ས་ཨུད་དང་གྲོང་ཨུད་ཁག་གི་རྩ་འཛུགས་པུའུ་དང་། རྨང་བརྟན་གཞུང་དོན་ཁང་། ལྗོངས་ཐད་གཏོགས་ཚན་པ་ཁག་གི་ཆབ་སྲིད་ལས་དོན་མི་དོན་སྡེ་ཚན་བཅས་ལ།

ཏོག་གསར་གློ་ཚད་རིམས་ནད་སྔོན་འགོག་དང་ཚོད་འཛིན་སྐོར་གྱི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་གསུང་བཤད་གལ་ཆེན་དང་མཛུབ་སྟོན་གལ་ཆེན་གྱི་དགོངས་དོན་ལག་བསྟར་དོན་འཁྱོལ་གཏིང་ཟབ་དང་། རིམས་ནད་སྔོན་འགོག་དང་ཚོད་འཛིན་སྐོར་གྱི་རང་སྐྱོང་ལྗོངས་ཏང་ཨུད་ཀྱི་བཀོད་སྒྲིག་བླང་བྱ་ལག་བསྟར་དོན་འཁྱོལ་བྱས་ནས་རིམ་ཁག་ཏང་རྩ་འཛུགས་དང་རྒྱ་ཆེའི་ཏང་ཡོན་ལས་བྱེད་པའི་ནུས་པ་འདོན་སྤེལ་གང་ལེགས་བྱས་ཏེ་དུས་ཚོད་ཐུང་ཤོས་དང་རིན་དོད་ཆུང་ཤོས་ཀྱི་ཐོག་ནས་རིམས་ནད་སྔོན་འགོག་དང་ཚོད་འཛིན་གྱི་དམག་འཐབ་ཆེན་པོ་དེར་རྒྱལ་ཁ་ལེན་དགོས། ད་ལྟ་འབྲེལ་ཡོད་དོན་གནད་བརྡ་ཐོ་གཏོང་རྒྱུ་གཤམ་གསལ་ཏེ།

གཅིག ཆབ་སྲིད་ཀྱི་ཚུགས་གནས་མཐོ་རུ་བཏང་ནས་རིམས་ནད་སྔོན་འགོག་དང་ཚོད་འཛིན་གྱི་ཆབ་སྲིད་འགན་འཁྲི་ཏན་ཏིག་འཁུར་དགོས།

