◆ འདུ་ཤེས་གནད་ལ་འཁེལ་བ་དང་། དག་ཐེར་གནད་ལ་འཁེལ་བ། འགན་འཁྲི་གནད་ལ་འཁེལ་བ་བཅས་བྱས་ནས་བདེ་འཇགས་འཕེལ་རྒྱས་ཀྱི་ཆུ་ཚད་ཕྱོགས་ཡོངས་ནས་མཐོ་རུ་གཏོང་དགོས།
ཚེས་11ཉིན། རྒྱལ་ཡོངས་ཀྱི་བདེ་འཇགས་ཐོན་སྐྱེད་སྐོར་གྱི་བརྙན་འཕྲིན་ཁ་པར་ཚོགས་འདུ་འཚོགས་པ་དང་། ཚོགས་འདུ་མཇུག་འགྲིལ་རྗེས། ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་རང་སྐྱོང་ལྗོངས་ཀྱི་ཀྲུའུ་ཞི་ཡན་ཅིན་ཧའེ་ཡིས་ཚོགས་འདུ་གཙོ་སྐྱོང་གནང་ནས་གོམ་སྟབས་རྗེས་མའི་ལས་དོན་བཀོད་སྒྲིག་གནང་ཞིང་། ཁོང་གིས་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་མཛུབ་ཁྲིད་དུ་བྱ་རྒྱུ་མཐའ་འཁྱོངས་བྱས་ནས“མི་དམངས་གོང་དུ་བཀུར་བ་དང་། ཚེ་སྲོག་གོང་དུ་བཀུར་བའི”འདུ་ཤེས་བརྟན་པོ་འཛུགས་པ་དང་། “རིམས་ནད་སྔོན་འགོག་བྱེད་པ་དང་། དཔལ་འབྱོར་བརྟན་པོ་ཡོང་བ་བྱེད་པ། འཕེལ་རྒྱས་བདེ་འཇགས་ལྡན་པ་བཅས་དགོས་པའི”བླང་བྱ་ལྟར་འཕེལ་རྒྱས་གཏོང་བར་མིའི་ཚེ་སྲོག་བློས་གཏོང་རིན་དོད་དུ་གཏན་ནས་མི་བྱེད་རྒྱུ་མཐའ་འཁྱོངས་བྱེད་པ། “བདེ་འཇགས་ཐོན་སྐྱེད་ཀྱི་བྱ་ཐབས་ནན་པོ་15”དང“དོན་འཁྱོལ་ལྔའི”བླང་བྱ་མཐའ་གཅིག་ཏུ་ལག་བསྟར་དོན་འཁྱོལ་བརྟན་པོ་བྱེད་པ། རྟག་ཏུ་ཉེན་ཁར་འགོག་ཟོན་བཅས་ཀྱིས་འདུ་ཤེས་གནད་ལ་འཁེལ་བ་དང་། དག་ཐེར་གནད་ལ་འཁེལ་བ། འགན་འཁྲི་གནད་ལ་འཁེལ་བ་བཅས་བྱས་ནས་དོན་རྐྱེན་ཆེན་པོ་དང་ཚབས་ཆེན་མཐའ་གཅིག་ཏུ་གཏན་འགོག་དང་། བདེ་འཇགས་ཀྱི་ཉེན་ཁའི་མངོན་མེད་རྐྱེན་ངན་དུས་ཐོག་ཏུ་དག་ཐེར། ཚན་རྩལ་ལ་བརྟེན་ནས་དུས་བདེར་ཤུགས་སྣོན་བརྒྱབ་སྟེ་བདེ་འཇགས་ལྡན་པའི་འཕེལ་རྒྱས་ཀྱི་ཆུ་ཚད་ཕྱོགས་ཡོངས་ནས་མཐོ་རུ་གཏོང་དགོས་པའི་ནན་བཤད་གནང་བ་རེད།
རེན་ཝེ་དང་། ཤའོ་ཡིའུ་ཚའེ། ལྕགས་རྭ་བློ་བཟང་བསྟན་འཛིན། ལུའོ་མེ། ཀྲང་ཧུང་པོ་བཅས་ཚོགས་འདུར་ཕེབས་ཡོད།
ཡན་ཅིན་ཧའེ་ཡིས་བདེ་འཇགས་ཐོན་སྐྱེད་ལ་དམ་འཛིན་ནན་པོ་བྱེད་པར་སྔོན་ལ་བདེ་འཇགས་ཐོན་སྐྱེད་ཀྱི་འདུ་ཤེས་བརྟན་པོ་འཛུགས་དགོས། ལྗོངས་ཡོངས་ཀྱི་རིམ་པ་ཁག་དང་སྡེ་ཚན་ཁག་གིས་ངེས་པར་དུ་བསམ་བློ་སྔོན་ལ་འཇོག་པ་དང་དུས་དང་རྣམ་པ་ཀུན་ཏུ་བློ་མི་བདེ་བའི་འགན་འཁྲིའི་སེམས་པ་བཅངས་ཏེ་བདེ་འཇགས་ཀྱི་འདུ་ཤེས་བརྟན་པོ་འཛུགས་པར་སྣེ་ཁྲིད་དང་། འཕེལ་རྒྱས་དང་བདེ་འཇགས་ལ་སྤྱི་འདོམས། དམ་འཛིན་ལྷོད་མེད་བྱས་ནས“ཟུར་དུ་འཇོག་པ”དང་། “ནར་འགྱངས་བྱེད་པ”“ལྷོད་གཡེང་དུ་གཏོང་བའི”བསམ་པའི་འཁྱེར་སོ་གང་ཡིན་ཡང་མཐའ་གཅིག་ཏུ་གཏན་འགོག་བྱས་ཏེ་དམ་འཛིན་ཤུགས་ཆེ་དྲགས་ནའང་ལྷོད་གཡེང་སྤུ་ཙམ་ཡང་གཏོང་མི་རུང་། བདེ་འཇགས་ཐོན་སྐྱེད་ཀྱི་དོན་རྐྱེན་གྱོད་གཞིའི་ཐད“གྱོད་དཔེ་དཔྱད་གཞིར་འཛིན་པ་དང་། གྱོད་དཔེར་བརྟེན་ནས་སྒྱུར་བཅོས་ལ་སྐུལ་འདེད་གཏོང་བའི”ཉེན་ཟོན་སློབ་གསོའི་བྱེད་སྒོ་སྒྲིག་འཛུགས་བྱས་ནས་སྤེལ་ཏེ། ཁེ་ལས་དང་། སློབ་གྲྭ ལས་ཁུངས། གྲོང་གསེབ། ཁྱིམ་ཚང་། དགོན་སྡེ། མི་མང་འདུ་འཛོམས་བྱ་ཡུལ་བཅས་ལ་སྤེལ་ནས་སྤྱི་ཚོགས་ཡོངས་ཀྱི་བདེ་འཇགས་ཀྱི་འདུ་ཤེས་ཟབ་ཏུ་འགྲོ་བར་སྣེ་ཁྲིད་བྱེད་དགོས་ཞེས་གསུངས།
ཁོང་གིས་ངེས་པར་དུ་འགན་འཁྲི་བདའ་འདེད་གཏོང་བར་དམ་འཛིན་བྱས་ནས“ངེས་པར་དུ་གསུམ”གྱི་འགན་འཁྲིའི་སྦྲེལ་ཐག་ནན་དུ་བཏང་སྟེ། ཁྱབ་ཁོངས་དང་། ཚན་པ། ལྷུ་ཚིགས་བཅས་ཁག་གི་བདེ་འཇགས་ཀྱི་སྔོན་འགོག་བྱ་ཐབས་སྔར་བས་ཞིབ་ཚགས་དང་ཏན་ཏིག་ཡོང་བར་བྱེད་དགོས་པ་དང་། མཉམ་འབྲེལ་ལྟ་སྐུལ་ཞིབ་བཤེར་བྱས་ནས་འགན་འཁྲི་དོན་འཁྱོལ་གནད་འཁེལ་མེད་རིགས་ལ་ཞིབ་བཤེར་ཐག་གཅོད་ནན་པོ་དང་འགན་འཁྲི་བདའ་འདེད་ནན་པོ་བཏང་སྟེ། དོན་དག་འདྲི་རྩད་བྱེད་པར་ངེས་པར་དུ་མི་ལ་འདྲི་རྩད་དང་། མི་ལ་འདྲི་རྩད་བྱེད་པར་ངེས་པར་དུ་འགན་འཁྲི་འདྲི་རྩད། འགན་འཁྲི་འདྲི་རྩད་མཐིལ་ཕྱིན་པ་བྱས་ནས“དོན་རྐྱེན་གྱི་འབྱུང་རྐྱེན་གསལ་པོ་མ་བྱུང་བར་ཐར་པ་མི་གཏོང་བ་དང་། འགན་འཁྲི་འཁུར་མཁན་མི་དང་ཚན་པ་ཐག་གཅོད་མ་བྱུང་བར་ཐར་པ་མི་གཏོང་བ་དང་། བཅོས་སྒྲིག་གི་བྱ་ཐབས་གནད་ལ་མ་འཁེལ་བར་ཐར་པ་མི་གཏོང་བ། འབྲེལ་ཡོད་མི་ལ་སློབ་གསོ་མ་ཐེབས་བར་ཐར་པ་མི་གཏོང་བ”བཅས་བྱས་ནས། དོན་འཁྱོལ་ལ་དམ་འཛིན་བྱེད་པའི་སྟོན་ཕྱོགས་ཁ་གསལ་བཟོས་ཏེ་ཏང་གི་ཚོགས་ཆེན་ཉི་ཤུ་པ་རྒྱལ་ཁའི་ངང་འཚོག་རྒྱུར་བདེ་འཇགས་བརྟན་ལྷིང་གི་སྤྱི་ཚོགས་ཁོར་ཡུག་ཅིག་གཏོད་དགོས་པའི་བླང་བྱ་བཏོན་པ་རེད།