ཚེས་14ཉིན། ལྗོངས་ཏང་ཨུད་ཀྱི་རྒྱུན་ཨུ་རང་སྐྱོང་ལྗོངས་ཀྱི་རྒྱུན་ལས་ཀྲུའུ་ཞི་གཞོན་པ་ཤའོ་ཡིའུ་ཚའེ་ཡིས། ལྗོངས་ཡོངས་ཀྱིས་ཉིང་སྐྱུར་བརྟག་དཔྱད་ལས་དོན་ལ་ཤུགས་སྣོན་རྒྱག་རྒྱུའི་སྐོར་གྱི་བརྙན་ལམ་བཀོད་གཏོང་ཚོགས་འདུ་གཙོ་སྐྱོང་གནང་བ་དང་། རང་སྐྱོང་ལྗོངས་འཕྲོད་བསྟེན་བདེ་ཐང་ཨུ་ལྷན་དང་གྲོང་ཁྱེར་དང་ས་གནས་ཁག་གི་ཉིང་སྐྱུར་བརྟག་དཔྱད་ལས་དོན་གྱི་གནས་ཚུལ་སྙན་སེང་གསན་པ། གོམ་སྟབས་རྗེས་མའི་ལས་དོན་བཀོད་སྒྲིག་བཅས་གནང་བ་རེད།

ཤའོ་ཡིའུ་ཚའེ་ཡིས་རིམ་ཁག་སྡེ་ཚན་ཁག་གིས་ཚད་མཐོའི་མཐོང་ཆེན་བྱས་ཏེ་ཉིང་སྐྱུར་བརྟག་དཔྱད་ཀྱི་གལ་ཆེའི་རང་བཞིན་ལ་ངོས་འཛིན་གཏིང་ཟབ་ཐུབ་པར་བྱེད་དགོས་ཤིང་། ཉིང་སྐྱུར་བརྟག་དཔྱད་ལས་དོན་གྱི་སྒྲིག་གཞི་འཛུགས་པ་དང་ཤུགས་སྣོན་བརྒྱབ་སྟེ། འགག་རྩའི་དུས་སུ་རིམས་ནད་སྔོན་འགོག་དང་ཚོད་འཛིན་གྱི་འགན་འཁྲི་མཐའ་གཅིག་ཏུ་འཁུར་ནས་ས་ཁོངས་ཀྱི་འགན་འཁྲི་དང་། སྡེ་ཚན་གྱི་འགན་འཁྲི། ཚན་པའི་འགན་འཁྲི། མི་སྒེར་གྱི་འགན་འཁྲི་བཅས་དམ་ནན་དུ་གཏོང་དགོས་པ་དང་། གདིང་གཞི་གསལ་རྟོགས་དང་བསམ་ཕྱོགས་གསལ་འབྱེད་ཀྱིས་རང་ངོས་ཀྱི་དགོས་མཁོ་དང་མཐུན་པའི་ཉིང་སྐྱུར་བརྟག་དཔྱད་ཇུས་གཞི་འགོད་དགོས་ཤིང་། ཚན་རིག་དང་མཐུན་པའི་སྒོ་ནས་བརྟག་དཔྱད་ས་ཚིགས་བཀོད་སྒྲིག་བྱེད་པ་དང་། དཔེ་ལེན་དང་། སྐྱེལ་སྤྲོད། བརྟག་དཔྱད། སྙན་སེང་བཅས་ཀྱི་ལྷུ་ཚིགས་ཧྲིལ་པོའི་བརྒྱུད་རིམ་ལེགས་སུ་གཏོང་བ། གནས་རྒྱུད་ཁྱོན་གསུམ་ཟུང་འབྲེལ་གྱིས་ཉིང་སྐྱུར་བརྟག་དཔྱད་ཀྱི་ནུས་པ་ཕྱོགས་ཡོངས་ནས་ཆེ་རུ་གཏོང་བ་བཅས་བྱས་ཏེ། མྱུར་ཚད་མགྱོགས་ཤོས་དང་ལས་ཕྱོད་ཆེ་ཤོས་ཀྱི་སྒོ་ནས་ཉིང་སྐྱུར་བརྟག་དཔྱད་བྱས་འབྲས་ཆུ་ཚོད་24ཡི་ནང་ཐོན་པ་བྱེད་དགོས། འགན་འཁྲི་ནན་དུ་བཏང་སྟེ་རིམས་ནད་སྔོན་འགོག་དང་ཚོད་འཛིན་གྱི་ས་ཁོངས་ཀྱི་འགན་འཁྲི་མཐའ་གཅིག་ཏུ་འཁུར་དགོས་ཤིང་། ཚེ་སྲོག་རིན་ཆེན་གསེར་ལས་ལྷག