ཚེས་12ཉིན་གྱི་དགོང་མོ་དང་ཚེས་13ཉིན་གྱི་དགོང་མོ། རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་ལྗོངས་ཡོངས་ཏོག་གསར་གློ་ཚད་རིམས་ནད་ལ་ཁ་གཏད་གཅོག་པའི་ལས་དོན་འགོ་ཁྲིད་ཚོགས་ཆུང་གི་ཙུའུ་ཀྲང་ཝང་ཅུན་ཀྲེང་གིས་ལྗོངས་ཡོངས་དང་། ས་གནས་དང་གྲོང་ཁྱེར་ཁག ཁོངས་གཏོགས་ཁག་བཅས་ཀྱི་རིམས་ནད་སྔོན་འགོག་དང་ཚོད་འཛིན་ལས་དོན་གྱི་གནས་ཚུལ་བཀོད་གཏོང་གནང་བ་དང་། རིམས་ནད་སྔོན་འགོག་དང་ཚོད་འཛིན་གྱི་དུས་བབ་ལ་སྔར་བས་དབྱེ་ཞིབ་དང་མིག་སྔའི་རིམས་ནད་སྔོན་འགོག་དང་ཚོད་འཛིན་གྱི་གཙོ་གནད་ལས་དོན་བཀོད་སྒྲིག་གནང་ཞིང་། ཁོང་གིས་ནན་བཤད་གནང་དོན། རིམས་ནད་སྔོན་འགོག་དང་ཚོད་འཛིན་གྱི་ཆབ་སྲིད་ཀྱི་འགན་འཁྲི་མཐའ་གཅིག་ཏུ་ཁུར་ནས། སྔ་ཙམ་ཤེས་རྟོགས་དང་། སྔ་ཙམ་སྙན་སེང་ཞུ་བ། སྔ་ཙམ་ལོགས་སུ་འཇོག་པ། སྔ་ཙམ་སྨན་བཅོས་བཅས་བྱེད་པ་དང་། འདུ་འཛོམས་བཀག་འགོག་དང་། དོ་དམ་བྱེད་ས་ནས་ཁ་བྲལ་རིགས་བཀག་འགོག ལས་དོན་སྣོལ་འཛིང་བཀག་འགོག ནད་དུག་མཆེད་རྒྱུ་བཀག་འགོག་བཅས་མཐའ་གཅིག་ཏུ་བྱེད་པ། གཅིག་སྡུད་འགག་སྒྲོལ་དང་ཕྱར་བ་གྲུ་འདེགས་ཀྱིས་དམིགས་བསལ་གྱི་བྱེད་ཐབས་ལ་བརྟེན་ནས་དམིགས་བསལ་གྱི་གནད་དོན་ལ་ཁ་གཏད་གཅོག་པ་དང་། ནར་འགྱངས་གཏན་ནས་མི་བྱེད་པར་བྱེད་ཐབས་ཁག་དམ་འཛིན་ཞིབ་ཚགས་བྱེད་པ། དེ་བས་བློ་ཐག་ཆོད་པའི་བྱེད་ཐབས་སྤྱད་དེ་རིམས་ནད་མཆེད་ལམ་མགྱོགས་མྱུར་བཀག་འགོག་བྱེད་པ། མྱུར་ཚད་མགྱོགས་ཤོས་དང་། དུས་ཚོད་ཐུང་ཤོས། རིན་དོད་ཆུང་ཤོས་བཅས་ཀྱི་ཐོག་ནས་རིམས་ནད་སྔོན་འགོག་དང་ཚོད་འཛིན་གྱི་འགོག་རྒོལ་དམག་འཐབ་འདིར་རྒྱལ་ཁ་ལེན་དགོས།
ཚོགས་ར།
