ཚེས་28ཉིན་གྱི་སྔ་དྲོ་ལྗོངས་ཏང་ཨུད་དྲིལ་བསྒྲགས་པུས་2022ལོའི་པུའུ་དོན(རྒྱ་ཆེ)ཚོགས་འདུ་ཐེངས་བརྒྱད་པ་འཚོགས་ནས། ཏང་གི་ཚོགས་ཆེན་ཉི་ཤུ་པ་དང་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་དང་པོའི་དགོངས་དོན་གཅིག་སྡུད་ཐོག་བརྒྱུད་བསྒྲགས་དང་སློབ་སྦྱོང་དང་། སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་གསུང་བཤད་གལ་ཆེན་གྱི་དགོངས་དོན་གཙོ་གནད་བརྒྱུད་བསྒྲགས་དང་སློབ་སྦྱོང་། ཀྲུང་དབྱང་དྲིལ་བསྒྲགས་པུའུ་དང་ལྗོངས་ཏང་ཨུད་ཀྱི་འབྲེལ་ཡོད་ཚོགས་འདུའི་དགོངས་དོན་བརྒྱུད་བསྒྲགས་དང་སློབ་སྦྱོང་བཅས་བྱས་པ་རེད།
ལྗོངས་ཏང་ཨུད་ཀྱི་རྒྱུན་ཨུ་དྲིལ་བསྒྲགས་པུའི་པུའུ་ཀྲང་དབང་ཧའེ་ཀྲོའུ་ཡིས་ཚོགས་འདུ་གཙོ་སྐྱོང་གནང་བ་དང་འབྲེལ་གསུང་བཤད་ཀྱང་གནང་བ་རེད།
དབང་ཧའེ་ཀྲོའུ་ཡིས་བསྟན་དོན། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་སྐབས་ཉི་ཤུ་པའི་ཀྲུང་གུང་ཀྲུང་དབྱང་ཆབ་སྲིད་ཅུས་ཀྱི་མཉམ་སྡེབ་སློབ་སྦྱོང་ཐེངས་དང་པོ་གཙོ་སྐྱོང་གནང་སྐབས་གནང་བའི་གསུང་བཤད་གལ་ཆེན་གྱི་དགོངས་དོན་ལས། ཏང་ཀྲུང་དབྱང་གིས་ཏང་གི་ཚོགས་ཆེན་ཉི་ཤུ་པའི་དགོངས་དོན་སློབ་སྦྱོང་དང་ལག་བསྟར་གཏིང་ཟབ་བྱེད་པར་ཚད་མཐོའི་མཐོང་ཆེན་གནང་ལུགས་གང་ལེགས་མཚོན་ལ། ང་ཚོས་ལས་དོན་ཁག་ཡག་པོ་སྒྲུབ་པར་རྩ་བའི་གཞི་འཛིན་ས་དང་བྱ་སྤྱོད་ཀྱི་ཕྱོགས་སྟོན་མཁོ་འདོན་ཡང་གནང་ཡོད་པས། ཁོངས་གཏོགས་ཡོངས་ཀྱི་ཚན་པ་ཁག་གིས་སློབ་སྦྱོང་དང་གོ་བ་ནན་ཏན་ལེན་པ་དང་ལག་བསྟར་དོན་འཁྱོལ་གཏིང་ཟབ་བྱེད་དགོས།
དབང་ཧའེ་ཀྲོའུ་ཡིས་ནན་བཤད་གནང་དོན། ལྗོངས་ཡོངས་ཀྱི་དྲིལ་བསྒྲགས་དང་བསམ་བློ་རིག་གནས་ཁོངས་གཏོགས་ཀྱིས་ཏང་གི་ཚོགས་ཆེན་ཉི་ཤུ་པའི་དགོངས་དོན་སློབ་སྦྱོང་དང་། དྲིལ་བསྒྲགས། ལག་བསྟར་བཅས་བྱེད་སྐབས་གདོང་ལེན་དཔེ་བཟང་བརྩོན་ལེན་བྱས་ནས་དཔེ་སྟོན་གྱི་ནུས་པ་འདོན་སྤེལ་བྱས་ཏེ། ལྗོངས་ཡོངས་ཀྱི་གོང་འོག་ཚང་མས་སློབ་སྦྱོང་དང་། དྲིལ་བསྒྲགས། ལག་བསྟར་བཅས་བྱེད་པའི་ལས་དོན་ལ་སྐུལ་འདེད་བཏང་ནས་ཟིལ་ཤུགས་ཆགས་པ་དང་། ཚ་རླབས་འཕྱུར་བ། ཕན་འབྲས་དངོས་ཐོན་པ་བཅས་བྱེད་དགོས། སློབ་སྦྱོང་ཞིབ་ཚགས་དང་། རིགས་པའི་གཞུང་ལུགས་ཞིབ་འཇུག