ཉེ་ཆར། བོད་རང་སྐྱོང་ལྗོངས་མི་དམངས་སྲིད་གཞུང་དང་སི་ཁྲོན་སློབ་ཆེན་ཧྭ་ཤིས་སྨན་ཁང་དང་ཧྭ་ཤིས་སྨན་ཁང་གཉིས་པའི་དབར་མཉམ་ལས་བྱས་ནས་རྒྱལ་ཁབ་ས་ཁོངས་སྨན་བཅོས་ལྟེ་གནས་མཉམ་དུ་བསྐྲུན་རྒྱུའི་གན་འཇོག་མཛད་སྒོ་དེ་བརྙན་ལམ་འབྲེལ་མཐུད་ཀྱི་རྣམ་པའི་ཐོག་ནས་ལྷ་ས་དང་ཁྲེང་ཏུར་འཚོགས་པ་རེད། ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་རང་སྐྱོང་ལྗོངས་ཀྱི་རྒྱུན་ལས་ཀྲུའུ་ཞི་གཞོན་པ་ཁྲེན་ཡུང་ཆིས་ལྷ་སར་མཛད་སྒོར་ཞུགས་པ་མ་ཟད་གསུང་བཤད་ཀྱང་གནང་བ་རེད། སི་ཁྲོན་སློབ་ཆེན་གྱི་སློབ་སྤྱི་གཞོན་པ་ཁྲུའུ་ལེང་ཡིང་དང་། སི་ཁྲོན་སློབ་ཆེན་ཧྭ་ཤིས་སྨན་ཁང་ཏང་ཨུད་ཀྱི་ཧྲུའུ་ཅི་ལི་ཀྲེང་ཁྲི། ཧྭ་ཤིས་སྨན་ཁང་གཉིས་པའི་ཏང་ཨུད་ཀྱི་ཧྲུའུ་ཅི་ཧོང་ཡུང་བཅས་ཁྲེང་ཏུར་མཛད་སྒོར་ཕེབས་པ་དང་འབྲེལ་གསུང་བཤད་ཀྱང་གནང་བ་རེད། རང་སྐྱོང་ལྗོངས་ཀྱི་ཀྲུའུ་ཞི་གཞོན་པ་ལུའོ་མེ་དང་། ལི་ཀྲེང་ཁྲི། ཧོང་ཡུང་བཅས་ཀྱིས་ཕྱོགས་གཉིས་པོའི་ཚབ་ཞུས་ནས་རྒྱལ་ཁབ་ས་ཁོངས་སྨན་བཅོས་ལྟེ་གནས་མཉམ་སྐྲུན་གྲོས་མཐུན་ལ་མིང་རྟགས་བཀོད་པ་རེད།
ཁྲེན་ཡུང་ཆིས་མཉམ་སྐྲུན་གྲོས་མཐུན་ལ་མིང་རྟགས་བཀོད་པ་དེ་ཐོག་ནས་བོད་ཀྱི་རྒྱལ་ཁབ་ས་ཁོངས་སྨན་བཅོས་ལྟེ་གནས་འཛུགས་སྐྲུན་ལ་ངོ་བོའི་རང་བཞིན་གྱི་གོམ་སྟབས་སྤོས་པ་དེས་བོད་ཀྱི་སྨན་བཅོས་འཕྲོད་བསྟེན་བྱ་གཞག་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་ནུས་ལྡན་ཐེབས་ནས་རང་ལྗོངས་ཀྱི་མི་དམངས་མང་ཚོགས་ལ་ཕྱོགས་ཡོངས་དང་ཚེ་སྲོག་གི་དུས་འཁོར་ཧྲིལ་པོའི་སྨན་བཅོས་འགན་ལེན་ཐུབ་ངེས་རེད། རིམ་པ་ཁག་དང་སྡེ་ཚན་ཁག་གིས་ལྟེ་བའི་སྒྲིག་བཀོད་འཛུགས་སྐྲུན་དང་ཚན་ཞིབ་གསར་གཏོད་སོགས་ལ་རྒྱབ་སྐྱོར་བྱེད་ཤུགས་སྔར་བས་ཆེ་རུ་བཏང་ནས་རང་སྐྱོང་ལྗོངས་སྲིད་གཞུང་གིས་ལྟེ་གནས་འཛུགས་སྐྲུན་དང་གཉེར་སྐྱོང་ལ་རྒྱབ་སྐྱོར་བྱེད་པའི་སྲིད་ཇུས་ཕྱོགས་ཡོངས་ནས་དོན་འཁྱོལ་བྱས་ཏེ། བོད་སྐྱོད་རིགས་གཅིག་མཁས་ཅན་ལ་ལས་དོན་དང་འཚོ་བའི་འགན་ལེན་ཡག་པོ་བྱས་ནས། བྱ་བ་བཟང་པོ་ཡག་པོ་སྒྲུབ་པ་དང་བྱ་བ་དངོས་ཏན་ཏིག་སྒྲུབ་དགོས་ཞེས་གསུངས་པ་རེད།
ཁྲེན་ཡུང་ཆིས་རྒྱལ་ཡོངས་ཀྱི་སྨན་ཁང་གྲགས་ཅན་ཡིན་པའི་ཧྭ་ཤིས་སྨན་ཁང་དང་ཧྭ་ཤིས་སྨན་ཁང་གཉིས་པར་རྩེར་སོན་གྱི་སྨན་བཅོས་ལག་རྩལ་དང་། ཕྱོགས་བསྡུས་སྟོབས་ཤུགས་ཆེན་པོ། སྨན་བཅོས་ཞབས་ཞུ་སྤུས་དག་བཅས་ཡོད། སྨན་ཁང་གཉིས་ཀྱིས་རང་ལྗོངས་ཀྱི་འཕྲོད་བསྟེན་བདེ་ཐང་བྱ་གཞག་ལ་མཛུབ་ཁྲིད་དང་རོགས་རམ་དེ་བས་མང་བ་བྱས་ནས་འཕེལ་རྒྱས་འཆར་འགོད་དང་རིག་ཚན་འཛུགས་སྐྱོང་སོགས་ལ་ཆེད་ལས་ཀྱི་ལེགས་ཆ་འདོན་སྤེལ་དང་དངོས་སྒྲུབ་མཉམ་ལས་གཏིང་ཟབ་བྱས་ཏེ་ལག་རྩལ་གྱི་སྟོབས་ཤུགས་ཆེན་པོ་དང་། གསར་གཏོད་ཀྱི་ཤེས་ལྡན་མི་སྣ་གསོ་སྐྱོང་བྱེད་སྟངས། སྔོན་ཐོན་གྱི་དོ་དམ་ཉམས་མྱོང་བཅས་བོད་དུ་ནང་འདྲེན་དང་བོད་ལ་བཞག་ནས་ཆུ་ཚད་དེ་བས་མཐོ་བའི་རྒྱལ་ཁབ་ས་ཁོངས་སྨན་བཅོས་ལྟེ་གནས་ཤིག་ཐུན་མོང་ཐོག་གཏོད་རྒྱུའི་རེ་བ་ཡོད་ཅེས་གསུངས་པ་རེད།