ཚེས་9ཉིན་གྱི་སྔ་དྲོ། རང་སྐྱོང་ལྗོངས་ཏང་ཨུད་དང་སྲིད་གཞུང་གི་བཀོད་སྒྲིག་བླང་བྱ་ལྟར། ལྗོངས་ཏང་ཨུད་ཀྱི་ཧྲུའུ་ཅི་གཞོན་པ། རང་སྐྱོང་ལྗོངས་ཀྱི་རྒྱུན་ལས་ཀྲུའུ་ཞི་གཞོན་པ་ཁྲེན་ཡུང་ཆིས་བཀོད་འདོམས་པུའུ་རུ་གཙོ་གནད་གྲོང་ཁུལ་གྱི་ཉིང་སྐྱུར་བརྟག་དཔྱད་ལས་དོན་གྱི་འཕེལ་རིམ་མཁྱེན་རྟོགས་གནང་བ་དང་། སློབ་གྲྭ་དང་། གནམ་ཐང་། མེ་འཁོར་བབས་ཚུགས། དགོན་སྡེ་སོགས་གཙོ་གནད་ས་ཁོངས་ཀྱི་རིམས་འགོག་དང་ཚད་ལྡན་ཆ་འཕྲིན་ཡོངས་བསྒྲགས་སོགས་ཀྱི་ལས་དོན་བཀོད་སྒྲིག་གནང་བ་རེད། དེ་རྗེས་ལྷ་ས་གྲོང་ཁྱེར་གྱི་གྲོང་ཁུལ་གཙོ་བོ་དང་ཁྲེང་ཀོན་ཆུས་ཀྱི་ཉིང་སྐྱུར་བརྟག་དཔྱད་དཔེ་ལེན་ས་ཚིགས་ཁག་གཅིག་ཏུ་ཕེབས་ནས་མི་ཚང་མར་ཉིང་སྐྱུར་བརྟག་དཔྱད་དཔེ་ལེན་ལས་དོན་སྤེལ་ཚུལ་ལ་བརྟག་ཞིབ་དང་ལྟ་སྐུལ་མཛུབ་ཁྲིད་གནང་སྟེ་རང་སྐྱོང་ལྗོངས་ཏང་ཨུད་དང་སྲིད་གཞུང་གི་ཚབ་ཞུས་ནས་འཐབ་ཕྱོགས་དང་པོའི་ལས་དོན་མི་སྣར་འཚམས་འདྲི་ཞུས་པ་རེད། ལྗོངས་ཏང་ཨུད་ཀྱི་རྒྱུན་ཨུ་ལྷ་ས་གྲོང་ཨུད་ཀྱི་ཧྲུའུ་ཅི་ཕུར་བུ་དོན་གྲུབ་མཉམ་དུ་བརྟག་ཞིབ་གནང་བར་ཕེབས་ཡོད་པ་རེད།
ཁྲེན་ཡུང་ཆི་དང་བཅས་པ་སྔ་རྗེས་སུ་རང་སྐྱོང་ལྗོངས་ཏང་ཨུད་ལས་བྱེད་པ་རྒན་གྲས་ཅུས་དང་། ཉི་འོད་གླིང་ཕྲན་ཅིན་ཀུའུ་སྤྱི་ཤག ཝ་པ་གླིང་སྡེ་ཁུལ་སོགས་ཉིང་སྐྱུར་བརྟག་དཔྱད་དཔེ་ལེན་བྱ་ཡུལ་དུ་ཕེབས་ནས་ས་གནས་ས་ཐོག་ཏུ་ཉིང་སྐྱུར་བརྟག་དཔྱད་མི་སྣའི་སྟོབས་ཤུགས་བཀོད་སྒྲིག་དང་། ས་གནས་ས་ཐོག་གི་སྒྲིག་ལམ་སྲུང་སྐྱོང་། སྔོན་འགོག་དང་ཚོད་འཛིན་གྱི་བྱ་ཐབས་དོན་འཁྱོལ། མང་ཚོགས་ཀྱི་ཞབས་ཞུ་འགན་ལེན་སོགས་ཀྱི་གནས་ཚུལ་ལ་ལྟ་ཞིབ་གནང་བ་རེད། ཁྲེན་ཡུང་ཆིས་གང་དུ་ཕེབས་ཀྱང་ཉིང་སྐྱུར་བརྟག་དཔྱད་དཔེ་ལེན་བྱེད་བཞིན་པའི་མང་ཚོགས་དུས་ཚོད་མང་པོ་སྒུག་དགོས་མིན་གྱི་གནས་ཚུལ་མཁྱེན་རྟོགས་ཞིབ་ཕྲ་གནང་བ་མ་ཟད། གྲོང་མི་ཚོས་ལྗོངས་ཡོངས་ཀྱི་རིམས་ནད་སྔོན་འགོག་དང་ཚོད་འཛིན་གྱི་ལས་དོན་ལ་བསམ་ཤེས་དང་རྒྱབ་སྐྱོར་གནང་བར་ཐུགས་རྗེ་ཆེ་ཡང་ཞུས་པ་རེད།
བརྟག་ཞིབ་མཇུག་འགྲིལ་རྗེས་ཁྲེན་ཡུང་ཆིས་སླར་ཡང་རིམས་ནད་སྔོན་འགོག་དང་ཚོད་འཛིན་གྱི་ལས་དོན་ལ་བཀོད་སྒྲིག་ཞིབ་ཕྲ་གནང་བ་རེད། ཁོང་གིས་ནན་བཤད་གནང་དོན། རིམས་ནད་སྔོན་འགོག་དང་ཚོད་འཛིན་གྱི་ལས་དོན་སྐོར་གྱི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཛུབ་སྟོན་དང་མཆན་བཀོད་མཛུབ་སྟོན་གལ་ཆེན་གྱི་དགོངས་དོན་ལག་བསྟར་དོན་འཁྱོལ་གཏིང་ཟབ་བྱས་ཏེ། རང་སྐྱོང་ལྗོངས་ཏང་ཨུད་དང་སྲིད་གཞུང་གི་བཀོད་སྒྲིག་བླང་བྱ་གཞིར་བཟུང་མི་དམངས་གོང་དུ་བཀུར་བ་དང་ཚེ་སྲོག་གོང་དུ་བཀུར་བ་མཐའ་འཁྱོངས་ཀྱིས་སྤྱིའི་ཐབས་ཇུས་དང་སྤྱིའི་མཛད་ཕྱོགས་ལ་གཡོ་འགུལ་མི་གཏོང་བ་མཐའ་འཁྱོངས་བྱས་ཏེ་རིམས་ནད་སྔོན་འགོག་དང་ཚོད་འཛིན་གྱི་ལས་དོན་ཁག་ལ་དམ་འཛིན་ནན་པོ་དང་དམ་འཛིན་ཏན་ཏིག་བྱེད་དགོས། ཐོན་ཁུངས་ཀྱི་སྟོབས་ཤུགས་སྤྱི་འདོམས་དང་བཀོད་སྒྲིག་ཚན་རིག་དང་མཐུན་པ་དང་། ཞིབ་བཤེར་བྱེད་དགོས་རིགས་ཚང་མར་ཞིབ་བཤེར། ལོགས་འཇོག་བྱེད་དགོས་རིགས་ཚང་མ་ལོགས་འཇོག བཅོས་སྐྱོང་བྱེད་དགོས་རིགས་ཚང་མར་བཅོས་སྐྱོང་བཅས་བྱས་ཏེ། དུས་ཡུན་ཐུང་ཤོས་ནང་སྤྱི་ཚོགས་གཙང་བཟོ་བྱེད་དགོས། དྲ་མིག་ཅན་གྱི་དོ་དམ་ལག་ལེན་བསྟར་ནས་ཉིང་སྐྱུར་བརྟག་དཔྱད་དཔེ་ལེན་ས་ཚིགས་བཀོད་སྒྲིག་ལུགས་མཐུན་གྱིས་གཞི་རིམ་རྩ་འཛུགས་ཀྱི་ནུས་པ་འདོན་པ་དང་། མི་སྣའི་གྲངས་འབོར་དང་། དཔེ་ལེན་བྱེད་མཁན་མང་ཚོགས་མང་ཉུང་། དཔེ་ལེན་བྱེད་ཚད་བཅས་ལ་གཞིགས་ཏེ་བརྟག་དཔྱད་ཀྱི་དུས་མཚམས་བཀོད་སྒྲིག་ལུགས་མཐུན་བྱས་ནས་གྲོང་མིར་ཁག་ཐེངས་དབྱེ་བ་དང་དུས་མཚམས་དབྱེ་ནས་གོ་རིམ་ལྡན་པའི་ངང་བརྟག་དཔྱད་བྱ་རྒྱུར་ཁྲིད་སྟོན་བྱེད་དགོས། དཔེ་ལེན་བྱ་ཡུལ་གྱི་སྒྲིག་ལམ་སྲུང་སྐྱོང་ལ་ཤུགས་སྣོན་བརྒྱབ་ནས“བར་ཐག་སྨི་གཅིག”འཇོག་པ་དང་ཁོར་ཡུག་དུག་སེལ་སོགས་ཀྱི་བྱེད་ཐབས་དོན་འཁྱོལ་ནན་པོ་བྱས་ཏེ། འདུ་འཛོམས་མི་བྱེད་པའི་འགན་ལེན་བྱས་ནས་ཕན་ཚུན་མི་འགོས་པར་བྱེད་དགོས། ཞབས་འདེགས་ལ་ཤུགས་སྣོན་བརྒྱབ་ནས་རྒན་རྒོན་དང་སྦྲུམ་མ་སོགས་དམིགས་བསལ་ཚོགས་སྤྱི་སྔོན་ལ་འགན་ལེན་བྱས་ཏེ་བརྟག་བཤེར་བྱ་རྒྱུར་སྒུག་བཞིན་པའི་མི་སྣར་འཐུང་ཆུ་མཁོ་འདོན་ཡག་པོ་བྱེད་དགོས། འབྲེལ་ཡོད་ཕྱོགས་ཀྱི་དང་བླངས་པ་སོགས་ཀྱི་སྟོབས་ཤུགས་མཐུན་སྦྱོར་ཧུར་ཐག་བྱས་ནས། སྒུལ་བདེའི་ལྟ་ཞིབ་ཚད་ལེན་རླངས་འཁོར་སོགས་སྒྲིག་ཆས་སྒྲིག་སྦྱོར་བྱེད་པ་དང། ལྷ་ས་གྲོང་ཁྱེར་ལ་རྒྱབ་སྐྱོར་བྱེད་ཤུགས་ཆེ་རུ་གཏོང་བ། ཉིང་སྐྱུར་བརྟག་དཔྱད་དཔེ་ལེན་ས་ཚིགས་མང་དུ་གཏོང་བ། བཀོད་པ་ལེགས་སུ་གཏོང་བ། དུས་ཚོད་བརྩོན་ལེན། ནད་དུག་གཙང་སེལ་ཐུབ་པར་བརྩོན་ལེན་བཅས་བྱས་ནས་ཆུ་ཚོད་24ནང་རེས་སྐོར་དང་པོའི་མི་ཚང་མར་ཉིང་སྐྱུར་བརྟག་དཔྱད་དཔེ་ལེན་གྱི་ལས་འགན་ལེགས་སྒྲུབ་བྱས་ཏེ། རིམས་ནད་ཚར་གཅོད་དམག་འཐབ་ལ་གང་མགྱོགས་རྒྱལ་ཁ་ཐོབ་པར་བྱས་ནས་མི་དམངས་མང་ཚོགས་ཀྱི་ཚེ་སྲོག་བདེ་འཇགས་དང་གཟུགས་གཞི་བདེ་ཐང་ལ་སྲུང་སྐྱོང་ཏན་ཏིག་བྱེད་དགོས།