མིག་སྔར། རང་ལྗོངས་ཀྱི་ས་གནས་ཁག་གཅིག་ཏུ་ཏོག་གསར་གློ་ཚད་རིམས་ནད་ཀྱི་གདགས་གཤིས་ནད་དཔེ་ཐོན་ནས་རིམས་ནད་སྔོན་འགོག་དང་ཚོད་འཛིན་ལས་དོན་ལ་འགྲན་སློང་ཧ་ཅང་ཆེན་པོ་འཕྲད་ཡོད། ལྗོངས་ཡོངས་ཀྱི་རིམ་ཁག་ཏང་རྩ་འཛུགས་དང་རྒྱ་ཆེའི་ཏང་ཡོན་ལས་བྱེད་པས་ཏང་དང་དཀའ་སྡུག་མཉམ་འཁུར་དང་ཏང་ལ་འགན་འཁུར་བའི་མཐོ་ཚད་ཐོག་ནས་བསམ་བློ་དང་བྱ་སྤྱོད་ཏང་ཀྲུང་དབྱང་དང་ལྗོངས་ཏང་ཨུད་ཀྱི་བཀོད་སྒྲིག་བླང་བྱའི་ཐོག་གཅིག་གྱུར་ཡོང་བར་བྱེད་པ་དང་། རིམས་ནད་སྔོན་འགོག་དང་ཚོད་འཛིན་ནང་ཞུགས་པ་ཐོག་མའི་བསམ་འདུན་གྱི་ལས་འགན་སྒྲུབ་པ་དང་འགན་འཁྲི་འཁུར་སེམས་མཚོན་པར་བྱེད་པའི་རྡོ་ཀ་ཤུ་ཁ་དང་རྡར་རྡོ་ལྟ་བུར་བརྩིས་ཏེ་མི་དམངས་ཀྱི་ཚེ་སྲོག་བདེ་འཇགས་དང་གཟུགས་གཞི་བདེ་ཐང་ལ་སྲུང་སྐྱོང་མཐའ་གཅིག་ཏུ་བྱས་ནས་རིམས་ནད་ཀྱིས་དཔལ་འབྱོར་དང་སྤྱི་ཚོགས་འཕེལ་རྒྱས་ལ་ཐེབས་པའི་ཤུགས་རྐྱེན་ཆུང་དུ་གཏོང་གང་ཐུབ་བྱེད་དགོས། རྒྱ་ཆེའི་ཏང་ཡོན་ལས་བྱེད་པ་དང་ལྷག་པར་དུ་ས་གནས་ཁག་དང་ཚན་པ་ཁག་གི་འགན་འཁུར་བློ་མཐུན་གཙོ་བོ་དང་། གྲོང་སྡོད་ལས་དོན་གྱི་རུ་སྣེ་ཁྲིད་མཁན་གཙོ་བོས་དཔེ་སྟོན་གྱི་ནུས་པ་འདོན་སྤེལ་བྱེད་པ་དང་། རིམས་ནད་སྔོན་འགོག་དང་ཚོད་འཛིན་གྱི་དུས་བབ་འགྱུར་ལྡོག་ལ་དམ་པོར་དམིགས་ནས། འཐབ་ཕྱོགས་དང་པོར་བསྐྱོད་དེ་གནས་ཚུལ་དངོས་ལ་ལྟ་བ་དང་། གནད་དོན་འཚོལ་བ། སྐྱོན་ཆ་སེལ་བ་བཅས་བྱེད་པ་དང་། འཕྲལ་སྡོམ་ཐག་གཅོད་དང་སྔོན་འགོག་དང་ཚོད་འཛིན་གྱི་འགན་འཁྲི་ནན་དུ་གཏོང་བ། འགན་འཁྲི་མི་ཐོག་ཏུ་དོན་འཁྱོལ་དང་ལས་དོན་དོན་འཁྱོལ་ཐུབ་པའི་འགན་ལེན་བྱས་ཏེ་མི་རིགས་ཁག་གི་མང་ཚོགས་ལ་མཐུན་སྒྲིལ་དང་སྣེ་ཁྲིད་ཀྱིས་ཐུན་མོང་ཐོག་རིམས་ནད་སྔོན་འགོག་དང་ཚོད་འཛིན་གྱི་ཟངས་གྱང་ལྕགས་རྩིག་བརྟན་པོ་བསྐྲུན་དགོས།

གཉིས། ཏང་འཛུགས་སྐྱོང་གི་སྣེ་ཁྲིད་མཐའ་འཁྱོངས་བྱས་ནས་གཞི་རིམ་ཏང་རྩ་འཛུགས་ཀྱི་འཐབ་འཛིང་མཁར་རྫོང་གི་ནུས་པ་འདོན་སྤེལ་གང་ལེགས་བྱེད་དགོས།

