ལྗོངས་ཡོངས་ཀྱི་ཆོས་ལུགས་ལས་རིགས་ཀྱི“འདུ་ཤེས་གསུམ”གྱི་སློབ་གསོའི་བཀོད་གཏོང་སྐུལ་སྤེལ་ཚོགས་འདུ་ཐེངས་དང་པོ་ལྷ་སར་འཚོགས་ཤིང་། ལྗོངས་ཏང་ཨུད་ཀྱི་རྒྱུན་ཨུ་འཐབ་ཕྱོགས་གཅིག་གྱུར་པུའི་པུའུ་ཀྲང་ཀརྨ་ཚེ་བརྟན་ཚོགས་འདུར་ཞུགས་པ་དང་སྦྲགས་གསུང་བཤད་ཀྱང་གནང་བ་རེད།
ཀརྨ་ཚེ་བརྟན་གྱིས། “འདུ་ཤེས་གསུམ”གྱི་སློབ་གསོ་གཏིང་ཟབ་སྤེལ་བ་ནི་ཀྲུང་དབྱང་གི་བོད་ཀྱི་ལས་དོན་སྐོར་གྱི་བཞུགས་མོལ་ཚོགས་འདུ་ཐེངས་བདུན་པའི་དགོངས་དོན་ལག་བསྟར་དོན་འཁྱོལ་བྱས་ནས་ཕུགས་འཕེར་གྱི་ཇུས་གཞི་འདིང་བ་དང་རྩ་བ་བརྟན་ཚུགས་ཀྱི་བྱ་ཐབས་སྤྱོད་པ་ཞིག་དང་། སྤྱི་ཚོགས་ཞི་མཐུན་བརྟན་ལྷིང་ལ་སྲུང་སྐྱོང་དང་ཆོས་ལུགས་ཁྱབ་ཁོངས་ཀྱི་ཉེན་ཁ་དང་མི་མངོན་པའི་རྐྱེན་ངན་ཚབས་ཆེན་ལ་འགོག་ཟོན་དང་སེལ་བའི་ཁ་ཚ་དགོས་གཏུགས་ཀྱི་དགོས་མཁོ་ཞིག དགོན་སྡེ་དོ་དམ་ལ་ཤུགས་སྣོན་དང་ལེགས་སུ་བཏང་ནས་ཆོས་ལུགས་ལས་དོན་ལ་ཁྲིམས་ལྟར་དོ་དམ་དང་ཆོས་ལུགས་ལས་དོན་གྱི་ཁྲིམས་སྐྱོང་ཅན་གྱི་ཆུ་ཚད་མཐོ་རུ་གཏོང་བའི་དམ་འཛིན་བྱ་གཞི་ནུས་ལྡན་ཞིག ཆོས་ལུགས་ཀྱི་ཕན་མེད་ཤུགས་རྐྱེན་ཆུང་དུ་བཏང་ནས་བོད་བརྒྱུད་ནང་བསྟན་ཀྲུང་གོ་ཅན་ལ་སྐུལ་འདེད་གཏོང་བ་དང་། ཆོས་ལུགས་སྤྱི་ཚོགས་རིང་ལུགས་སྤྱི་ཚོགས་དང་འཚམ་མཐུན་ཡོང་བར་ཁྲིད་སྟོན་ཧུར་ཐག་བྱེད་པའི་ཐབས་ལམ་ནུས་ལྡན་ཞིག