་བའི་བཟོ་ལས་ཐོན་ལས་སོགས་ཁྱབ་ཁོངས་ཀྱི་སྤེལ་རེས་མཉམ་ལས་གཏིང་ཟབ་ཏུ་བཏང་ནས་ཐོན་ཁུངས་ཀྱི་ལེགས་ཆ་ཐོན་ལས་ཀྱི་ལེགས་ཆ་དང་འཕེལ་རྒྱས་ཀྱི་ལེགས་ཆར་ཧུར་ཐག་བསྒྱུར་ནས་འཐབ་ཇུས་རང་བཞིན་གྱི་གསར་དར་ཐོན་ལས་སྐྱེད་སྲིང་ལ་རམ་འདེགས་བྱས་ཏེ། ཐོན་ལས་ཀྱི་གྲུབ་ཆ་ལེགས་སུ་དང་རིམ་སྤོར་ལ་སྐུལ་འདེད་གཏོང་བའི་རེ་བ་ཡོད། རང་སྐྱོང་ལྗོངས་ཏང་ཨུད་དང་སྲིད་གཞུང་གིས་ད་ཐེངས་ཀྱི་བྱེད་སྒོ་གོ་སྐབས་སུ་བྱས་ནས་ཚོང་གཉེར་ཁོར་ཡུག་རྒྱུན་ཆད་མེད་པར་ལེགས་སུ་གཏོང་བ་དང་། རང་འགུལ་ངང་འབྲེལ་མཐུད་ལ་ཤུགས་སྣོན་རྒྱག་པ། ཞབས་ཞུ་འགན་ལེན་ཧུར་ཐག་བཅས་བྱས་ནས་ཁྱབ་ཁོངས་དེ་བས་ཆེ་བ་དང་། རིམ་པ་དེ་བས་ཟབ་པ། ཆུ་ཚད་དེ་བས་མཐོ་བ་བཅས་ཀྱི་སྒོ་ནས་མཉམ་ལས་སྤེལ་རེས་ལ་ཤུགས་སྣོན་བརྒྱབ་སྟེ་ལེགས་ཆ་གསབ་རེས་དང་གཉིས་ཁེ་འཕེལ་རྒྱས་དེ་བས་ལེགས་པ་མངོན་འགྱུར་ཡོང་བར་བྱ་རྒྱུ་རེད།

ཞུས་ལེ་ཅང་གིས་གསུངས་དོན། དམངས་གཉེར་ཁེ་ལས་མཁས་ཅན་གྱིས་ལེགས་ཆ་འདོན་སྤེལ་དང་བོད་ཀྱི་སྤུས་ཚད་མཐོ་པོས་འཕེལ་རྒྱས་ལ་སྐུལ་འདེད་གཏོང་བར་རོགས་རམ་བྱས་ཏེ་དངོས་སྒྲུབ་ངང་ཐོན་ལས་བོད་སྐྱོར་ལ་སྐུལ་འདེད་གཏོང་བ་དང་ཐོན་ཁུངས་ཀྱི་ལེགས་ཆ་ཐོན་ལས་ཀྱི་ལེགས་ཆར་ཧུར་ཐག་བསྒྱུར་ནས་སྤྱི་ཕན་རྣམ་གྲངས་གནད་སྨིན་ལག་བསྟར་དང་དམངས་འཚོའི་དགོས་མཁོའི་གླེང་མང་བའི་གནད་དོན་ལ་ལན་བཏབ་ནས་འདུ་ཤེས་གསར་གཏོད་ཀྱི་བྱེད་ཐབས་འཚོལ་ཞིབ་དང་བློ་གྲོས་གཅིག་སྡུད་ཀྱིས་བོད་སྐྱོར་གྱི་ལས་དོན་ཡག་པོ་སྒྲུབ་དགོས། ཁ་གཏད་བོད་སྐྱོར་ཞིང་ཆེན་དང་གྲོང་ཁྱེར་གྱི་བཟོ་ཚོང་ལས་རིགས་མཉམ་འབྲེལ་ལྷན་ཚོགས་དང་གཟི་བརྗིད་མཐུན་ཚོགས་ཀྱིས“ཀྲུང་གོའི་གཟི་བརྗིད་བྱ་གཞག་གི་བོད་ཀྱི་བྱ་སྤྱོད”རྣམ་གྲངས་དོན་འཁྱོལ་ནི་ཆབ་སྲིད་ཀྱི་ལས་འགན་གལ་ཆེན་དུ་བརྩིས་ནས་རྩ་འཛུགས་ཀྱི་འགོ་ཁྲིད་ལ་ཤུགས་སྣོན་རྒྱག་པ་དང་། ཕན་འབྲས་དངོས་ལ་དོ་སྣང་བྱ་རྒྱུ་མཐའ་འཁྱོངས། རྗེས་སྙེགས་ཀྱི་ཞབས་འདེགས་ཞུ་བར་ཤུགས་སྣོན་རྒྱག་པ། བོད་སྐྱོར་ལས་དོན་གྱི་ཕུགས་ཕན་ལམ་སྲོལ་འཚོལ་ཞིབ་བྱས་ནས་འཛུགས་པ་དང་འཐུས་སྒོ་ཚང་དུ་གཏོང་བ་བཅས་བྱས་ཏེ། བོད་སྐྱོར་གྱི་གཙོ་གནད་ལས་འགན་དོན་འཁྱོལ་ལ་སྐུལ་འདེད་ཏན་ཏིག་གཏོང་དགོས།

བྱེད་སྒོ་སྤེལ་རིང“ཁེ་ལས་བརྒྱས་གྲོང་ཚོ་བརྒྱར་འབྲེལ་མཐུད་བྱེད་པའི”མཐའ་མཚམས་ལ་རོགས་སྐྱོར་བྱ་སྤྱོད་ཀྱི་གན་རྒྱ་འཇོག་པའི་མཛད་སྒོ་དང་སྤྱི་ཕན་རྣམ་གྲངས་ཀྱི་ཞལ་འདེབས་འབུལ་བའི་མཛད་སྒོ་འཚོགས་པ་དང་བྱེད་སྒོ་སྤེལ་བ་བརྒྱུད་དམངས་གཉེར་ཁེ་ལས་ཀྱིས་སྤྱི་ཕན་རྣམ་གྲངས་59ལ་ཞལ་འདེབས་བརྒྱབ་པ་དང་ཞལ་འདེབས་དངུལ་འབོར་སྒོར་ཁྲི་6739ཟིན་ཡོད་པ་རེད།