གཞི་རིམ་ཏང་རྩ་འཛུགས་ཀྱིས་རྩ་འཛུགས་ཀྱི་ནུས་པ་ཕྱོགས་ཡོངས་ནས་ཆེ་རུ་གཏོང་བ་དང་ཏང་འཛུགས་སྐྱོང་གི་སྣེ་ཁྲིད་ལ་ཤུགས་སྣོན་བརྒྱབ་ནས་ཏང་གི་ཆབ་སྲིད་ཀྱི་ལེགས་ཆ་དང་། རྩ་འཛུགས་ཀྱི་ལེགས་ཆ། མང་ཚོགས་ཀྱི་ལས་ཀའི་ལེགས་ཆ་བཅས་རིམས་ནད་སྔོན་འགོག་དང་ཚོད་འཛིན་གྱི་དམག་འཐབ་ཀྱི་སྟོབས་ཤུགས་ཆེན་པོ་ཞིག་ཏུ་འགྱུར་བར་བྱེད་དགོས། ཤང་དང་གྲོང་རྡལ(ཁྲོམ་གཞུང)དང་། གྲོང་ཚོ(སྡེ་ཁུལ)ཏང་རྩ་འཛུགས་ཀྱིས་གཏོགས་ཁོངས་དོ་དམ་གྱི་འགན་འཁྲི་དོན་འཁྱོལ་ནན་ཏན་བྱས་ཏེ་ལས་ཀའི་ལམ་སྲོལ་འཐུས་སྒོ་ཚང་དུ་གཏོང་བ་དང་དྲ་མིག་ཅན་དང་ཞིབ་ཚགས་ཅན་གྱི་དོ་དམ་གཏིང་ཟབ་ཏུ་བཏང་ནས“ཨུ་ལྷན་གཉིས”ཚན་ཁག་དང་། གྲོང་སྡོད་ལས་དོན་རུ་ཁག ཧྲུའུ་ཅི་དང་པོ། གྲོང་གསེབ་དར་རྒྱས་ཀྱི་ཆེད་བསྐོས་ལས་བྱེད་པ་སོགས་ཀྱི་ནུས་པ་འདོན་སྤེལ་གང་ལེགས་བྱས་ཏེ་རིམས་ནད་གྲལ་བཤེར་དང་། ཚ་བ་ལྟ་བ་དང་ཨང་རྟགས་བཤེར་བ། ཉིང་སྐྱུར་བརྟག་དཔྱད། རིམས་འགོག་སྨན་ཁབ་རྒྱག་པ། ལྟ་འདོམས་ལོགས་འཇོག་སོགས་ཀྱི་ལས་དོན་ཡག་པོ་སྒྲུབ་པར་གཞོགས་འདེགས་བྱེད་དགོས། རིམས་ནད་ཐོན་སར་ཏང་ཡོན་སྐོར་གཡེང་རུ་ཁག་དང་། འཕྲལ་སྒྲུབ་རུ་ཁག དྲིལ་བསྒྲགས་རུ་ཁག ལྟ་སྐྱོང་རུ་ཁག ཞབས་ཞུ་རུ་ཁག་སོགས་འཕྲལ་མར་བཙུགས་ཏེ་ཞིབ་བཤེར་གཞོགས་འདེགས་ཀྱི་ལས་ཕྱོད་ཆེ་རུ་གཏོང་བ་དང་སྔོན་འགོག་དང་ཚོད་འཛིན་གྱི་ལས་དོན་ཡག་པོ་བསྒྲུབས་ནས་རིམས་ནད་ཕྱིར་མཆེད་རྒྱུར་སྔོན་འགོག་མཐའ་