འབད་འབུངས་ཡར་བརྩོན་གྱི་སྟོབས་ཤུགས་གཅིག་ཏུ་བསྒྲིལ་ནས་ཡུན་རིང་བདེ་འཁོད་དང་སྤུས་ཚད་མཐོ་བའི་འཕེལ་རྒྱས་ཀྱི་ལྡོག་མེད་བླང་བྱ་ཞིག་བཅས་ཡིན་པས། དུས་རབས་གསར་པའི་བོད་བརྒྱུད་ནང་བསྟན་ལས་དོན་གྱི་འགག་རྩའི་ལྷུ་ཚིགས་དམ་འཛིན་བྱེད་པ་ནི་སྤྱི་ཚོགས་རིང་ལུགས་དེང་རབས་ཅན་གྱི་བོད་ལྗོངས་གསར་པ་འཛུགས་སྐྲུན་བྱེད་པའི་སྤྱི་ཡོངས་དང་འབྲེལ་བ་ཡོད་ལ་གལ་ཆེ་ཞིང་རྒྱང་རིང་གཏིང་ཟབ་ཀྱི་དོན་སྙིང་ཡང་ལྡན་ཡོད་ཅེས་གསུངས་པ་རེད།
ཀརྨ་ཚེ་བརྟན་གྱིས་ནན་བཤད་གནང་དོན། སློབ་སྦྱོང་གཏིང་ཟབ་དང་གོ་བ་ནན་ཏན་བླངས་ནས། ཏང་གི་ཚོགས་ཆེན་ཉི་ཤུ་པའི་དགོངས་དོན་གྱིས“འདུ་ཤེས་གསུམ”གྱི་སློབ་གསོར་སྤྱི་འདོམས་བྱེད་དགོས། ཁྲིད་སྟོན་ཡག་པོ་དང་སྣོད་བསྟུན་སློབ་ཁྲིད་བྱས་ཏེ་ནུས་ལྡན་གྱི་བྱ་ཐབས་ལ་བརྟེན་ནས“འདུ་ཤེས་གསུམ”གྱི་སློབ་གསོ་མི་སེམས་སུ་ཟུག་པ་དང་བློ་ལ་ངེས་ཐུབ་པའི་འགན་ལེན་བྱེད་དགོས། འགན་འཁྲི་ནན་གཏོང་དང་བྱེད་ཐབས་ཞིབ་ཚགས་སུ་བཏང་ནས་ལས་དོན་ཞིབ་ཕྲ་བསྒྲུབས་ཏེ་དྲིལ་བསྒྲགས་ནུས་ལྡན་བྱ་རྒྱུའི་འགན་ལེན་བྱེད་དགོས། དམིགས་ཚད་དང་ལྟེ་བར་དམ་པོར་དམིགས་ནས་དངོས་སྒྲུབ་ཀྱི་བྱེད་ཐབས་སྤྱད་དེ་སློབ་གསོའི་བྱེད་སྒོར་གྲུབ་འབྲས་དངོས་ཐོན་པའི་འགན་ལེན་བྱེད་དགོས། འགོ་ཁྲིད་ལ་ཤུགས་སྣོན་དང་སྐོར་ཞིབ་མཛུབ་ཁྲིད་བྱས་ཏེ་དམ་ཞིང་ནན་པའི་རྩ་འཛུགས་འགོ་ཁྲིད་ལ་བརྟེན་ནས་སློབ་གསོ་གཏིང་ཟབ་སྤེལ་བའི་འགན་ལེན་བྱེད་དགོས།
རང་སྐྱོང་ལྗོངས་ཀྱི་འགོ་ཁྲིད་རྡོ་རྗེ་ཚེ་སྒྲུབ་དང་། ཚེ་སྨོན་གླིང་བསྟན་འཛིན་འཕྲིན་ལས། བསོད་ནམས་རིག་འཛིན་བཅས་རང་སྐྱོང་ལྗོངས་ཀྱི་ཚོགས་ར་གཙོ་བོའི་ཚོཌ་འདུར་ཞུགས་པ་དང་། སྒྲུབ་ཁང་ཐུབ་བསྟན་མཁས་གྲུབ་དང་། རྫོང་ལྷོ་བྱམས་པ་མཁས་གྲུབ། ས་ལུང་ཕུན་ལགས་བཅས་ཡན་ལག་ཚོགས་རའི་ཚོགས་འདུར་ཞུགས་པ་རེད།