ཚེས་18ནས་20ཉིན་བར། ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་རང་སྐྱོང་ལྗོངས་ཀྱི་ཀྲུའུ་ཞི་ཡན་ཅིན་ཧའེ་གཞིས་རྩེ་གྲོང་ཁྱེར་གྱི་རྫོང་དང་ཆུས་8དུ་ཕེབས་ནས་འབྲུ་རིགས་བདེ་འཇགས་དང་། མཐའ་མཚམས་འགག་སྒོ་འཛུགས་སྐྲུན། རིམས་ནད་སྔོན་འགོག་དང་ཚོད་འཛིན། ཁྱད་ལྡན་ཐོན་ལས། སྐྱེ་ཁམས་འཛུགས་སྐྱོང་། གྲོང་གསེབ་དར་རྒྱས་སོགས་ལ་བརྟག་ཞིབ་གནང་བ་རེད།
ཡན་ཅིན་ཧའེ་ཡིས་འབྲུ་རིགས་བདེ་འཇགས་ལས་དོན་ལ་ཚད་མཐོའི་མཐོང་ཆེན་གནང་ཞིང་། བརྟག་ཞིབ་གནང་སྐབས། ཡན་ཅིན་ཧའེ་དུད་ཚང་དུ་ཐེངས་གསུམ་ཕེབས་ནས་མང་ཚོགས་ཀྱི་འདེབས་འཛུགས་ཕན་འབྲས་དང་ཁྱིམ་ཚང་གི་ཡོང་འབབ་སོགས་བཀའ་འདྲི་ཞིབ་ཕྲ་གནང་བ་དང་སྦྲགས། ལྷ་རྩེ་རྫོང་གི་བསམ་གྲུབ་གྲོང་ཚོའི་ཚད་གཞི་མཐོ་བའི་ཞིང་ཁ་འཛུགས་སྐྲུན་རྣམ་གྲངས་དང་། ལ་ལྷོ་ཆུ་བེད་ལྟེ་གནས་དང་། དེ་བཞིན་དེའི་ལེ་ལག་ཆ་སྒྲིག་གི་ཞིང་ཆུ་གཏོང་ཁུལ་ལས་གྲྭའི་གནས་ཚུལ་ལའང་ས་གནས་ས་ཐོག་ཏུ་གཟིགས་ཞིབ་གནང་ཞིང་། ཁོང་གིས་ནན་བཤད་གནང་དོན། ཐོན་འབབ་ནི་ཚད་གཞི་མཐོ་བའི་ཞིང་ཁ་འཛུགས་སྐྲུན་གྱི་དམིགས་ཚད་གཙོ་བོ་ཞིག་རེད། མཉམ་ལས་ཁང་གིས་ཀུན་གྱི་སྣེ་ཁྲིད་དེ་ཚན་རིག་དང་མཐུན་པར་ཞིང་ཁ་འདེབས་དགོས་པ་མ་ཟད། ད་དུང་མང་ཚོགས་ལ་བསམ་ཕྱོགས་རྙིང་པ་དང་བྱེད་ཐབས་རྙིང་པ་སྒྱུར་བའི་སྐུལ་ཁྲིད་བྱས་ནས་འབྲུ་རིགས་འདེབས་པའི་བརྩོན་སེམས་ཆེ་རུ་གཏོང་དགོས། ཞིང་ལས་འཕྲུལ་ཆས་ཅན་གྱི་ཆུ་ཚད་མཐོ་རུ་གཏོང་བ་དང་། ཞིང་ཁའི་ཆུ་བེད་ཀྱི་རྨང་གཞིའི་སྒྲིག་བཀོད་རྒྱུན་ཆད་མེད་པར་ལེགས་སུ་གཏོང་བ། ཞིང་ཁར་གཡོག་བྱེད་ལ་ཤུགས་སྣོན་རྒྱག་པ་བཅས་བྱས་ནས་འབྲུ་རིགས་ཐོན་འབབ་བརྟན་པོ་དང་། ཐོན་འབབ་འཕར་