ནད་ཡམས་ནི་བཀའ་རྒྱ་དང་འགོག་ཟོན་བྱ་རྒྱུ་ནི་འགན་འཁྲི་ཡིན་པ་མཐའ་འཁྱོངས་བྱེད་པ་དང་། ཉིང་སྐྱུར་བརྟག་དཔྱད་སྒྲིག་གཞིའི་ཆ་བགོས་འགན་ལེན་ལམ་སྲོལ་ཕྱོགས་ཡོངས་ནས་དོན་འཁྱོལ་བྱེད་པ། ཉིང་སྐྱུར་བརྟག་དཔྱད་སྒྲིག་གཞི་བར་མཚམས་མི་འཇོག་པའི་ལས་ཀའི་ལམ་སྲོལ་ལག་བསྟར་བཅས་བྱས་ནས། ཉིང་སྐྱུར་བརྟག་དཔྱད་ཀྱི་མྱུར་ཚད་མགྱོགས་སུ་དང་ལས་ཕྱོད་ཆེ་རུ་ཕྱོགས་ཡོངས་ནས་གཏོང་དགོས། སྒྲིག་ཁྲིམས་ནན་དུ་བཏང་སྟེ་ཉིང་སྐྱུར་བརྟག་དཔྱད་ཀྱི་བརྒྱུད་རིམ་ཧྲིལ་པོར་ལྟ་སྐུལ་ཞིབ་བཤེར་བྱེད་ཤུགས་ཆེ་རུ་གཏོང་དགོས་ཤིང་། ལས་སྒྲུབ་ནུས་པ་ཆུང་བ་དང་། ལས་ཀར་གོ་རིམ་མེད་པ། འཕེལ་རིམ་འགོར་བ་བཅས་ཀྱིས་རྐྱེན་པས་རིམས་ནད་ཚོད་འཛིན་མི་ཐུབ་པ་དང་མཇུག་འབྲས་ཚབས་ཆེན་བྱུང་བའི་རིགས་ལ་འགན་འཁྲི་བདའ་འདེད་ནན་པོ་གཏོང་དགོས་པ་དང་ཁྲིམས་ལུགས་དང་སྒྲིག་ཁྲིམས་ལྟར་ཆད་པ་ནན་པོ་གཅོད་དགོས། གྲོང་ཁྱེར་དང་ས་གནས་ཁག་གིས་རང་ངོས་ཀྱི་རིམས་ནད་སྔོན་འགོག་དང་ཚོད་འཛིན་གྱི་དགོས་མཁོ་ལྟར་ཁ་གཏད་རོགས་སྐྱོར་ཞིང་ཆེན་དང་འབྲེལ་མཐུད་བྱས་པར་ཤུགས་སྣོན་བརྒྱབ་སྟེ། ཁ་གཏད་རོགས་སྐྱོར་ཞིང་ཆེན་གྱི་རྒྱབ་སྐྱོར་ཤུགས་ཆེན་ཐོབ་ཐབས་བྱེད་པ་དང་། ཉིང་སྐྱུར་བརྟག་དཔྱད་ཀྱི་སྟོབས་ཤུགས་ཆེ་རུ་གཏོང་བ། ཉིང་སྐྱུར་བརྟག་དཔྱད་ཀྱི་ལས་ཕྱོད་ཆེ་རུ་གཏོང་བ་བཅས་བྱས་ནས། རིམས་ནད་སྔོན་འགོག་དང་ཚོད་འཛིན་ལས་དོན་ལ་བདེ་བླག་ངང་སྐུལ་འདེད་གཏོང་ཐུབ་པའི་འགན་ལེན་བྱེད་དགོས་ཞེས་ནན་བཤད་གནང་བ་རེད།