གཅིག་ཏུ་བྱེད་དགོས། རིམས་ནད་ཐོན་མེད་པའི་ས་གནས་ཀྱིས་ཀྱང་མགྱོགས་མྱུར་བྱ་སྤྱོད་སྤེལ་ནས་སྔོན་འགོག་དང་ཚོད་འཛིན་གྱི་ལམ་སྲོལ་འཐུས་སྒོ་ཚང་དུ་གཏོང་བ་དང་དོན་འཁྱོལ་བྱས་ཏེ་མངའ་ཁོངས་སྲུང་བའི་འགན་འཁྲི་ཡོད་པ་དང་། མངའ་ཁོངས་སྲུང་བའི་འགན་འཁྲི་འཁུར་བ། མངའ་ཁོངས་སྲུང་བའི་འགན་འཁྲི་གཙང་སྒྲུབ་བཅས་བྱེད་དགོས། འཕྲོད་བསྟེན་དང་། སློབ་གསོ། སྤྱི་བདེ། འགྲིམ་འགྲུལ། འཕྲལ་སྡོམ། ཁྲོམ་ར་ལྟ་འདོམས་སོགས་སྡེ་ཚན་གྱི་ཏང་རྩ་འཛུགས་ཀྱིས་གཙོ་གཉེར་གྱི་འགན་འཁྲི་དོན་འཁྱོལ་བྱས་ཏེ། གཙོ་གནད་ས་ཁུལ་དང་། གཙོ་གནད་ལྷུ་ཚིགས། གཙོ་གནད་མི་སྣ་བཅས་ལ་དམ་པོར་དམིགས་ནས་རིམས་ནད་སྔོན་འགོག་དང་ཚོད་འཛིན་གྱི་བླང་བྱ་དོན་འཁྱོལ་ལ་ལྟ་སྐུལ་བྱེད་དགོས། སྨན་ཁང་དང་། མཐོ་སློབ། ཚན་ཞིབ་ཁང་བཅས་ཀྱི་ཏང་རྩ་འཛུགས་ཀྱིས་རྒྱ་ཆེའི་སྨན་དོན་ལས་དོན་པ་དང་ཆེད་ལས་ལག་རྩལ་མི་སྣར་མཐུན་སྒྲིལ་དང་སྣེ་ཁྲིད་བྱས་ཏེ་རང་འགན་གཙང་སྒྲུབ་ཀྱིས་སྨན་བཅོས་སྲོག་སྐྱོབ་དང་རྨང་གཞིའི་སྔོན་འགོག་སོགས་ཀྱི་ལས་དོན་ནུས་ཤུགས་ཡོད་རྒུས་ཡག་པོ་སྒྲུབ་དགོས། ལས་ཁུངས་དང་། ཁེ་ལས་དང་བྱ་གཞག་ཚན་པ། དགོན་སྡེ་དོ་དམ་ཨུ་ལྷན། “གསར་གཉིས”ཁྱབ་ཁོངས་ཀྱི་ཏང་རྩ་འཛུགས་སོགས་ཀྱིས་གཏོགས་ཁོངས་ཏང་རྩ་འཛུགས་དང་མཐུན་སྦྱོར་གཞོགས་འདེགས་ལ་ཤུགས་སྣོན་བརྒྱབ་སྟེ། འདུ་འཛོམས་རང་བཞིན་གྱི་ཚོགས་འདུ་དང་བྱེད་སྒོར་ཚོད་འཛིན་ནན་པོ་བྱེད་དགོས།

གསུམ། དཔེ་སྟོན་སྣེ་ཁྲིད་བྱེད་ཤུགས་ཆེ་རུ་བཏང་ནས་ཏང་ཡོན་གྱི་གདོང་ལེན་དཔེ་བཟང་གི་ནུས་པ་འདོན་སྤེལ་གང་ལེགས་བྱེད་དགོས།

རྒྱ་ཆེའི་ཏང་ཡོན་གྱིས་སྤྱི་ཡོངས་ཀྱི་འདུ་ཤེས་དང་སྤྱི་ཡོངས་ཀྱི་ལྟ་བ་བརྟན་པོར་བཙུགས་ནས་རང་འགུལ་ངང་རིམས་ནད་སྔོན་འགོག་དང་ཚོད་འཛིན་གྱི་འཐབ་ཕྱོགས་དང་པོར་ཐོབ་ཐང་གསལ་སྟོན་དང་ལེགས་སྐྱེས་འབུལ་བ་དང་། བདེ་འཇགས་འགོག་སྲུང་བྱ་ཐབས་དོན་འཁྱོལ་ལ་སྣེ་ཁྲིད་བྱེད་པ། འབྲེལ་ཡོད་སྡེ་ཚན་ལ་གཞོགས་འདེགས་བྱས་ཏེ་རིམས་འགོག་ཞིབ་བཤེར་ཡག་པོ་བྱེད་པ། གཅིག་སྡུད་རང་བཞིན་གྱི་བྱེད་སྒོར་མི་ཞུགས་པ་བཅས་བྱས་ནས་རིམས་ནད་མཆེད་ལམ་གཅོད་གང་ཐུབ་བྱེད་དགོས། ཉེན་ཁ་གྲལ་བཤེར་དང་། ལས་རེས་གནས་སྲུང་། བྱེད་སྒོ་སྤེལ་ཡུལ་ལ་དོ་དམ་ཚོད་འཛིན། དངོས་ཟོག་སྐྱེལ་འདྲེན། སྒྲིག་ལམ་སྲུང་སྐྱོང་། སེམས་ཁམས་གསེད་བཀྲོལ་སོགས་ཀྱི་ལས་དོན་ནང་ཧུར་ཐག་ཞུགས་དགོས། ཏང་ཡོན་གྱིས“འགན་ལེན་གསུམ”གྱི་བླང་བྱ་དོན་འཁྱོལ་བྱས་ནས་ཐག་ཉེ་སར་སྤྱི་ཚོགས་ཀྱི་རིམས་འགོག་དོ་དམ་ནང་ཞུགས་ཏེ་རིམས་ནད་སྔོན་འགོག་དང་ཚོད་འཛིན་གྱི་སྲིད་ཇུས་དང་འགོག་བཅོས་ཤེས་བྱ་རྒྱ་ཁྱབ་ངང་དྲིལ་བསྒྲགས་བྱེད་པ་དང་། མང་ཚོགས་ཀྱིས་རིམས་འགོག་གཏན་འབེབས་ལ་བརྩི་སྲུང་ཞུ་རྒྱུར་ཁྲིད་སྟོན་བྱེད་པ། རང་ངོས་འགོག་སྲུང་ལ་ཤུགས་སྣོན་རྒྱག་པ་བཅས་བྱས་ཏེ་འཕྲལ་མཁོ་དང་། དཀའ་ངལ། སེམས་ཁྲལ། རེ་སྒུག་བཅས་ཀྱི་གནད་དོན་ཐག་གཅོད་རོགས་ཧུར་ཐག་བྱེད་དགོས། ཉེ་འགྲམ་གྱི་མང་ཚོགས་ལ་ཆ་འཕྲིན་སྣ་ཚོགས་དབྱེ་འབྱེད་དང་ཞིབ་བསྡུར་བྱ་རྒྱུའི་སློབ་གསོ་རྒྱག་པ་དང་ཁྲིད་སྟོན་བྱས་ཏེ་དཀྲོག་གཏམ་མི་བཟོ་བ་དང་། དཀྲོག་གཏམ་ལ་ཡིད་ཆེས་མི་བྱེད་པ། དཀྲོག་གཏམ་བརྒྱུད་སྤེལ་མི་བྱེད་པ་བཅས་བྱས་ནས་ཁྲིམས་འགལ་སྒྲིག་འགལ་གྱི་བྱེད་སྤྱོད་ལ་བཀག་འགོག་མཐའ་གཅིག་ཏུ་བྱས་ཏེ་སྤྱི་ཚོགས་སྤྱི་ཡོངས་རྒྱུན་མཐུད་ཞི་མཐུན་བརྟན་ལྷིང་ཡོང་བར་ཐུན་མོང་ཐོག་སྲུང་སྐྱོང་བྱེད་དགོས།

བཞི། རང་འགན་ཐེག་པ་འཁུར་ལེན་ལ་སྐུལ་ལྕག་བྱས་ཏེ་རིམས་ནད་སྔོན་འགོག་དང་ཚོད་འཛིན་གྱི་མཉམ་ཤུགས་ཆེན་པོ་ཞིག་ཆགས་པ་བྱེད་དགོས།

