◆ ཀུན་སེམས་གཅིག་སྒྲིལ་དང་ཕྱར་བ་གྲུ་འདེགས་བྱས་ཏེ་སྤྱི་ཚོགས་ཐོག་རིམས་ནད་གཙང་བཟོའི་དམིགས་ཚད་མངོན་འགྱུར་ཧུར་ཐག་ཡོང་བ་བྱས་ནས་རིམས་ནད་སྔོན་འགོག་དང་ཚོད་འཛིན་གྱི་འགག་སྒྲོལ་དམག་འཐབ་ལ་རྒྱལ་ཁ་མཐའ་གཅིག་ཏུ་ལེན་དགོས།

ཚེས་23ཉིན་གྱི་སྔ་དྲོ། རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་ཝང་ཅུན་ཀྲེང་གིས་ལྗོངས་ཡོངས་ཀྱི་རིམས་ནད་སྔོན་འགོག་དང་ཚོད་འཛིན་གྱི་ལས་དོན་ལ་བཀོད་གཏོང་གནང་ནས་ནུས་ཤུགས་ཡོད་རྒུས་མིག་སྔའི་རིམས་ནད་སྔོན་འགོག་དང་ཚོད་འཛིན་དང་འཕྲལ་སྡོམ་ཐག་གཅོད་ཡག་པོ་བྱེད་པའི་ཐད་སླར་ཡང་སྐུལ་སློང་དང་སླར་ཡང་བཀོད་སྒྲིག་གནང་བ་རེད། ཁོང་གིས་ནན་བཤད་གནང་དོན། མིག་སྔར། རིམས་ནད་སྔོན་འགོག་དང་ཚོད་འཛིན་དེ་འགག་རྩའི་དུས་མཚམས་སུ་སླེབས་ཡོད་པས། ལྗོངས་ཡོངས་ཀྱི་རིམ་ཁག་སྡེ་ཚན་ཁག་དང་རྒྱ་ཆེའི་ཏང་ཡོན་ལས་བྱེད་པས་རིམས་ནད་སྔོན་འགོག་དང་ཚོད་འཛིན་སྐོར་གྱི་བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གི་མཛུབ་སྟོན་གལ་ཆེན་གྱི་དགོངས་དོན་ལག་བསྟར་ནན་ཏན་དང་ཏང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་གི་ཐབས་ཇུས་བཀོད་སྒྲིག་དང་རང་སྐྱོང་ལྗོངས་ཏང་ཨུད་ཀྱི་ལས་དོན་བཀོད་སྒྲིག་ལག་བསྟར་དོན་འཁྱོལ་མཐའ་གཅིག་ཏུ་བྱས་ནས་ཡིད་ཆེས་དང་ཆོད་སེམས་བརྟན་དུ་གཏོང་བ་དང་འགན་འཁྲི་འཁུར་སེམས་དང་ལས་འགན་སྒྲུབ་སེམས་ཆེ་རུ་གཏོང་བ་དང་། ཀུན་སེམས་གཅིག་སྒྲིལ་དང་ཕྱར་བ་གྲུ་འདེགས་བྱེད་པ། གཙོ་གནད་ཚད་བརྒལ་དང་འགག་སྒྲོལ་ལ་ཤུགས་སྣོན་རྒྱག་པ་བཅས་བྱས་ཏེ། སྤྱི་ཚོགས་ཐོག་རིམས་ནད་གཙང་བཟོའི་དམིགས་ཚད་མངོན་འགྱུར་ཧུར་ཐག་ཡོང་བ་བྱས་ནས་རིམས་ནད་སྔོན་འགོག་དང་ཚོད་འཛིན་གྱི་འགག་སྒྲོལ་དམག་འཐབ་ལ་རྒྱལ་ཁ་མཐའ་གཅིག་ཏུ་ལེན་དགོས།

