ཚེས་2ཉིན། ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་རང་སྐྱོང་ལྗོངས་ཀྱི་ཀྲུའུ་ཞི་ཡན་ཅིན་ཧའེ་ཡིས་རང་སྐྱོང་ལྗོངས་སྲིད་གཞུང་གི་རྒྱུན་ལས་ཚོགས་འདུ་གཙོ་སྐྱོང་གནང་ནས་ས་གནས་ཀྱི་ཡིད་རྟོན་བློ་འདྲིའི་ལས་སྟེགས་བསྐྲུན་པ་དང་། ཁྲིམས་སྐྱོང་སྲིད་གཞུང་འཛུགས་སྐྱོང་། སྲིད་གཞུང་ལས་དོན་གྱི་དུས་བཀག་དཔྱད་གླེང་བྱ་ཐབས། སྲིད་གཞུང་གི་ལྟ་འདོམས་ཕན་ནུས་ཆེ་རུ་གཏོང་བ་སོགས་ཀྱི་དོན་གནད་ལ་ཞིབ་འཇུག་གནང་བ་རེད།
ཚོགས་འདུའི་ཐོག་བསྟན་དོན། ས་གནས་ཀྱི་ཡིད་རྟོན་བློ་འདྲིའི་ལས་སྟེགས་བསྐྲུན་རྒྱུ་དེ་སྤྱི་ཚོགས་ཀྱི་ཡིད་རྟོན་མ་ལག་འཐུས་སྒོ་ཚང་དུ་གཏོང་བ་དང་ཚོང་གཉེར་ཁོར་ཡུག་ལེགས་སུ་གཏོང་བའི་ཐབས་ལམ་གལ་ཆེན་ཞིག་དང་། དངུལ་རྩའི་རྨང་གཞིའི་སྒྲིག་བཀོད་འཐུས་སྒོ་ཚང་དུ་གཏོང་བ་དང་གྲངས་འཛིན་བོད་ལྗོངས་འཛུགས་སྐྲུན་ལ་སྐུལ་འདེད་གཏོང་བའི་བྱ་ཐབས་གལ་ཆེན་ཞིག ཁེ་ལས་འབྲིང་ཆུང་ཕྲན་གསུམ་ལ་དངུལ་བུན་གཏོང་ཚད་དང་། ཐོབ་རུང་རང་བཞིན། སྟབས་བདེ་བསྐྲུན་ཚད་བཅས་མཐོ་རུ་གཏོང་བའི་གཞི་རྟེན་གལ་ཆེན་ཞིག་བཅས་ཡིན་པས་མིག་སྔའི་དུས་བབ་འོག་ཁེ་ལས་འབྲིང་ཆུང་ཕྲན་གསུམ་ལ་དཀའ་ངལ་སེལ་རོགས་བྱེད་པའི་ཐད་དོན་སྙིང་གལ་ཆེན་ལྡན་ཡོད། མཉམ་དུ་སྐུལ་འདེད་གཏོང་བ་དང་། བཀོལ་སྤྱོད་གཏིང་ཟབ་ཏུ་གཏོང་བ། ས་གནས་ཀྱི་ཡིད་རྟོན་བློ་འདྲིའི་ལས་སྟེགས་འཛུགས་སྐྲུན་བཀོལ་སྤྱོད་བྱ་རྒྱུ་གོ་སྐབས་སུ་བྱས་ནས་དངུལ་རྩའི་ཁོངས་གཏོགས་དང་སྲིད་དོན་སྡེ་ཚན་དབར་གྱི“ཆ་འཕྲིན་གྱི་བཀག་རྒྱ”སེལ་དགོས། བདེ་འཇགས་འགན་ལེན་བྱས་ནས་ཡིད་རྟོན་ཆ་འཕྲིན་གྱི་གཙོ་གནད་ཁེ་དབང་སྲུང་སྐྱོང་ལ་ཤུགས་སྣོན་རྒྱག་པ་དང་ཆ་འཕྲིན་བདེ་འཇགས་དོ་དམ་ལ་ཤུགས་སྣོན་རྒྱག་དགོས།
ཚོགས་འདུའི་ཐོག་བསྟན་དོན། ཁྲིམས་ལྟར་སྲིད་འཛིན་པར་གཙོ་བོ“དཔོན་པོ་བཅོས་སྒྲིག”དང“དབང་ཆ་བཅོས་སྒྲིག”ལ་སྣང་ཆེན་བྱས་ཏེ་སྲིད་གཞུང་གི་ལས་དོན་མི་སྣ་དང་ལྷག་དོན་དུ་སྲིད་འཛིན་འགོ་ཁྲིད་གཙོ་བོའི་ཁྲིམས་སྐྱོང་གི་བསམ་བློ་དང་། ཁྲིམས་སྐྱོང་གི་གོམས་གཤིས། ཁྲིམས་སྐྱོང་ནུས་པ། ཁྲིམས་སྐྱོང་གི་གཅུན་འདོམས་བཅས་འཛུགས་པར་ཤུགས་སྣོན་རྒྱག་རྒྱུ་དེ་གནས་བབ་ཨང་དང་པོར་བཞག་ནས་ཁྲིམས་ལྟར་ལས་དོན་བསྒྲུབ་རྒྱུ་མཐའ་འཁྱོངས་བྱེད་དགོས། དམངས་ཆེད་སྲིད་དོན་སྒྲུབ་མཁན་གྱི་སྲིད་གཞུང་འཛུགས་སྐྱོང་ཧུར་ཐག་བྱས་ཏེ་སྲིད་འཛིན་གྱི་དབང་ཆ་ཁྲིམས་ལྟར་ཡོངས་བསྒྲགས་དང་སྲིད་འཛིན་གྱི་དབང་ཆ་འཁོར་སྐྱོད་བྱེད་པའི་བརྒྱུད་རིམ་ཡོངས་བསྒྲགས་དང་མཇུག་འབྲས་ཡོངས་བསྒྲགས་བྱས་ཏེ། མི་རིགས་ཁག་གི་མང་ཚོགས་ཚོར་སྲིད་གཞུང་ལ་ལྟ་སྐུལ་བྱེད་དུ་འཇུག་དགོས། ཁ་དན་ཚིག་གནས་ཀྱི་སྲིད་གཞུང་འཛུགས་སྐྱོང་ལ་ཤུགས་སྣོན་བརྒྱབ་སྟེ་ཁྲིམས་ལྟར་ཁས་ལེན་དོན་ཐོག་ཏུ་འཁྱོལ་བ་བྱེད་པ་ལས“དཔོན་པོ་གསར་པས་རྩིས་ཐོ་རྙིང་པར་ཁ་ཡ་མི་བྱེད་པ”བྱེད་མི་རུང་། འགན་འཁྲི་འཁུར་མཁན་གྱི་སྲིད་གཞུང་འཛུགས་སྐྱོང་ལ་ཤུགས་སྣོན་བརྒྱབ་སྟེ“ཁྲིམས་ཀྱིས་དབང་བསྐུར་མེད་ན་བྱེད་མི་རུང་། ཁྲིམས་བཀོད་འགན་འཁྲི་ངེས་པར་དུ་བསྒྲུབ་ཐུབ་པ”བྱེད་པ་དང་། “གློད་སྡོམ་ཞབས་གསུམ”གྱི་སྒྱུར་བཅོས་རྒྱུན་མཐུད་གཏིང་ཟབ་ཏུ་བཏང་ནས་ཚོང་གཉེར་ཁོར་ཡུག་རྒྱུན་ཆད་མེད་པར་ལེགས་སུ་གཏོང་དགོས།
ཚོགས་འདུའི་ཐོག་བསྟན་དོན། སྲིད་གཞུང་གི་འགན་ནུས་བསྒྱུར་རྒྱུ་དེ་སྤུས་ཚད་མཐོ་རུ་དང་ཕན་འབྲས་ཆེ་རུ་གཏོང་རྒྱུར་ཐུག་ཡོད། ལྟ་འདོམས་ལམ་སྲོལ་འཐུས་སྒོ་ཚང་དུ་བཏང་ནས“སུས་དོ་དམ་བྱེད་པའི”གནད་དོན་ནུས་ཤུགས་ཡོད་རྒུས་ཐག་གཅོད་བྱེད་དགོས་པ་དང་། “སུས་ཞིབ་བཤེར་ཆོག་མཆན་སྤྲད་ན་དེས་ལྟ་འདོམས་བྱེད་པ་དང་སུས་དོ་དམ་གཙོ་བོ་བྱས་ན་དེས་ལྟ་འདོམས་བྱེད་པའི”རྩ་དོན་མཐའ་འཁྱོངས་ཀྱིས་འགན་དབང་གི་གསལ་ཐོ་ཁ་གསལ་བཟོས་ནས་གནད་དོན་ལ་དོ་དམ་བྱེད་མཁན་ཡོད་པ་དང་འགན་འཁྲི་འཁུར་མཁན་ཡོད་པར་བྱེད་དགོས། ལྟ་འདོམས་བྱེད་སྟངས་གསར་གཏོད་བྱས་ནས“དོ་དམ་ཇི་ལྟར་བྱ་རྒྱུའི”གནད་དོན་ཐག་གཅོད་གང་ཐུབ་བྱས་ཏེ་ཁྲིམས་སྐྱོང་ཅན་དང་། ཆ་འཕྲིན་ཅན། རིག་ནུས་ཅན་བཅས་ཀྱི་ལྟ་འདོམས་ལ་ཤུགས་སྣོན་རྒྱག་དགོས་པ་དང་ལྷག་པར་དུ་རྒྱང་རིང་ལྟ་འདོམས་དང་། སྒུལ་བདེའི་ལྟ་འདོམས། གཞི་གྲངས་ཆེན་མོའི་རིག་ནུས་ཀྱི་ཉེན་ཟོན་ཉེན་བརྡ་བཅས་སྤྱད་དེ“དོ་དམ་བྱེད་ཐུབ་པ”དང“དོ་དམ་ཡག་པོ་བྱེད་ཐུབ་པ”བྱེད་དགོས།
ཚོགས་འདུའི་ཐོག་ད་དུང་ཁྱད་ལྡན་ཐོན་ལས་དང་རྣམ་གྲངས་འཛུགས་སྐྲུན་ལ་མཁོ་བའི་ས་ཆ་སྤྱོད་པའི་གནད་དོན་ལ་ཞིབ་འཇུག་ཀྱང་བྱས་པ་རེད།