◆ སྔ་ཙམ་ཤེས་རྟོགས་དང་། སྔ་ཙམ་སྙན་སེང་། སྔ་ཙམ་ལོགས་འཇོག སྔ་ཙམ་སྨན་བཅོས་བཅས་བྱས་ཏེ་འདུ་འཛོམས་སྔོན་འགོག་དང་། དོ་དམ་མེད་པ་སྔོན་འགོག ཕན་ཚུན་མི་འགོ་བ་སྔོན་འགོག ཁྱབ་མཆེད་སྔོན་འགོག་བཅས་བྱས་ནས་དེ་བས་འཕྲལ་ཐག་ཆོད་པོའི་བྱ་ཐབས་སྤྱད་དེ་ཁྱབ་མཆེད་ཀྱི་འབྲེལ་ཐག་གང་མགྱོགས་གཅོད་དགོས།

ཚེས་12ཉིན་དང་ཚེས་13ཉིན་གྱི་དགོང་མོ་རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་ལྗོངས་ཡོངས་ཀྱི་ཏོག་གསར་གློ་ཚད་རིམས་ནད་ལ་ཁ་གཏད་གཅོག་པའི་ལས་དོན་འགོ་ཁྲིད་ཚོགས་ཆུང་གི་ཙུའུ་ཀྲང་ཝང་ཅུན་ཀྲེང་གིས་ལྗོངས་ཡོངས་དང་། ས་ཁུལ་ཁག་དང་གྲོང་ཁྱེར་ཁག ཁོངས་གཏོགས་ཁག་བཅས་ཀྱི་རིམས་ནད་སྔོན་འགོག་དང་ཚོད་འཛིན་ལས་དོན་གྱི་གནས་ཚུལ་བཀོད་གཏོང་གནང་ནས་རིམས་ནད་སྔོན་འགོག་དང་ཚོད་འཛིན་གྱི་དུས་བབ་ལ་སྔར་བས་དབྱེ་ཞིབ་དང་མིག་སྔའི་རིམས་ནད་སྔོན་འགོག་དང་ཚོད་འཛིན་གྱི་གཙོ་གནད་ལས་དོན་བཀོད་སྒྲིག་གནང་བ་རེད། རིམས་ནད་སྔོན་འགོག་དང་ཚོད་འཛིན་ལས་དོན་སྐོར་གྱི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཛུབ་སྟོན་གལ་ཆེན་གྱི་དགོངས་དོན་སློབ་སྦྱོང་ལག་བསྟར་གཏིང་ཟབ་བྱས་ཏེ་རིམས་ནད་སྔོན་འགོག་དང་ཚོད་འཛིན་ལས་དོན་སྐོར་གྱི་ཏང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་གི་ཐབས་ཇུས་བཀོད་སྒྲིག་དོན་འཁྱོལ་མཐའ་གཅིག་ཏུ་བྱེད་དགོས་པ་དང་། རིམས་ནད་སྔོན་འགོག་དང་ཚོད་འཛིན་གྱི་ཆབ་སྲིད་འགན་འཁྲི་མཐའ་གཅིག་ཏུ་འཁུར་བ། སྔ་ཙམ་ཤེས་རྟོགས་དང་། སྔ་ཙམ་སྙན་སེང་། སྔ་ཙམ་ལོགས་འཇོག་། སྔ་ཙམ་སྨན་བཅོས་བཅས་བྱེད་པ། འདུ་འཛོམས་སྔོན་འགོག་དང་། དོ་དམ་མེད་པ་སྔོན་འགོག ཕན་ཚུན་མི་འགོ་བ་སྔོན་འགོག