གླེང་ཕྱོགས་ཀྱི་དྲིལ་བསྒྲགས། སྒྲོག་འགྲེལ་སློབ་གསོ། དོན་འཁྱོལ་མཐར་ཕྱིན་བཅས་ཀྱི་ཐད་མདུན་གྲལ་དུ་སླེབས་པ་དང་དང་མིག་དཔེ་འདོན་ཐུབ་པ་བྱེད་དགོས། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་གནང་བའི་སྙན་སྒྲོན་དང་གསུང་བཤད་གལ་ཆེན་སྤྱི་འདོམས་སུ་བྱ་རྒྱུ་མཐའ་འཁྱོངས་བྱས་ཏེ། སྔོན་ལ་སློབ་སྦྱོང་དང་སློབ་སྦྱོང་གཏིང་ཟབ་ཐུབ་པ་བྱེད་དགོས། བོད་ཀྱི་དོན་དངོས་དང་ཟུང་འབྲེལ་དམ་ཟབ་བྱས་ནས་རིགས་པའི་གཞུང་ལུགས་ཞིབ་འཇུག་དང་དྲིལ་བསྒྲགས་དགོངས་འགྲེལ་ལ་ཤུགས་སྣོན་རྒྱག་དགོས། གཞི་རིམ་མང་ཚོགས་ཀྱི་ཚུར་སྣང་ལན་ཆ་དང་སློབ་སྦྱོང་དྲིལ་བསྒྲགས་ལ་དམིགས་ཏེ་མང་ཚོགས་ཀྱིས་ལྟ་འདོད་ལ་ཉན་སྤྲོ་བའི་སྨྱན་སྦྱོར་གྱི་ཐོན་རྫས་ཁྱབ་གདལ་གཏོང་དགོས། ཀྲུང་དབྱང་སྒྲོག་འགྲེལ་ཚོགས་པས་རང་ལྗོངས་སུ་སྒྲོག་འགྲེལ་ལས་དོན་སྤེལ་བར་གཞོགས་འདེགས་བྱས་ནས་དྲ་ཐོག་དང་དྲ་ཕྱི་ཟུང་འབྲེལ་གྱིས། ནང་དོན་ཕུན་སུམ་ཚོགས་ལ་རྣམ་པ་སྣ་ཚོགས་ཀྱི་སྒྲོག་འགྲེལ་སློབ་གསོའི་བྱེད་སྒོ་རྒྱ་ཁྱབ་ངང་སྒྲིག་འཛུགས་བྱས་ནས་སྤེལ་དགོས། སང་ལོ་ཙམ་མ་ཟད་སླད་ཕྱིན་ལོ་5ཡི་ལས་དོན་ལ་ཞིབ་འཇུག་དང་ཇུས་འགོད་ནན་ཏན་བྱས་ནས་རང་ལྗོངས་ཀྱི་འདུ་ཤེས་འཛིན་སྟངས་དང་དྲིལ་བསྒྲགས་བསམ་བློའི་ལས་དོན་སྐས་རིམ་གསར་པ་ཞིག་ཏུ་སླེབས་རྒྱུར་སྐུལ་འདེད་གཏོང་དགོས། མཐའ་ཚད་ཀྱི་བསམ་བློར་ཤུགས་སྣོན་རྒྱག་པ་དང་། སྒྲིག་ཁྲིམས་ཀྱི་འདུ་ཤེས་ཟབ་ཏུ་གཏོང་བ། ཡང་དག་པའི་ཁ་ཕྱོགས་དང་སྟོན་ཕྱོགས་ལ་སྟངས་འཛིན་ནན་པོ་བཅས་བྱས་ནས། དྲིལ་བསྒྲགས་དང་སྒྲོག་འགྲེལ་གྱི་ལས་དོན་ཁག་ལ་དམ་འཛིན་ནན་པོ་བྱས་ཏེ། ནོར་འཁྲུལ་གྱི་བསམ་བློ་དང་གཏམ་བརྗོད་གང་རུང་ཞིག་ལ་བརྒྱུད་བསྒྲགས་ཀྱི་ཐབས་ལམ་གཏན་ནས་མཁོ་འདོན་བྱེད་མི་རུང་།
ཚོགས་འདུའི་ཐོག་ད་དུང་ལས་དོན་གཞན་དག་ལ་ཞིབ་འཇུག་དང་གྲོས་ཞིབ་གནང་བ་རེད།