ཚེས་24ཉིན་གྱི་ཕྱི་དྲོར། ལྗོངས་ཏང་ཨུད་ཀྱི་རྒྱུན་ཨུ་རང་སྐྱོང་ལྗོངས་ཀྱི་རྒྱུན་ལས་ཀྲུའུ་ཞི་གཞོན་པ་ཤའོ་ཡིའུ་ཚའེ་ཡིས་ལྷ་སར་ཁྲེང་ཏུར་བཅའ་སྡོད་ཤང་ཀང་དཔལ་འབྱོར་ཚོང་དོན་དོན་གཅོད་ཁྲུའི་ཀྲུའུ་རེན་ལི་ཡུན་ཡན་བཅས་པ་དང་བཞུགས་མོལ་གནང་ནས་ཕྱོགས་གཉིས་པོས་མཉམ་ལས་ཁྱབ་ཁོངས་སྔར་བས་ཆེ་རུ་གཏོང་བ་དང་མཉམ་ལས་རིམ་པ་ཇེ་ཟབ་ཏུ་གཏོང་བའི་སྐོར་ལ་སྤེལ་རེས་གནང་བ་རེད།
ཤའོ་ཡིའུ་ཚའེ་ཡིས་བརྟག་ཞིབ་ཚོགས་ཆུང་དང་བཅས་པར་བོད་ཀྱི་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་གནས་ཚུལ་ངོ་སྤྲོད་གནང་ཞིང་། ཁོང་གིས་སྤྱི་ཁྱབ་ཧྲུའུ་ཅི་ཞི་ཅིན་ཕིང་དང་ཏང་ཀྲུང་དབྱང་གི་དམིགས་བསལ་ཐུགས་ཁུར་འོག ལྗོངས་ཡོངས་ཀྱི་མི་རིགས་ཁག་གི་ལས་བྱེད་པ་དང་མང་ཚོགས་ཀྱིས“དོན་ཆེན་བཞིར”དམིགས་པ་དང་། “འཛུགས་གཏོད་བཞིར”ནུས་ཤུགས་གཅིག་ཏུ་བསྒྲིལ་ཏེ་བོད་ཀྱི་བྱ་གཞག་ཁག་ཕྱོགས་ཡོངས་ནས་ཡར་རྒྱས་འགྲོ་བར་སྐུལ་འདེད་ཧུར་ཐག་བཏང་བས། དམངས་གཙོ་ཆབ་སྲིད་འགན་ལེན་གང་ལེགས་དང་། དཔལ་འབྱོར་དང་སྤྱི་ཚོགས་རྒྱུན་མཐུད་དང་སྐྱོན་བྲལ་ངང་འཕེལ་རྒྱས་འགྲོ་བ། མི་དམངས་ཀྱི་འཚོ་བ་ཉིན་རེ་བཞིན་ཡར་རྒྱས་འགྲོ་བ། ཕུལ་བྱུང་གི་སྲོལ་རྒྱུན་རིག་གནས་སྲུང་སྐྱོང་དང་འཕེལ་རྒྱས་བྱུང་བ། མི་རིགས་ཆོས་ལུགས་ལས་དོན་ལ་ཕན་འབྲས་མངོན་གསལ་དོད་པོ་ཐོན་པ། སྐྱེ་ཁམས་བདེ་འཇགས་སྲུང་ཡོལ་ཉིན་རེ་བཞིན་བརྟན་དུ་ཕྱིན་པ། ཀྲུང་ཧྭ་མི་རིགས་གཅིག་མཐུན་འདུས་གྲུབ་ཀྱི་འདུ་ཤེས་ཟམ་མི་ཆད་པར་བརྟན་དུ་སོང་བ་བཅས་ཀྱི་རྣམ་པ་བཟང་པོ་མངོན་ཡོད། བརྟག་ཞིབ་ཚོགས་ཆུང་དང་བཅས་པས་ཤང་ཀང་གི་ཁེ་ལས་དང་སྤུན་ཟླ་ཤང་ཀང་བར་བོད་ལྗོངས་དྲིལ་བསྒྲགས་དང་འོས་སྦྱོར་མང་ཙམ་བྱས་ཏེ་ཕྱོགས་གཉིས་པོའི་ཁྱབ་ཁོངས་ཁག་གི་འགྲོ་འོང་སྤེལ་རེས་དང་དཔལ་འབྱོར་ཚོང་དོན་མཉམ་ལས་ལ་སྔར་བས་སྐུལ་འདེད་གཏོང་བ་དང་ལྷག་པར་དུ་བོད་ཀྱི་ཁྱད་ལྡན་ལེགས་ཆའི་ཐོན་ལས་ཁྱབ་ཁོངས་ཀྱི་མཉམ་ལས་ལ་ཤུགས་སྣོན་བརྒྱབ་ནས་མཉམ་ལས་སྤེལ་རེས་ཀྱི་ལས་སྟེགས་ཤིག་གཏོད་རྒྱུའི་རེ་བ་ཡོད་ཅེས་གསུངས་པ་རེད།
ལི་ཡུན་ཡན་གྱིས་ཁྲེང་ཏུར་བཅའ་སྡོད་ཤང་ཀང་དོན་གཅོད་ཁྲུའུ་ཡིས་ཤང་ཀང་གི་ཁེ་ལས་བོད་དུ་བརྟག་ཞིབ་བྱེད་པར་སྒྲིག་འཛུགས་ཧུར་ཐག་བྱས་ནས་རིག་གནས་དང་། ཡུལ་སྐོར། སྒྱུ་རྩལ། ཁྱད་ལྡན་ཐོན་ལས་སོགས་ཁྱབ་ཁོངས་སུ་སྤེལ་རེས་གཏིང་ཟབ་དང་མ་འཇོག་མཉམ་ལས་ཧུར་ཐག་བྱ་རྒྱུ་ཡིན་ཞེས་གསུངས་པ་རེད།