ཁྱབ་མཆེད་སྔོན་འགོག་བཅས་མཐའ་གཅིག་ཏུ་བྱེད་དགོས་པ། གཅིག་སྡུད་འགག་སྒྲོལ་དང་ཕྱར་བ་གྲུ་འདེགས་བྱེད་དགོས་པ། དམིགས་བསལ་གྱི་བྱ་ཐབས་ལ་བརྟེན་ནས་དམིགས་བསལ་གྱི་གནད་དོན་ལ་ཁ་གཏད་གཅོག་པ། ནར་འགྱངས་ཡུད་ཙམ་ཡང་མེད་པའི་སྒོ་ནས་བྱ་ཐབས་ཁག་དམ་འཛིན་ཞིབ་ཚགས་དང་དམ་འཛིན་ལྷོད་མེད་བྱེད་དགོས་པ། དེ་བས་འཕྲལ་ཐག་ཆོད་པའི་བྱ་ཐབས་ལ་བརྟེན་ནས་ཁྱབ་མཆེད་ཀྱི་འབྲེལ་ཐག་མགྱོགས་མྱུར་གཅོད་པ་བཅས་བྱས་ཏེ་མྱུར་ཚད་མགྱོགས་ཤོས་དང་། དུས་ཚོད་ཐུང་ཤོས། རིན་དོད་ཆུང་ཤོས་བཅས་ལ་བརྟེན་ནས་རིམས་ནད་སྔོན་འགོག་དང་ཚོད་འཛིན་གྱི་འགོག་རྒོལ་དམག་འཐབ་དེར་རྒྱལ་ཁ་ལེན་དགོས་ཞེས་ནན་བཤད་གནང་བ་རེད།

རྒྱལ་སྲིད་སྤྱི་ཁྱབ་ཁང་མཉམ་དུ་སྔོན་འགོག་དང་ཚོད་འཛིན་ལམ་སྲོལ་ཕྱོགས་བསྡུས་ཚོགས་ཆུང་གི་བོད་ཀྱི་ལས་དོན་ཚོགས་ཆུང་གི་ཙུའུ་ཀྲང་རྒྱལ་ཁབ་འཕྲོད་བསྟེན་བདེ་ཐང་ཨུ་ལྷན་གྱི་ཀྲུའུ་རེན་གཞོན་པ་ཡུས་ཞུའེ་ཅུན་ཚོགས་འདུར་མཛུབ་ཁྲིད་གནང་བར་ཕེབས་ཡོད་པ་རེད།

ཝང་ཅུན་ཀྲེང་གིས་གསུངས་དོན། བོད་དུ་གཞི་ཁྱོན་ཆེ་བའི་ཏོག་གསར་གློ་ཚད་རིམས་ནད་ཐོག་མར་ཐོན་པ་དང་རིམས་ནད་སྔོན་འགོག་དང་ཚོད་འཛིན་གྱི་ལས་དོན་ལ་ཚོད་བགམ་ནན་པོ་འཕྲད་ཡོད། བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གིས་བོད་ཀྱི་རིམས་ནད་སྔོན་འགོག་དང་ཚོད་འཛིན་ལས་དོན་ལ་ཚད་མཐོའི་མཐོང་ཆེན་གནང་བས་ང་ཚོས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཛུབ་སྟོན་གལ་ཆེན་གྱི་དགོངས་དོན་ལག་བསྟར་དོན་འཁྱོལ་གཏིང་ཟབ་བྱས་ཏེ་རྒྱལ་སྲིད་སྤྱི་ཁྱབ་ཁང་མཉམ་དུ་སྔོན་འགོག་དང་ཚོད་འཛིན་ལམ་སྲོལ་གྱི་ཐབས་ཇུས་བཀོད་སྒྲིག་ཕྱོགས་ཡོངས་ནས་དོན་འཁྱོལ་བྱེད་པ་དང་། མི་དམངས་གོང་དུ་བཀུར་བ་དང་ཚེ་སྲོག་གོང་དུ་བཀུར་རྒྱུ་མཐའ་འཁྱོངས་བྱེད་པ། སྟོབས་ཤུགས་མཐའ་དག་གཅིག་སྡུད་བྱེད་པ། ནུས་ཤུགས་ཡོད་རྒུས་ནད་དུག་མ་མཆེད་སྔོན་འགོག་དང་། ནུས་ཤུགས་ཡོད་རྒུས་ནད་པ་སྐྱོབ་བཅོས། ནུས་ཤུགས་ཡོད་རྒུས་མང་ཚོགས་ཀྱི་གཞི་རྩའི་འཚོ་བ་འགན་ལེན་བཅས་བྱེད་པ། མི་དམངས་མང་ཚོགས་ལ་མཐུན་སྒྲིལ་དང་སྣེ་ཁྲིད་བྱེད་པ་དང་མི་དམངས་མང་ཚོགས་ལ་དམ་པོར་བརྟེན་པ། དམངས་སེམས་གཅིག་མཐུན་གྱིས་རིམས་ནད་ལ་འགོག་རྒོལ་བྱེད་པའི་མཉམ་ཤུགས་ཆེན་པོ་གཅིག་ཏུ་སྒྲིལ་བ་བཅས་བྱས་ཏེ་མི་དམངས་ཀྱི་ཚེ་སྲོག་བདེ་འཇགས་དང་གཟུགས་གཞི་བདེ་ཐང་ལ་སྲུང་སྐྱོང་མཐའ་གཅིག་ཏུ་བྱེད་དགོས།

