ཚེས་8ཉིན། རང་སྐྱོང་ལྗོངས་ཏང་ཨུད་ཀྱི་རྒྱུན་ལས་ཧྲུའུ་ཅི་གཞོན་པ་དང་རང་སྐྱོང་ལྗོངས་སྲིད་གྲོས་ཏང་ཙུའི་ཧྲུའུ་ཅི་ཀྲོང་ཡན་རང་སྐྱོང་ལྗོངས་ལས་ཞུགས་ཞབས་ཞུ་ལྟེ་གནས་དང་རང་སྐྱོང་ལྗོངས་མི་ཤུགས་ཐོན་ཁུངས་དང་སྤྱི་ཚོགས་འགན་སྲུང་ཐིང་དུ་ཕེབས་ནས་མཐོ་སློབ་སློབ་ཐོན་སློབ་མའི་ལས་ཞུགས་ལས་དོན་ལ་བརྟག་ཞིབ་གནང་བ་དང་འབྲེལ་བཞུགས་མོལ་ཚོགས་འདུ་ཡང་འཚོགས་པ་རེད།
རང་སྐྱོང་ལྗོངས་ལས་ཞུགས་ཞབས་ཞུ་ལྟེ་གནས་སུ། “དཔྱིད་རླུང་བྱ་སྤྱོད་དང་ལས་ཞུགས་རོགས་སྐྱོར་ཟླ་བའི”ལས་མི་བསྡུ་བའི་འདུ་ཚོགས་ཚོགས་བཞིན་ཡོད་པ་རེད། ཀྲོང་ཡན་གྱིས་ཕེབས་ཞོར་དུ་གཟིགས་ཞིབ་གནང་བ་མ་ཟད། ལས་མི་བསྡུ་བའི་འདུ་ཚོགས་སྒྲིག་འཛུགས་བྱས་ནས་སྤེལ་བ་དང་། ཁེ་ལས་ཀྱི་གླ་ཕོགས་ཐོབ་ཐང་དང་ལས་མི་བསྡུ་བའི་གནས་ཚུལ་བཀའ་འདྲི་ཞིབ་ཕྲ་གནང་བ་རེད། ཀྲུང་གོ་སྒུལ་བདེ་བོད་ལྗོངས་ཡན་ལག་ཀུང་སིའི་ལས་མི་བསྡུ་སར་ཀྲོང་ཡན་གྱིས་ལོ་རྒྱུས་མདོར་བསྡུས་སྐྱེལ་བཞིན་པའི་ལོ་འདི་གའི་མཐོ་སློབ་སློབ་ཐོན་སློབ་མ་བྱམས་པ་སྙན་གྲགས་དང་ལས་མི་བསྡུ་མཁན་ཕྱོགས་ཀྱི་འགན་འཁུར་བ་ལུའོ་ཅ་མིན་དང་བྱམས་བརྩེའི་སྤེལ་རེས་གནང་ཞིང་། ཁོང་གིས་ལས་ཞུགས་ནི་དམངས་འཚོ་ཆེ་ཤོས་དེ་རེད། བོད་སྡོད་ཀྲུང་དབྱང་ཁེ་ལས་ཁག་གིས་སྤྱི་ཚོགས་ཀྱི་འགན་འཁྲི་ཧུར་ཐག་བསྒྲུབས་ནས་ཐེམ་ཁུངས་བོད་ནས་ཡིན་པའི་མཐོ་སློབ་སློབ་ཐོན་སློབ་མ་བསྡུས་ནས་ཡུན་རིང་ལས་ཞུགས་བརྟན་པོ་དང་གང་ལེགས་ཡོང་བའི་རེ་བ་ཡོད་ལ། མཐོ་སློབ་སློབ་ཐོན་སློབ་མས་མིག་རྒྱང་རིང་ཞིང་ཏན་ཏན་ཏིག་ཏིག་ངང་ལས་ཞུགས་ཀྱི་འདུ་ཤེས་འགྱུར་ལྡོག་བཏང་ནས། སྤྱི་ཚོགས་རིང་ལུགས་དེང་རབས་ཅན་གྱི་བོད་ལྗོངས་གསར་པ་འཛུགས་སྐྲུན་བྱེད་པའི་ཚ་ཚ་འུར་འུར་གྱི་ལག་ལེན་ནང་ཧུར་ཐག་ཞུགས་ཏེ་སྤྱིར་བཏང་གི་ལས་གནས་ཐོག་སྤྱིར་བཏང་མིན་པའི་བྱས་རྗེས་ཧུར་ཐག་འཇོག་རྒྱུའི་རེ་བ་ཡོད་ཅེས་གསུངས་པ་རེད།
ཀྲོང་ཡན་ད་དུང་ལྗོངས་མི་སྤྱི་ཐིང་བྱ་གཞག་ཚན་པའི་མི་དོན་དོ་དམ་ཁྲུའུ་རུ་ཕེབས་ནས། 2023ལོར་བྱ་གཞག་ཚན་པས་ཡོངས་བསྒྲགས་ངང་མཐོ་སློབ་སློབ་ཐོན་སློབ་མ་བསྡུ་བའི་ལས་དོན་སྤེལ་ཚུལ་མཁྱེན་རྟོགས་ཞིབ་ཕྲ་གནང་ཞིང་། ཁོང་གིས་འདི་ལོའི་བྱ་གཞག་ཚན་པས་ཡོངས་བསྒྲགས་ངང་ལས་མི་བསྡུ་བའི་ལས་དོན་སྔ་སྣུར་དུ་སྒྲིག་འཛུགས་ཞིབ་ཚགས་དང་ཇུས་འགོད་ཡག་པོ་བྱས་ནས། མཐོ་སློབ་སློབ་ཐོན་སློབ་མའི་ལས་ཞུགས་ལ་ཆ་རྐྱེན་བཟང་པོ་སྐྲུན་དགོས་པའི་བླང་བྱ་བཏོན་གནང་བ་རེད།
དེ་རྗེས་འཚོགས་པའི་བཞུགས་མོལ་ཚོགས་འདུའི་ཐོག ཀྲོང་ཡན་གྱིས་ལས་དོན་སྙན་སེང་གསན་རྗེས། འདས་ཟིན་པའི་ལོ་གཅིག་རིང་། རང་སྐྱོང་ལྗོངས་ཏང་ཨུད་ཀྱི་འགྱུར་མེད་སྟོབས་ལྡན་གྱི་འགོ་ཁྲིད་འོག ལྗོངས་ཡོངས་ཀྱི་མཐོ་སློབ་སློབ་ཐོན་སློབ་མའི་ལས་ཞུགས་ལས་དོན་གྱི་དམིགས་ཚད་ལས་འགན་ཕུན་སུམ་ཚོགས་པོས་ལེགས་གྲུབ་བྱུང་བ་དང་། ལྗོངས་ཕྱིའི་ལས་ཞུགས་ལ་གྲུབ་འབྲས་གསར་པ་ཐོབ་པ། ལས་གནས་འགན་ལེན་ལ་ཚད་བརྒལ་གསར་པ་བྱུང་བ། སྲིད་ཇུས་ཀྱི་འདེགས་སྐྱོར་ཆུ་ཚད་གསར་པ་ཞིག་ཏུ་སླེབས་ཡོད་ཅེས་གསུངས་པ་དང་། ཁོང་གིས་མཐོ་སློབ་སློབ་ཐོན་སློབ་མའི་ལས་ཞུགས་ལས་དོན་ནི་སྤྱི་ཚོགས་ཀྱི་དམངས་འཚོ་དང་སྤྱི་ཡོངས་བརྟན་ལྷིང་དང་འབྲེལ་བ་ཡོད་པའི་དོན་ཆེན་ཞིག་རེད། དགེ་མཚན་ལྡན་པའི་ལས་ཞུགས་སྲིད་ཇུས་ལག་ལེན་བསྟར་ནས་སྤུས་ཚད་མཐོ་བའི་ལས་གནས་མཁོ་འདོན་ཤུགས་ཆེན་བྱེད་པ་དང་། ལྗོངས་ཕྱིའི་ལས་ཞུགས་ལ་སྐུལ་འདེད་ཤུགས་ཆེན་གཏོང་བ། ཞབས་ཞུ་འགན་ལེན་ནུས་ལྡན་བྱེད་པ། ལས་ཞུགས་དྲིལ་བསྒྲགས་སློབ་གསོར་སྐུལ་འདེད་ཤུགས་ཆེན་གཏོང་བ་བཅས་བྱས་ནས། ནུས་ཤུགས་ཡོད་རྒུས་འདི་ལོའི་མཐོ་སློབ་སློབ་ཐོན་སློབ་མའི་ལས་ཞུགས་ལས་དོན་བརྟན་ཐོག་ཡར་འཕེལ་ཡོང་བར་འགན་ལེན་བྱེད་དགོས་པའི་ནན་བཤད་གནང་བ་རེད།