ཚེས་9ཉིན། རྒྱལ་ཁབ་འཕྲོད་བསྟེན་བདེ་ཐང་ཨུ་ལྷན་ནད་ཡམས་སྔོན་འགོག་དང་ཚོད་འཛིན་ཅུས་ཀྱི་རིམ་པ་དང་པོའི་སྐོར་གཟིགས་པ་ཧོ་ཆིང་ཧྭ་ཡིས་སྣེ་ཁྲིད་པའི་རྒྱལ་ཁབ་འཕྲོད་བསྟེན་བདེ་ཐང་ཨུ་ལྷན་དང་། ཀྲུང་གོ་ནད་ཡམས་སྔོན་འགོག་དང་ཚོད་འཛིན་ལྟེ་གནས་དང་དེ་བཞིན་པེ་ཅིང་གྲོང་ཁྱེར་དང་མཚོ་སྔོན་ཞིང་ཆེན་གྱི་ནད་ཡམས་སྔོན་འགོག་དང་ཚོད་འཛིན། དབུགས་ལམ་ནད་གཞི་སྐྱོབ་བཅོས་སོགས་ཀྱི་རིགས་གཅིག་མཁས་ཅན་ལས་གྲུབ་པའི་རྒྱལ་སྲིད་སྤྱི་ཁྱབ་ཁང་མཉམ་འགོག་མཉམ་སྡོམ་ལམ་སྲོལ་ཕྱོགས་བསྡུས་ཚོགས་ཆུང་་བོད་དུ་འབྱོར་ནས་རིམས་ནད་སྔོན་འགོག་དང་ཚོད་འཛིན་ལ་མཛུབ་ཁྲིད་བྱེད་པའི་ལས་དོན་སྤེལ་འགོ་ཚུགས་པ་རེད།
རྒྱལ་ཁབ་ལས་དོན་ཚོགས་ཆུང་བོད་དུ་འབྱོར་རྗེས་ལམ་བར་གྱི་ངལ་དུབ་དང་ལ་ས་མཐོ་མི་འཕྲོད་པར་མ་འཛེམས་པར་མཚན་དགུང་དུ་རིམས་ནད་སྔོན་འགོག་དང་ཚོད་འཛིན་ལས་དོན་གྲོས་མོལ་ཚོགས་འདུ་འཚོགས་པ་རེད། ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་དང་། རང་སྐྱོང་ལྗོངས་ཀྱི་རྒྱུན་ལས་ཀྲུའུ་ཞི་གཞོན་པ། ལྗོངས་ཡོངས་ཀྱིས་ཏོག་གསར་གློ་ཚད་རིམས་ནད་ལ་ཁ་གཏད་གཅོག་པའི་ལས་དོན་འགོ་ཁྲིད་ཚོགས་ཆུང་གི་ཙུའུ་ཀྲང་གཞོན་པ། གཞུང་དོན་ཁང་གི་ཀྲུའུ་རེན་བཅས་ཡིན་པའི་ཁྲེན་ཡུང་ཆི་དང་། རང་སྐྱོང་ལྗོངས་ཀྱི་ཀྲུའུ་ཞི་གཞོན་པ་ལྗོངས་ཡོངས་ཀྱིས་ཏོག་གསར་གློ་ཚད་རིམས་ནད་ལ་ཁ་གཏད་གཅོག་པའི་ལས་དོན་འགོ་ཁྲིད་ཚོགས་ཆུང་གཞུང་དོན་ཁང་གི་ཀྲུའུ་རེན་གཞོན་པ་ལུའོ་མེ་ཚོགས་འདུར་ཞུགས་པ་རེད།
ཚོགས་འདུའི་ཐོག རྒྱལ་སྲིད་སྤྱི་ཁྱབ་ཁང་གི་འབྲེལ་ཡོད་དགོངས་དོན་བརྒྱུད་བསྒྲགས་བྱས་པ་དང་ཉེ་དུས་ཀྱི་རང་ལྗོངས་ཀྱི་རིམས་ནད་སྔོན་འགོག་དང་ཚོད་འཛིན་ལས་དོན་སྤེལ་ཚུལ་གྱི་སྙན་སེང་གསན་པ་རེད། ལས་དོན་ཚོགས་ཆུང་གིས་རང་ལྗོངས་ཀྱི་རིམས་ནད་སྔོན་འགོག་དང་ཚོད་འཛིན་གྱི་ལས་དོན་སྤེལ་ཚུལ་ལ་ཁས་ལེན་བྱས་པ་དང་འབྲེལ། བོད་རང་སྐྱོང་ལྗོངས་ཀྱིས་ཏང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་གི་ཐབས་ཇུས་བཀོད་སྒྲིག་ལག་བསྟར་དོན་འཁྱོལ་མཐའ་གཅིག་ཏུ་བྱས་ཏེ་རྒྱལ་སྲིད་སྤྱི་ཁྱབ་ཁང་མཉམ་འགོག་མཉམ་སྡོམ་ལམ་སྲོལ་དང་རིམས་ནད་སྔོན་འགོག་དང་ཚོད་འཛིན་གྱི་ཇུས་གཞི་ཁག་དགུ་པའི་བླང་བྱ་གཞིར་བཟུང་། བོད་སྐྱོད་པ་རྒན་གྲས་ཀྱི་སྙིང་སྟོབས་དར་སྤེལ་གཏོང་བ་དང་། གསོ་རླུང་ཉུང་ཡང་སྙིང་སྟོབས་མི་ཉམས་པ། དཀའ་ཚེགས་ཆེ་ཡང་དཀའ་སྡུག་ལ་མི་སྐྲག་པ། ས་བབ་མཐོ་ཡང་བསམ་པའི་གོ་རྟོགས་དེ་བས་མཐོ་བ། ལས་དོན་དང་ལས་འགན་ཁག་དོན་འཁྱོལ་མགྱོགས་པོ་དང་། ཞིབ་ཚགས། ནན་པོ། ཏན་ཏིག་བཅས་བྱས་ཏེ་དུས་ཚོད་ཐུང་ཤོས་ནང་སྤྱི་ཚོགས་ཐོག་ལ་གཙང་བཟོ་ཐུབ་པར་བྱེད་དགོས་ཞེས་བསྟན་པ་རེད། དེ་དང་ཆབས་ཅིག་ཐག་གཅོད་ལམ་སེང་བྱེད་པ་དང་། ལྷུག་ལྷོད་འཇམ་གསུམ་མི་བྱེད་པར་རྒྱལ་ཁབ་ལས་དོན་ཚོགས་ཆུང་དང་རང་སྐྱོང་ལྗོངས་དང་དེ་བཞིན་འབྲེལ་ཡོད་སྡེ་ཚན་ལས་གྲུབ་པའི་མཉམ་འགུལ་སྔོན་འགོག་དང་ཚོད་འཛིན་གྱི་ལས་ཀའི་ལམ་སྲོལ་འཛུགས་པ་དང་། རིམ་ཉུང་དོ་དམ་བྱེད་པ། ཆ་འཕྲིན་སྦྲེལ་མཐུད་བྱེད་ཤུགས་ཆེ་རུ་གཏོང་བ། ལས་ཀའི་འཆར་ཅན་ཚོགས་འདུའི་ལམ་སྲོལ་ལག་ལེན་བསྟར་བ། ཆ་འཕྲིན་གོང་ཞུ་དང་ཡོངས་བསྒྲགས་ཚད་ལྡན་དུ་གཏོང་བ། ཡུལ་སྐོར་བར་ཞབས་ཞུ་དང་དོ་དམ་བྱེད་ཤུགས་ཆེ་རུ་གཏོང་བ་སོགས་ཀྱི་ཐད་ཞིབ་ཕྲའི་མཛུབ་ཁྲིད་བསམ་འཆར་བཏོན་པ་རེད།
ཁྲེན་ཡུང་ཆིས་རང་སྐྱོང་ལྗོངས་ཏང་ཨུད་དང་སྲིད་གཞུང་གི་ཚབ་ཞུས་ཏེ་རྣམ་འགྱུར་མཚོན་པའི་གཏམ་བཤད་སྤེལ་ཞིང་། ཁོང་གིས་རིམས་ནད་སྔོན་འགོག་དང་ཚོད་འཛིན་ལས་དོན་སྐོར་གྱི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཛུབ་སྟོན་དང་མཆན་བཀོད་མཛུབ་སྟོན་གལ་ཆེན་གྱི་བླང་བྱ་ལག་བསྟར་དོན་འཁྱོལ་མཐའ་གཅིག་ཏུ་བྱེད་པ་དང་། ཏང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་གི་ཐབས་ཇུས་བཀོད་སྒྲིག་དོན་འཁྱོལ་མཐའ་གཅིག་ཏུ་བྱེད་པ། ལས་དོན་ཚོགས་ཆུང་གི་བླང་བྱ་ལྟར་རིམས་འགོག་ལས་དོན་ལ་དམ་འཛིན་ཡག་པོ་བྱེད་པ་བཅས་ཀྱིས་སྐབས་བསྟུན་གཙང་བཟོ་གང་མགྱོགས་ཐུབ་པ་བྱ་རྒྱུ་ཡིན་ཞེས་གསུངས་པ་རེད།