ཁྲེན་ཡུང་ཆིས་བོད་ལྗོངས་འཕྲལ་སྡོམ་རོགས་སྐྱོབ་རྟེན་གཞིར་འཕྲལ་སྡོམ་རོགས་སྐྱོབ་དང་སྤྱི་སྤྱོད་མཁའ་འགྲུལ་ཐོན་ལས་འཕེལ་རྒྱས་ཀྱི་གནས་ཚུལ་ལ་བརྟག་ཞིབ་གནང་བ།
ཉེ་ཆར། རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་དང་རང་སྐྱོང་ལྗོངས་ཀྱི་རྒྱུན་ལས་ཀྲུའུ་ཞི་གཞོན་པ་ཁྲེན་ཡུང་ཆིས་བོད་ལྗོངས་འཕྲལ་སྡོམ་རོགས་སྐྱོབ་རྟེན་གཞིར་འཕྲལ་སྡོམ་རོགས་སྐྱོབ་དང་སྤྱི་སྤྱོད་མཁའ་འགྲུལ་ཐོན་ལས་འཕེལ་རྒྱས་ཀྱི་གནས་ཚུལ་ལ་བརྟག་ཞིབ་གནང་ནས། རྟེན་གཞིའི་འཕུར་སྐྱོད་ཁུལ་དང་བཀོད་འདོམས་ལྟེ་གནས་སོགས་སྒྲིག་བཀོད་འཛུགས་སྐྲུན་བྱས་ཚུལ་ལ་ས་གནས་ས་ཐོག་ཏུ་གཟིགས་ཞིབ་གནང་བ་དང་། ཐད་འཕུར་གནམ་གྲུའི་བཟོ་དབྱིབས་དང་ནུས་པ་སོགས་སྒྲིག་ཆས་གཉེར་སྐྱོང་དང་དོ་དམ་བྱས་ཚུལ་ལ་མཁྱེན་རྟོགས་ཞིབ་ཕྲ་གནང་བ་མ་ཟད། ས་གནས་ས་ཐོག་ཏུ་བཞུགས་མོལ་ཚོགས་འདུ་ཡང་འཚོགས་ནས་འབྲེལ་ཡོད་སྡེ་ཚན་དང་ཁེ་ལས་ཀྱི་གནམ་གྲུ་ཤར་གཏོང་ལས་དོན་སྤེལ་ཚུལ་གྱི་སྙན་སེང་གསན་པ་དང་། དཀའ་ངལ་མཐུན་སྦྱོར་ངང་ཐག་གཅོད་དང་གོམ་སྟབས་རྗེས་མའི་ལས་དོན་བཀོད་སྒྲིག་ཀྱང་གནང་བ་རེད། རང་སྐྱོང་ལྗོངས་ཀྱི་ཀྲུའུ་ཞི་གཞོན་པ་ཝུའེ་ཤིའུ་ཁྲང་བརྟག་ཞིབ་ལ་ལྷན་དུ་ཕེབས་ཡོད་པ་རེད།
ཁྲེན་ཡུང་ཆིས་བསྟན་དོན། སྤྱི་སྤྱོད་མཁའ་འགྲུལ་ཐོན་ལས་ནི་འཐབ་ཇུས་རང་བཞིན་གྱི་གསར་དར་ཐོན་ལས་གལ་ཆེན་ཞིག་ཡིན་ལ།
དཔལ་འབྱོར་འཕེལ་རྒྱས་ལ་སྐུལ་འདེད་གཏོང་བའི་འཕར་གཞི་གསར་པ་ཞིག་ཡིན་པ་དང་། ལྷག་པར་དུ་རང་ལྗོངས་ནི་ས་རྒྱ་ཆེ་ལ་མི་འབོར་ཉུང་བ་དང་སྐམ་སའི་འགྲིམ་འགྲུལ་འཛུགས་སྐྲུན་གྱི་མ་གནས་མཐོ་བ་དང་སྐྱེལ་འདྲེན་གྱི་དུས་ཚོད་རིང་བས། སྤྱི་སྤྱོད་མཁའ་འགྲུལ་ཐོན་ལས་འཕེལ་རྒྱས་གཏོང་བར་དགོས་གལ་ཆེ་ལ་མདུན་ལམ་ཡང་ཆེན་པོ་ཡོད། འབྲེལ་ཡོད་སྡེ་ཚན་དང་ས་ཁུལ་དང་གྲོང་ཁྱེར་གྱིས་ཆབ་སྲིད་ཀྱི་ཚུགས་གནས་མཐོ་རུ་བཏང་སྟེ་བསམ་བློ་དང་བྱ་སྤྱོད་སྤྱི་སྤྱོད་མཁའ་འགྲུལ་ཐོན་ལས་འཕེལ་རྒྱས་གཏོང་རྒྱུའི་སྐོར་གྱི་རང་སྐྱོང་ལྗོངས་ཏང་ཨུད་དང་སྲིད་གཞུང་གི་ཐབས་ཇུས་བཀོད་སྒྲིག་ཐོག་གཅིག་གྱུར་ཏན་ཏིག་ཡོང་བ་བྱས་ནས། འགན་འཁྲི་འཁུར་སེམས་ཆེ་རུ་གཏོང་བ་དང་གོ་སྐབས་དམ་འཛིན་གྱིས་སྤུན་ཟླའི་ཞིང་ཆེན་དང་གྲོང་ཁྱེར་གྱི་གྲུབ་འབྲས་ཐོབ་པའི་ཉམས་མྱོང་དང་བྱེད་སྟངས་སློབ་སྦྱོང་དང་དཔྱད་གཞིར་ཧུར་ཐག་འཛིན་པ་དང་། འཕེལ་རྒྱས་དང་བདེ་འཇགས་དང་མིག་སྔ་དང་སླད་ཕྱིན་སྤྱི་འདོམས་ཡག་པོ་བྱེད་པ། ངེས་གནས་གཏན་འཁེལ་དང་བཀོད་པ་ལེགས་སུ་གཏོང་བ། རང་ལྗོངས་ཀྱི་སྤྱི་སྤྱོད་གནམ་ཐང་གི་གནས་འདེམས་འཛུགས་སྐྲུན་ལ་སྐུལ་འདེད་མགྱོགས་པོ་གཏོང་བ་བཅས་བྱས་ཏེ་རང་ལྗོངས་ཀྱི་སྤྱི་སྤྱོད་མཁའ་འགྲུལ་ཐོན་ལས་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་དགོས། སྤྱི་སྤྱོད་མཁའ་འགྲུལ་དོ་དམ་མ་ལག་དང་དོ་དམ་སྒྲིག་གཞི་འཛུགས་པ་དང་འཐུས་སྒོ་ཚང་དུ་བཏང་ནས། དོ་དམ་སྒྲིག་སྲོལ་གསེད་བཀྲོལ་དང་། མཁའ་ལམ་ཤར་གཏོང་ཁྱབ་ཁོངས་ཀྱི་ཤེས་ལྡན་མི་སྣའི་དཔུང་ཁག་འཛུགས་སྐྱོང་ལ་ཤུགས་སྣོན་བརྒྱབ་སྟེ་བརྒྱུད་རིམ་ཧྲིལ་པོའི་བདེ་འཇགས་ལྟ་འདོམས་ལ་ཤུགས་སྣོན་རྒྱག་དགོས། འཕྲལ་སྡོམ་རོགས་སྐྱོབ་རྟེན་གཞི་འཛུགས་སྐྲུན་བྱེད་ཤུགས་ཆེ་རུ་བཏང་ནས། སྤྱི་སྤྱོད་མཁའ་འགྲུལ་དང་འཕྲལ་སྡོམ་རོགས་སྐྱོབ་ཟུང་འབྲེལ་དམ་ཟབ་དང་། འཕྲལ་སྡོམ་རོགས་སྐྱོབ་སྒྲིག་ཆས་སྒྲིག་བཀོད་ནུས་ཤུགས་ཡོད་རྒུས་འཐུས་སྒོ་ཚང་དུ་གཏོང་བ། ལྗོངས་ནང་ཁུལ་གྱི་སྤྱི་སྤྱོད་མཁའ་འགྲུལ་གྱི་འཕྲལ་སྡོམ་རོགས་སྐྱོབ་དྲ་བ་གང་མགྱོགས་གྲུབ་པ་བཅས་བྱས་ཏེ་འཕྲལ་སྡོམ་རོགས་སྐྱོབ་ཀྱི་འཇོན་ཐང་དང་ཆུ་ཚད་ཟམ་མི་ཆད་པར་མཐོ་རུ་གཏོང་དགོས།