རྒྱལ་སྲིད་སྤྱི་ཁྱབ་ཁང་མཉམ་འགོག་མཉམ་སྡོམ་ལམ་སྲོལ་ཕྱོགས་བསྡུས་ཚོགས་ཆུང་བོད་ལྗོངས་ལས་དོན་ཚོགས་ཆུང་གི་ཙུའུ་ཀྲང་རྒྱལ་ཁབ་འཕྲོད་བསྟེན་བདེ་ཐང་ཨུ་ལྷན་གྱི་ཀྲུའུ་རེན་གཞོན་པ་ཡུས་ཞུའེ་ཅུན་ཚོགས་འདུར་མཛུབ་ཁྲིད་གནང་བར་ཕེབས་པ་རེད།
ཝང་ཅུན་ཀྲེང་གིས་ནན་བཤད་གནང་དོན། རིམས་ནད་སྔོན་འགོག་དང་ཚོད་འཛིན་གྱི་འགོག་རྒོལ་དམག་འཐབ་ལ་རྒྱལ་ཁ་ལེན་པའི་འགག་རྩ་དེ་དོན་འཁྱོལ་ལ་དམ་འཛིན་བྱེད་པར་ཐུག་ཡོད། དེར་བརྟེན་ངེས་པར་དུ་རིམས་འགོག་གི་གཙོ་གནད་འབུར་དུ་ཐོན་པ་བྱས་ནས་ལས་དོན་ཁག་ལ་སྤྱི་འདོམས་སྐུལ་འདེད་གཏོང་དགོས་པ་དང་། ངེས་པར་དུ་རིམས་ནད་སྔོན་འགོག་དང་ཚོད་འཛིན་གྱི་གཅིག་གྱུར་འགོ་ཁྲིད་ལ་ཤུགས་སྣོན་བརྒྱབ་སྟེ་རིམ་ཉུང་གྱི་བཀོད་འདོམས་མ་ལག་འཐུས་སྒོ་ཚང་དུ་གཏོང་དགོས་པ། ངེས་པར་དུ་མཉམ་འགོག་མཉམ་སྡོམ་གྱི་ལེགས་ཆ་འདོན་སྤེལ་བྱས་ནས་རིམས་ནད་སྔོན་འགོག་དང་ཚོད་འཛིན་གྱི་སྲུང་བཅད་བརྟན་པོ་སྐྲུན་དགོས་པ། ངེས་པར་དུ་སྤྱོད་ཚུལ་ལེགས་སུ་གཏོང་བ་དང་དོན་འཁྱོལ་ལ་དམ་འཛིན་ནན་པོ་བྱས་ཏེ་ལས་ཀའི་ཕན་འབྲས་བཟང་པོར་བརྟེན་ནས་ལས་ཀའི་བྱ་ཐབས་ལ་ཞིབ་དཔྱད་བྱེད་དགོས།
རྒྱལ་སྲིད་སྤྱི་ཁྱབ་ཁང་མཉམ་འགོག་མཉམ་སྡོམ་ལམ་སྲོལ་ཕྱོགས་བསྡུས་ཚོགས་ཆུང་བོད་ལྗོངས་ལས་དོན་ཚོགས་ཆུང་གི་ཙུའུ་ཀྲང་རྒྱལ་ཁབ་འཕྲོད་བསྟེན་བདེ་ཐང་ཨུ་ལྷན་གྱི་ཀྲུའུ་རེན་གཞོན་པ་ཡུས་ཞུའེ་ཅུན་གྱིས་བསྟན་དོན། བསམ་བློའི་ཐད་ཚད་མཐོའི་མཐོང་ཆེན་བྱས་ནས་པར་གཞི་དགུ་པའི་རིམས་ནད་སྔོན་འགོག་དང་ཚོད་འཛིན་གྱི་བླང་བྱར་ནན་པོ་གཞིགས་ཏེ། འགལ་ཟླ་གཙོ་བོ་དང་འགག་རྩའི་ལྷུ་ཚིགས་དམ་འཛིན་བྱས་ནས་རིམས་ནད་སྔོན་འགོག་དང་ཚོད་འཛིན་གྱི་བྱེད་ཐབས་ཁག་ནར་འགྱངས་གཏན་ནས་མེད་པར་དོན་འཁྱོལ་བྱེད་དགོས། ཉིང་སྐྱུར་བརྟག་དཔྱད་བྱེད་ནུས་གང་མགྱོགས་ཆེ་རུ་གཏོང་བ་དང་། གོ་རིམ་ལེགས་སུ་གཏོང་བ། སྤུས་ཚད་ཚོད་འཛིན་ནན་པོ་བཅས་བྱས་ཏེ་ཉེན་ཆེའི་མི་ཚོགས་ཡོངས་ལ་ཉིན་རེར་ཉིང་སྐྱུར་བརྟག་དཔྱད་རེ་བྱས་ནས་དུད་ཚང་གཅིག་ཀྱང་མི་ལུས་པ་དང་མི་གཅིག་ཀྱང་མི་ལུས་པ་བྱས་ཐོག རིམས་ནད་ཀྱི་གནས་ཚུལ་མཐིལ་རྟོགས་བྱེད་པར་དམ་འཛིན་བྱེད་དགོས། ཉིང་སྐྱུར་བརྟག་དཔྱད་བྱས་འབྲས་གདགས་གཤིས་ཡིན་རིགས་འཚོལ་མཁན་གྱི་ལས་དོན་ཆེད་སྒྲུབ་ཚོགས་ཆུང་གི་སྟོབས་ཤུགས་ཆེ་རུ་བཏང་སྟེ། དུས་ཚོད་ཐུང་ཤོས་ནང་ཉིང་སྐྱུར་བརྟག་དཔྱད་བྱས་འབྲས་གདགས་གཤིས་ཡིན་པ་འཚོལ་བའི་ལས་དོན་ལེགས་སྒྲུབ་བྱས་ནས་སྤྱི་ཚོགས་ངོས་ཀྱི་ནད་དུག་འགོས་མཁན་ཚང་མ་འཚོལ་ཐུབ་པ་བྱེད་དགོས། སྤྱི་ཚོགས་ངོས་ཀྱི་དོ་དམ་ཚོད་འཛིན་བྱེད་སྟངས་ཚད་ལྡན་དུ་གཏོང་བ་དང་མི་ཚོགས་འདུ་ས་དང་གནས་གལ་ཆེན་ལ་དོ་དམ་ཚོད་འཛིན་བྱེད་པར་ཤུགས་སྣོན་བརྒྱབ་ནས་གཅིག་སྡུད་རང་བཞིན་གྱི་རིམས་ནད་མཐའ་གཅིག་ཏུ་མི་ཐོན་པ་བྱེད་དགོས། ཞིང་ཆེན་སྒྲོལ་བའི་མཉམ་འགུལ་ལམ་སྲོལ་ལ་ཤུགས་སྣོན་རྒྱག་པ་དང་བོད་སྐྱོར་དང་ཉེ་འཁོར་ཞིང་ཆེན་དང་གྲོང་ཁྱེར་གྱི་རོགས་སྐྱོར་ཤུགས་ཆེན་ཐོབ་རྒྱུའི་བརྩོན་ལེན་ཧུར་ཐག་བྱས་ཏེ་འཚོ་བ་དང་སྨན་བཅོས་སོགས་འགན་སྲུང་དངོས་ཟོག་དབོར་འདྲེན་གྱི“བགྲོད་ལམ་ཆེན་པོ”ཤར་བགྲོད་ཐུབ་པ་བྱས་ནས་ལས་དོན་ཁག་ཕྱོགས་ཡོངས་དང་། མགྱོགས་མྱུར། ནུས་ལྡན་བཅས་ངང་སྤེལ་ཐུབ་པ་བྱས་ཐོག སྤྱི་ཚོགས་ངོས་ཀྱི་ནད་དཔེ་གཙང་བཟོའི་དམིགས་ཚད་གང་མགྱོགས་མངོན་འགྱུར་ཐུབ་པ་བྱེད་དགོས།