ཡན་ཅིན་ཧའེ་དང་། ཀྲོང་ཡན། ཁྲེན་ཡུང་ཆི། ལིའུ་ཅང་། ཝང་ཝུའེ་ཏུང་། དབང་ཧའེ་ཀྲོའུ། རེན་ཝེ། ཕུར་བུ་དོན་གྲུབ། ཀརྨ་ཚེ་བརྟན། ཤའོ་ཡིའུ་ཚའེ། ཟླ་བ་ཚེ་རིང་བཅས་ཚོགས་འདུར་ཞུགས་པ་རེད།

ཝང་ཅུན་ཀྲེང་གིས་གསུངས་དོན། རྒྱ་ཆེའི་ཏང་ཡོན་ལས་བྱེད་པས་ནད་དུག་དང་འཐབ་རྩོད་བྱེད་པའི་ལག་ལེན་ཁྲོད་རིམས་ནད་སྔོན་འགོག་དང་ཚོད་འཛིན་སྐོར་གྱི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཛུབ་སྟོན་གལ་ཆེན་ལ་གོ་བ་ལེན་ཚད་སྔར་བས་ཟབ་ཏུ་སོང་ཡོད་ལ་རིམས་ནད་སྔོན་འགོག་དང་ཚོད་འཛིན་ལས་དོན་གྱི་ཆོས་ཉིད་དང་། དུས་བབ། ལས་འགན་བཅས་ལ་ངོས་འཛིན་དེ་བས་གསལ་དུ་ཕྱིན་ཡོད་པ་མ་ཟད། ནུས་ཆེའི་བཀོད་འདོམས་མཐུན་སྦྱོར་མ་ལག་རིམ་བཞིན་བཙུགས་པས་འཕྲལ་སྡོམ་ཐག་གཅོད་ཀྱི་ཆུ་ཚད་དང་ཞབས་ཞུ་འགན་ལེན་གྱི་ནུས་པ་ཆེ་རུ་ཕྱིན་ཡོད། ཡིད་ཆེས་དང་ཆོད་སེམས་བརྟན་དུ་བཏང་ནས། རིག་པ་དྭངས་གསལ་མཐའ་འཁྱོངས་དང་། ཐོག་མཐའ་བར་གསུམ་དུ་གདེང་ཚོད་ཡོད་པ་བྱེད་པ། ཞུམ་མེད་ཀྱི་འཐབ་སེམས་འཕེལ་བར་བྱེད་པ། ལས་དོན་ལག་བསྟར་བྱེད་ཤུགས་སྔར་བས་ཆེ་རུ་གཏོང་བ། སྔོན་འགོག་དང་ཚོད་འཛིན་གྱི་བྱ་ཐབས་ཆད་ལུས་མེད་པར་དོན་འཁྱོལ་བྱེད་པ། ཉེན་ཁ་དང་མངོན་མེད་རྐྱེན་ངན་སྣ་ཚོགས་ཐོན་བཟོ་ཡོད་དུས་ནས་མེད་པར་བཟོ་བ། འབད་འཐབ་ལ་བརྟེན་ནས་བཅོས་སྐྱོང་ལ་སྐུལ་འདེད་གཏོང་བ་དང་ནུས་པ་དང་ཆུ་ཚད་མཐོ་རུ་ནུས་ལྡན་གཏོང་བ་བཅས་བྱས་ཏེ་རིམས་ནད་མཆེད་རྒྱུ་སྔོན་འགོག་མཐའ་གཅིག་ཏུ་བྱེད་དགོས།