བ། ཐོན་འབབ་མཐོ་བ་བཅས་ཡོང་བའི་འགན་ལེན་བྱེད་དགོས། ལ་ལྷོ་ཆུ་བེད་ཀྱི་རྒྱུག་ཚད་དང་ཆུ་སྤུས་ཀྱི་རིགས་སྒྲུབ་ཁུངས་སྐྱེལ་ལ་ཤུགས་སྣོན་བརྒྱབ་ནས“སྒོ་ཁར”རྒྱུག་པའི་ཆུ་བོའི་ཐོན་ཁུངས་བེད་སྤྱོད་གང་ལེགས་བྱེད་དགོས། གཞིས་རྩེ་རྒྱལ་ཁབ་འབྲུ་རིགས་གསོག་འཇོག་མཛོད་དུ་ཕེབས་སྐབས་ཡན་ཅིན་ཧའེ་ཡིས་བསྟན་དོན། འབྲུ་རིགས་གསོག་འཇོག་ལས་དོན་ཐད་གཡོ་ཟོལ་སྤུ་ཙམ་ཡང་བྱེད་མི་ཉན། “བདག་གཉེར་བ”ཡག་པོ་ཞིག་བྱས་ཏེ་ལྟ་འདོམས་ལ་ཤུགས་སྣོན་བརྒྱབ་ནས་གྲབས་གསོག་འབྲུ་རིགས་ཀྱི་གྲངས་འབོར་དངོས་འབྲེལ་ཡིན་པ་དང་། སྤུས་ཚད་ལེགས་པ། གཏོང་འདྲེན་མགྱོགས་པ། སྤྱོད་ཐུབ་པ་བཅས་ཀྱི་འགན་ལེན་བྱེད་དགོས། དོན་དངོས་དང་ཟུང་འབྲེལ་གྱིས་ཚོད་ལྟ་ཡག་པོ་བྱས་ནས་གསོག་འཇོག་དུས་ཡུན་རིང་དུ་བཏང་སྟེ་མ་གནས་དམའ་རུ་གཏོང་དགོས།
ཡན་ཅིན་ཧའེ་འགྲམ་གྲོང་རྡལ་དུ་ཕེབས་ནས་མཐའ་མཚམས་དཔོན་དམག་དང་། མཐའ་སྲུང་བ། འགག་སྒོའི་འཐབ་ས་དང་པོའི་ལས་དོན་མི་སྣ། འགག་སྒོའི་སྨན་དོན་མི་སྣ་བཅས་ལ་བྱམས་བརྩེའི་ངང་གཟིགས་པ་དང་འབྲེལ་རིམས་ནད་སྔོན་འགོག་དང་ཚོད་འཛིན་དང་། ཟོག་འདྲེན་འགག་སྒྲོལ། མཐའ་མཚམས་དོ་དམ་ཚོད་འཛིན་སོགས་ཀྱི་ལས་དོན་ལ་བརྟག་ཞིབ་ཀྱང་གནང་ཞིང་། ཁོང་གིས་བསྟན་དོན། རིམས་ནད་སྔོན་འགོག་དང་ཚོད་འཛིན་གྱི་བྱེད་ཐབས་ཁག་དོན་འཁྱོལ་ཞིབ་ཅིང་ནན་པོ་བྱས་ནས་འགག་སྒོའི་རིམས་ནད་སྔོན་འགོག་དང་ཚོད་འཛིན་གྱི་བདེ་འཇགས་སྲུང་ཡོལ་ནུས་ཤུགས་ཡོད་རྒུས་བརྟན་པོ་འཛུགས་དགོས། འགག་སྒོའི་འཐབ་ས་དང་པོའི་ལས་རེས་ལ་སྔར་བཞིན་རྒྱབ་སྐྱོར་དང་སེམས་ཁུར་བྱེད་དགོས།
