རང་སྐྱོང་ལྗོངས་ཏང་ཨུད་ཀྱི་རྒྱུན་ཨུ་དྲིལ་བསྒྲགས་པུའི་པུའུ་ཀྲང་དབང་ཧའེ་ཀྲོའུ་ཡིས་རང་སྐྱོང་ལྗོངས་ཀྱི་རིག་གནས་སྒྲིག་གཞི་སྒྱུར་བཅོས་དང་རིག་གནས་ཐོན་ལས་འཕེལ་རྒྱས་ལས་དོན་འགོ་ཁྲིད་ཚོགས་ཆུང་དང་རིག་གནས་སྒྲིག་གཞི་སྒྱུར་བཅོས་ཆེད་དོན་ཚོགས་ཆུང་གི་ཆེད་དོན་ཚོགས་འདུ་གཙོ་སྐྱོང་གནང་བ་དང་།《རང་སྐྱོང་ལྗོངས་ཀྱི་གཞུང་ཁོངས་རིག་གནས་ཁེ་ལས་སྒྱུར་བཅོས་ཟབ་གཏོང་དང་མགྱོགས་མྱུར་འཕེལ་རྒྱས་གཏོང་བའི་བྱ་སྤྱོད་ཀྱི་ཇུས་གཞི》སོགས་འབྲེལ་ཡོད་ཡིག་ཆར་ཞིབ་འཇུག་དང་གྲོས་ཞིབ་གནང་ནས། གོམ་སྟབས་རྗེས་མའི་རིག་གནས་སྒྱུར་བཅོས་དང་འཕེལ་རྒྱས་ཀྱི་གཙོ་གནད་ལས་དོན་བཀོད་སྒྲིག་གནང་བ་རེད།
དབང་ཧའེ་ཀྲོའུ་ཡིས། ཏང་གི་ཚོགས་ཆེན་ཉི་ཤུ་པའི་ཐོག་རིག་གནས་སྒྲིག་གཞི་སྒྱུར་བཅོས་གཏིང་ཟབ་ཏུ་གཏོང་བ་དང་རིག་གནས་དང་དཔལ་འབྱོར་སྲིད་ཇུས་འཐུས་སྒོ་ཚང་དུ་གཏོང་བའི་ཐད་བཀོད་སྒྲིག་གསར་པ་དང་བླང་བྱ་གསར་པ་བཏོན་གནང་ནས། དུས་རབས་གསར་པ་དང་རྒྱང་སྐྱོད་ཀྱི་ལམ་བུ་གསར་པའི་རང་ལྗོངས་ཀྱི་རིག་གནས་སྒྲིག་གཞི་སྒྱུར་བཅོས་དང་རིག་གནས་ཐོན་ལས་ལས་དོན་ཡག་པོ་བསྒྲུབ་རྒྱུར་མདུན་སྐྱོད་ཀྱི་ཁ་ཕྱོགས་གསལ་སྟོན་དང་རྩ་བའི་གཞི་འཛིན་ས་མཁོ་འདོན་གནང་ཡོད། འབྲེལ་ཡོད་སྡེ་ཚན་ཁག་གིས་ཚད་མཐོའི་མཐོང་ཆེན་དང་བསམ་བློ་གཅིག་གྱུར་ཡོང་བ་བྱས་ཏེ། རང་ལྗོངས་ཀྱི་རིག་གནས་སྒྲིག་གཞི་སྒྱུར་བཅོས་དང་རིག་གནས་ཐོན་ལས་འཕེལ་རྒྱས་གཏོང་བའི་ལས་དོན་གྱི་གལ་ཆེའི་རང་བཞིན་ལ་ངོས་འཛིན་གང་ལེགས་བྱས་ནས། རིག་གནས་བྱ་གཞག་དང་རིག་གནས་ཐོན་ལས་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་བཏང་སྟེ། དངོས་པོ་དང་བསམ་པ་ཐུན་མོང་ཐོག་ཕུན་སུམ་ཚོགས་པོ་ཡོང་བ་བྱས་ནས་རྒྱ་ཆེའི་མི་དམངས་མང་ཚོགས་ཚོས་རིག་གནས་འཕེལ་རྒྱས་ཀྱི་གྲུབ་འབྲས་སྔར་བས་མང་བ་དང་སྔར་བས་ཡག་པ་ལོངས་སྤྱོད་ཐུབ་པ་བྱེད་དགོས། གཙོ་གནད་ལ་དམིགས་པ་དང་གསར་འབྱེད་གསར་གཏོད་ཀྱིས་རིག་གནས་སྒྲིག་གཞི་སྒྱུར་བཅོས་དང་འཕེལ་རྒྱས་དང་། རིག་གནས་སྒྱུར་བཅོས་འཕེལ་རྒྱས་གསར་གཏོད། རིག་གནས་བྱ་གཞག་དང་རིག་གནས་ཐོན་ལས་སྤུས་ཚད་མཐོ་བའི་འཕེལ་རྒྱས། གཙོ་གནད་རིག་གནས་སྒྲིག་གཞི་སྒྱུར་བཅོས་དང་རིག་གནས་ཐོན་ལས་ཀྱི་ལས་འགན་དོན་འཁྱོལ་སོགས་ཀྱི་ཐད་མུ་མཐུད་སྐུལ་འདེད་བཏང་ནས་ཚད་བརྒལ་གསར་པ་ཡོང་བ་བྱེད་དགོས། འགན་འཁྲི་འཁུར་ཕོད་པ་དང་རང་འགན་གཙང་སྒྲུབ་ལ་ཤུགས་སྣོན་བརྒྱབ་སྟེ་བསམ་བློར་བཅིངས་འགྲོལ་དང་། བསམ་ཕྱོགས་གསལ་བཟོ། འགན་འཁྲི་གསལ་བཟོ། ཁོར་ཡུག་ལེགས་གཏོང་། དཔུང་ཁག་འཛུགས་ཤུགས་ཆེར་གཏོང་སོགས་ཀྱི་ཐད་ཤུགས་སྣོན་བརྒྱབ་ནས། སྤྱི་ཚོགས་རིང་ལུགས་དེང་རབས་ཅན་གྱི་བོད་ལྗོངས་གསར་པ་སྐྲུན་ཆེད་རིག་གནས་གསར་གཏོད་འཕེལ་རྒྱས་ཀྱི་སྒུལ་ཤུགས་ཆེན་པོ་སྣོན་དགོས་ཞེས་ནན་བཤད་གནང་རེད།