ཉེ་ཆར། རང་སྐྱོང་ལྗོངས་ཏང་ཨུད་ཀྱི་རྒྱུན་ལས་ཧྲུའུ་ཅི་གཞོན་པ་རང་སྐྱོང་ལྗོངས་སྲིད་གྲོས་ཏང་ཙུའི་ཧྲུའུ་ཅི་ཀྲོང་ཡན་འབྲས་སྤུངས་དགོན་དང་། སེ་ར་དགོན། ལྷ་ལྡན་གཙུག་ལག་ཁང་བཅས་སུ་ཕེབས་ནས“འདུ་ཤེས་གསུམ”གྱི་སློབ་གསོ་དང་། མེ་ཟོན་བདེ་འཇགས། རིག་དངོས་སྲུང་སྐྱོབ་སོགས་ཀྱི་ལས་དོན་ལ་བརྟག་ཞིབ་གནང་བ་རེད།

འབྲས་སྤུངས་དགོན་གྱི་ཚོགས་ཆེན་འདུ་ཁང་གི་ཐོག་སོ་གཉིས་པའི་གནའ་དཔེ་ཁང་དུ་དགེ་འདུན་པ་ཚོས་ཆ་འཕྲིན་ཅན་སོགས་ཚན་རྩལ་བྱ་ཐབས་སྤྱད་དེ་གནའ་དཔེ་སྣ་ཚོགས་ཉམས་གསོ་བྱེད་བཞིན་ཡོད་པ་རེད། གནས་ཚུལ་དེ་དག་གཟིགས་སྐབས། ཀྲོང་ཡན་གྱིས་འབྲས་སྤུངས་དགོན་གྱི་རྩ་ཆེའི་རིག་དངོས་ནི་ཀྲུང་ཧྭའི་མི་རིགས་ཁག་དབར་འགྲོ་འོང་དང་། སྤེལ་རེས། མཉམ་འདྲེས་བཅས་དང་། ཐུན་མོང་ཐོག་མཐུན་སྒྲིལ་ཡར་ཐོན་དང་ཐུན་མོང་ཐོག་དར་རྒྱས་གོང་འཕེལ་གྱི་ལོ་རྒྱུས་ཀྱི་དཔང་པོ་ཞིག་རེད། “སྲུང་སྐྱོབ་གཙོ་བོར་བྱེད་པ་དང་། མྱུར་སྐྱོབ་ཨང་དང་པོར་འཛིན་པ། བེད་སྤྱོད་ལུགས་མཐུན་བྱེད་པ། དོ་དམ་ལ་ཤུགས་སྣོན་རྒྱག་པ”བཅས་ཀྱི་ལས་ཀའི་བྱེད་ཕྱོགས་ཕྱོགས་ཡོངས་ནས་ལག་བསྟར་བྱས་ཏེ“རིག་དངོས་ཀྱི་གསོན་ཤུགས་འཕེལ་བར་བྱེད་པའི”དོན་ཆེན་འདི་ལེགས་པར་སྒྲུབ་པ་དང་། རིག་དངོས་སྲུང་སྐྱོབ་དང་དེང་རབས་ཀྱི་ཚན་རྩལ་མཉམ་འདྲེས་གསར་གཏོད་ལ་སྐུལ་འདེད་གཏོང་བ། སྲུང་སྐྱོབ་བྱེད་རིང་རིག་དངོས་ཀྱི་ཐོན་ཁུངས་བེད་སྤྱོད་ཡག་པོ་བཅས་བྱས་ནས་རིག་དངོས་སྲུང་སྐྱོབ་ཀྱི་གྲུབ་འབྲས་ལས་མི་རིགས་ཁག་གི་མང་ཚོགས་ལ་ཕན་པ་སྔར་ལས་མང་བ་ཐོབ་པར་བྱེད་དགོས་ཞེས་གསུངས་པ་རེད།