ཝང་ཅུན་ཀྲེང་གིས་ནན་བཤད་གནང་དོན། རིམ་ཁག་འགོ་ཁྲིད་ལས་བྱེད་པས་འགན་འཁྲི་འཁུར་སེམས་དང་ལས་འགན་སྒྲུབ་སེམས་སྔར་བས་ཆེ་རུ་བཏང་ནས་ཏང་དང་མི་དམངས་ལ་ཚད་མཐོའི་འགན་འཁུར་བའི་སྙིང་སྟོབས་ཐོག་ནས་སྔོན་འགོག་དང་ཚོད་འཛིན་གྱི་བྱ་ཐབས་ཁག་ཇི་མ་ཇི་བཞིན་དོན་འཁྱོལ་བྱེད་པ་དང་། རང་སྐྱོང་ལྗོངས་ཏང་ཨུད་དང་སྲིད་གཞུང་གི་ཐབས་ཇུས་བཀོད་སྒྲིག་ཁག་བློ་བརྟན་འགྱུར་མེད་ངང་ལག་བསྟར་མཐའ་གཅིག་ཏུ་བྱས་ཏེ་བཀའ་བསྒོས་ངེས་པར་ལག་ལེན་དང་གང་བཀག་དེ་སྡོམ་བྱེད་དགོས། མིག་སྔར་ལྗོངས་ཡོངས་ཀྱི་རིམས་ནད་སྔོན་འགོག་དང་ཚོད་འཛིན་ཐད་ད་དུང་གནད་དོན་འགའ་ཡོད་པ་དེ་དག་མདོར་བསྡུས་ནས་བཤད་ན་ལག་བསྟར་བྱེད་ནུས་མི་འདང་བ་དེ་རེད། རིམ་ཁག་འགོ་ཁྲིད་ལས་བྱེད་པས་ངེས་པར་དུ་ཚད་མཐོའི་མཐོང་ཆེན་བྱེད་དགོས་ཤིང་། “ལས་བྱེད་པས་ལས་ཀ་བྱེད་དགོས་ལ་བྱས་པར་གྲུབ་འབྲས་ཐོབ་པའི”འདུ་ཤེས་བློ་ལ་བརྟན་པོར་བཅངས་ཏེ་འགྲན་སློང་དྲག་པོའི་མདུན་དུ་ངེས་པར་དུ་ནན་པོ་དང་བྱ་སྤྱོད་མགྱོགས་མྱུར་སྤེལ་བ་དང་། ཏན་ཏིག་ཨང་དང་པོར་འཇོག་པ་དང་དངོས་སྒྲུབ་གཙིགས་ཆེར་འཛིན་པ། རང་འགན་ནན་སྒྲུབ་དང་རང་འགན་གཙང་སྒྲུབ་བྱེད་པ། ཉེན་ཁ་ཆེ་བའི་ལས་འགན་ལྕི་པོ་རང་འགུལ་ངང་འཁུར་བ། མངོན་གསལ་དོད་པའི་གནད་དོན་ཐག་གཅོད་ཧུར་ཐག་བྱེད་པ། རིམས་ནད་སྔོན་འགོག་དང་ཚོད་འཛིན་གྱི་འཐབ་རྩོད་ཁྲོད་རང་འགུལ་ངང་སྦྱོང་བརྡར་དང་ཉམས་སད་ཐེག་པ་བཅས་བྱས་ནས་གོ་གནས་གང་ཞིག་བཟུང་ན་དེ་མཚུངས་ཀྱི་སྲིད་དོན་སྒྲུབ་ཐུབ་པར་བྱེད་དགོས། སྤྱི་ཡོངས་ལ་སྣང་ཆེན་དང་དོན་ཆེན་ལ་དམིགས་ཏེ་རིམས་ནད་སྔོན་འགོག་དང་ཚོད་འཛིན་གྱི་འཐབ་ས་དང་པོ་ནས་ཕུལ་བྱུང་ལས་བྱེད་པ་དང་ཤེས་ལྡན་མི་སྣ་འཚོལ་ཞིབ་བྱེད་པར་སྣང་ཆེན་བྱེད་པ་དང་། རིམས་ནད་སྔོན་འགོག་དང་ཚོད་འཛིན་ལས་དོན་ཁྲོད་སྤྱོད་ཚུལ་བརྟན་པོ་མེད་པ་དང་། སྣང་མེད་དུ་གཏོང་བ། གཡོལ་ཐབས་བྱེད་པ། ཁག་འགན་དཀྲི་རེས་བྱེད་པ་སོགས་ཕྱི་ཚུལ་རིང་ལུགས་དང་དཔོན་ཉམས་རིང་ལུགས་བཀག་འགོག་མཐའ་གཅིག་ཏུ་བྱེད་པ། “བཤད་པ་ཙམ་གྱིས་བསྒྲུབས་པར་བརྩི་བ་དང་བསྒྲུབས་པ་ཙམ་གྱིས་ཡག་པོ་བསྒྲུབས་པར་བརྩི་བའི”སྣང་ཚུལ་བཀག་འགོག་མཐའ་གཅིག་ཏུ་བྱེད་པ། ལས་བྱེད་པ་འགའ་ཞིག་གིས་རིམས་འགོག་ལས་དོན་ཁྲོད་རྣམ་པ་ཙམ་དང་ཕྱི་ཚུལ་ཙམ་སྟོན་པར་ངོ་རྒོལ་མཐའ་གཅིག་ཏུ་བྱེད་པ། རིམས་ནད་སྔོན་འགོག་དང་ཚོད་འཛིན་བྱེད་སྐབས་དོན་འཁྱོལ་ལ་དམ་འཛིན་ནན་པོ་དང་ལྷོད་གཡེང་གཏོང་མི་རུང་བའི་བརྡ་རྟགས་དྲག་པོ་རྒྱུན་མཐུད་བཏང་ནས། རྒྱ་ཆེའི་ཏང་ཡོན་ལས་བྱེད་པ་ཚོར་དཀའ་ཚེགས་ཆེན་པོའི་ཁྲོད་ཉམས་སད་ཐེག་ཐུབ་པ་དང་དམག་འཐབ་ཆེན་པོའི་ནང་འགན་འཁྲི་མངོན་ཐུབ་པ་བྱེད་དགོས་པའི་ལྕག་སྐུལ་གནང་བ་རེད།

ཝང་ཅུན་ཀྲེང་གིས་ནན་བཤད་གནང་དོན། གནད་དོན་ཕྱོགས་སྟོན་དུ་འཛིན་རྒྱུ་མཐའ་འཁྱོངས་ཀྱིས་ལས་ཀའི་གཙོ་གནད་མངོན་པར་བྱས་ཏེ་རིགས་དབྱེ་མཛུབ་ཁྲིད་དང་ཚན་རིག་དང་མཐུན་པའི་ངང་ཇུས་བསྟར་བྱས་ནས་རིམས་ནད་སྔོན་འགོག་དང་ཚོད་འཛིན་གྱི་བྱ་ཐབས་ཞིབ་ཅིང་ཕྲ་བའི་ངང་དོན་འཁྱོལ་ཡག་པོ་བྱེད་དགོས། གནད་དོན་ཤེས་རྟོགས་དང་གནད་དོན་ཐག་གཅོད་ལ་ཤུགས་བརྒྱབ་སྟེ་ཐོན་མ་ཐག་དང་། གཞི་རིམ། ཞིབ་ཕྲ་བཅས་ནས་དམ་འཛིན་བྱེད་པ་དང་། རིགས་དབྱེ་རིམ་དབྱེའི་ངང་དོ་དམ་བྱ་རྒྱུར་ཤུགས་སྣོན་རྒྱག་པ། ཁུལ་དབྱེ་ཡུག་དབྱེ་བྱས་ནས་འགན་འཁྲི་ནན་དུ་གཏོང་བ། རིམས་ནད་སྔོན་འགོག་དང་ཚོད་འཛིན་ལས་དོན་གྱི་ཞན་ཆའི་ལྷུ་ཚིགས་དང་འགག་གནད་གཙོ་གནད་དུ་འཚོལ་ཞིབ་དང་ཐག་གཅོད་བྱེད་པ། དུས་ཐོག་ཏུ“ཁབ་མིག་ཆེན་པོ”འགོག་པ་བཅས་བྱས་ནས་ཉེན་ཁ་ཆུང་གྲས་གནད་དོན་ཆེན་པོར་མི་འགྱུར་བའི་སྔོན་འགོག་བྱེད་དགོས། དམིགས་ཚད་ཀྱི་སྟོན་ཕྱོགས་ལ་ཤུགས་སྣོན་བརྒྱབ་སྟེ་ས་གནས་ཁག་གི་དོན་དངོས་དང་ཟུང་འབྲེལ་གྱིས་དོན་ཐོག་ཏུ་འཁྱོལ་ཐུབ་ངེས་ཀྱི་བྱ་ཐབས་སྤྱད་དེ་ལེགས་ཆའི་སྟོབས་ཤུགས་གཅིག་སྡུད་དང་། ཡུག་དབྱེ་ཚར་གཅོད་དང་རེ་རེ་བཞིན་འགག་སྒྲོལ། འགག་སྒྲོལ་བྱེད་མགྱོགས་སུ་གཏོང་བ་བཅས་བྱས་ནས“གཙང་བཟོའི་དམིགས་ཚད”ཕྱོགས་སུ་གདོང་མཆོང་བྱེད་དགོས། ནུས་ཤུགས་ཡོད་རྒུས་ལས་ཕྱོད་ཆེ་རུ་བཏང་སྟེ་ལྷུ་ཚིགས་ཡོངས་ལ་རང་བཤེར་རང་བཅོས་བྱེད་པ་དང་། སྤྱི་ཚོགས་དོ་དམ་ཚོད་འཛིན་དང་བཀག་སྡོམ་ཚོད་འཛིན་དང་། རིམས་དཔྱད་ཁུངས་འདེད། ཉིང་སྐྱུར་བརྟག་དཔྱད། གདགས་གཤིས་འཚོལ་བཤེར་དང་ལོགས་བཀར་སོགས་སྔོན་འགོག་དང་ཚོད་འཛིན་བྱ་ཐབས་སྔར་བས་ལེགས་སུ་བཏང་ནས་རིམས་ནད་སྔོན་འགོག་དང་ཚོད་འཛིན་ཚན་རིག་ཅན་དང་ཞིབ་ཕྲ་ཅན་གྱི་ཆུ་ཚད་མཐོ་རུ་གཏོང་དགོས། རིམ་ཁག་སྡེ་ཚན་ཁག་དང་ལས་རིགས་ཁག་གི་འགན་འཁྲི་ནན་དུ་བཏང་ནས་རང་འགན་རང་འཁུར་དང་རང་འགན་གཙང་སྒྲུབ་ཀྱིས་ལས་ཀའི་གཙོ་གནད་མངོན་གསལ་དོད་པོ་ཡོང་བར་བྱེད་པ་དང་། སྨན་ཁང་དང་། སློབ་གྲྭ དགོན་སྡེ། རྒན་གསོ་ཁང་། ཕན་བདེ་ཁང་། བཙོན་ཁང་སོགས་མི་ཚོགས་སྟུག་སར་དམ་པོར་དམིགས་པ་དང་། གཙོ་གནད་ས་ཁོངས་དང་། གཙོ་གནད་ཁྱབ་ཁོངས། གཙོ་གནད་ལས་རིགས་བཅས་ཀྱི་རིམས་ནད་སྔོན་འགོག་དང་ཚོད་འཛིན་གྱི་ལས་དོན་ཏན་ཏིག་སྒྲུབ་པ། སྟོབས་ཤུགས་གཅིག་སྒྲིལ་གྱིས་ཚར་གཅོད་དམག་འཐབ་རྒྱག་པ་བཅས་བྱས་ནས་མཐའ་གསལ་མཐིལ་རྟོགས་གང་མགྱོགས་ཐུབ་པར་བྱེད་དགོས། རིམས་ནད་སྔོན་འགོག་ཚོད་འཛིན་དང་སྤྱི་ཚོགས་བརྟན་ལྷིང་དང་དཔལ་འབྱོར་དང་སྤྱི་ཚོགས་འཕེལ་རྒྱས་ལ་སྤྱི་འདོམས་བྱས་ཏེ་མང་ཚོགས་ལ་སྟོན་ཁའི་རྨོ་འདེབས་སྡུད་གསུམ་གྱི་ལས་དོན་སྒྲུབ་རོགས་ཧུར་ཐག་བྱེད་པ་དང་། རིམས་འགོག་གིས་སོ་ནམ་གྱི་དུས་ཚོད་ལ་ཤུགས་རྐྱེན་མི་ཐེབས་པར་བྱས་ནས་གཉིས་ཀར་འཐུས་ཤོར་མི་ཡོང་བ་དང་གཉིས་ཀར་སྐུལ་འདེད་ཐེབས་པའི་འགན་ལེན་ཏན་ཏིག་བྱེད་དགོས། དོ་དམ་ཚོད་འཛིན་བྱ་ཐབས་ནན་དུ་གཏོང་བ་དང་བཀག་སྡོམ་དོ་དམ་ལ་ཤུགས་སྣོན་བརྒྱབ་ནས། ཁུག་གསང་སྟོང་གསུམ་མི་ལུས་པ་བྱེད་པ་དང་རིམས་ནད་མི་མཆེད་སྔོན་འགོག་མཐའ་གཅིག་ཏུ་བྱས་ཏེ་དོ་དམ་ཚོད་འཛིན་གྱི་བྱ་ཐབས་ནན་པོའི་ཐོག་ནས་དོ་དམ་ཚོད་འཛིན་མགྱོགས་མྱུར་མཚམས་འཇོག་ཐུབ་པར་བྱེད་དགོས། རིགས་དབྱེ་མཛུབ་ཁྲིད་དང་སྟབས་བསྟུན་ལེགས་སྒྲིག་མཐའ་འཁྱོངས་ཀྱིས་འགག་སྒྲོལ་མགྱོགས་མྱུར་ཐུབ་པ་བྱས་ནས་རིམས་ནད་མེད་པའི་ཁུལ་ཆུང་ཧུར་ཐག་བཏོད་དེ་ད་ཡོད་ཀྱི་གྲུབ་འབྲས་སྲ་བརྟན་དུ་གཏོང་དགོས། ཐོག་མཐའ་བར་གསུམ་དུ་མི་དམངས་ཀྱི་ལངས་ཕྱོགས་ནས་གནད་དོན་ལ་བསམ་བློ་གཏོང་བ་དང་ལས་དོན་བསྒྲུབས་ཏེ་དུས་དང་རྣམ་པ་ཀུན་ཏུ་མང་ཚོགས་སེམས་ལ་འཇོག་པ་དང་མང་ཚོགས་དང་རྩ་བ་ནས་ཁ་མི་བྲལ་བ། ཐོག་མཐའ་བར་གསུམ་དུ་མང་ཚོགས་ཀྱི་བདེ་སྡུག་སེམས་ལ་བཞག་སྟེ་སེམས་ནུས་ཡོད་རྒུས་མང་ཚོགས་ཀྱི་འཕྲལ་མཁོ་དང་། དཀའ་ངལ། སེམས་ཁྲལ། རེ་སྒུག་བཅས་ཀྱི་གནད་དོན་ཐག་གཅོད་གང་ལེགས་བྱེད་པ་དང་། མང་ཚོགས་ཀྱི་ཐོན་སྐྱེད་དང་འཚོ་བར་འགན་ལེན་ཡག་པོ་བྱས་ནས་བསམ་བློའི་སློབ་གསོ་གཏོང་བ་དང་ཁྲིད་སྟོན་བྱེད་པའི་ལས་དོན་གཏིང་ཟབ་དང་ཞིབ་ཚགས་ངང་སྒྲུབ་དགོས། གླེང་ཕྱོགས་ཀྱི་ཁྲིད་སྟོན་དང་དྲང་ཕྱོགས་ཀྱི་དྲིལ་བསྒྲགས་ཡག་པོ་བྱས་ཏེ་དབང་གྲགས་ལྡན་པའི་ཆ་འཕྲིན་དུས་ཐོག་ཏུ་ཁྱབ་བསྒྲགས་བྱེད་པ་དང་། བསམ་འཆར་དང་གྲོས་འགོ་ནན་ཏན་ངང་ཉན་པ། སྐབས་དང་བསྟུན་ནས་དཀྲོག་གཏམ་བཟོ་བ་དང་སྤྱི་ཚོགས་ཀྱི་བདེ་འཇགས་ཟང་ཟིང་བཟོ་མཁན་ལ་ཁྲིམས་ལྟར་རྡུང་རྡེག་མཐའ་གཅིག་ཏུ་གཏོང་དགོས། ཡུལ་སྐོར་བར་དོ་དམ་དང་ཞབས་འདེགས་ཡག་པོ་ཞུས་ནས་རྒྱལ་ཡོངས“མིག་མངས་སྒྲིག་སྐོར་གཅིག”གི་བསམ་བློ་བཙུགས་ཏེ་རིམས་ནད་ཕྱིར་མ་མཆེད་པའི་ལས་དོན་ཏན་ཏིག་ངང་སྒྲུབ་དགོས། རྒྱུན་གཏན་གྱི་སྨན་བཅོས་ཞབས་ཞུ་ཡག་པོ་སྒྲུབ་པ་དང་། རྒྱུན་གཏན་གྱི་སྨན་བཅོས་སྒྲིག་ལམ་ཡག་པོ་སྲུང་བ། དོས་དྲག་དང་ཉེན་ཆེའི་ནད་པ་དང་དམིགས་བསལ་ཚོགས་སྤྱིའི་སྨན་བཅོས་དགོས་མཁོ་སྔོན་ལ་འགན་ལེན་བྱས་ནས་མང་ཚོགས་ཀྱི་རྒྱུན་གཏན་གྱི་སྨན་བཅོས་ཞབས་ཞུའི་དགོས་མཁོ་སྐོང་དགོས།

ཝང་ཅུན་ཀྲེང་གིས་ནན་བཤད་གནང་དོན། རྩ་འཛུགས་ཀྱི་འགོ་ཁྲིད་ལ་ཤུགས་སྣོན་རྒྱག་པ་དང་། བཀོད་འདོམས་མ་ལག་སྔར་བས་ལེགས་སུ་གཏོང་བ། རིམ་ཉུང་དོ་དམ་ལག་བསྟར་བྱེད་པ། ནུས་ལྡན་མཐུན་སྦྱོར་འཁོར་སྐྱོད་བཅས་བྱས་ཏེ་ས་ཁུལ་དང་གྲོང་ཁྱེར་ཁག་གི་ཏང་ཨུད་ཀྱིས་སྤྱི་ཡོངས་ལ་གཅིག་འདོམས་བྱེད་པ་དང་ཕྱོགས་ཁག་ལ་མཐུན་སྦྱོར་བྱེད་པའི་ནུས་པ་འདོན་སྤེལ་གང་ལེགས་བྱེད་པ་དང། ས་ཁུལ་དང་གྲོང་ཨུད་ཀྱི་ཧྲུའུ་ཅིས་སྔོན་ཚུད་ནས་བཀོད་འདོམས་བྱེད་པ། འགོ་ཁྲིད་ལས་བྱེད་པས“དཔེ་སྟོན་དྲུག”སྣེ་ཁྲིད་ནས་ཐུབ་པ་བཅས་བྱས་ཏེ་རྩ་འཛུགས་ཀྱི་ནུས་པ་ཆེན་པོར་བརྟེན་ནས་རིམས་ནད་སྔོན་འགོག་དང་ཚོད་འཛིན་གྱི་འཐབ་ནུས་ཆེ་རུ་གཏོང་དགོས། རིམ་ཁག་འགོ་ཁྲིད་ལས་བྱེད་པས་སྤྱི་ཡོངས་ཀྱི་འདུ་ཤེས་ཟབ་ཏུ་གཏོང་བ་དང་། རང་འགུལ་ངང་འགན་འཁྲི་འཁུར་ཕོད་པ་བྱེད་པ། སྦྲེལ་མཐུད་དང་འབྲེལ་གཏུག་བྱེད་ཤུགས་ཆེ་རུ་གཏོང་བ། མཉམ་ལས་གཞོགས་འདེགས་དམ་ཟབ་བཅས་བྱས་ཏེ། ལས་དོན་ཁག་འབྲེལ་མཐུད་ཡག་པོ་ཡོང་བའི་འགན་ལེན་ཏན་ཏིག་དང་། རིམས་ནད་སྔོན་འགོག་དང་ཚོད་འཛིན་བྱེད་རིང་ཤེས་རྟོགས་བྱུང་བའི་གནད་དོན་དང་དཀའ་ངལ་དུས་ཐོག་ཏུ་རང་སར་ཐག་གཅོད་བྱས་ཏེ་ལས་ཀའི་མཉམ་ཤུགས་ཆེན་པོ་ཆགས་པར་བྱེད་དགོས། དམ་པ་དོན་གཉེར་གྱི་སྤྱོད་ཚུལ་བཟང་པོ་དར་སྤེལ་ཤུགས་ཆེན་བཏང་ནས་རིམས་ནད་སྔོན་འགོག་དང་ཚོད་འཛིན་བྱ་རྒྱུ་དེ་འཇོན་ཐང་དང་སྤྱོད་ཚུལ་གྱི་ཉམས་སད་གལ་ཆེན་ཞིག་ལ་བརྩི་བ་དང་། འགལ་ཟླ་འཕྲད་སྐབས་དཀའ་ངལ་ལ་མི་སྐྲག་པར་མདུན་སྐྱོད་བྱེད་པ། ཉེན་ཁ་འཕྲད་སྐབས་ཞུམ་མེད་གདོང་མཆོང་བྱེད་པ། རིམས་ནད་སྔོན་འགོག་དང་ཚོད་འཛིན་བྱེད་རིང་གདོང་ལེན་དང་དཔེ་བཟང་བྱེད་པ། དུས་རབས་གསར་པའི་ཏང་ཡོན་ལས་བྱེད་པའི་གཟུགས་བརྙན་བཟང་པོ་གཏོད་པ་བཅས་བྱེད་དགོས། སྒྲིག་ཁྲིམས་ལག་བསྟར་དང་འགན་འཁྲི་བདའ་འདེད་ལ་ལྟ་སྐུལ་ནན་པོ་བྱས་ནས་དོན་འཁྱོལ་དམ་འཛིན་བྱེད་པའི་དམ་ནན་རང་བཞིན་དང་། སྒྲིག་ཁྲིམས་རང་བཞིན། གོ་ཆོད་རང་བཞིན་བཅས་ཤུགས་ཆེར་གཏོང་བ་དང་། གོང་རིམ་གྱི་ཐབས་ཇུས་དོན་འཁྱོལ་ཐད་འགོར་འགྱངས་བཟོ་བ་དང་། དགོས་པའི་ལས་མི་བྱེད་པར་མི་དགོས་པའི་ལས་རྙོག་བཟོ་བ། དག་ཐེར་ཡོ་བསྲང་གི་བཀའ་གསལ་པོར་བཏང་ཡང་ཕན་འབྲས་མི་ཐོན་པ་བཅས་ཀྱི་རིགས་ལ་ཐག་གཅོད་ནན་པོ་བྱེད་པ། རིམས་ནད་སྔོན་འགོག་དང་ཚོད་འཛིན་ལས་དོན་ཁྲོད་འགན་འཁྲི་ཡག་པོ་མི་སྒྲུབ་མཁན་དུས་ཐོག་ཏུ་ལེགས་སྒྲིག་བྱེད་པ། འགན་ཤོར་ལས་འཛོལ་བྱུང་བའི་འགན་འཁྲི་བདའ་འདེད་ནན་པོ་གཏོང་བ་བཅས་བྱས་ཏེ། སྒྲིག་ཁྲིམས་དམ་པོ་དང་སྤྱོད་ཚུལ་ནན་པོར་བརྟེན་ནས་རིམས་ནད་སྔོན་འགོག་དང་ཚོད་འཛིན་བྱེད་ཐབས་དོན་འཁྱོལ་ཡོང་བར་སྐུལ་འདེད་གཏོང་དགོས།