རིམ་ཁག་རྩ་འཛུགས་མི་དོན་སྡེ་ཚན་གྱིས་མགྱོགས་མྱུར་བྱ་སྤྱོད་སྤེལ་ནས་རང་འགུལ་ངང་འགན་འཁྲི་ཧུར་ཐག་བསྒྲུབས་ཏེ། རིམས་ནད་སྔོན་འགོག་དང་ཚོད་འཛིན་གྱི་དམག་འཐབ་ཆེན་པོ་དེར་རྒྱལ་ཁ་ལེན་ཆེད་སྲ་ཞིང་བརྟན་པའི་རྩ་འཛུགས་ཀྱི་འགན་ལེན་བྱེད་དགོས། ཡང་དག་པའི་མི་འདེམས་སྤྱོད་ཀྱི་སྟོན་ཕྱོགས་འཛུགས་པ་དང་། རིམས་ནད་སྔོན་འགོག་དང་ཚོད་འཛིན་གྱི་འཐབ་ས་དང་པོར་གསོ་སྐྱོང་དང་སྦྱོང་བརྡར་དང་། ལས་བྱེད་པར་རྟོག་ཞིབ་དང་དབྱེ་འབྱེད་བྱ་རྒྱུར་སྣང་ཆེན་བྱས་ནས་འགོ་ཁྲིད་ཚན་ཁག་དང་འགོ་ཁྲིད་ལས་བྱེད་པའི་མཚོན་ཚུལ་དངོས་དུས་ཐོག་ཏུ་ཤེས་རྟོགས་དང་ཁོང་དུ་ཆུད་པར་བྱས་ཏེ་ལས་བྱེད་པར་དཔྱད་ཞིབ་གདེང་འཇོག་དང་། འདེམས་སྒྲུག་བཀོལ་སྤྱོད་བྱེད་པའི་གཞི་འཛིན་ས་གལ་ཆེན་ཞིག་ཏུ་བརྩིས་ནས་རིམས་ནད་སྔོན་འགོག་དང་ཚོད་འཛིན་ཁྲོད་དཀའ་ངལ་ལ་མི་སྐྲག་པ་དང་། རང་འགན་ཐེག་པ་འཁུར་ལེན། ལེགས་སྐྱེས་འབུལ་འདོད་པ། མཚོན་ཚུལ་མངོན་གསལ་དོད་པ་བཅས་ཀྱི་ལས་བྱེད་པ་བློ་ཁོག་ཆེན་པོས་གོ་གནས་སྤར་ནས་སྤྱོད་དགོས། གཅིག་གྱུར་གྱི་བཀོད་འདོམས་དང་ལེན་མི་བྱེད་པ་དང་། འགན་འཁྲི་འཁུར་མི་ཕོད་པ། སྤྱོད་ཚུལ་ཏན་ཏིག་མེད་པ། བྱ་སྤྱོད་སྤེལ་འགོར་བ། དོན་འཁྱོལ་ནུས་ལྡན་མ་བྱུང་བ་བཅས་ཀྱི་དབང་གིས་ཤུགས་རྐྱེན་ངན་པ་བཟོས་རིགས་ལ་འགན་འཁྲི་བདའ་འདེད་ནན་པོ་གཏོང་དགོས། རིམས་ནད་སྔོན་འགོག་དང་ཚོད་འཛིན་གྱི་འཐབ་ས་དང་པོར་ཤེས་ལྡན་མི་སྣར་རྟོག་ཞིབ་དང་། གསོ་སྐྱོང་། བསྡུ་ལེན་བཅས་བྱེད་པར་མཐོང་ཆེན་བྱས་ཏེ། དུས་ཐོག་ཏུ་མདུན་མཆོང་བྱེད་པ་དང་མཚོན་ཚུལ་འབུར་དུ་ཐོན་པའི་ཕུལ་བྱུང་ཅན་ཏང་རྩ་འཛུགས་ནང་བསྡུ་ལེན་བྱེད་དགོས། རིམས་ནད་སྔོན་འགོག་དང་ཚོད་འཛིན་གྱི་འཐབ་ཕྱོགས་དང་པོའི་ལས་དོན་མི་སྣའི་བསམ་བློའི་གནས་ཚུལ་དུས་ཐོག་ཏུ་ཤེས་རྟོགས་དང་སེམས་ཁུར་དང་གཅེས་སྐྱོང་བྱ་ཐབས་དོན་འཁྱོལ་བྱས་ནས་དཀའ་ངལ་དངོས་ཐག་གཅོད་བྱེད་རོགས་ཧུར་ཐག་བྱེད་དགོས། སྔོན་ཐོན་དཔེ་བཟང་གི་དཔེ་སྟོན་ནུས་པ་འདོན་སྤེལ་གང་ལེགས་བྱས་ཏེ་རིམས་ནད་སྔོན་འགོག་དང་ཚོད་འཛིན་ཁྲོད་ཀྱི་སྔོན་ཐོན་དཔེ་བཟང་སྔོག་འདོན་དང་རྒྱ་ཁྱབ་ངང་དྲིལ་བསྒྲགས་བྱ་རྒྱུར་སྣང་ཆེན་བྱས་ནས་སྔོན་ཐོན་ལ་སློབ་སྦྱོང་དང་རང་འགན་ཐེག་པ་ཁུར་ལེན་གྱི་རྣམ་པ་བཟང་པོ་ཞིག་ཧུར་ཐག་གཏོད་དགོས།

ཀྲུང་གུང་བོད་རང་སྐྱོང་ལྗོངས་ཨུ་ཡོན་ལྷན་ཁང་རྩ་འཛུགས་པུས།

2022ལོའི་ཟླ་8ཚེས་9ཉིན།