ཝང་ཅུན་ཀྲེང་གིས་ནན་བཤད་གནང་དོན། རིམ་པ་ཁག་དང་སྡེ་ཚན་ཁག་དང་རྒྱ་ཆེའི་ཏང་ཡོན་དང་ལས་བྱེད་པས་བསམ་བློའི་ངོས་འཛིན་མཐོ་རུ་ཏན་ཏིག་བཏང་ནས་རིམས་ནད་སྔོན་འགོག་དང་ཚོད་འཛིན་ལས་དོན་གྱི་ཧ་ཅང་གལ་ཆེའི་རང་བཞིན་ལ་ངེས་པར་དུ་རིག་པ་དྭངས་གསལ་གྱིས་ངོས་འཛིན་བྱས་ཏེ་རིམས་ནད་སྔོན་འགོག་དང་ཚོད་འཛིན་དེ་ཉིད་ལྗོངས་ཡོངས་ཀྱི་མིག་སྔའི་དོན་ཆེན་ཨང་དང་པོ་དང་ལས་དོན་གལ་ཆེ་ཤོས་ལ་བརྩི་བ་དང་མི་དམངས་མང་ཚོགས་ཀྱི་བདེ་སྡུག་ལ་སེམས་ཁུར་བྱས་ཏེ་རིམས་ནད་སྔོན་འགོག་དང་ཚོད་འཛིན་གྱི་མི་དམངས་དམག་འཁྲུག་ལ་རྒྱལ་ཁ་མཐའ་གཅིག་ཏུ་ལེན་དགོས་པ་དང་། ངེས་པར་དུ་རིམས་ནད་སྔོན་འགོག་དང་ཚོད་འཛིན་གྱི་དངོས་ཡོད་ཀྱི་དགོས་གལ་ཆེ་བའི་རང་བཞིན་ལ་ངོས་འཛིན་གསལ་པོ་བྱས་ནས་བྱ་སྤྱོད་མགྱོགས་མྱུར་སྤེལ་བ་དང་། དུས་ཚོད་སྐར་ཆ་ཙམ་ཡང་བརྩོན་ལེན། ནད་དུག་དང་འཐབ་རྩོད་དང་རིམས་ནད་དང་འཐབ་རྩོད། གནས་ཚུལ་ཛ་དྲག་ཤོས་ལ་དཔགས་ནས་ཚོད་སྐོར་བྱེད་པ་དང་ཡག་ཤོས་ཀྱི་ཕྱོགས་སུ་འབད་བརྩོན་བྱེད་པ། རིམས་ནད་སྐབས་བསྟུན་གཙང་བཟོ་གང་མགྱོགས་ཐུབ་པའི་བརྩོན་ལེན་བཅས་བྱས་ཏེ་རིམས་ནད་སྔོན་འགོག་དང་ཚོད་འཛིན་གྱི་སྤྱིའི་དམག་འཐབ་ལ་རྒྱལ་ཁ་མཐའ་གཅིག་ཏུ་ལེན་དགོས་པ། ངེས་པར་དུ་སྔོན་འགོག་དང་ཚོད་འཛིན་གྱི་དུས་བབ་ཛ་དྲག་དང་རྙོག་འཛིང་རང་བཞིན་ལ་ངོས་འཛིན་གསལ་པོ་བྱས་ཏེ་དུས་བབ་ལ་ཚོད་སྐོར་བྱེད་ཚད་དེ་བས་ཛ་དྲག་པ་དང་དཀའ་ངལ་དང་གནད་དོན་ལ་བསམ་གཞིག་དེ་བས་གང་ལེགས་བྱེད་པ་དང་། ཕྱོགས་ཡོངས་ནས་དམག་རྒྱག་གི་གྲ་སྒྲིག་བྱེད་པ། ཡིད་ཆེས་བརྟན་པོ། ཕྱར་བ་གྲུ་འདེགས། ཚན་རིག་དང་མཐུན་པའི་འགོག་བཅོས། གནད་སྨིན་ཇུས་འདོན་བཅས་ཀྱི་བླང་བྱ་ཕྱོགས་ཡོངས་ནས་དོན་འཁྱོལ་བྱེད་པ། བློ་ཐག་ཆོད་པ་དང་ཕན་ནུས་ཆེ་བའི་བྱེད་ཐབས་སྤྱོད་པ་བཅས་ལ་བརྟེན་ནས་རིམས་ནད་སྔོན་འགོག་དང་ཚོད་འཛིན་གྱི་འགོག་རྒོལ་དམག་འཐབ་འདིར་རྒྱལ་ཁ་མཐའ་གཅིག་ཏུ་ལེན་དགོས།

