ཉིན་ཤས་བསྟུད་མར་རང་སྐྱོང་ལྗོངས་ཀྱི་འགོ་ཁྲིད་ཀྱིས་གྲོང་ཁྱེར་དང་ས་ཁུལ་དུ་ཕེབས་ནས་རིམས་ནད་སྔོན་འགོག་དང་ཚོད་འཛིན་ལས་དོན་ལ་བརྟག་ཞིབ་དང་ལྟ་སྐུལ་མཛུབ་ཁྲིད་གནང་བ་རེད།

ཟླ་9ཚེས་3ཉིན། ལྗོངས་ཏང་ཨུད་ཀྱི་རྒྱུན་ཨུ་དང་། རང་སྐྱོང་ལྗོངས་ཀྱི་རྒྱུན་ལས་ཀྲུའུ་ཞི་གཞོན་པ། ལྗོངས་ཡོངས་ཀྱི་ཏོག་གསར་གློ་ཚད་རིམས་ནད་ལ་ཁ་གཏད་གཅོག་པའི་ལས་དོན་འགོ་ཁྲིད་ཚོགས་ཆུང་ཉིང་སྐྱུར་བརྟག་དཔྱད་ཚོགས་ཆུང་གི་ཙུའུ་ཀྲང་བཅས་ཡིན་པའི་ཤའོ་ཡིའུ་ཚའེ་ལྷ་ས་གྲོང་ཁྱེར་མི་དམངས་སྨན་ཁང(དཔལ་སྡིངས་སྨན་ཁུལ)དང་རང་སྐྱོང་ལྗོངས་ནད་ཡམས་སྔོན་འགོག་ཚོད་འཛིན་ལྟེ་གནས་སོགས་ལ་ཕེབས་ནས་བརྟག་ཞིབ་གནང་སྐབས་བརྟག་དཔྱད་སྒྲིག་གཞི་ཁག་གིས་འབྲེལ་མཐུད། མཐུན་སྦྱོར་ལ་ཤུགས་སྣོན་རྒྱག་པ་དང་ལས་སྒྲུབ་དང་ངལ་གསོ་བཀོད་སྒྲིག་ཡག་པོ་བྱས་ཏེ་བརྟག་དཔྱད་མྱུར་པོ་དང་བརྟག་དཔྱད་བྱས་འབྲས་མྱུར་པོ་འདོན་པ། སྒྲོམ་ཚང་སྨན་ཁང་གིས་སྐྱོབ་བཅོས་བྱེད་ཚད་དང་སྨན་ཁང་ནས་དོན་ཚད་མགྱོགས་མྱུར་མང་དུ་གཏོང་དགོས། འབྲེལ་ཡོད་སྡེ་ཚན་ཁག་གིས་ཚན་རིག་དང་མཐུན་པའི་སྒོ་ནས་བརྒྱུད་རིམ་ལེགས་སུ་གཏོང་བ་དང་ལྷུ་ཚིགས་ཁག་གི་དཀའ་གནད་དང་འགག་གནད་བསལ་ཏེ་ཉིང་སྐྱུར་བརྟག་དཔྱད་མ་ལག་འཁོར་རྒྱུག་ནུས་ལྡན་ཐུབ་པའི་འགན་ལེན་བྱེད་དགོས། སྔོན་ཐོན་ཉམས་མྱོང་ལ་དཔེ་བལྟས་ཏེ་སྒྲིག་བཀོད་དང་སྒྲིག་ཆས་རིམ་སྤོར་བྱེད་པ་དང་། གསོ་སྦྱོང་བྱེད་ཤུགས་ཆེ་རུ་གཏོང་བ། ནད་ཡམས་སྔོན་འགོག་དང་ཚོད་འཛིན་གྱི་མ་ལག་འཛུགས་སྐྱོང་བྱེད་ཤུགས་ཆེ་རུ་གཏོང་བ་བཅས་བྱས་ནས་སྤྱི་པའི་འཕྲོད་བསྟེན་གྱི་འགོག་བཅོས་ལས་དོན་གྱི་ཆུ་ཚད་མཐོ་རུ་གཏོང་དགོས་ཞེས་ནན་བཤད་གནང་བ་རེད།

ཟླ་8ཚེས་29ནས་ཟླ་9ཚེས་8ཉིན་བར། རང་སྐྱོང་ལྗོངས་སྲིད་གྲོས་ཀྱི་ཀྲུའུ་ཞི་གཞོན་པ་དང་གཞིས་རྩེ་གྲོང་ཁྱེར་དུ་བསྐྱོད་ནས་འགན་གཙང་འགན་ལེན་གྱི་རང་སྐྱོང་ལྗོངས་ལྟ་སྐུལ་མཛུབ་ཁྲིད་ཚོགས་ཆུང་གི་ཙུའུ་ཀྲང་གཞོན་པ་ཅང་ཅེས་རུ་སྣེ་ཁྲིད་གནང་སྟེ་གཞིས་རྩེ་གྲོང་ཁྱེར་གྱི་སྡེ་ཁུལ་ཁྲོམ་གཞུང་དང་གཙོ་གནད་ས་ཁོངས་སུ་རིམས་ནད་སྔོན་འགོག་དང་ཚོད་འཛིན་གྱི་འབྲེལ་ཡོད་ལས་དོན་ལ་བརྟག་ཞིབ་གནང་བ་དང་སྡེ་ཁུལ་གྱི་དོ་དམ་ཚོད་འཛིན་དང་། མི་སྣ་ལོགས་བཀར། མང་ཚོགས་ལ་ཞབས་ཞུ། ནད་པ་བརྒྱུད་འདྲེན། དངོས་ཟོག་གྲབས་གསོག་སོགས་ཀྱི་ལས་ཀའི་གནས་ཚུལ་ལ་མཁྱེན་རྟོགས་ཞིབ་ཕྲ་གནང་ནས་གནས་པའི་དཀའ་ངལ་དང་གནད་དོན་ལ་བཀའ་འདྲི་གནང་བ་དང་། ཆབས་ཅིག་རིམས་འགོག་གི་འཐབ་ས་དང་པོའི་ཏང་ཡོན་ལས་བྱེད་པ་དང་མང་ཚོགས་ལའང་གཟིགས་པ་རེད།