སེ་ར་དགོན་དུ་ཀྲོང་ཡན་གྱིས་བོད་ལྗོངས་ནང་བསྟན་སློབ་གླིང་སེ་ར་དགོན་ཡན་ལག་སློབ་གླིང་གི་སློབ་ཁང་དང་ཟ་ཁང་སོགས་སུ་ཕེབས་ནས་དགེ་འདུན་པ་ཚོའི་སློབ་སྦྱོང་དང་འཚོ་བའི་གནས་ཚུལ་ས་གནས་ས་ཐོག་ཏུ་གཟིགས་ཞིབ་གནང་བ་དང་འབྲེལ་དགོན་སྡེ་དོ་དམ་ཨུ་ལྷན་གྱི་ལས་བྱེད་པ་དང་བཞུགས་མོལ་ཡང་གནང་ཞིང་། ཁོང་གིས་ལྗོངས་ཡོངས་ཀྱི་ཆོས་ལུགས་ལས་རིགས་སུ“འདུ་ཤེས་གསུམ”གྱི་སློབ་གསོ་གཏིང་ཟབ་སྤེལ་བ་ནི་རང་སྐྱོང་ལྗོངས་ཏང་ཨུད་ཀྱིས་བཏོན་པའི་ཐབས་ཇུས་བཀོད་སྒྲིག་གལ་ཆེན་ཞིག་རེད། རིམ་ཁག་དགོན་སྡེ་དོ་དམ་ཨུ་ལྷན་དང་རྒྱ་ཆེའི་དགོན་སྡེར་བཅའ་སྡོད་ལས་བྱེད་པས་ལྗོངས་ཡོངས་སུ་སྤེལ་བའི“འདུ་ཤེས་གསུམ”གྱི་སློབ་གསོའི་དོན་སྙིང་གལ་ཆེན་ལ་གོ་བ་གཏིང་ཟབ་བླངས་ཏེ་ཡང་དག་པའི་ཆབ་སྲིད་ཀྱི་ཁ་ཕྱོགས་མཐའ་འཁྱོངས་བྱེད་པ་དང་། བྱེད་ལུགས་བྱེད་སྟངས་རྒྱུན་ཆད་མེད་པར་གསར་གཏོད་བྱེད་པ། དགོན་པར་བསྟུན་ནས་ཇུས་འགོད་ཀྱིས་སྒྲོག་འགྲེལ་གྱི་ལས་དོན་ཡག་པོ་སྒྲུབ་པ། དགེ་འདུན་པའི་རང་ངོས་སློབ་གསོ་དང་དོ་དམ་ལ་ཤུགས་སྣོན་རྒྱག་པ་བཅས་བྱས་ནས། དགེ་འདུན་པ་ཚོར་ཐོས་བསམ་མྱོང་རྟོགས་ཁྲོད“འདུ་ཤེས་གསུམ”དངོས་འབྲེལ་ནང་སེམས་རྒྱུད་ལ་འཇགས་པ་དང་ཕྱི་ལག་ལེན་ལ་འཁྱོལ་བར་བྱེད་དགོས། ཆོས་ལུགས་ལས་རིགས་ཀྱི་འཐུས་ཚབ་མི་སྣའི་ཐུན་མོང་མ་ཡིན་པའི་ནུས་པ་བཏོན་ཏེ། རྒྱ་ཆེའི་དགེ་འདུན་པ་ཚོར་ཆོས་ལུགས་ལས་རྒྱལ་ཁབ་ཆེ་བ་དང་། འདུལ་ཁྲིམས་ལས་རྒྱལ་ཁྲིམས་ཆེ་བ། ཆོས་འབངས་ལས་སྤྱི་དམངས་ཆེ་བ། བཅའ་ཁྲིམས་མདུན་དུ་མི་ཚང་མ་འདྲ་མཉམ་ཡིན་པ་བཅས་ཀྱི་ཁྲིམས་སྐྱོང་གི་འདུ་ཤེས་བརྟན་པོ་འཛུགས་པར་ཁྲིད་སྟོན་བྱས་ནས“འདུ་ཤེས་གསུམ”གྱི་སློབ་གསོར་ཕན་འབྲས་དངོས་ཐོན་པའི་འགན་ལེན་བྱེད་དགོས་ཞེས་གསུངས་པ་རེད།

ལྷ་ལྡན་གཙུག་ལག་ཁང་དུ། ཀྲོང་ཡན་གྱིས་མེ་ཟོན་ལས་དོན་གྱི་བྱེད་ཐབས་མཁྱེན་རྟོགས་ཞིབ་ཕྲ་གནང་ཞིང་། ཁོང་གིས་རིམ་པ་ཁག་དང་སྡེ་ཚན་ཁག་གིས་དགོན་སྡེའི་མེ་ཟོན་བདེ་འཇགས་ཀྱི་འགན་འཁྲི་དོན་འཁྱོལ་ནན་པོ་བྱས་ནས། དྲིལ་བསྒྲགས་སློབ་གསོ་གཏོང་ཤུགས་ཆེ་རུ་གཏོང་བ་དང་དགོན་སྡེའི་མེ་ཟོན་བདེ་འཇགས་ཀྱི་ནུས་པ་ཆེ་རུ་དང་ཆུ་ཚད་མཐོ་རུ་བཏང་སྟེ། དགོན་སྡེ་དང་རིག་དངོས་ཀྱི་མེ་ཟོན་བདེ་འཇགས་ནུས་ཤུགས་ཡོད་རྒུས་འགན་ལེན་བྱེད་དགོས་པའི་ནན་བཤད་གནང་བ་རེད།