ཝང་ཅུན་ཀྲེང་གིས་ནན་བཤད་གནང་དོན། རིམས་ནད་སྔོན་འགོག་དང་ཚོད་འཛིན་གྱི་འགོག་རྒོལ་དམག་འཐབ་ལ་རྒྱལ་ཁ་ལེན་པའི་འགག་རྩ་ནི་དོན་འཁྱོལ་ལ་དམ་འཛིན་བྱེད་པར་ཐུག་ཡོད། ངེས་པར་དུ་རིམས་འགོག་གི་གཙོ་གནད་མངོན་གསལ་དོད་པོ་ཡོང་བར་བྱེད་པ་དང་ལས་དོན་ཁག་ལ་སྤྱི་འདོམས་སྐུལ་འདེད་གཏོང་དགོས། གཙོ་གནད་ས་ཁོངས་ལ་དམ་པོར་དམིགས་པ་དང་། ས་ཁུལ་དང་གྲོང་ཁྱེར་ཁག་གི་སྔོན་འགོག་དང་ཚོད་འཛིན་གྱི་གཙོ་གནད་ཁུལ་དང་རྫོང་ལ་དམ་པོར་དམིགས་པ། སྨན་ཁང་དང་། སློབ་གྲྭ དགོན་སྡེ། རྒན་གསོ་ཁང་། ཕན་བདེ་ཁང་། བཙོན་ཁང་སོགས་འདུ་འཛོམས་ཆེ་སར་དམ་པོར་དམིགས་པ། སྟོབས་ཤུགས་བསྡུ་སྒྲིལ་དང་རིམ་པ་སྤོར་བའི་བཀོད་འདོམས་བཅས་བྱས་ཏེ་འགོ་ཁྲིད་ལས་བྱེད་པས་གཙོ་གནད་ས་ཁོངས་དང་། གཙོ་གནད་ཁྱབ་ཁོངས། གཙོ་གནད་ལས་རིགས་བཅས་ཀྱི་རིམས་ནད་སྔོན་འགོག་དང་ཚོད་འཛིན་ལས་དོན་ལ་སྐུལ་འདེད་གཏོང་བ། ནད་ཡམས་རིག་པའི་བརྟག་དཔྱད་ཁུངས་འདེད་དང་། ཉིང་སྐྱུར་བརྟག་དཔྱད། ལོགས་འཇོག་དོ་དམ་ཚོད་འཛིན། ནད་པ་སྒྱུར་སྐྱེལ། སྨན་བཅོས་སྐྱོབ་བཅོས་སོགས་ཀྱི་གཙོ་གནད་ལྷུ་ཚིགས་ལ་དམ་པོར་དམིགས་པ། ཉིང་སྐྱུར་བརྟག་དཔྱད་སྒྲིག་འཛུགས་ཞིབ་ཚགས་བྱེད་པ། མ་དཔེ་ལེན་པ་དང་། སྐྱེལ་བ། བརྟག་དཔྱད། སྙན་ཞུ། སྒྱུར་སྐྱེལ། བསྡུ་ལེན་སོགས་ལྷུ་ཚིགས་ཡོངས་ཀྱི་བརྒྱུད་རིམ་ལེགས་སུ་བཏང་སྟེ་གཏན་འབེབས་ཀྱི་དུས་ཚོད་ནང་ལས་དོན་མི་སྣ་ཡོངས་དབྱེ་བཤེར་ལེགས་སྒྲུབ་ཐུབ་པའི་འགན་ལེན་བྱས་ཐོག་རིམས་ནད་ཀྱི་གཞི་གྲངས་སྔར་བས་མཐིལ་རྟོགས་ཐུབ་པ་དང་། གྲངས་གཞི་འཚོལ་བསྡུ་དང་། བརྒྱུད་གཏོང་། དབྱེ་ཞིབ་སོགས་ཀྱི་ནུས་པ་ཆེ་རུ་དང་ཆུ་ཚད་མཐོ་རུ་བཏང་སྟེ་གནད་སྨིན་དབྱེ་ཞིབ་དང་། ཚན་རིག་དང་མཐུན་པའི་ཞིབ་དཔྱོད། ཕན་འབྲས་ཆེ་བའི་ཐག་གཅོད་བཅས་ལ་སྐུལ་འདེད་གཏོང་དགོས་པ། ནད་ཡམས་རིག་པའི་བརྟག་དཔྱད་ཁུངས་འདེད་བྱེད་ཤུགས་ཆེ་རུ་བཏང་ནས་སྤྱི་བདེ་དང་། སྤྱི་པའི་འཕྲོད་བསྟེན། བཟོ་འཕྲིན་བཅས་ཀྱི་མཐུན་སྦྱོར་ནུས་པ་འདོན་སྤེལ་གང་ལེགས་བྱས་ཏེ་དུས་ཚོད་ཐུང་ཤོས་ནང་ཉེན་ཁ་ཡོད་ས་ཚང་མ་འཚོལ་ཐུབ་པ་དང་ཚོད་འཛིན་ཐུབ་པའི་བརྩོན་ལེན་བྱེད་དགོས། གཅིག་སྡུད་ལོགས་དབྱེའི་ས་ཚིགས་ཁག་གཅིག་གང་མགྱོགས་བསྐྲུན་ནས་ཐད་འབྲེལ་དང་གདགས་གཤིས་ཡིན་པའི་ནད་པ་ལོགས་འཇོག་བྱེད་དགོས་རིགས་ལོགས་འཇོག་བྱེད་པ་དང་། ཉར་དགོས་རིགས་ཉར་བ། ཉིན་རེར་གཙང་བཟོ་དང་ཐག་གཅོད་བཅས་ཐུབ་པའི་འགན་ལེན་བྱེད་དགོས། “ནད་པ་གཅིག་སྡུད་དང་། རིགས་གཅིག་མཁས་ཅན་གཅིག་སྡུད། ཐོན་ཁུངས་གཅིག་སྡུད། སྐྱོབ་བཅོས་གཅིག་སྡུད”བཅས་ཀྱི་སྐྱོབ་བཅོས་ཀྱི་རྩ་དོན་གཞིར་བཟུང་ནུས་ཤུགས་ཡོད་རྒུས་ནད་པ་སྐྱོབ་བཅོས་བྱས་ཏེ་ནད་པ་སྔ་ཙམ་དྲག་སྐྱེད་ཡོང་བའི་འགན་ལེན་བྱེད་དགོས།

ངེས་པར་དུ་རིམས་ནད་སྔོན་འགོག་དང་ཚོད་འཛིན་གྱི་གཅིག་གྱུར་འགོ་ཁྲིད་ལ་ཤུགས་སྣོན་བརྒྱབ་ནས་རིམ་ཉུང་དོ་དམ་གྱི་བཀོད་འདོམས་མ་ལག་འཐུས་སྒོ་ཚང་དུ་གཏོང་དགོས། “བསམ་ཇུས་གཅིག”གི་བསམ་བློ་བརྟན་པོ་བཙུགས་ནས་གཅིག་གྱུར་འགོ་ཁྲིད་དང་། གཅིག་གྱུར་བཀོད་འདོམས། གཅིག་གྱུར་བཀོད་གཏོང་། གཅིག་གྱུར་བྱ་སྤྱོད་བཅས་ལ་ཤུགས་སྣོན་རྒྱག་དགོས། ས་ཁུལ་དང་གྲོང་ཁྱེར་ཁག་གིས་བྱ་སྤྱོད་མྱུར་པོ་དང་། དོ་དམ་ནན་པོ། བྱ་ཐབས་ཏན་ཏིག་བཅས་ལ་ཤུགས་བརྒྱབ་ནས་མགྱོགས་མྱུར་དང་གནད་སྨིན་ངང་བཀོད་འདོམས་བཀོད་གཏོང་བྱས་ཏེ་ནར་འགྱངས་ཡུད་ཙམ་ཡང་བྱེད་མི་རུང་བར་མྱུར་དུ་བྱ་སྤྱོད་སྤེལ་ནས་ཚོད་འཛིན་ནན་པོ་བྱེད་དགོས། གནད་དོན་ཕྱོགས་སྟོན་དུ་འཛིན་རྒྱུ་མཐའ་འཁྱོངས་ཀྱིས་རིམས་ནད་ཀྱི་གནས་ཚུལ་ལ་དོ་ཁུར་ཆེན་པོ་བྱས་ཏེ་གནས་ཚུལ་གསར་པར་ཞིབ་འཇུག་དང་གནད་དོན་གསར་པ་ཐག་གཅོད་བྱེད་པ་དང་། ཉེན་ཁའི་མངོན་མེད་རྐྱེན་ངན་ཕྱོགས་ཡོངས་ནས་གྲལ་བཤེར་དང་གསེད་དཀྲོལ་བྱེད་པ། ཞན་ཆ་སེལ་བ་དང་། སྐྱོན་ཆ་གསབ་པ། ཆད་སྐྱོན་སེལ་བ། ཞན་ཆ་ལེགས་གཏོང་བཅས་བྱས་ཏེ་རིམས་ནད་སྔོན་འགོག་དང་ཚོད་འཛིན་གྱི་དྲ་བ་དམ་དུ་ཏན་ཏིག་གཏོང་དགོས།

ངེས་པར་དུ་མཉམ་དུ་སྔོན་འགོག་དང་ཚོད་འཛིན་གྱི་ལེགས་ཆ་འདོན་སྤེལ་བྱས་ནས་རིམས་ནད་སྔོན་འགོག་དང་ཚོད་འཛིན་གྱི་སྲུང་ཡོལ་བརྟན་པོ་བསྐྲུན་དགོས། རིམས་ནད་སྔོན་འགོག་དང་ཚོད་འཛིན་གྱི་ཁོངས་གཏོགས་ཁུལ་དང་། ཚན་པ། མི་སྒེར་བཅས“ཕྱོགས་བཞིའི་འགན་འཁྲི”ནན་དུ་བཏང་ནས་མངའ་ཁོངས་སྲུང་བའི་འགན་འཁྲི་ཡོད་པ་དང་། མངའ་ཁོངས་སྲུང་བའི་འགན་འཁྲི་འཁུར་བ། མངའ་ཁོངས་སྲུང་བའི་འགན་འཁྲི་གཙང་སྒྲུབ་བཅས་བྱས་ནས་མཉམ་དུ་སྔོན་འགོག་དང་ཚོད་འཛིན་གྱི་མཉམ་ཤུགས་ཆེན་པོ་ཞིག་ཆགས་པར་བྱས་ཏེ་རིམས་ནད་ཞིང་འབྲོག་ཁུལ་དུ་མ་མཆེད་པ་དང་ཉེ་འཁོར་དུ་མ་མཆེད་པ་བྱེད་དགོས། ཏང་སྲིད་དམག་ཉེན་དམངས་བཅས་ཚང་མ་གཡུལ་སར་བསྐྱོད་དེ་རྒྱ་ཆེའི་མི་དམངས་མང་ཚོགས་སྐུལ་སློང་དང་། སྒྲིག་འཛུགས། གཅིག་སྡུད་བཅས་བྱས་ནས་དྲ་མིག་ཅན་གྱི་དོ་དམ་གྱི་ཉམས་མྱོང་བཟང་པོ་དང་བྱ་ཐབས་བཟང་པོ་ཏན་ཏིག་སྤྱོད་པ་དང་། རིམས་ནད་སྔོན་འགོག་གི་འགོག་སྲུང་འཛིང་རགས་བརྟན་པོ་མཐའ་གཅིག་ཏུ་སྐྲུན་པ། དྲ་བ་དང་། དྲ་མིག ཁྱིམ་ཚང་བཅས་སུ་ཞུགས་ཐུབ་པ་བྱས་ནས་མཉམ་འགོག་མཉམ་བཅོས་ཀྱི་ཁུག་ཆ་མི་ལུས་པ་དང་ཁྱོན་ཡོངས་ལ་མཉམ་དུ་སྔོན་འགོག་དང་ཚོད་འཛིན་ཁྱབ་པར་བྱས་ནས་གོང་འོག་སེམས་པ་གཅིག་མཐུན་དང་དུས་ངལ་མཉམ་སེལ་ཐུབ་པའི་འགན་ལེན་བྱེད་དགོས།

ངེས་པར་དུ་སྤྱོད་ཚུལ་ལེགས་གཏོང་དང་དོན་འཁྱོལ་ལ་དམ་འཛིན་ནན་པོ་བྱས་ཏེ་ལས་ཀའི་ཕན་འབྲས་བཟང་པོར་བརྟེན་ནས་ལས་ཀའི་བྱེད་ཐབས་ལ་ཞིབ་བཤེར་བྱེད་དགོས། རིམས་ནད་ནི་བཀའ་རྒྱ་ཡིན་པས་ཏང་ཡོན་ལས་བྱེད་པས་རིམས་ནད་སྔོན་འགོག་དང་ཚོད་འཛིན་གྱི་འཐབ་ས་དང་པོར་འབད་འཐབ་བྱེད་པ་དང་། སྟོབས་ཤུགས་གཙོ་བོ་རིམས་ནད་ཐོན་སའི་སྔོན་འགོག་དང་ཚོད་འཛིན་གྱི་གཞི་རིམ་གྱི་འཐབ་ས་དང་པོར་གཏོང་བ། རིམས་ནད་སྔོན་འགོག་དང