ཚེས་25ཉིན། ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་དང་རང་སྐྱོང་ལྗོངས་ཀྱི་ཀྲུའུ་ཞི་ཡན་ཅིན་ཧའེ་ཡིས་རིམས་ནད་སྔོན་འགོག་དང་ཚོད་འཛིན་དང་འཕྲོད་བསྟེན་བདེ་ཐང་ལས་དོན་ལ་བརྟག་ཞིབ་གནང་བ་རེད།
ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་དང་རང་སྐྱོང་ལྗོངས་ཀྱི་རྒྱུན་ལས་ཀྲུའུ་ཞི་གཞོན་པ་ཁྲེན་ཡུང་ཆི་དང་རང་སྐྱོང་ལྗོངས་ཀྱི་ཀྲུའུ་ཞི་གཞོན་པ་ལུའོ་མེ་བརྟག་ཞིབ་གནང་བར་ལྷན་དུ་ཕེབས་པ་རེད།
རང་སྐྱོང་ལྗོངས་ནད་ཡམས་སྔོན་འགོག་དང་ཚོད་འཛིན་ལྟེ་གནས་དང་ལྗོངས་ནད་ཡམས་སྔོན་འགོག་གཞུང་ལས་ཁང་དུ་ཡན་ཅིན་ཧའེ་ཡིས་ཉིང་སྐྱུར་བརྟག་དཔྱད་དང་། ཏོག་གསར་རིམས་འགོག་སྨན་ཁབ་རྒྱག་ཚུལ། བོད་དུ་ཡོང་མཁན་ཐོ་འགོད་སོགས་ཀྱི་གནས་ཚུལ་མཁྱེན་རྟོགས་ཞིབ་ཕྲ་གནང་བ་དང་། ལྷ་ས་མེ་འཁོར་བབས་ཚུགས་ཀྱི་ཐོན་སྒོ་དང་འཛུལ་སྒོར། ཡན་ཅིན་ཧའེ་ཡིས་རིམས་ནད་སྔོན་འགོག་དང་ཚོད་འཛིན་ལས་དོན་སྤེལ་ཚུལ་ནན་ཏན་ངང་གསན་པ་རེད། ཁོང་གིས་ལྷ་སའི་རིམས་ནད་སྔོན་འགོག་དང་ཚོད་འཛིན་ལས་དོན་གལ་འགངས་ཤིན་ཏུ་ཆེན་པོ་ཡོད། མིག་སྔར་རིམས་ནད་སྔོན་འགོག་དང་ཚོད་འཛིན་གྱི་དམག་འཐབ་ཆེན་པོ་ད་དུང་མུ་མཐུད་རྒྱག་བཞིན་ཡོད་ལ་ནད་དུག་དང་རྒྱུན་ཆད་མེད་པར་འཐབ་རྩོད་བྱེད་བཞིན་ཡོད་པས། བག་མེད་ལྷོད་གཡེང་གཏན་ནས་བྱེད་མི་རུང་བར་སྔོན་འགོག་དང་ཚོད་འཛིན་བྱ་ཐབས་ཁག་ཇི་མ་ཇི་བཞིན་སྤེལ་ཏེ་རིམས་ནད་ཕྱི་ནས་མི་འགོས་པ་བྱེད་པའི་འགོག་རགས་བརྟན་དུ་གཏོང་དགོས། ལས་སྟེགས་འཛུགས་སྐྱོང་སྔར་བས་འཐུས་སྒོ་ཚང་དུ་གཏོང་བ་དང་། ཐོལ་བྱུང་གི་སྤྱི་པའི་འཕྲོད་བསྟེན་དོན་རྐྱེན་གྱི་ཉེན་བརྡ་གཏོང་བ་དང་ལྟ་ཞིབ་ཚད་ལེན་བྱེད་ཤུགས་ཆེ་རུ་གཏོང་བ། ནང་སྦྱོང་ལ་ཤུགས་སྣོན་རྒྱག་པ། མང་ཚོགས་ཀྱིས་དོ་ཁུར་བྱེད་པའི་གནད་དོན་ཐག་གཅོད་ཧུར་ཐག་བཅས་བྱེད་དགོས།
རིམས་ནད་སྔོན་འགོག་དང་ཚོད་འཛིན་གྱི་འཐབ་ཕྱོགས་དང་པོའི་ལས་དོན་མི་སྣར་ཆབ་སྲིད་ཐད་སེམས་ཁུར་དང་འཚོ་བའི་ཐད་བྱམས་སྐྱོང་བྱས་ནས་ཁོང་ཚོས་སེམས་ནུས་དེ་བས་མང་བ་ལས་ཀར་འཇོག་ཐུབ་པའི་འགན་ལེན་བྱེད་དགོས་པའི་ནན་བཤད་གནང་བ་རེད།
ལྗོངས་འཕྲོད་བསྟེན་བདེ་ཐང་ཨུ་ལྷན་གྱི་ལས་དོན་སྙན་སེང་གསན་རྗེས། ཡན་ཅིན་ཧའེ་ཡིས། འཚོ་གནས་ཀྱི་དབང་ཆ་དང་འཕེལ་རྒྱས་ཀྱི་དབང་ཆ་ནི་གཞི་རྩའི་འགྲོ་བ་མིའི་ཐོབ་ཐང་གཙོ་བོ་དེ་རེད། བོད་ཀྱི་འཕྲོད་བསྟེན་བདེ་ཐང་བྱ་གཞག་འཕེལ་རྒྱས་གཏོང་བ་ནི་ཀྲུང་གོ་གུང་ཁྲན་ཏང་གིས་བོད་ལ་འགྲོ་བ་མིའི་ཐོབ་ཐང་བརྩོན་ལེན་དང་། འགྲོ་བ་མིའི་ཐོབ་ཐང་ལ་བརྩི་འཇོག འགྲོ་བ་མིའི་ཐོབ་ཐང་འགན་ལེན། འགྲོ་བ་མིའི་ཐོབ་ཐང་མངོན་འགྱུར་བཅས་བྱེད་པའི་གསོན་ཉམས་དོད་པའི་མཚོན་ཚུལ་ཞིག་རེད། མིག་སྔའི་འཕྲོད་བསྟེན་བདེ་ཐང་ལས་ཀའི་ལྟེ་བ་ནི“རིམས་ནད་འགོག་ཐུབ་པ”བྱས་ཏེ“དཔལ་འབྱོར་བརྟན་པོ་དང་འཕེལ་རྒྱས་བདེ་འཇགས་ཡོང་རྒྱུར”བློས་འགེལ་ཆོག་པའི་འགན་ལེན་བྱེད་པ་དང་། “སྔོན་འགོག”དང“གྲ་སྒྲིག”ལ་ཤུགས་སྣོན་རྒྱག་པ། ཚང་བཤེར་ཆད་གསབ་ལ་དེ་བས་ཤུགས་སྣོན་རྒྱག་པ་བཅས་བྱས་ནས་ལས་དོན་དོ་དོ་ནན་ནན་དང་། ཏན་ཏན་ཏིག་ཏིག ཞིབ་ཅིང་ཕྲ་བ་བཅས་བསྒྲུབ་རྒྱུ་དེ་རེད། སྨན་བཅོས་ལམ་ལུགས་སྒྱུར་བཅོས་དང་ལེགས་གཏོང་གི་ཞབས་འདེགས་ཞུ་བ་དང་། “སན་མིང”གི་སྨན་བཅོས་ལམ་ལུགས་སྒྱུར་བཅོས་ཀྱི་རྩ་ཆེའི་ཉམས་མྱོང་སློབ་སྦྱོང་བྱེད་པ། ཞབས་འདེགས་ཞུ་སྟངས་དག་བཅོས་བྱེད་པ། ཞབས་ཞུ་དང་སྐུལ་གཏོང་ཆེ་རུ་གཏོང་བ་བཅས་བྱས་ཏེ་འདུས་ཆེ་བའི་རྫོང་ཁོངས་ཀྱི་སྨན་བཅོས་གཅིག་མཐུན་འདུས་གྲུབ་ལ་སྤྱི་འབོར་གྲོན་འཇལ་བྱེད་པ་དང་། “ལྷག་འཕྲོར་ཉར་བ་དང་ལུགས་མཐུན་གྱི་ཚད་བརྒལ་འགན་བགོས་བྱེད་པའི”སྲིད་ཇུས་དོན་འཁྱོལ་བྱེད་པ། སྨན་བཅོས་ཞབས་ཞུའི་རིན་གོང་ལ་འགུལ་རྣམ་ལེགས་སྒྲིག་བྱེད་པའི་ལམ་སྲོལ་འཛུགས་པ་བཅས་བྱེད་དགོས། མང་ཚོགས་ཀྱི་བདེ་ཐང་འགན་ལེན་ལ་དམ་པོར་དམིགས་པ་དང་། ཕྱོགས་ཡོངས་དང་། མི་ཚོགས་ཡོངས། དུས་འཁོར་ཧྲིལ་པོ་བཅས་ལ་ཁྱབ་པའི་དམིགས་ཚད་ལ་དམ་པོར་དམིགས་པ། བདེ་ཐང་ལ་ཤུགས་རྐྱེན་ཐེབས་རྐྱེན་དང་གཙོ་གནད་མི་ཚོགས་ཀྱི་བདེ་ཐང་གནད་དོན་སོགས་ལ་དམིགས་པ་བཅས་བདེ་ཐང་བོད་ལྗོངས་ཀྱི་བྱ་སྤྱོད་ལ་སྐུལ་འདེད་གཏིང་ཟབ་གཏོང་བ་དང་བདེ་ཐང་གི་བྱ་བ་དངོས་ཁག་གཅིག་ཡག་པོ་སྒྲུབ་དགོས། “ཞིང་འབྲོག་མང་ཚོགས་ཀྱི་ཉམས་འགྱུར་གསར་པ་གཏོད་པའི”བྱ་སྤྱོད་ལ་དམིགས་ཏེ་དངོས་སྒྲུབ་གོ་ཆོད་ཀྱི་བྱ་ཐབས་སྤྱད་ནས་མང་ཚོགས་ལ་སྐྱོན་བྲལ་ཡ་རབས་ཀྱི་འཚོ་བའི་གོམས་གཤིས་འཇགས་པར་སློབ་གསོ་ཁྲིད་སྟོན་བྱེད་དགོས་པའི་ནན་བཤད་གནང་བ་རེད།
ཡན་ཅིན་ཧའེ་ཡིས་ད་དུང་བོད་ཞི་བས་བཅིངས་འགྲོལ་བཏང་ནས་ལོ་ངོ་70འཁོར་བའི་འཕྲོད་བསྟེན་བདེ་ཐང་གི་གྲུབ་འབྲས་འགྲེམས་སྟོན་ལ་གཟིགས་སྐོར་གནང་བ་རེད།