རང་སྐྱོང་ལྗོངས་ཏང་ཨུད་ཀྱི་གཅིག་གྱུར་བཀོད་སྒྲིག་གཞིར་བཟུང་། ཉིན་ཤས་གོང་རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་རང་སྐྱོང་ལྗོངས་མི་དམངས་འཐུས་ཚོགས་རྒྱུན་ལས་ཨུ་ལྷན་གྱི་ཀྲུའུ་རེན་བློ་བཟང་རྒྱལ་མཚན་གྱིས“མི་བྱེད་པ་བཞི་དང་ཐད་སྐྱོད་གཉིས”ཀྱི་བྱེད་སྟངས་ལ་བརྟེན་ནས། ལྷ་ས་གྲོང་ཁྱེར་གྱི་རིམས་ནད་སྔོན་འགོག་དང་ཚོད་འཛིན་གྱི་ལས་དོན་ལ་ལྟ་སྐུལ་མཛུབ་ཁྲིད་དང་ཞིབ་བཤེར་གནང་བ་དང་། རང་སྐྱོང་ལྗོངས་ཏང་ཨུད་དང་ཧྲུའུ་ཅི་ཝང་ཅུན་ཀྲེང་གི་ཚབ་ཞུས་ནས་རིམས་ནད་སྔོན་འགོག་དང་ཚོད་འཛིན་གྱི་འཐབ་ས་དང་པོར་འབད་འཐབ་བྱེད་བཞིན་པའི་ལས་དོན་མི་སྣར་འཚམས་འདྲི་ཞུས་པ་རེད།
ཀྲེ་ཀྲའོ་ཐོན་ལས་གླིང་ཧེང་ཐུང་ཟོག་འགྲེམས་ཞིང་ཞོར་ཐོན་རྫས་སྡེབ་ཚོང་ཁྲོམ་ར་དང་བོད་ལྗོངས་ལིང་ཧྥུང་རིག་ལྡན་ཟོག་འགྲེམས་གླིང་གདོང་དཀར་ཞིང་ཞོར་ཐོན་རྫས་ཁྲོམ་ར་དངོས་ཟོག་གསོག་ཉར་རྟེན་གཞིར།
བློ་བཟང་རྒྱལ་མཚན་གྱིས་ས་གནས་ས་ཐོག་ཏུ་རིམས་ནད་སྔོན་འགོག་དང་ཚོད་འཛིན་དང་ཁྲོམ་རའི་མཁོ་སྤྲོད་འགན་ལེན་དང་རིན་གོང་བརྟན་པོའི་ལས་དོན་གནས་ཚུལ་ལ་ཞིབ་བཤེར་གནང་ཞིང་། ཤ་ཚལ་རིན་གོང་བརྟན་པོ་དང་དངོས་ཟོག་གསོག་ཉར་འདང་ངེས་ཡོད་པ་མཁྱེན་རྗེས་ཁས་ལེན་གང་ལེགས་གནང་བ་རེད། ཁོང་གིས་མང་ཚོགས་ཀྱི་བསམ་བློ་གཏོང་སར་བསམ་བློ་གཏོང་བ་དང་སེམས་ཁྲལ་བྱེད་སར་སེམས་ཁྲལ་བྱས་ཏེ། རིམས་ནད་སྔོན་འགོག་དང་ཚོད་འཛིན་གྱི་བྱེད་ཐབས་ཁག་དོན་འཁྱོལ་ནན་པོ་བྱེད་པ་དང་། མཁོ་སྤྲོད་འགན་ལེན་ཁྲོད་ཀྱི་ཁྲོམ་རའི་བྱེད་པོའི་ནུས་པ་འདོན་སྤེལ་གང་ལེགས་བྱེད་པ། ཉོ་སྒྲུབ་དང་། སྐྱེལ་འདྲེན། གསོག་ཉར། སྡེབ་སྐྱེལ་སོགས་ལྷུ་ཚིགས་ཁག་གི་ལས་ཀའི་ཕན་ནུས་ཆེ་རུ་ཧུར་ཐག་གཏོང་བ་བཅས་བྱས་ནས། མང་ཚོགས་ཀྱི་གཞི་རྩའི་འཚོ་བའི་དགོས་མཁོ་སྐོང་གང་ཐུབ་བྱེད་དགོས་ཞེས་ནན་བཤད་གནང་བ་རེད།
བློ་བཟང་རྒྱལ་མཚན་གྱིས། ལྷ་སར་ཡོད་པའི་མངའ་རིས་དང་ཧོ་པེའི་ཆ་ཚང་སློབ་ཆུང་དང་བོད་ལྗོངས་སློབ་ཆེན་རྔ་ཆེན་སློབ་ཁུལ་དུ་རིམས་ནད་སྔོན་འགོག་དང་ཚོད་འཛིན་གྱི་བྱེད་ཐབས་དོན་འཁྱོལ་བྱས་ཚུལ་ལ་ལྟ་སྐུལ་མཛུབ་ཁྲིད་དང་ཞིབ་བཤེར་གནང་བ་དང་། རང་སྐྱོང་ལྗོངས་སློབ་གསོ་ཐིང་དུ་ལྗོངས་ཡོངས་ཀྱི་སློབ་གསོའི་ཁོངས་གཏོགས་ཀྱི་རིམས་ནད་སྔོན་འགོག་དང་ཚོད་འཛིན་གྱི་ལས་དོན་ལ་བརྙན་ལམ་བརྒྱུད་བཀོད་གཏོང་གནང་བ་རེད།