་ཚོད་འཛིན་གྱི་འཐབ་ས་དང་པོར་ཏང་དར་ལྷབ་ལྷུབ་ཏུ་གཡོ་བ་བཅས་བྱེད་དགོས། སྤྱོད་ཚུལ་ལ་ཞིབ་བཤེར་དང་། ཐོག་མའི་བསམ་འདུན་འདྲི་བ། འགན་འཁྲིར་ཞིབ་བཤེར། འགན་འཁྲི་རྩད་གཅོད། སྐྱོན་ཆ་འཚོལ་ཞིབ། ཞན་ཆ་རྩད་གཅོད། དོན་འཁྱོལ་ལ་ཞིབ་བཤེར། ཕན་འབྲས་འདྲི་རྩད་བཅས་བྱས་ནས་བྱ་སྤྱོད་མགྱོགས་ཤོས་དང་། བྱེད་ཐབས་ནན་ཤོས། སྤྱོད་ཚུལ་ལེགས་ཤོས་བཅས་ཀྱི་སྒོ་ནས་ལྷུ་ཚིགས་ཁག་ལ་ཕན་འབྲས་ཆེན་པོ་ཐོན་པ་དང་བཀོད་སྒྲིག་ཁག་དོན་འཁྱོལ་ཐུབ་ནས་ནུས་པ་ཐོན་པའི་འགན་ལེན་བྱས་ཏེ་ལས་དོན་དངོས་ཀྱི་ཕན་འབྲས་ལ་བརྟེན་ནས་འགོ་ཁྲིད་ལས་བྱེད་པའི་འཇོན་ཐང་དང་ཆུ་ཚད་ལ་ཞིབ་བཤེར་བྱེད་དགོས། བྱ་དགའ་དང་ཆད་གཅོད་ནན་པོ་བྱས་ནས་རིམས་ནད་སྔོན་འགོག་དང་ཚོད་འཛིན་གྱི་འཐབ་ཕྱོགས་དང་པོར་སྤྱོད་ཚུལ་མངོན་གསལ་དོད་པོའི་ཕུལ་བྱུང་ལས་བྱེད་པར་བློ་ཁོག་ཆེན་པོས་གནས་སྤོར་བཀོལ་སྤྱོད་བྱེད་པ་དང་། རིམས་ནད་སྔོན་འགོག་དང་ཚོད་འཛིན་ལས་དོན་ཁྲོད་འགན་འཁྲི་ཡག་པོ་མི་སྒྲུབ་པའི་ལས་བྱེད་པ་དུས་ཐོག་ཏུ་ལེགས་སྒྲིག་བྱེད་པ། འགན་འཛོལ་ཤོར་བའི་ལས་བྱེད་པར་འགན་འཁྲི་བདའ་འདེད་ནན་པོ་གཏོང་བ་བཅས་བྱེད་དགོས།

ཡུས་ཞུའེ་ཅུན་གྱིས་གསུངས་དོན། བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གིས་བོད་ཀྱི་རིམས་ནད་སྔོན་འགོག་དང་ཚོད་འཛིན་གྱི་ལས་དོན་ལ་ཚད་མཐོའི་མཐོང་ཆེན་གནང་གི་ཡོད། བོད་རང་སྐྱོང་ལྗོངས་ཏང་ཨུད་ཀྱིས་ལྗོངས་ཡོངས་ཀྱི་མི་རིགས་ཁག་གི་ལས་བྱེད་པ་དང་མང་ཚོགས་ཀྱི་སྣེ་ཁྲིད་དེ་ཏང་ཀྲུང་དབྱང་གི་ཐབས་ཇུས་བཀོད་སྒྲིག་ལག་བསྟར་དོན་འཁྱོལ་མཐའ་གཅིག་ཏུ་བྱས་ནས་མཉམ་དུ་སྔོན་འགོག་དང་ཚོད་འཛིན་གྱི་བཀོད་པ་ཆེན་པོ་ཞིག་ཆགས་པར་བྱས་ནས་ཡིད་ཆེས་བརྟན་གཏོང་དང་སེམས་ནུས་གཅིག་སྒྲིལ་གྱིས་རིམས་ནད་སྔོན་འགོག་དང་ཚོད་འཛིན་གྱི་དམག་འཐབ་ཆེན་པོ་དེར་རྒྱལ་ཁ་ལེན་ཐུབ་པར་བྱེད་དགོས། བསམ་བློའི་ཐད་ཚད་མཐོའི་མཐོང་ཆེན་བྱས་ཏེ་པར་གཞི་དགུ་པའི་རིམས་ནད་སྔོན་འགོག་དང་ཚོད་འཛིན་གྱི་བླང་བྱ་གཞིར་བཟུང་འགལ་བ་གཙོ་བོ་དང་འགག་རྩའི་ལྷུ་ཚིགས་ལ་དམ་འཛིན་བྱས་ནས་རིམས་ནད་སྔོན་འགོག་དང་ཚོད་འཛིན་གྱི་བྱ་ཐབས་ཁག་དོན་འཁྱོལ་བྱ་རྒྱུ་ནར་འགྱངས་གཏན་ནས་བྱེད་མི་རུང་། ཉིང་སྐྱུར་བརྟག་དཔྱད་བྱེད་ནུས་གང་མགྱོགས་ཆེ་རུ་གཏོང་བ་དང་། བརྒྱུད་རིམ་ལེགས་སུ་གཏོང་བ། སྤུས་ཚད་ཚོད་འཛིན་ནན་པོ་བཅས་བྱས་ནས་ཉེན་ཡོད་མི་ཚོགས་ཡོངས་ལ་ཉིན་རེར་ཞིབ་དཔྱད་ཐེངས་རེ་བྱས་ཏེ་དུད་ཚང་གཅིག་ཀྱང་མ་ལུས་པ་དང་མི་གཅིག་ཀྱང་མི་ཆད་པ་བྱས་ནས་རིམས་ནད་ཀྱི་གནས་ཚུལ་མཐིལ་རྟོགས་ཡོང་རྒྱུར་དམ་འཛིན་བྱེད་དགོས། “གདགས་གཤིས་ཁུངས་འདེད”ཀྱི་ཆེད་དོན་སྟོབས་ཤུགས་ཆེ་རུ་བཏང་སྟེ་དུས་ཚོད་ཐུང་ཤོས་ནང་གདགས་གཤིས་ཁུངས་འདེད་བྱེད་པའི་ལས་དོན་ལེགས་སྒྲུབ་བྱས་ནས་སྤྱི་ཚོགས་ཐོག་གི་ནད་དུག་འགོ་མཁན་ཚང་མ་གཙང་སེལ་ཐུབ་པར་འགན་ལེན་བྱེད་དགོས། སྤྱི་ཚོགས་ངོས་ཀྱི་དོ་དམ་ཚོད་འཛིན་ཚད་ལྡན་དུ་གཏོང་བ་དང་མི་ཚོགས་འདུ་ས་དང་གནས་གལ་ཆེན་ལ་དོ་དམ་ཚོད་འཛིན་བྱ་རྒྱུར་ཤུགས་སྣོན་བརྒྱབ་ནས་གཅིག་སྡུད་རང་བཞིན་གྱི་རིམས་ནད་མཐའ་གཅིག་ཏུ་མི་ཐོན་པ་བྱེད་དགོས། རང་སར་ལུས་པའི་འགྲུལ་པའི་ཞབས་ཞུ་འགན་ལེན་གྱི་ལས་དོན་ཡག་པོ་སྒྲུབ་པ་དང་བོད་ནས་ཕྱིར་ཐོན་པའི་སྔོན་འགོག་དང་ཚོད་འཛིན་བྱེད་ཐབས་དོན་འཁྱོལ་ནན་པོ་བྱས་ཏེ་རིམས་ནད་ཕྱིར་མ་མཆེད་ནན་འགོག་བྱེད་དགོས། ཞིང་ཆེན་སྒྲོལ་བའི་མཉམ་འགུལ་ལམ་སྲོལ་ལ་ཤུགས་སྣོན་རྒྱག་པ་དང་བོད་སྐྱོར་དང་ཉེ་འཁོར་ཞིང་ཆེན་དང་གྲོང་ཁྱེར་གྱི་རྒྱབ་སྐྱོར་ཤུགས་ཆེན་ཐོབ་རྒྱུའི་བརྩོན་ལེན་ཧུར་ཐག་བྱས་ཏེ་འཚོ་བ་དང་སྨན་བཅོས་སོགས་འགན་སྲུང་དངོས་ཟོག་དབོར་འདྲེན་གྱི“བགྲོད་ལམ་ཆེན་པོ”ཤར་བགྲོད་ཐུབ་པ་བྱས་ནས་ལས་དོན་ཁག་ཕྱོགས་ཡོངས་དང་། མགྱོགས་མྱུར། ནུས་ཆེ་བཅས་ཀྱི་སྒོ་ནས་འཁོར་སྐྱོད་ཏན་ཏིག་ཐུབ་པ་བྱས་ཏེ་སྤྱི་ཚོགས་ངོས་ཀྱི་ནད་དཔེ་གཙང་བཟོའི་དམིགས་ཚད་གང་མགྱོགས་མངོན་འགྱུར་ཐུབ་པ་བྱེད་དགོས།