ལྷ་རྩེ་གྲོང་ཚོའི་བོད་གྲི་ཆེད་ལས་མཉམ་ལས་ཁང་དང་རིན་སྤུངས་རྫོང་གི་རྟ་ར་འོག་ནས་ཆང་ལས་རིགས་མ་རྐང་ཚད་ཡོད་ཀུང་སི་རུ། ཡན་ཅིན་ཧའེ་ཡིས་ཐོན་སྐྱེད་གཉེར་སྐྱོང་དང་དེ་བཞིན་མང་ཚོགས་ལ་འབབ་འཕར་སྐུལ་ཁྲིད་བྱས་པའི་གནས་ཚུལ་མཁྱེན་རྟོགས་ཞིབ་ཕྲ་གནང་ཞིང་། ཁོང་གིས་བསྟན་དོན། སྲོལ་རྒྱུན་གྱི་ལག་ཤེས་བཟོ་ལས་ལ“རིག་གནས་གསོན་པ”ཡོད་པས་མངོན་མིན་རིག་གནས་ཤུལ་བཞག་རྒྱུན་འཛིན་ཡག་པོ་དང་འཕེལ་རྒྱས་ཡག་པོ་བཏང་ནས་གྲོང་གསེབ་དར་རྒྱས་ལ་རམ་འདེགས་བྱེད་དགོས། དེང་རབས་བཟོ་རྩལ་ལ་བརྟེན་ནས་ཐོན་ལས་རིམ་པ་སྤོར་བར་སྐུལ་འདེད་བཏང་སྟེ། ཐོན་ལས་འཁོར་འབྲེལ་སྣུར་སྲིང་དང་ཟུར་སྣོན་རིན་ཐང་ཆེ་རུ་བཏང་ནས། ཁྱད་ལྡན་ཐོན་ལས་ཚད་གཞི་མཐོ་པོ་དང་། གཞི་ཁྱོན་ཆེན་པོ། སྤུས་རྟགས་ལྡན་པ་བཅས་ལ་སྐུལ་འདེད་གཏོང་དགོས།
“གཙང་པོ་གཉིས་དང་ཆུ་བོ་བཞིའི”ནགས་བཟོ་སྔོ་འགྱུར་ལས་གྲྭར་བརྟག་ཞིབ་གནང་སྐབས། ཡན་ཅིན་ཧའེ་ཡིས་བླང་བྱ་བཏོན་དོན། “ཁུལ་གསུམ་རྒྱུད་གསུམ”དབྱེ་འབྱེད་ལས་དོན་གོ་སྐབས་སུ་བྱས་ཏེ་ཕུགས་ལ་དམིགས་ནས་ཡུལ་བབ་དང་མཐུན་པར་གླ་ཚེར་དང་སྨན་རྩྭ་སོགས་དཔལ་འབྱོར་ནགས་ཚལ་བཏབ་ནས་སྐྱེ་ཁམས་དང་། དཔལ་འབྱོར། སྤྱི་ཚོགས་བཅས་ཀྱི་ཕན་འབྲས་གཅིག་གྱུར་དམ་ཟབ་ཡོང་བར་བྱེད་དགོས།
ཡན་ཅིན་ཧའེ་ཡིས་རྣམ་གླིང་རྫོང་གི་ར་ལག་གཡུང་དྲུང་གླིང་དུ་བརྟག་ཞིབ་གནང་སྐབས། སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མངགས་བཅོལ་ཟབ་མོ་བློ་ལ་བརྟན་པོར་བཅངས་ཏེ། ལྗོངས་ཏང་ཨུད་ཀྱི་བཀོད་སྒྲིག་ལྟར“རྒྱལ་ཁབ་ཀྱི་འདུ་ཤེས་དང་། སྤྱི་དམངས་ཀྱི་འདུ་ཤེས། ཁྲིམས་སྐྱོང་གི་འདུ་ཤེས”བཅས་ཀྱི་སློབ་གསོ་གཏིང་ཟབ་སྤེལ་ནས། ལྗོངས་ཡོངས་ཀྱི་ཆོས་ལུགས་ལས་རིགས་ལ་མིག་དཔེ་སྟོན་དགོས་པའི་བླང་བྱ་བཏོན་གནང་བ་རེད།